Nyiqane Mekune Jë Hë Enehila La Aqane Troa Akökötrene La Huliwa Ne Cainöje i Nyipunie
1. Nemene la ewekë ka sisitria hna aijijë së troa kuca ngöne la hneijine ne la Drai Ne Amekunën, nge tro sa hnëkë tune ka thatraqane lai?
1 Kola aijijë së ngöne la hneijine ne la Drai Ne Amekunën troa “ole atrunyi Iehova.” (Sal. 109:30) Tro kö nyipunieti a thele troa akökötrene la huliwa ne cainöje i nyipunie ngöne la treu Maac, matre troa amamane la hni ne ole i nyipunie kowe la Atre hamëne la thupene mel? Enehila hi la ijine troa canga eköthe amë la itre ewekë.—Ite edomë 21:5.
2. Hnei nyipunie memine la itre xa trejine hna kapa tune ka, lo hna amekötine ka hnyipixe thatraqane la itre ka pionie ka ixatua ngöne lo treu Eiperem?
2 Pionie Ka Ixatua: Ame ngöne lo macatre hnapan, ala nyimu la itre trejine e hnine la itre ekalesia ka kapa madrine lo hna amekötine ka hnyipixe, ene la troa pionie ka ixatua me thele troa eatrëne la 30 lao hawa. Hnene la ketre trejine trahmanyi hna cinyihane ka hape: “Eni pala kö a kuca la itre ini ka tru, celë hi matre jole koi ni troa pionie lapa. Ngo ame ngöne la treu Eiperem, ngacama tro ni a kuca la 30 lao hawa, ngo eni a troa thele troa eatrëne la 50.” Ame pena la ketre trejine föe ka huliwa ngöne la drai ka pexej, tre hnei eahlo hna cinyihane ka hape: “Tha ka jole kö la thötre lao hawa!” Thupene la hna qaja la hna amekötine celë, hnene la ketre pionie ekö ka 80 lao macatre enehila, hna qaja ka hape: “Celë hi la ijine hnenge hna treqen! Atre hnyawa hi Iehova laka ka lolo catre kowe la meleng la troa pionie!” Ame la itre xan ka tha hane pë hë pionie ka ixatua, tre, hnei angatre hna thele troa catre huliwa atrun ngöne la hna cainöj.
3. Nemene la itre kepine ka upi së troa xome la huliwa ne pionie ka ixatua ngöne la itre treu Maac, me Eiperem me Mei?
3 Maac la ketre treu ka lolo catr, matre troa pionie ka ixatua, ke ijije hmaca tro sa iëne troa eatrëne la 30 maine 50 lao hawa. Ketre, qane e 17 Maac, easa troa nyiqane la ketre huliwa ka ketrepengön ne ihë trotro, me theng la itre atr troa ce atrune me easë la Drai Ne Amekunën e 5 Eiperem. Pine laka nyimutre la itre ka madrine troa akökötrene la huliwa ne cainöje i angatr, ene pe angatre a ajane troa xome la huliwa ne pionie ka ixatua ngöne la itre treu Eiperem me Mei, matre troa eatrëne la 50 lao hawa.
4. Tro nyipunieti a akökötrene tune ka la huliwa ne cainöje i nyipunie, nge nemene la thangane lai?
4 Tune ka matre troa ce wange ngöne la Jidri Ne Hmi Ne La Hnepe Lapa, la aqane tro la ketre e nyipunie a akökötrene la huliwa ne cainöje i angeic ngöne la hneijine ne la Drai Ne Amekunën? (Ite edomë 15:22) Sipone jë koi Iehova troa amanathithine la itre trengecatre i nyipunie. (1 Ioane 3:22) Maine tro pala hi nyipunieti a akökötrene la huliwa ne cainöje i nyipunie, eje hi lai laka tro hë nyipunieti a atrunyi Iehova nge tro fe ha elitrauje la madrine i nyipunie.—2 Kor. 9:6.