Cainöje Jë Nge Troa Pexej La Aqane Anyipicin
1 Qa ngöne laka Iesu la “mekene me atre mus,” hnei nyidrë hna hnëkën la itretre drei nyidrë kowe la huliwa ne cainöj ka tru hna troa sisedrën hnei angatr. (Is. 55:4; Luka 10:1-12; Ite Huliwa 1:8) Hna qejepengön hnei Peteru la huliwa hnei Iesu hna hamën koi angatr, kola hape: “Hnei nyidrëti hna ahnithe koi huni troa cainöj kowe la nöj, me anyipicin, laka nyidrëti la iana i Akötresie nyine ate hnyingëne la itre ka mele me itre ka mec.” (Itre Huliwa 10:42) Nemen la alien la hna hape, troa pexej ngöne la aqane troa anyipicin?
2 Maine tro së a goeën la tulu hna amë pe hnei Paulo aposetolo, eje hi lai laka, tro fe së a hane atre hnyawa la nyine tro sa kuca. Ame ngöne la nyidrë a ce icasikeu memine la itre qatr ne la ekalesia ne Efeso, hnei nyidrë hna amekunë angatr ka hape: “Thaa hnenge hna juetëne la kete ewekë ka nyipi, ngo hna amamane koi nyipunie me ini nyipunie qëmeke ne la nöj, me ngöne la kete uma me kete uma, kola anyipicine [hnyawa] koi angete Iuda, me angete Heleni fe, ka hape, troa ietra koi Akötresie, me lapaune koi Joxu shë Iesu Keriso.” Ngacama hnei Paulo hna qëmek kowe la itre jol, ngo hnei nyidrë hna catre tro fë pala hi la maca ka loi kowe la itre atr. Thaa hnei nyidrëti kö hna tro fë ju hi la itre trenge ewekë ka nyitrepen la nyipici kowe la itre ka drei nyidrë, ngo hna catre hane qaja fe la “nöjei hna mekuatin’ asë hnei Akötresie.” Hnei nyidrë hna nue la trengecatr, me mele i nyidrë matre troa eatrën la huliwa cili. Hnei nyidrëti fe hna qaja ka hape: “Tha ini kö a nyipi ewekëne la melenge mate nyipi koi ni, mate tro ni a umuthe la hna isasaqeng memine la qânge hnenge hna kapa qa thei Joxu Iesu, troa anyipicine [hnyawa] la maca ka loi ne la ihnimi gufa i Akötesie.”—Ite Huliwa 20:20, 21, 24, 27.
3 Tune kaa la aqane tro sa xom la tulu i Paulo enehila? (1 Kor. 11:1) Loi e tro sa cainöj kowe asë hi la itre atren la hnepe lapa ngacama easë a qëmeke kowe la itre itupath, me hane thel troa tro fë la maca ka loi kowe la itre atr ka isa hane ngönetrei kö me qene hlapa me easë, nge troa catre iwai hmaca. (Mat. 10:12, 13) Tro sa eatrëne lai, e hne së hna ami traem, me nue la trengecatre së thatraqane la huliwa cili, me hane amaman la ihnimi së kowe la itre atr.
4 Ijije Kö Tro Sa Hane Pionie Ka Ixatua? Hetre ijin ka ijij troa hane pexej la aqane troa anyipicin, ene la troa hane pionie ka ixatua e Maac me Eiperem. Drei la madrin lo macatre hnapan, ngöne la kola pane catr hnene la itre trejin ka nyimutre troa pionie ka ixatua!
5 Drei la ewekë ka traqa kowe la ketre trejine föe ka 80 lao macatre i nyiidro nge nyimu sine mec; hna ketri eahlo hnene la itre ithuecatr hna hamën hnene la organizasio i Iehova. Hnei eahlo hna cinyihan ka hape: “Kola ahlën hmaca la aja ka meköle hë e kuhu hning, nge kola upi ni troa hane xome fe la huliwa ne pionie ka ixatua.” Hnei eahlo hna mekune ju troa pionie ka ixatua e treu Maac. Öni eahlo ka hape: “Ame la hnenge hna pane kuca, tre, ene la troa pane lapa me e la thupene lai. Hneng hna ce ithanatan memin la neköng jajiny la ajang, qa ngöne laka, eni a ajan tro fe angeic a hane xatua ni. Eni a sesëkötr la angeic a hane qaja ka hape, angeice fe a troa hane pionie ka ixatua.” Ame ngöne la treu, hnene lai trejin qatre föe hna kuca la 52 lao hawa ngöne la hna cainöje trootro. Öni eahlo fe ka hape: “Nyimu ijin ne thithi ni koi Iehova matre troa ahnyipixene hmaca la trengecatreng ngöne la eni a dreng laka eni a kucakuca. Ame hë ngöne la pun la treu, atraqatr la madrineng, nge nyimutre la itre ijin eni a olen koi Iehova la hnei Nyidrëti hna xatua ni. Eni hmaca a ajan troa tupath troa hane pionie ka ixatua.” Ketre ixatua ka tru la ewekë hnei eahlo hna melën, ngöne laka, kola xatuan la itre xan ka hetre hni ne ajan troa hane pionie ka ixatua, ngacama tru la itre ejolen la egöcatre ne la mel.
6 Hnene la ketre trejin hna lisasie qa ngöne la hna huliwa i maseta, hna hane xom la huliwa ne pionie ka ixatua. Ame ngöne lai treu ne angeic a pionie, tre, hnei angeic hna catre cainöj matre ame hë ngöne la pun la treu, hnei angeic hna etid memin la ketre atr. Angeic a mekune hnyawa la ewekë hnei angeic hna kuca, me qaja ka hape: “Drei la ketre treu ka lolo!” Kola elitrauj la madrine i angeic, ngöne laka, hnei Iehova hna eatrongën me xatua angeic! Eje hi lai laka, hnei Iehova hna neng la itre manathith koi angeic, qa ngöne laka, hnei angeic hna catr cainöj, nge tro fe Iehova a hane amanathithi së e hne së hna hane kuca tune lai.—Mal. 3:10.
7 Ame kowe la itretre cainöj ka nyimutre, thaa ka hmaloi kö la troa pionie ka ixatua. Ngo ngacama kola huliwa i maseta maine tru pena la itre hnëqa i angatr e hnine la fami, nyimutre mina fe la ite trejin trahmanyi me föe ka hane xome hë la huliwa cili. E maine easë a ajan troa pexej la aqane tro sa anyipicin, nyipi ewekë tro sa pane xom la itre xaa traeme së, me nue la trengecatre së, ngo eje hi lai laka, thatreine kö tro sa qaja elany la etrun la itre manathith hne së hna troa kapa.—Ite edomë 10:22.
8 Lue treu ka ijij troa pionie ka ixatua, la treu Maac me Eiperem. Faifi lao mecixen me sabath ngöne la treu Maac. Maine tro sa cainöj ngöne la itre mecixen me sabathi cili memine fe la itre hej, eje hi lai laka, atreine hi tro sa eatrën la huliwa ne pionie ka ixatua. Ketre, atreine mina fe tro sa cainöj ngöne lo itre ijine pë huliwa ngöne la treu Eiperem. Ame itre xan, tre, maine jë pëkö ini maine huliwa pena, matre angatr a hane xome fe la itre ijine cili matre troa kuca lo lai 50 lao hawa hna amekötin. Hanawange cahu ketre tulu ne porogaram hna ce hamën memine la hna cinyihane celë; itre aqane troa eköth la huliwa, ijije kö troa xom la ketre e itre ej matre troa xatua së troa hane pionie ka ixatua, ene la troa kuca la 50 lao hawa ne cainöj ngöne la treu Maac maine Eiperem? Ce ithanatane jë la porogarame i epun memine la itre atren la hnepe lapa, memine la itre xaa ka cainöj; ame itre xan, tre angatr a hane pionie ka ixatua, hnene laka, hne së hna ce ithanatan me angatr lai porogaram. Maine thaa ijiji epuni kö troa hane pionie ka ixatua, ami trepene ju la itre nyine tro epuni a kuca ngöne la itre treu cili, nge ce huliwa jë memine la itre ka pionie. Nyiqaane mekune jë me ami trepen la aqane tro epuni a akökötren la huliwa ne cainöje i epun e Maac me Eiperem.
9 Ahmitrötrëne Jë La Drai Ne Amekunën: Ame ngöne la nöjei macatre hmekun lo Drai ne Amekunën, tre, kola upe la itre atr ka alanyim hnene la ole i angatr kowe la mele hna hujën hnei Iesu, troa ‘anyipiewekën la nöjei ijin’ matre troa pionie ka ixatua. (Efe. 5:15, 16) Ame ngöne lo macatre ka ase hë, hna e la 258 lao pionie ka ixatua e Kaledonia ngöne lo treu Maac, nge 119 lo Eiperem. Matre kösë isa 188 kowe la lue treu cili. Ka draië kö la etrun la itre pionie celë hune la 46 lao itre ka pionie ngöne la itre treu ne la macatre ka ase hë. Ame ngöne la hneijin ne la Drain Ne Amekunën ne la macatre celë, ketre ijin ka lolo catr tro sa hane amaman la etrun la ole së kowe la mele hna hujën hnei Keriso, ene la troa akökötren la aqane tro sa hane cainöje trootro.
10 Kola easenyi trootro la 16 Eiperem, nge loi e tro së a nyiqaane mekun la alien la Drai Ne Amekunën koi së. Mekune jë la itre ewekë ka traqa qëmeken me thupen la meci Iesu, memin la itre mekun hnei nyidrëti hna hnehengazon ka troa ej ngöne la he me e kuhu hni nyidrë. Mekune hnyawa jë fe la madrin hna amë qëmeke i nyidrë, memine la aqane xatua nyidrë hnene lai madrine cili troa xomihnin ahoean la iaxösisi. Goeëne jë fe la götraneqa hna cilën enehila hnei nyidrë, laka, he ne la ekalesia, nge kola thupën la huliwa ne cainöj me inin la itre atr. (1 Kor. 11:3; Heb. 12:2; Hna Ama. 14:14-16) Thupene lai, amamane jë la ole i nyipunie kowe la nöjei ewekë asë hnei Keriso hna kuca, hnene la troa pexej la aqane troa cainöj, thenge la ka ijij troa kuca hnei nyipunie.
11 Xatuane Jë La Itre Xan Troa Catr Cainöj: Maine tro la itre qatre thup me itre drikona a xom la huliwa ne pionie, aqane tro hi lai a ithuecatr elanyi kowe la itre xan troa hane pionie. Ame ngöne la angatr a ce cainöj memine la itre trejin me iwai troa ithuecatr, itre ijine ka lolo hi lai ka ijij troa xatuan la itre xan troa pexej la aqane troa cainöj ngöne la huliwa ka ketre pengöne cili. Epi tro asë hi së a thithi thatraqane la huliwa celë ka ketre pengön, haawe, tro ha nyixan la trengecatr hne së hna xom matre troa pexej la aqane tro sa anyipicin.
12 Maine nyipici laka, kola troa ce huliwa hnene la itre qatre thup memine la itre drikona matre troa tro thenge hnyawa la itre hna amekötin hnine la ekalesia, göi aqane troa akökötren la cainöj e Maac me Eiperem, ame koi atre thupën la huliwa ne cainöj, loi e tro angeic a hnëkë hnyawa matre troa elemeken hnyawa la huliwa ne cainöj. Loi e troa hnëkën hnei angeic la itre hnë troa icasikeu göi troa cainöje trootro, me traem ka loi kowe la itre trejin asë, nge troa ithuemacanyin lapaan ngöne la itre ijine Icasikeu Ne La Huliwa Ne Cainöj. Maine jë troa hnëkën matre troa cainöj ngöne la itre hawa ka isa pengön ne la drai, me aijijën la itre trejin asë ne la ekalesia troa xom la nöjei aqane troa cainöj. Kolo lai a qaja la itre hna salem, me cainöj e cahu gojeny, me ngöne itre hnalapa trootro, me iwai hmaca, me cainöj jëne telefon. Ketre, loi e tro fe angeic a hnëkën la etrun la itre itus, me itre zonal, memine fe la itre teritoar hna troa kuca ngöne lo lai itre treu Maac me Eiperem.
13 Ame la itus nyine troa tro fë e Maac, tre, Atrehmekune, nge troa thele etid. Eje hnine la sinecetron la Huliwa Ne Baselaia ne Januare 2002 la itre mekun ka lolo nyine ixatua matre troa tro fë la itus Atrehmekune. Ame e Eiperem, tre, zonal, La Tour de Garde me Réveillez-vous ! la lue hna troa tro fë. Tupathe jë troa xom la itre aqane nyiqaane ithanata fene la hna cinyihan hna hape, “Troa Qeje Nemen Gön La Itre Zonal.” Loi e tro asë hi së a xomi ijin troa hnëkë hnyawa matre troa pexej la aqane tro sa anyipicin.
14 Drei la madrine së troa huliwa fene la musi ne la hene la ekalesia, ene Iesu Keriso, nge ketre hnëqa ka lolo mina fe la troa hane tro fë la maca ka loi kowe la itre xaa atr! Kola easenyi trootro la treu Maac me Eiperem, nge loi e tro sa thele troa itre treu ka sisitria la lue treu cili, nge easë pala hi a drengethenge la hna upi së troa kuca hnei Keriso, ene la troa cainöj nge troa pexej la aqane anyipicin.
[Hna eköhagen götran 5]
Itre Aqane Troa Pionie e Maac Me Eiperem 2003
(Wange ju la itus)