Amamane Jë La Nöjei Thiina Ka Loi i Iehova
1. Nemene la ka upi së troa amamane la itre thiina ka loi i Iehova?
1 “Iehova fe, enëtilai la ka sisitia, me ka men, me ka lolo, me cat, me nyine atrun; ke nöjei ewekë i cilieti la nöjei ewekë asë e koho hnengödrai me e celë fen.” (1 A. l. ite jo. 29:11) Tune kaa la aqane troa ketri së hnene la ihnimi së me hni ne ole së koi Iehova? Ej a upi së troa ‘amamane la nöjei thiina ka loi nyidë ate hë së qa ngöne la jidi kowe la lai nyidë nyine hain.’ (1 Pet. 2:9) Thaa tro pi kö sa cile troa qaja la pengöne la Akötresi së kapucatin asë kowe la itre xaa atr! Troa hetre ijine ka lolo catre koi së la troa qaja la itre thiina i Akötresie, ngöne la itre treu Maac me Eiperem, me Mei.
2. Nemene la ketre huliwa ka ketrepengöne hna hnëkën matre troa ithuemacanyine göi Drai Ne Amekunën, nge drei la ka troa xome la huliwa cili?
2 Ketre Huliwa Nyine Troa Ithuemacanyine La Drai Ne Amekunën: Ame e thupene hmi drai 2 Eiperem, easë a troa amamane hnyawa la itre thiina i Iehova hnene la hna atrune la Pui Ne Xeni Ne La Joxu. Hetrenyi la ihë ka ketrepengöne kö hna troa kuca kowe lai ketre ijine ka sisitria cili; troa thawa la itre pepa ne ihë ngöne la fene hnengödrai qaane e 17 Maac uti hë e 2 Eiperem. Loi e troa ithuecatre kowe la itre trejin asë troa xome la huliwa cili. Celë hi ketre ijine ka lolo catre lai kowe la itre ka xötrei atre la nyipici troa hane nyiqaane tro fë la maca ka loi, e maine ijiji angatre fe hë. Maine hetre atr hnei epuni hna ini tusi memin maine itre nekönatre pena ka ijije hë troa hane cainöj, haawe, ce ithanatane jë memine la itre qatre thup.
3. Nemene la nyine tro sa qaja kowe la itre atr hne së hna troa könëne kowe la Drai Ne Amekunën?
3 Celë hi ketre huliwa lai ka ceitun memine lo hne së hna kuca ha thatraqane lo itre Kovasio Ne Distrik hna hape: “Calemi Catre Hë La Iamele!” Troa iupi fë kowe la itre ekalesia la itre pepa ne ihë, nge loi e troa isa hamën la 30 kowe la itretre cainöj nge isa 80 kowe la itre pionie. Thaa tro kö a qea menu la aqane nyiqaane ithanata, maine jë troa qaja ka hape: “Hane la ketre pepa nyine troa könë nyipunie kowe la ketre ijine ka nyipi ewekë ngöne la macatre, laka calemi catre hë. Eahuni a troa kepe nyipunie. Hane cahu itre ithuemacanyi hnine la pepa ne ihë.” Eje hi laka, maine hetre hnyinge ne la atr, thele jë troa sa koi angeic. Hetrenyi fe la itre mekun nyine ixatua ka qejepengöne la Jidri Ne Pui Ne Xeni Ne La Joxu; itre ej ngöne la pune la itus Ini Tusi Hmitrötr, götrane 206. Ame ngöne la itre mecixeni me sabath, tro sa tro fë la itre zonal hna xötrei kapa cememine la itre pepa ne ihë. Xome hnyawa ju la ëjene la itre atr ka hetre hni ne ajan, nge isa pui ju matre troa wai angatre hmaca.
4. Troa hamëne tune kaa la itre pepa ne ihë göi Drai Ne Amekunën?
4 Loi e troa isa hamëne hnyawa la pepa ne ihë kowe la itre atr, angatr isa ala caas. Qa ngöne lai, xome hnyawa ju la itre hnalapa ka pë atren, nge tupathe jë troa bëeke hmaca troa wange itre ej ngöne la ketre ijin. Ame kowe la itre ekalesia ka trene pepa ne ihë petre kö, tre, maine jë tro angatr a amë pe ngöne la itre hlapa ka pë atren ngöne la wiik ka lapa qëmekene la Drai Ne Amekunën, ngo thaa e thupene kö. Loi e troa xecie hnyawa koi së laka, ase hë hane kapa la itre pepa hnene la itre atr hne së hna wange lapaan, me itre ka etid, me itre sinee së, me itre sine huliwa së, me itretre lapa easenyi së, me itre xaa hne së ju kö hna atre.
5. Pine nemen matre loi e tro sa nyiqaane enehila troa hnëkë matre troa hane xome la huliwa ne pionie ka ixatua?
5 Pionie Ka Ixatua: Tro kö epuni a hane catre qaja la itre thiina ka sisitria i Iehova, hnene la troa pionie ka ixatua ngöne la itre treu Maac, me Eiperem, me Mei? Maine easa ajan troa kuca tune lai, nyipi ewekë troa saze la itre xaa ewekë ngöne la porogarame së ngöne la drai. (Efe. 5:15-17) Eje hi lai laka, maine tro sa catre xome la huliwa i Akötresie, tro ha hetrenyi the së la madrin memine la manathithi qaathei Iehova. (Ite edomë 10:22) Pine laka easenyi hë la hneijin ne la Drai Ne Amekunën, nyipi ewekë troa canga hnëkë enehila.—Ite edomë 21:5.
6. Nemene la ini hne së hna kapa qa ngöne la ewekë hna melën hnene la ketre trejine föe ka 90 lao macatre, ka xome la huliwa ne pionie ka ixatua ngöne lo macatre hnapan?
6 Hnene la ketre trejine föe ka 90 lao macatre hna hane pionie ka ixatua ngöne lo macatre hnapan. Öni eahlo ka hape: “Ngacama ka madrine ni troa kuci gatran me troa tra feja, ngo hnenge hna wanga atrehmekune hnyawa laka, nyipi ewekë tro ni a amë panën la itre ewekë ka tru alien. Atraqatr la ajange troa amë panën la itre aja ne la Baselaia, ene pe eni a mekune ju troa pionie ka ixatua e treu Maac.” Hapeu, hetre thangane ka loi kö hnei eahlo hna kapa qa ngöne la hna pane hane catre huliwa? Öni eahlo ka hape, “Eni a fedre catre kowe la ekalesia, nge kola aeasenyi ni catr koi Iehova.” Ijije kö tro sa pane hane waipengöne la itre ewekë hne së hna amë panën memine la itre nyine troa saze ngöne la aqane mele së?
7. Hapeu, ka jole kö troa xome la huliwa ne pionie ka ixatua?
7 Maine jë easa mekune menune ka hape, ka jole e troa eatrën la 50 lao hawa hna amekötine kowe la ka pionie ka ixatua. Haawe, thithi fë jë la itre nyine troa wanga atrune ngöne la itre drai, kuca jë la ketre porogaram, nge thupene lai, cinyihane ju la itre nyine tro sa kuca ngöne la götrane la ua hnine la idrai së. Isa atre hnyawa kö së la itre hne së hna melën me itre jol ka eje the së. Maine ka nango wezipo epun maine kucakuca pena ha, maine jë tro hi a hane xome la lue hawa ne cainöj ngöne la nöjei drai. Maine epuni a huliwa i maseta ngöne la drai ka pexej, maine tro pena troa ini, maine jë ijije hi tro epuni a hane pionie ka ixatua hnene la hna cainöj e heji maine itre mecixeni me sabath.
8. Nemene la ka aijijën la ketre trefën troa pionie ka ixatua?
8 Nyimutre la itre ka ce xome la huliwa ne pionie e hnine la fami. Ame ngöne lo itre macatre ka ase hë, hnene lue trefën hna lapaa luelue troa hane xome la huliwa ne pionie ka ixatua, ke kola mekune ka hape thaa ijije kö hnene la aqane mele i nyidro. Nemene la hnei nyidroti hna kuca? “Hnei nyiho hna thithi koi Iehova troa xatua nyiho troa hane kuca la huliwa hnei nyiho hna ajane pala hi troa ce kuca.” Hnei nyidroti hna eköth la ketre porogaram ka aijijë nyidro troa eatrëne lai aja ka eje thei nyidro. Öni nyidroti fe ka hape: “Ka lolo catr. Hnei nyiho hna ce kapa madrine la itre manathith. Caasi hi, tupathe jë. Maine ewekë lai hna kuca hnei nyiho, haawe, maine jë atreine fe tro epuni a hane kuca.”
9. Nemene la ewekë ka ijije troa kuca ngöne la kola ini Tusi Hmitrötr ne la fami, göi troa hnëkëne la itre treu ka troa xulu ka ketrepengön?
9 Ijije hi tro sa ami traeme ngöne la ijine kola troa ini Tusi Hmitrötr hnene la fami, matre troa ce wange la aqane tro la itre atrene asë la hnepe lapa a isa akökötrene la huliwa ne cainöje i angatr ngöne la itre treu ka troa xulu. Ngacama thaa ijije asë kö la itre atrene la fami troa pionie ka ixatua, maine jë troa xome hnene la ala caas, nge ame pë hë la munën, tre, angatr a ixatua me ce huliwa me angeic. Maine thaa ijije pena kö kowe la fami troa hane xome la huliwa ne pionie ka ixatua, maine jë tro angatr a thele troa akökötrene la traeme i angatr ngöne la hna cainöj ngöne lai itre treu ka ketrepengöne cili.
10. Pine nemen matre loi e tro sa ce ithanatane memine la itre xan la aja së troa pionie ka ixatua ngöne la hneijin ne Drai Ne Amekunën?
10 Ixatuanekeune Jë: Ka ixötrekeu la madrin. Ithanatane jë la aja së troa hane pionie ka ixatua. Maine jë troa hane xatuane la itre xan troa hane pionie. Ketre, maine jë tro lo itre trejine ka pionie hë ekö, a hamëne la itre mekune ka troa xatua së troa eköthe la itre jole së me kuca la porogarame së matre troa eatrëne la aja së. (Ite edomë 15:22) Maine ijiji së hi troa hane pionie ka ixatua, haawe, hapeu matre hëne la ketre trejin, maine jë ka caasi hi la aqane mele së me angeic, matre troa hane xome la huliwa ka lolo cili?
11. Tro la itre qatre thup a ithuemadrine tune kaa matre troa hane pionie ka ixatua hnene la itre xan ngöne la itre treu ka troa xulu?
11 Nyimutre la itre qatre thup ka saze la itre ewekë ngöne la mele i angatr, matre troa hane lö hnine la huliwa ka ketrepengöne cili. (Heb. 13:7) Celë hi ketre ithuecatre ka tru lai kowe la ekalesia! Kolo mina fe a ithuemadrinen la itre xan ngöne la kola porotrikëne lai hnene la itre qatre thup. Ame la hna ajan hnene la itre xaa trejin matre troa hane xome la huliwa ne pionie ka ixatua, tre, ene la itre hnepe trenge ewekë hi nyine ithuecatr maine itre mekune pena nyine ixatua. Loi e tro la atre thupëne la huliwa ne cainöj a nyi xane la itre icasikeu göi cainöje trootro, matre tro asë hi la itre trejin a ce cainöj memine la gurup, maine thupene la hna huliwa maine hna ini pena. Loi e troa amexeje pala hi la itre ithuemacanyi cili. Loi e tro fe a xecie hnyawa koi angeic laka, ijije hi göi teritoar me itus nyine troa tro fë.
12. Nemene la nyine tro sa hane kuca maine thaa ijiji së kö troa hane pionie ka ixatua?
12 Maine thaa ijije kö tro epuni a hane xome la huliwa ne pionie ka ixatua, ijije hi tro epuni a hane xatuane la itre ka pionie me hane thithi sai angatr. (Ite edomë 25:11; Kol. 4:12) Maine jë ijije hi tro epuni a saze la itre xaa ewekë ngöne la mele i epun, matre troa ce cainöj me angatr ngöne la ketre drai ne la wiik, maine troa cainöj aqeanyi pena me angatr.
13. Nemene la hne së hna troa eatrën e Kaledonia, me Tas me Walis me Futuna, nge troa eatrëne tune kaa lai hnene la ekalesia së?
13 300 Lao Pionie Ka Ixatua Ngöne La Treu Eiperem: Ame la etrune la itre pionie ka ixatua e Kaledonia, tre, 323 ngöne lo treu eiperem 2000, celë hi etrune lai thaa hna waja kö; ketre tune e Tas, laka 59 ngöne lo treu Maac 1997, nge Walis, tre, 17 ngöne lo treu Maac 2003. Qa ngöne lai, ame ngöne la treu Eiperem ka troa xulu, maine jë ijije hi tro sa eatrën la 370 lao pionie ka ixatua ngöne la köni nöj ne la filiale së: 300 e Kaledonia, 60 e Tas nge 10 e Walis. Ijije hi tro sa eatrëne lai, e 1 koi 6 lao trejine ngöne la nöjei ekalesia ka pionie ka ixatua. Nyipici laka, ame la itre xaa ekalesia, tre, tro angatr a nango tru la itre ka troa xome la huliwa ne pionie ka ixatua, pine laka, ijije hi koi angatr. Ame la ewekë hna ajan troa eatrën hnene la ketre ekalesia, tre, thaa jole kö troa eatrën hnene la itre ekalesia ka ala nyim. Drei kö la madrine elanyi e hnine la itre ekalesia memine la thangane ka loi hne së hna troa kapa, kola troa mama hnyawa ngöne la huliwa ne cainöje trootro ngöne la götran hne së hna cainöje ngön!
14. Pine nemen matre sisitria la treu Eiperem göi troa pionie ka ixatua?
14 Pine nemen matre Eiperem la ketre treu ka lolo catr göi troa pionie ka ixatua? Kola troa atrune la Drai Ne Amekunën ngöne la mekene treu; kolo hi lai a aijijë së troa wange hmaca lo itre atr ka traqa troa hane sine lo lai drai cili. Tro sa tro fë la itre zonal, cememine la ajane troa hamën la itus Ini Tusi Hmitrötr, ngöne la kola iwai hmaca me nyiqaane inine la Tusi Hmitrötr me angatr. Haawe, tro la huliwa ne pionie ka ixatua e Eiperem a aijijë së troa nyiqaane inine la Tusi Hmitrötr memine la itre atr ka ala nyim. Faifi lao sabath e Eiperem, nge caa drai ne mano, ke feete i fen; matre hmaloi hi kowe la itre ka huliwa i maseta me itre ka ini troa hane pionie ka ixatua.
15. Pine nemen matre loi e tro sa canga sikusikune la nyine tro sa kuca ngöne la kola easenyi trootro la hneijin ne la Drai Ne Amekunën?
15 Kola aeasenyi së catre pala hi kowe la pune la fene celë, hnene laka kolo pala hi a tro la itre macatre me hneijin ne Drai Ne Amekunën hne së hna atrun. Coco catre pe hi la traeme ne tro sa qaja la pengöne Akötresi së kapucatin asë kowe la itre atr. (1 Kor. 7:29) E ase hë la hneijin ne Drai Ne Amekunëne celë, tre paatre hë la itre ijine ka sisitria cili ka aijijë së troa atrune la Tretretro së e koho hnengödrai. Epi tro sa hnëkë enehila troa kuca asë la hne së hna atrein e treu Maac, me Eiperem, me Mei, matre troa qaja catrëne la itre thiina ka sisitria i Iehova!
[Iatr ne la götran 4]
Ijije Kö Troa 300 Pionie Ka Ixatua e Eiperem?
◼ Wange ju la itre hne së hna amë panën
◼ Ithanatane jë la itre hna troa eatrën hnene la fami
◼ Qaja jë fe kowe la itre xan la hnei epuni hna hnëkën