Tro Fe Kö Epuni a Hane Pionie Ka Ixatua?
1. Pine nemene matre ame lo itre ijine kola qëmeke koi Drai Ne Amekunën, tre, ijine tro hi së lai a aelëne la etrune la huliwa ne cainöje së?
1 Ame lo itre ijine kola qëmeke koi Drai Ne Amekunën, tre, ijine tro hi së lai a aelëne la etrune la huliwa ne cainöje së. Ijine tro hi së lai a mekune la etrune la ihnimi Iehova koi së lo Nyidrëti a upe la Hupuna i Nyidrë nyine thupene mele së. (Ioane 3:16) Celë hi ka amejëne e kuhu hni së la ole së kowe la hnei Nyidrëti hna kuca koi së, me akökötrene la aja së troa qeje Iehova koi itre xan, memine la itre hnei Nyidrëti hna kuca kowe la atr. (Is. 12:4, 5; Luka 6:45) Kolo fe lo ijine easë lai a madrine la ketre huliwa ka ketre pengön, ene la troa könëne la itre atr hne së hna atre, memine la itre atr ngöne la itre hnepe götrane hne së hna cainöje kow matre tro angatr a ce sine me easë la Drai Ne Amekunën. Thupene lai, tro sa wange la itre atr ka traqa, matre nyipi ewekëne la aja ka eje thei angatr. Tro fe kö epuni a hane xome la pionie ka ixatua ngöne la treu Maac, maine Eiperem, maine Mei?
2. Pine nemene matre ame la treu Maac, tre ketre treu ka loi göi troa pionie ka ixatua?
2 Xome Jë La Treu Maac Ceitu Me Ketre Treu Ka Ketre Pengön: Troa ketre pengöne la treu Maac, pine laka treu ka loi lai göi troa pionie ka ixatua. Ijije tro la itre ka nyi aliene la sine pepa ne pionie a iëne maine tro angatr a kuca la 30 maine 50 lao hawa. Maine tro la iwai ne la atre thupëne la sirkoskripsio a eje ngöne la treu Maac, haawe, tro la itre pionie ka ixatua a hane sine asë la icasikeu hna hnëkëne thatraqane lo itre pionie lapa me pionie hut. Ame la hnepe ijin ne ihë koi Drai Ne Amekunën e drai 26 Maac 2013, tre, ka nango qea kö hune lo itre macatre ka ase hë, pine laka troa nyiqaane ihë e drai 1 Maac. Ame mina fe, ame la treu Maac, ka faifi lao mecixeni me sabath. Haawe, hnauëne kö matre tha waipengöne pe epuni me xome la ijine cili ceitu me ketre treu ka ketre pengöne kö ne la macatre?
3. Nemene la aqane tro sa eköthe la ketre porogarame matre tru la itre hawa ne cainöje së?
3 Hnëkëne Jë Qaane Enehila: Enehila hi la ijine troa xome la porogarame i epun, me wange la itre ewekë nyine troa kuca ka ijije matre troa pionie. Nyipi ewekë troa ce iatren hnene la hnepe lapa la nyine tro angatr a kuca, celë hi matre ame ngöne la heji ne kola Hmi Ne La Hnepe Lapa, loi e tro la iatren a ithanatane la itre nyine tro angatr a eatrën, me kuca la ketre porogaram. (Ite edomë 15:22) Maine tha ijiji epuni kö troa pionie ka ixatua, the ngazohnine kö. Hapeu, ijiji epuni kö troa saze la porogarame i epun matre qea la hnei epuni hna huliwa ngöne la itre drai ne epuni a cainöje trootro? Ijiji epuni kö troa xome la ketre drai ngöne la wiike göi troa cainöj?
4. Nemene la itre eloine nyine tro sa kapa qa ngöne la etrune la itre huliwa së e treu Maac, me Eiperem, me Mei?
4 Ame la easa aelëne la etrune la huliwa së e treu Maac, me Eiperem, me Mei, tre tro fe hi lai a tru catre la madrine së hnene la hna nyi hlue i Iehova me hna xatuane la itre atr. (Ioane 4:34; Ite hu. 20:35) Ame la ka sisitria mina, tre, troa amadrinë Iehova hnene la aqane catre së troa kuca la huliwa i Nyidrë.—Ite edomë 27:11.