Eköthe Amë Jë La Itre Nyine Kuca Ka Lolo Thatraqane La Macatre Ne Huliwa Ka Hnyipixe
1. Nemene la ewekë nyine tro sa eköthe amë thatraqane la macatre ne huliwa ka hnyipixe?
1 Nyipi ewekë tro sa eköthe amë la itre nyine tro sa kuca, e ajane së troa kökötre ngöne la ua. Nemene la itre hnei epuni hna ketre eköthe amë hë thatraqane la macatre ne huliwa ka hnyipixe? Ame la ketre ewekë ka lolo nyine eköthe amë, tre, ene la troa xome la huliwa ne pionie ka ixatua ngöne la caas maine nyimu treu ne la macatre. Ketre huliwa lai ka thue madrine së, ngo nyipi ewekë tro sa canga ami trepene la itre nyine tro sa kuca, nge enehila hi la ijine ka ijije troa nyiqaane eköthe amë. Hapeue matre troa mekune troa pionie ka ixatua me thele troa eatrëne lai?
2. Pine nemene matre loi e troa mekune troa pionie ka ixatua me thele troa eatrëne lai?
2 Itre Kepine Matre Troa Pionie Ka Ixatua: Kola aijijë së hnene la huliwa ne pionie ka ixatua troa amadrinëne la Tretretro së e hnengödrai, nge tro sa “amamane pala hi” ngöne la aqane akökötrene së la huliwa ne cainöje së. (1 Thes. 4:1) Ame ngöne la easa mekune la nöjei ewekë hnei Iehova hna kuca koi së, canga ketre ju hi la itre hni së me upi së troa qeje Nyidrë kowe la itre xaa atr. (Sal. 34:1, 2) Öhne hi Iehova la trenge catre hne së isa ala caas hna kuca matre troa catre cainöje trootro, nge Nyidrëti mina fe a wangatrune lai. (Heb. 6:10) Atraqatre la madrine së, ke, atre hi së laka, easa amadrinë Iehova hnene la aqane catre huliwa së.—1 A. l. ite jo. 29:9.
3, 4. Nemene la thangane ka loi hne së hna troa kapa qa ngöne la hna pionie ka ixatua?
3 Eje hi laka, maine troa tru catre pala hi la itre ewekë hne së hna kuca, thaa tro ha jole koi së troa eatrëne ej, nge tro fe ha atraqatre la madrine hne së hna kapa qa ngön. Maine tro sa catre cainöje trootro, tro ha hmaloi koi së troa ithanata ngöne la easa cainöje ngöne la itre hnalapa trootro. Tro hë sa atrein nyiqaane porotrike memine la itre atr me tro fë la Tusi Hmitrötr. Maine tro sa catre troa ithanatane pala hi la mejiune së koi Akötresie, ketre tro fe ha hane catre la lapaune së. Ala nyimu la itre trejine ka pëkö etid hna xomiujin ekö, ngo ame la angatre a hane xome la huliwa ne pionie ka ixatua, hetre etidi angatre fe hë.
4 Ketre, ijije tro la huliwa ne pionie ka ixatua a hmekë së wanga tro sa kuca la huliwa ne cainöj ceitune me ketre huliwa hna majemine kuca laka, thaa qa kuhu hmaca kö hni së ngo kolo pë hë a kuca xanën. Hnene la ketre pionie lapaa ekö hna mekune laka, tru menu pala ha la hnei angeice hna nyipiewekëne la huliwa i maseta, ene pe angeice a axeciëne ju troa pionie ka ixatua ngöne la caa treu. Öni angeice ka hape: “Thatreine kö ni troa qaja la treu celë, ketre treu ka aegöcatrenyi ni ngöne la götrane la ua! Hnenge hna axeciëne troa xome lapaane la huliwa ne pionie ka ixatua, uti hë la eni a hane pionie lapaa.”
5. Nemene la aqane tro sa cile kowe la itre mekune ka iajolë, tune la troa xouene la itre hnëqa, ke easa mekune ka hape thaa ijiji së kö?
5 Troa Cile Kowe La Itre Jol: Kola luelue hnei itre xan troa pionie ka ixatua, ke, angatr a mekune laka thaa maca hnyawa pala kö angatre troa cainöj. Maine celë hi ewekë lai ka sewe epuni troa hane xome ej, tre, atreine hi Iehova troa xatua epuni tune la hnei Nyidrë hna xatua Ieremia. (Iere. 1:6-10) Ngacama “sinesine la [qe i Mose], nge sinesine la sesepeneqe [i angeic],” hnei Iehova hna aijijë angeice troa kuca la aja i Nyidrë. (Eso. 4:10-12) Maine epuni a xouen, ke ma thaa ijiji epuni kö troa eatrëne la ketre huliwa, sipo Iehova jë la trenge catr.
6. Ngacama hetre sine mec, maine tru la huliwa i itre xane pena, ngo nemene la hnei angatre hna kuca matre hane jë fe angatre hane pionie ka ixatua?
6 Hapeu, epuni kö a luelue troa pionie ka ixatua, ke, hetre sine meci epun, maine tru catre pena ha la huliwa i epun? Maine sine atr epun, cainöje jë thenge la hnei epuni hna atrein, maine jë tro ha aijijë epuni troa hane pionie ka ixatua. Maine tru la huliwa i epun, ijije hi tro epuni a pane uthe la itre huliwa ka thaa nyipi ewekë kö kowe la ketre treu. Ame itre xan ka huliwa i maseta ngöne la drai ka pexej, tre, hnei angatre hna xome la caas maine lue drai ne mano matre troa pionie ka ixatua.—Kol. 4:5.
7. Pine nemene matre hetre eloine la troa thithi fë la aja i epuni troa xome la huliwa ne pionie ka ixatua?
7 Tune Kaa La Aqane Eatrëne lai: Loi e troa thithi fë la aja i epun. Sipo Iehova jë troa amanathithine la trenge catre hnei epuni hna kuca matre troa akökötrene la huliwa ne cainöje i epun. (Rom. 12:11, 12) Tro Nyidrëti a xatua epuni troa inamacane la itre mekune hnei epuni hna axeciëne ngöne la epuni a saze la porogarame i epun. (Iako. 1:5) Maine pëkö aja thei epun, sipo Iehova jë troa xatua epuni troa hetrenyi la madrine ngöne la epuni a cainöje trootro.—Luka 10:1, 17.
8. Maine tro sa trongëne la Ite Edomë 15:22, tune kaa la aqane troa aijijë epuni hnene la mekune cili troa hane pionie ka ixatua?
8 Ce ithanatane jë memine la fami epun, ene la troa hane pionie ka ixatua. (Ite edomë 15:22) Maine jë, tro la ketre atrene la fami a xome la huliwa ne pionie ka ixatua, nge tro pë hë a sajuë angeice hnene la itre xaa atrene ej. Ce ithanatane jë la aja i epun troa hane pionie memine la itre xaa trejine ngöne la ekalesia, maine jë caasi hi la aqane mele i epun me angatr. Tro lai a akökötrene la aja, me madrine troa hane pionie ka ixatua.
9. Nemene treu ka ijije tro epuni a iëne troa hane pionie?
9 Ame ngöne la epuni a goeëne la porogarame i epun göi cainöj thatraqane la macatre ne huliwa ka hnyipixe, eue la ijine ka ijije hnei epuni hna mekune troa hane xome la huliwa ne pionie ka ixatua? Maine epuni a huliwa i maseta ngöne la drai ka pexej, maine epuni a ini pena, ijije tro epuni a goeëne la itre treu ka hetre drai ne mano, tune la itre feete i fen, maine wange pena la itre treu ka faifi lao mecixeni me sabath. Hanawange la ketre ceitun, ame la itre treu Semitrepa, Diseba, Maac, me Ogas, tre, itre treu lai ka faifi lao mecixeni me sabath. Faifi lao mecixeni e treu Mei, nge faifi lao sabath e treu Juun. Maine itre trene sine mec epun, wange ju la itre treu, laka lolo la drai. Maine epuni fe a ajane troa hane pionie ngöne la treu ne iwai hnene la atre thupëne la sirkoskripsio ngöne la ekalesia i epun. Ame ngöne la ijine iwai nyidrë, ijiji epuni fe troa hane sine la icasikeu hna hnëkëne thatraqane la itre pionie lapaa, ngo hna nue hi koi epuni lo itre pane menetre, 30 la etrun. Pine laka, kola troa atrune la Drai Ne Amekunën e drai 22 Maac ne la macatre ka troa xulu, haawe ijije hi troa hane pionie ngöne la itre treu Maac, Eiperem, me Mei. Ame hë la epuni a ase axeciëne la treu maine itre treu pena hnei epuni hna ajane troa xome göi troa hane pionie ka ixatua, haawe, fejane jë la ketre porogarame ka troa aijijë epuni troa eatrëne la itre hawa hna athipe koi epun.
10. Nemene la nyine tro epuni a kuca maine thaa ijiji së kö troa hane pionie ka ixatua?
10 Maine epuni a mekune laka, thaa ijiji epuni kö troa hane pionie ka ixatua ngöne la macatre ne huliwa ka troa xulu, loi pe tro epuni catre cainöje lapaa. Catre jë troa kuca asë la hnei epuni hna atreine ngöne la huliwa ne cainöj, nge loi e troa xecie hnyawa koi epuni laka Iehova a madrine la trenge catre hnei epuni hna kuca, hnene la u ka pexej, thatraqane la huliwa i Nyidrë. (Gal. 6:4) Catre jë ixatua, me sajuëne la itre ka xome la huliwa ne pionie ka ixatua. Maine jë, ijije tro epuni a saze la porogarame i epun, ene la troa xome la ketre drai ne la wiik matre troa ce cainöje memine la itre pionie.
11. Pine nemene matre loi e troa eje the së la mekune laka, easenyi catre hë la pun?
11 Eje thene la nöje i Iehova la mekune laka, easenyi catre hë la pun. Hetrenyi la ketre huliwa nyine troa kuca, ene la troa cainöjëne la maca ka loi. Kola të drea la mele ne la nöjei atr, nge hna e pe hi la itre drai ne la fene celë. (1 Kor. 7:29-31) Tro la ihnimi së koi Akötresie me kowe la itre atr a upi së troa kuca asë la hne së hna atrein ngöne la huliwa ne cainöj. Maine tro sa catr, me eköthe hnyawa la ketre porogaram, ijije hi tro sa hane pionie ka ixatua ngöne la caa treu ne la macatre ne huliwa ka hnyipixe, celë hi ketre mekune lai nyine troa eatrën!