“Troa Anyipicine La Maca Ka Loi”
1. Nemene la maca ka loi nyine tro sa ce thawa?
1 Ame ngöne la fene celë thaa majemine kö së troa drenge la itre maca ka loi, tre, hetrenyi the së la ketre hnëqa hna aijijë së kow, ene la “troa anyipicine la maca ka loi ne la ihnimi gufa i Akötesie.” (Ite hu. 20:24) Kolo lai a hape, tro la itre atr a atrehmekune laka, easenyi hë matre nyipune pi hë la “ite drai hnapin,” me nyihnane lai hnene la fene ka hnyipixe, me ka meköt i Iehova, nge e cili “patë hë la ite ewekë hnapan.” (2 Tim. 3:1-5; Hna ama. 21:4) Ame ngöne la ijine cili, pë hmaca kö troa hetre sine mec. (Is. 33:24) Troa mejë hmaca qa ngöne la itre hua nyine amekunën, lo itre hne së hna hnim, nge troa iacaasi angatre hmaca memine la itre fami me itre enehmu i angatr. (Ioane 5:28, 29) Troa kuca matre tro la fen asë a paradraiso ka mingöming. (Is. 65:21-23) Drei la itre ithuemacanyi ka lolo nyine tro sa ce thawa!
2. Pine nemene matre ketre ijine ka lolo catre la hneijine Drai Ne Amekunën göi troa cainöjëne la maca ka loi?
2 Itre ijine ka lolo catre e treu Maac, Eiperem, me Mei matre tro sa qaja trongëne la maca ka loi. Ame ngöne la itre treu cili, tre lolo la drai, nge qea lai ngöne la itre nöje ka nyimutre, matre ijije hi tro sa cainöje aqeany. Ketre, troa atrune la Drai Ne Amekunën, lo ketre ijine ka sisitria catre ne la macatre, ngöne la fene asë thupene la kola lö la jö, e Mecixeni ne 22 Maac. Enehila hi la ijine troa nyiqaane hnëkë matre troa akökötrene la huliwa ne cainöje së.
3. Nemene la ka troa xatua së, itre fami, troa akökötrene la huliwa ne cainöje së?
3 Pionie Ka Ixatua: Ijije kö tro epuni a eköthe la porogarame i epuni matre troa hane pionie ka ixatua koi caas, luetre, maine kowe lai köni treu asë? Hapeu matre troa nango xome la hnepe traeme ngöne la ini tusi ne la fami matre troa ce wange la mekune cili? Maine troa ce huliwa hnene la itre atrene la fami, maine jë ijije hi tro la caas maine itre xan a xome la huliwa ne pionie ka ixatua. (Ite edomë 15:22) Loi e troa thithi fë la mekune cili, nge wange ju la aqane amanathithine Iehova la trenge catre hnei epuni hna kuca. (Ite edomë 16:3) Nge maine pëkö atrene la fami ka pionie ka ixatua, loi e tro la itre atrene asë la fami a eköthe amë la itre aja nyine troa aeatrën matre troa akökötrene la huliwa ne cainöje i angatr, ke, angatre lai a ce huliwa memine la itre ka pionie ka ixatua ngöne la ijine cili.
4. Nemene la aqane tro sa eköthe la porogarame së matre troa pionie ka ixatua, e ka huliwa i maseta së ngöne la drai ka pexej?
4 Maine epuni a huliwa i maseta ngöne la drai ka pexej, tro la ketre porogaram hna eköthe hnyawa a aijijë epuni troa hane pionie ka ixatua. Maine jë ijije tro epuni a cainöje ngöne la ijine kola mano treqene troa xejë hmaca la huliwa. Maine pena loi e troa sipo teritoare easenyine la hnalapa i epun, maine troa cainöje pena caa hawa qëmekene maine thupene la kola fenesi la huliwa. Ijije fe tro sa kötrëne la itre huliwa ka thaa nyipi ewekë kö kowe la ketre treu, nge easa xome jë pe lo lai traeme hna hnëkëne thatraqane itre ej matre troa hane amë e hnine la porogarame së; ketre, ijije fe tro sa cainöje ngöne la drai ka pexej ngöne lo itre mecixeni me sabath. Ame itre xan, hnei angatre hna xome la caas maine lue drai ne mano matre troa hetre ijine troa cainöj.
5. Tune kaa la aqane tro la itre qatr me itre sin atr a hane pionie ka ixatua?
5 Maine ketre qatre epun, maine sin atr, maine trene kucakuca pena, ijije tro epuni a hane pionie ka ixatua, hnene la hna xome hi la ketre hnepe hawa e nöjei drai matre troa cainöj. Sipo Iehova jë së troa nue koi së “la etrune la men, ngo tha qa the [së] kö.” (2 Kor. 4:7) Hna pionie ka ixatua hnene la ketre trejine föe ka 106 lao macatre! Hnene la hna xatua eahlo hnene la itre sinee i eahlo Keresiano me itre xane ju kö ngöne la ekalesia, ene pe hnei eahlo hna cainöje ngöne itre hnalapa trootro, me kuci vizit, me sine la itre etid, me hane kuca la itre xaa jëne cainöj. Hnei eahlo hna xatuane la treen lao atr troa nyiqaane inine la Tusi Hmitrötr. Eahlo a qaja ka hape: “Ame la eni a mekune la hnëqa hna aijijë ni troa xom, ene la troa hane pionie ka ixatua, kola tiqa la hning hnene la ihnim, me hni ne ole koi Iehova, me Hupuna i Nyidrë, me kowe la organizasio i Nyidrë ka hetre ihnimin. Eni a pi qaja ka hape, ‘oleti, Iehova!’ ”
6. Tune kaa la aqane tro la itre thöth hna bapataison, nge ka ini pala kö a hane pionie ka ixatua?
6 Maine ketre thöthi epun hna bapataisone hë, nge epuni pala kö a ini, ijije fe tro epuni a hane pionie ka ixatua. Tune la itre ka huliwa i maseta ngöne la drai ka pexej, tro epuni a canga eköthe la porogarame i epuni göi troa cainöj e mecixeni me sabath. Maine jë ijije fe troa caa hawa ne cainöj hnei epuni maine thupene la hna ini e itre xaa drai. Hetre drai kö ne feete i fene matre tro epuni a xome göi troa cainöje trootro? Maine epuni a ajane troa pionie ka ixatua, ce ithanatane jë memine la keme me thine i epuni la aja i epun.
7. Nemene la nyine tro la itre qatre thup a kuca matre troa eköthe la madrine kowe la huliwa ne cainöje ngöne la hneijine Drai Ne Amekunën?
7 Eköthe Jë La Madrin: Ijije tro la itre qatre thup a sajuëne la huliwa matre eköth la madrine e hnine la ekalesia jëne la tulu i angatr. (1 Pet. 5:2, 3) Maine jë tro angatre a eköthe la itre xaa icasikeu göi cainöje trootro thatraqane la itre ka troa cainöje e hmakany, e hnaipajö, maine e thupene la hna huliwa i maseta. Loi e xecie kowe la atre thupëne la huliwa ne cainöj laka, hna athipe hë kowe la itre ka trejine trahmanyi ka maca troa elemekene la itre icasikeu cili thatraqane la cainöje trootro, nge hetrenyi pala hi la itre teritoar, me itre zonal, me itus nyine troa tro fë la itre treu cili.
8. Nemene la ini hne së hna kapa qa ngöne la hna melëne hnene la ketre ekalesia?
8 Ame ngöne la ketre ekalesia, itre treu qëmeken petre kö la itre treu cili, kola ithuecatre hnene la itre qatre thup kowe la huliwa ne pionie ka ixatua. Hnei angatre hna thuemacane la ekalesia e nöjei wiik la etrune la itre pionie ka ixatua hna kapa. Haawe, thaa luelue kö kowe la itre ka ajane troa akökötrene la huliwa ne cainöje i angatre laka, ala nyimu la itre ka troa xatua angatr. Hna eköthe la itre xaa icasikeu göi cainöje trootro e hmakany me e hej. Ame la thangane lai, 53 lao ka cainöj ka hane pionie ka ixatua e Eiperem, kösë sine la ekalesia.
9. Pine nemene matre ketre ijine ka lolo catre la hneijine Drai Ne Amekunën, kowe la itre ka ijije troa nyiqaane cainöjëne la maca ka loi?
9 Xatuane Jë La Itre Xan Troa Cainöj: Troa könëne la itre ka xötrei cainöj me itre thöth, troa ce cainöje memine la itretre cainöje ka maca. Ketre ijine lai ka ijije e qëmeken me thupene la hneijine Drai Ne Amekunën, ngöne la kola troa akökötrene hnene la ka ala nyimu ne la ekalesia la huliwa ne cainöje i angatr. Hapeu, hetre hnei epuni hna ini Tusi Hmitrötre memin ka kökötre ngöne la ua, me thele troa mele thenge la itre trepene meköti Iehova? Hetre nekö i epuni kö ka kökötre hnyawa ngöne la ua, ngo thaa ka cainöje pala kö? Maine aja i angatre hi lai troa nyiqaane cainöj, nge epuni a öhne laka ijiji angatre hë, loi e troa thuemacane la ketre qatre thup. Tro la atre thup perezida a ce wange matre tro la lue qatre thup a ce ithanatane lai me epun, me itre nekö i epun, maine memine la hnainin.
10. Nemene la nyine tro la itre qatre thup a kuca matre troa xatuane la itre ka nanazije ngöne la ua?
10 Ame la itre treu ka troa xulu, tre, itre ijine ka lolo catre fe kowe la itre ka nanazije ngöne la ua matre tro hmaca ce cainöje memine la ekalesia. Loi e tro la itretre xomiujine la itre Ini Tusi Ne La Ekalesia me itre xaa qatre thup a thele matre troa vizitëne la itre atr cili, me hane könë angatr cememine la keukawa, troa ce cainöje me angatr. Maine ka hekö hë angatre thaa cainöj, loi e tro la lue qatre thup a pane ce ithanata me angatr e maine ijiji angatre troa cainöje hmaca.—km 11/00 g. 3.
11. Nemene la hatren ka sisitria ne la “ihnimi gufa i Akötesie?”
11 Troa Hnëkë Thatraqane La Drai Ne Amekunën: Ketre hatren ka sisitria ne “la ihnimi gufa i Akötesie,” ene la thupene mel. (Ite hu. 20:24) Itre milio lao atr ka hetre hni ne ole ka troa icasikeu e Mecixeni 22 Maac, thupene la kola lö la jö, matre troa atrune la Drai Ne Amekunën la mec i Keriso. Easa ajane troa könëne la itre atr me xatuan asë la itre atr ka hni ka menyik troa sine lai ijine cili ka nyipi ewekë catr. Celë hi ijine lai ka anyipicine la ihnimi gufa i Iehova kowe la nöjei atr asë.
12. Drei la hne së hna troa könëne kowe la Drai Ne Amekunën?
12 Loi e troa cinyihane wengëne la ëjene la itre atr hnei epuni hna ajane troa könën. Eje hi laka, eje e cili la ëjene la itre sinee epun, me itre ka lapa ezi epun, maine itre atr hnei epuni hna atre ngöne la hna huliwa, maine hna ini pena, itre ka etid hë ekö me itre ka etid enehila, me itre atr asë hnei epuni hna vizitëne lapaan. Maine hetre hnyinge ne la itre xan ngöne la Drai Ne Amekunën, hetrenyi la itre mekune nyine ixatua ka qejepengöne la Jidri Ne Pui Ne Xeni Ne La Joxu, ngöne la pune la itus Ini Tusi Hmitrötr, götrane 206-8. Tro lai aijijë epuni fe troa nyiqaane inine la Tusi Hmitrötre me ketre atr, ke, jëne tro hi lai a hamëne lai itus nyine troa xomiujine la itre etid.
13. Tune kaa la aqane amanathithine Iehova la trenge catre hna kuca hnene la lue ka cainöj ka mekune troa könën la itre xaa atr kowe la Drai Ne Amekunën?
13 Hnene la ketre sör hna cinyihane la ëjene la 48 lao sinee i nyiidro nyine troa könën. Ame la nyiidro a könë angatr, hnei nyiidro hna sijihatren la ëje i angatr, me cinyihane la drai ne könë angatr hnei nyidro. Drei la madrine thei nyiidro la kola traqa kowe la Drai Ne Amekunën hnene la ala 26 lao atr hnei nyiidro hna könën! Hnene la ketre trejine trahmany ka trene magazë hna könën la ketre ka huliwa i nyidrë, ketre hene hmi katolik ekö. Hna haine hnene lai trahmanyi thupene lai ka hape, “Atraqatre kö la hnenge hna inin qa hnine la Tusi Hmitrötre ngöne hi la caa hawa, hune la hnenge hna inin ngöne la hmi Katolik ngöne la 30 lao macatre ka ase hë.” Thaa hmitre kö thupene la Drai Ne Amekunën, nyidrëti a etid ngöne la itus Ini Tusi Hmitrötr.
14. Nemene huliwa nyine anyipicin e cailo fen hna troa nyiqaan e 1 Maac?
14 Ketre Huliwa Nyine Anyipicin: Kola troa hamëne trongëne la ketre pepa ne ihë kowe la Drai Ne Amekunën e cailo fen, qaane e Mecixeni 1 Maac uti hë e 22 Maac. Tro la itretre cainöj asë a ajane troa kuca la hnei angatre hna atrein matre troa aeatrëne la huliwa cili ka nyipi ewekë catr. Thaa tro kö a nue ngöne la qene qënehlö la ipepa, loi e tro pe a hamëne mekötin kowe la atr. Ame ngöne la itre Mecixeni me Sabath, tro fe sa tro fë la itre zonale hna xötrei kapa.
15. Tune kaa la aqane tro sa tro fë la pepa ne ihë kowe Drai Ne Amekunën?
15 Hnene laka hna sa ijine hi la tro sa hamëne trongëne la itre ipepa, thaa tro kö sa aqeane la aqane tro sa nyiqaane ithanata. Loi e troa madrin, me loi la hni së. Maine jë qaja jë ka hape: “Atraqatre la madrine huni troa hane könë epun, me itre atrene la fami epun me itre enehmu i epun, kowe la ketre ijin ka nyipi ewekë catr hna troa atrune e 22 Maac. Hane hi la ipepa ne ihë i epun. Hna fejane la itre xaa ithuemacanyi e hnine ej.” Maine jë troa hetre hnyinge ne lai atr. Maine pena tro angeic a kapa la pepa ne ihë, me hane qaja hnyawa ka hape tro angeice elanyi a hane traqa. Loi e troa cinyihane la itre ithuemacanyi ngöne lai atr ka hetre hni ka ajan, me ce wange matre troa iwaihmaca.
16. Nemene la hna melëne ka amamane la etrune la huliwa ne ihë ngöne la teritoare së kowe la Drai Ne Amekunën?
16 Ame lo macatre ka ase hë, hna öhne hnene la ketre sooci la pepa ne ihë kowe la Drai Ne Amekunën ngöne la qene qënehlö i angeic. Hnei angeic hna mekune troa hane sine lai ijine cili, ngo troa pane sipo göi mano kowe la hene i angeic. Ame la angeice a amamane la ipepa i angeic kowe la hene i angeic, ene pe lapa thaupe ju lai hene i angeic, nge thupene lai nyidrëti a sa ka hape, Itretre Temoë i Iehova la lue keme me thine i nyidrë, nge hnei nyidrëti ekö hna lapaa sine la itre icasikeu me nyidro. Hnei nyidrëti hna kapa la sipo göi mano ne lai sooc, nge hnei nyidrëti mina fe hna ce tro me angeice kowe la Drai Ne Amekunën!
17. Tro sa amamane tune kaa laka, thaa easë kö a kapa gufane la ihnimi gufa i Akötesie?
17 Amamane Jë La Hni Ne Ole i Epun: Ame la kola easenyi kowe la hneijine Drai Ne Amekunën macatre 2008, epi tro së isa ala caas a mekune hnyawa la aqane amamane Iehova la ihnimi gufa i Nyidrë thatraqa së. Hnei Paulo aposetolo hna cinyihane ka hape: “Eëhuni angete ce huliwa me nyidë a iele nyipunie wanga kapa gufane hnei nyipunie la ihnimi gufa i Akötesie.” (2 Kor. 6:1) Tro sa amamane tune kaa ka hape easa kapa gufane la ihnimi gufa i Akötresie? Hna cinyihane hnei Paulo ka hape: “Ngo ngöne la nöjei ewekë asë, eëhuni a amamai huni kö ite hlue i Akötesie.” (2 Kor. 6:4) Qa ngöne lai, easa amamane la hni ne ole së kowe la ahnahna qaathei Iehova jëne la thiina ka loi së me aqane catre së troa cainöjëne la maca ka loi. Troa ketre ijine ka lolo catre la hneijine Drai Ne Amekunën göi troa akökötrene la huliwa ne cainöje së, me anyipicine la maca ka loi.
[Hna eköhagen ne la götran 3]
Drei La Itre Hna Aijijëne Troa Hane Xome La Huliwa Ne Pionie Ka Ixatua?
◼ Itre fami.
◼ Itre ka huliwa ngöne la drai ka pexej.
◼ Itre ka qatre hë, me itre sin atr.
◼ Itre ka ini.
[Hna eköhagen ne la götran 4]
Ame Ngöne La Kola Hamëne Trongëne La Itre Pepa Ne Ihë:
◼ Thaa tro kö a aqean, me ithanata cememine la madrin.
◼ Troa cinyihane la itre atr ka hni ka ajan me iwaihmaca.
◼ Troa hamëne la itre zonal ngöne la Mecixeni me Sabath.