Catre Pi Së Troa Qaja La Itre Huliwa Ka Lolo i Iehova
1. Nemene la itre xaa huliwa ka lolo i Iehova hnei nyipunieti hna wangatrune hnyawa?
1 Pëkö sa ne la Akötresi së ka pucatin asë, ene Iehova! Hnei Davita hna cinyihane ka hape: “Iehova Akötesingöti fe, nyimute la nöjei huliwa i cilie nyine haine hnei cilieti hna kuca, me ite mekune i cilie koi hun ; tha nune qaja zizine koi cilie, pi tro ni a amamane me qaja, ngo kösaue it’ eje tha nune e kö.” (Sal. 40:5) Ame ngöne la itre huliwa ka lolo i Iehova, tre kolo fe a qaja la itre hnei Nyidrëti hna xup e koho hnengödrai me e celë fen, memine la Baselaia ne la Mesia, me itre aqane hnime Nyidrëti la nöje i Nyidrë, memine fe la huliwa ne cainöj e cailo fen. (Sal. 17:7, 8; 139:14; Dan. 2:44; Mat. 24:14) Tro la ihnimi së koi Iehova memine la aqane wangatrune së la nöjei hnei Nyidrëti hna kuca, a upi së troa hane qeje Nyidrëti kowe la itre xaa atr. (Sal. 145:5-7) Ame ngöne itre treu Maac, me Eiperem, me Mei, tre itre ijine tro hi së lai a kuca la ewekë cili.
2. Tune kaa la aqane tro sa isa kepe thangane ka loi e troa sa hane pionie ka ixatua?
2 Troa Pionie Ka Ixatua: Ijiji nyipunieti kö troa eköthe la ketre porogaram matre troa kuca la 50 lao hawa ne cainöj ngöne la caas maine ngöne pena la itre treu cili ka ketrepengön? Eje hi lai laka, itre ewekë lai ka nango troa saze la mele i nyipunie ngöne la nöjei ijin, ngo ame pe tre itre ewekë ka lolo catr. (Efe. 5:16) Nyimutre la itre ka mekune ka hape, lolo catr la huliwa ne pionie, ke kola xatua angatr troa akökötrene hnyawa la atreine i angatr ngöne la hna cainöje trootro. Thaa xou menu hmaca kö ngöne la kola cainöj ngöne itre hnalapa trootro, nge nyimu ijin ne xome la Tusi Hmitrötr matre troa qejepengöne la itre mekun. Maine tro sa xome la itre traeme ka nyimutre thatraqane la cainöj, eje hi lai laka, troa hmaloi koi së troa wange hnyawa la itre atr ka hetre hni ne ajan, nge ame koi itre xan, tre ene la troa hane nyiqaane inine la Tusi Hmitrötr memine la ketre atr ngöne la ijine angatr a pionie. Pine laka ame la troa pionie, tre easë a nue la trenge catre së troa xatuane la itre xaa atr, haawe, troa hetre madrine ka tru hne së hna kapa qa ngöne la huliwa ne cainöj.—Ite hu. 20:35.
3. Ngacama tru la itre jol ne la itre xaa trejin, ngo tune kaa la aqane atreine angatr troa xome la huliwa ne pionie?
3 Thaa tro pi kö sa canga mekune ka hape, qa ngöne la itre jole ka eje the së, thatreine kö së troa hane pionie ka ixatua. Ame lo macatre hnapan, hna xome la huliwa ne pionie ka ixatua hnene la ketre qatre thup ka lue nekönatr, caa trahmany nge caa jajiny, nge ketre ka huliwa i maseta nyidrëti ngöne la drai ka pexej. Ngacama tru la itre jole i angeic, ngo tune kaa la aqane eatrëne angeice lai? Pine laka nyidrëti a huliwa ngöne la wiik, hnei nyidrëti hna mekune troa kuca la itre hawa i nyidrëti ngöne la mecixeni me sabath, a kola nyiqaane troa cainöj e cahu gojeny e 7 h e mecixen hmakany. Ala nyimu la itre trejine hnine la ekalesia ka nyimu jole tune lai trejine cili, ngo hnei angatre mina fe hna hane pionie, me ithuecatrekeu. Ame ngöne la ketre ekalesia, tre hnene la ketre trejine föe ka 99 lao macatre hna mekune troa pionie ngöne lo treu Mei, thupene la hna hane hë eahlo hnene la nekö i eahlo troa hane ce pionie me angeic. Hnene mina fe la itre xaa atren la ekalesia hna uku eahlo hune ikatr, me ce tro me eahlo troa cainöje ngöne itre hnalapa trootro, me ce kuca me eahlo la itre etid. Hnei eahlo mina fe hna cainöje jëne telefon, me ngöne la gojeny, me jën tus. Ka xecie koi eahlo laka, thaa hnene kö la sipu trenge catre i eahlo la eahlo a atreine kuca lai, ngo hnene la ixatua qaathei Iehova.—Is. 40:29-31.
4. Nemene la itre xaa ewekë nyine troa sa wange hnyawa ngöne la easë a kuca la ketre porogaram matre troa xome la huliwa ne pionie?
4 Kuca jë la ketre porogaram ka ihmeku hnyawa memine la aqane mele i epun. Troa hetre thangane ka loi e hna trongën la itre porogaram ka thaa jole menu kö ngöne la hna cinyihane celë. Hapeu, epuni a huliwa ngöne la drai ka pexej, maine epuni pena a ini? Maine jë ka loi koi epuni troa kuca la ketre porogaram matre troa xome la itre mecixeni me sabath. Maine hetre sine meci epun nge kucakuca e troa cainöj ngöne la itre drai ka pexej, maine jë tro hi epuni a kuca la itre hnepe hawa ka co ngöne la nöjei drai. Ithanatane jë memine la itre xan la aja i epun troa pionie ka ixatua. Maine jë tro jë fe hë angatr a hane eköth la aja cili e kuhu itre hni i angatr.
5. Nemene la itre mekune ka ijij troa kuca hnene la itre thöth ngöne la itre treu Maac me Eiperem, me Mei?
5 Itre Aqane Tro La Itre Thöth a Hane Akökötren La Cainöje i Angatr: Atraqatr la madrine i Iehova ngöne la kola qaja hnene la itre thöth la itre huliwa ka lolo hnei Nyidrëti hna kuca. (Sal. 71:17; Mat. 21:16) Maine itre thöthi epuni ka xome hë la bapataiso, maine jë ijije hi tro epuni a hane pionie ka ixatua ngöne la ketre treu ne mano i uma ne ini. Maine thaa ijije kö tro epuni a hane pionie ka ixatua, tune kaa, ijije kö tro epuni a hane mekune amë la itre nyine tro epuni a kuca matre troa akökötrene me amacane hnyawa la aqane tro epuni a cainöj ngöne la itre treu cili? Maine ka ce cainöje hë epuni memine la itre keme me thine i epun ngo thaa ketre atre cainöje hna thaa bapataisone petre kö epun, ijine tro hi lai a thele troa eatrëne la mekune cili. Thaa kolo kö a thele thei epuni troa itre ka atreine sa asë la itre hnying qa hnine la Tusi Hmitrötr, maine pena troa hetrenyi la atreine tune la itre thupëtresij hna bapataisone hë. Trotrohnine hi epuni la itre trepene ini qa hnine la Tusi Hmitrötr? Hapeu, epuni kö a hane trongëne hnyawa la itre hna amekötin hnei Tusi Hmitrötr thatraqane la thiina? Epuni kö a ajan troa atrehmekunyi epun tune la Itretre Anyipici Iehova? Thupene lai, ce ithanatane ju la aja i epun memine la itre keme me thine i epun. Tro angatr a ce tro me epuni troa wange la itre qatre thup, nge e cili troa ithanatan maine epuni kö a hane trongëne la itre hna amekötin.—Wange ju la itus Notre ministère götrane 98-9.
6. Tune kaa la aqane tro sa xatuan la itre hnainin troa itretre cainöjën la maca ka loi?
6 Loi e Troa Xatuan La Itre Xan Troa Cainöj: Maine jë tro la itre hnainin ka kökötr ngöne la ua a hane ce cainöje me easë ngöne itre treu ka troa xulu ne la huliwa ka ketrepengöne celë. Maine epuni a inine la Tusi Hmitrötr memine la ketre hnainin ka kökötr ngöne la götrane la ua, thele ixatua jë thene la qatre thup ka xomiujine la Ini Tus maine thene pena la atre thupën la huliwa ne cainöj. Tro la ketre e angatr a ce sin me epuni la etid ne lai hnainin, matre troa waipengöne la aqane kökötre i angeic ngöne la ua. Maine ijije fe hë nge hetre ajan la hnainin troa hane nyiqaane cainöj, tro la atre thup perezida a wang matre tro la lue qatre thup a ce icasikeu me epun memine la hnainin. (Wange ju la zonal La Tour de Garde ne 15 Nofeba 1988, götrane 17.) E ase fe hë kapa lai hnainin, canga nyiqaane jë troa ce cainöje me angeic.
7. Tune kaa la aqane troa xatuan la itre trejine ka thaa hane hmaca kö cainöj?
7 Loi e tro la itre atre thupëne la itre Ini Tus a pane wangatrune hnyawa la itre ka thaa cainöje hmaca kö, maine ka thaa traqa lapaa troa hane cainöje memine la gurup. Hë angatre jë fe matre troa hane ce cainöje me epun. Maine ekö hë angatre thaa hane cainöj, ma loi e troa pane ithanata me angatr hnene la lue qatre thup, matre troa wang maine ijiji angatre jë fe hë troa hane cainöj. (Wange ju la Huliwa Ne Baselaia ne Nofeba 2000, hmekune lo itre mekune hna hape, Kola Sa La Itre Hnyinge i Nyipunie.) Maine jë tro la aqane catre cainöj hnene la ekalesia ngöne lai itre treu cili ka ketrepengöne kö, a aciane hmaca la aja thei angatr troa xome lapaane la huliwa ne cainöj ngöne la mele i angatr.
8, 9. Nemene la nyine troa kuca hnene la itre qatre thup matre troa ithuecatr me hetrenyi la ajan thene la itre trejin troa xome la huliwa ne cainöje cili ka ketrepengön?
8 Hnëkë Jë Enehila Matre Troa Akökötren La Huliwa Ne Cainöje i Epun: Troa nyiqaan enehila hnene la itre qatre thup troa sajuën la huliwa matre troa hetre madrinene la ekalesia kowe la huliwa ne pionie ka ixatua. Atreine fe tro epuni a hane caasi me angatr, jëne la ithuecatr memine la tulu hnei epuni hna troa hamën. (1 Pet. 5:3) Ala ije la itre pionie ka ixatua ngöne lo ijine kola pane elë la etrun hnine la ekalesia? Atreine kö troa pane sasaith lai ngöne la macatre celë? Loi e troa thele hnene la itretre thupëne la itre Ini Tus, la itre aqane troa ithuecatr kowe la itre atrene la gurup matre troa akökötren la huliwa ne cainöje i angatr. Maine jë tro la itretre thupëne la huliwa ne cainöj, a nyixan la itre icasikeu göi huliwa ne cainöj ngöne itre hnalapa trootro. Canga thuemacane ju la ekalesia la hna hnëkëne thatraqane lai. Loi e troa xecie hnyawa laka hna ahnithe hë kowe la itretre cainöj ka maca troa huliwa, matre tro angatr a elemekene lai itre icasikeu nge troa nyiqaane me nyipune itre ej ngöne la traeme hna sa. (Wange ju la Huliwa Ne Baselaia ne Semitrepa 2001, Kola Sa La Itre Hnyinge i Nyipunie.) Loi e troa hnëkëne mina fe hnene la atre thupëne la huliwa ne cainöj la itre teritoar, me itre zonal, me itre itus matre thaa tro kö a jole kowe la huliwa.
9 Ame ngöne lo macatre hnapan, hnene la itre qatre thup ne la ketre ekalesia hna canga nyiqaane troa ithuecatr kowe la itre trejin, matre troa xome la huliwa ne pionie ka ixatua, ene pe ala nyimu la ka nyialiene la pepa ne sipo. Hnei angatr hna amekötin troa nyixan la itre icasikeu göi troa cainöj ngöne itre hnalapa trootro, caas e 5 h 30 e hmakany, kola cainöj ngöne la itre gojeny, nge ketre e 3 h e hnaipajö thatraqane la itre ka fenesi qa hna ini, nge ame la hnaakönin tre 6 h e heji lapa thatraqane la itre ka fenesi hna huliwa. Ketre, köni icasikeu göi cainöj ngöne itre hnalapa trootro hna hnëkën thatraqane la itre mecixen. Hna xome hnene la 66 lao trejine la huliwa ne pionie ka ixatua ngöne la treu Eiperem!
10. Tune kaa la aqane troa hnëkë matre akökötren hnene la itre fami la huliwa ne cainöje i angatr?
10 Tune kaa matre ami ijine hnei epuni ngöne la kola troa etid ne la hnepe lapa, göi troa eköthe amë la itre nyine troa kuca ka ijij thatraqane la itre treu ka troa xulu? Maine tro sa ce huliwa hnyawa me ce hnëkën la itre nyine troa kuca, haawe, maine jë troa hane xome hnene la itre xaa atren maine pena itre atren asë la hnepe lapa, la huliwa ne pionie ka ixatua. Maine thaa ijiji epuni kö, eköthe amë jë la itre ewekë hnei epun hna ajan troa kuca matre troa akökötren la huliwa ne cainöje i epun; maine hnene la troa sisedrëne la aqane cainöje i epun ngöne la itre treu cili, maine tro pena a thele itre xaa jëne troa cainöj. Loi e tro la itre ewekë cili a itre mekune nyine thithi fë e hnine la fami. Loi fe tro epuni a mejiune laka tro Iehova a amanathithin la itre ewekë hnei epuni hna catre kuca.—1 Ioane 3:22.
11. (a) Nemene la itre ewekë ka lolo catr hna eatrëne hë hnene la mele hna hujën hnei Keriso? (b) Eu la traem nge ekaa la hnë troa atrun la Drai Ne Amekunën ngöne la nöj?
11 Ewekë Ka Lolo Catr Hna Kuca Hnei Akötresie: Ame la ketre hatren ka sisitria catr ka amamane la ihnimi Iehova, tre ene la hnei Nyidrëti hna nue nyine ahnahna la Hupuna i Nyidrë matre nyine thupene mele së. (1 Ioane 4:9, 10) Ame la thupene mel hna hamën hnei Iesu tre, celë hi ketre trepene lai ka catr hna hnëkëne matre troa itöne la mele ne la itre atr asë me thepe angatr qa ngöne la ngazo memine la mec. (Rom. 3:23, 24) Hnene la madra hna nenge hnei Iesu hna aejën la isisinyikeu ka hnyipixe, me aijijëne la itre atr ka ngazo troa itre nekö i Akötresie ka troa musi hune la Baselaia e koho hnengödrai. (Iere. 31:31-34; Mar. 14:24) Ame la ka nyipi ewekë catr, tre ene la hna ahmitrötrën la ëje i Iehova hnene la aqane drengethenge i Iesu. (Deu. 32:4; Ite edomë 27:11) Ame e sabath 4 Eiperem thupene la hna lö la jö, kola troa atrun la Drai Ne Amekunën la ijine meci Keriso e cailo fene hnengödrai.
12. Tune kaa la aqane troa kepe thangane ka loi hnene la itre atr ka hetre hni ne ajan, la icasikeu ngöne la Jidri Ne Pui Ne Xeni Ne La Joxu?
12 Maine tro sa hane sin la Jidri Ne Pui Ne Xeni Ne La Joxu, easë hi lai a atrun la itre huliwa ka lolo catre i Iehova. Troa akökötren hnene la cainöj la hni ole së the së kowe la ewekë hnei Iehova hna kuca, ene la troa hamën la thupene mel. Atreine fe troa öhne hnene la itre atr ka hetre hni ne ajan ka hane sin la icasikeu, la itre xaa huliwa i Akötresie ka lolo catr. Atreine fe hi troa angatr a hane öhne la caas memine la ihnimi ka keukawa hnei Iehova hna inine la nöje i Nyidrë troa melën. (Efe. 4:16, 22-24; Iako. 3:17, 18) Ka lolo catr troa hane sin la ijine ka tru cili, ke troa hetre thangane ka loi kowe la aqane mekune ne la ketre atr, haawe, loi e tro sa kuca asë la hne së hna atrein matre troa hane sine lai icasikeu ka tru cili.—2 Kor. 5:14, 15.
13, 14. Drei la hne së hna troa hën troa hane sin la Drai Ne Amekunën, nge troa könë angatre tune kaa?
13 Loi e Tro Sa Hëne La Itre Xan Troa Hane Sin La Icasikeu: Nyiqaane jë troa hnëkëne hnyawa me cinyihane wengëne la ëjene la itre atr hnei epuni hna troa hën. Troa könën la itre atren la hnepe lapa ka thaa hmi kö, me itre atr ka lapa ezi së, me itre atr hne së hna atre ka ce huliwa me easë maine ka ce ini pena, me itre ka inine la Tusi Hmitrötr ekö me enehila, memine asë lo itre atr hne së hna vizitën. Loi e tro fe la itretre thupëne la itre Ini Tus a hane amë fe la ëjen la itretre cainöj ka thaa hane hmaca kö tro fë la maca ka loi.
14 Xome jë la itre pepa ne ihë thatraqai Drai Ne Amekunën, nge cinyihane hnyawa ju la traem maine lepe ju ngöne tusi la traem me hnë troa atrun la Drai Ne Amekunë. Maine pena epuni a ajane troa xome itre mekun göi troa könën la itre atr hna hamën ngöne la pune la zonal La Tour de Garde ne 15 Maac 2004, maine Réveillez-vous ! ne 22 Maac 2004. Pine laka easenyi hë la 4 Eiperem, amekunëne jë lo itre atr hnei epuni hna siji ëjen hnine lo ipepa i epun, maine troa wai angatr maine pena troa telefone koi angatr.
15. Tune kaa la aqane troa iamacanyin la aqane troa ikep ngöne la Heji Ne Pui Ne Xeni ne la Drai Ne Amekunën?
15 Ngöne La Drai Ne Amekunën: Thele jë troa canga traqa qëmekene troa atrun la Drai Ne Amekunën. Iamacanyine jë la aqane troa kapa me ibozu memine la itre atr ka xötrei traqa. (Rom. 12:13) Hetrenyi kö la ketre hnëqa ka ketrepengön nyine tro epuni a kuca kowe la itre atr hnei epuni hna hën. Kuca jë matre thaa tro kö angatr a xou troa sin la icasikeu, nge hane ju fe tro sai angatr kowe la itre xaa trejin matre troa hane atre angatr hnene la itre xaa atren la ekalesia. Maine jë tro epuni a xatua angatr troa thele göhnë ezi epun. Nge maine pëkö Tusi Hmitrötr me nyima ne la itre xan, ce goeëne jë me angatr maine hamë angatre pena jë nge ce wange jë me ketre. Thupene la hna icasikeu, thele jë troa sa la itre hnyinge i angatr. Maine kolo petre hi a xötrei traqa la itre xan, hnyingë angatre jë maine angatre a ajan troa kapa la itre xaa ini qa hnine la Wesi Ula i Akötresie memine fe la aja i Nyidrë. Hnyingë angatre jë maine hetre ajane i angatr troa etid.
16. Nemene la nyine troa kuca matre troa xatuane la itre atr ka sin la Drai Ne Amekunën troa hane kökötr ngöne la götrane la ua?
16 The Mano Kö Së Xatuan La Itre Ka Traqa Troa Sin La Icasikeu: Nyipi ewekë troa xatuan la itre atr ka sin la Drai Ne Amekunën, ngöne la itre wiik thupene la drai cili. Kolo lai a qaja lo itre ka sine pala hi ekö lo itre icasikeu së, ngo ame pë hë enehila, tre thaa traqa nyimenyime hë troa ce icasikeu memine la ekalesia. Tro la itre qatre thup a thupën matre thaa tro kö a thëthëhmine la itre atr cili, nge troa thel troa atrehmekune la kepin matre angatr a hmaca troa kökötr ngöne la götrane la ua. Amamane hnyawa jë koi angatr laka easenyi catre hë la pun. (1 Pet. 4:7) Xatua angatre asë jë troa hane öhne la eloine la troa drengethenge la itre ithuecatr qa hnine la Tusi Hmitrötr, göi troa ce icasikeu pala hi memine la nöje i Akötresie.—Heb. 10:24, 25.
17. Pine nemen loi e tro së a catre ithanatan la itre huliwa ka lolo i Iehova?
17 Lolo catre pala ha la itre huliwa i Iehova koi së matre thatreine kö së troa trotrohnine asë itre ej, ngacama easë ju hë a troa mele epine palua. (Iobu 42:2, 3; Ate Cai. 3:11) Qa ngöne lai, nyimutre catr la itre jëne tro sa atrunyi Nyidrë. Loi tro sa amamane ngöne la hneijin ne la Drai Ne Amekunën, la ole së kowe la itre huliwa ka lolo i Iehova; hnene la tro sa pane thele troa hane catre akökötren la huliwa ne cainöje së.
[Hna eköhagen götran 5]
Ijije Kö Tro Epuni a Hane Pionie Ka Ixatua Me Hane Xome Cahu Ketre Porogaram?(Wange ju la itus)