Hneijin Ne La Drai Ne Amekunën—Ketre Ijin Ka Sisitria Göi Troa Akökötrene La Huliwa Ne Cainöj!
1. Nemene la itre sipu kepin matre loi e tro sa akökötrene la huliwa ne cainöje së ngöne la itre treu Maac me Eiperem me Mei?
1 Ijije kö tro nyipunieti a akökötrene la aqane tro nyipunieti a cainöj ngöne la hneijin ne la Drai Ne Amekunën? Maine jë tro la itre xaa ka cainöj a xome la itre ijine mano i angatr thatraqane la huliwa ne cainöj. Qaane e 2 Eiperem, troa atraqatre la madrine së troa xome la ketre huliwa ka ketrepengön, ene la troa hëne la itre atr ka hni ne ajan matre troa hane ce sine me easë la Drai Ne Amekunën e 17 Eiperem. Thupene lai, loi e tro sa akökötrene lai aja cili ka eje thei angatr, me hë angatr hmaca matre troa hane drenge la cainöj ka ketrepengön hna troa hamën ngöne la wiike ne 25 Eiperem. Haawe, nyimutre la itre sipu kepin ka upi së troa akökötrene la huliwa ne cainöje së ngöne la itre treu Maac me Eiperem me Mei.
2. Nemene la ketre aqane ka lolo ka troa xatua së troa kuca atrune ngöne la huliwa ne cainöje së?
2 Pionie Ka Ixatua: Ame la ketre aqane tro sa akökötren la huliwa ne cainöje së, tre, ene la troa xome la huliwa ne pionie ka ixatua. Pine laka tru hnei jole së, nyipi ewekë tro sa canga eköth amë la ketre porogaram me saze la itre xaa ewekë ka thaa sisitria kö. (Ite edomë 21:5) Ame ngöne la itre ewekë hne së hna kuca o drai, maine jë tro sa uthe la itre huliwa ka thaa nyipi ewekë kö. (Fil. 1:9-11) Tune kaa matre tro epuni a qaja kowe la itre xaa atrene la ekalesia la aja i epuni troa pionie, me wange maine ijiji angatre jë fe kö troa hane ce tro me epun ngöne la epuni a pionie?
3. Nemene la nyine troa kuca hnene la itre fami matre troa akökötrene la huliwa ne cainöje i angatr?
3 Ketre ijine ka lolo la heji ne la Hmi Ne La Hnepe Lapa göi troa ce ithanatane memine la itre atrene la fami epun, la itre aja hnei epuni hna thele troa eatrën. (Ite edomë 15:22) Maine kola ce huliwa la fami, haawe, ijije hi tro la cas maine itre xaa atrene pena a xome la huliwa ne pionie ka ixatua ngöne la cas maine nyimu treu pena. Ngo maine thaa ijije kö troa ujë tune lai, haawe, nemene la nyine tro epuni a kuca? Maine jë tro la fami a thele troa akökötrene la huliwa i angatr, hnene la hna xome la itre xaa hej göi troa cainöj, maine pena troa cainöje aqean e mecixen me sabath.
4. Nemene la itre manathithi hne së hna troa kapa, e hne së hna akökötrene la huliwa ne cainöje së ngöne la hneijine ne la Drai Ne Amekunën?
4 Iehova a wanga atrune me madrine la nöjei ewekë hne së hna kuca matre troa nyihlue i Nyidrë, memine la itre ewekë hne së hna huujën. (Heb. 6:10) Ame la madrin, tre, celë hi thangane la hne së hna hame koi Iehova me kowe la itre xan. (1 A. l. ite jo. 29:9; Ite hu. 20:35) Hapeu, ijije kö tro epuni a akökötrene la huliwa ne cainöje i epun, ngöne la hneijine ne la Drai Ne Amekunën, me hane kapa mina fe la itre manathith me madrin ka xulu qa ngön?