Madrine Jë Ngöne La Ijine Hnëkë Göi Drai Ne Amekunën!
1. Nemene la ketre nyine tro sa kuca, matre troa tru la madrine së ngöne la ijine easa hnëkë göne la Drai Ne Amekunën?
1 Aja i nyipunieti fe kö troa hane tru la madrine i nyipunie ngöne la treu Maac, me Eiperem, me Mei? Ame la ketre jën, tre ene la troa cainöje atruny, nge maine ijij, tro fe a hane pionie ka ixatua. Nemene la aqane tro la lue ewekë celë a akökötrene la madrine i nyipunie?
2. Pine nemene laka, maine tro sa cainöj atruny, tre tro fe a hane tru la madrine së?
2 Akökötrene Jë La Madrine i Nyipunie: Hnei Iehova hna xupi së matre tro sa hetre madrine qa ngöne la hna hmi koi Nyidrë, me kapa la xeni ne la u. (Mat. 5:3) Hnei Nyidrëti fe hna xupi së matre tro sa hetre madrine qa ngöne la hna ham. (Ite hu. 20:35) Nge ame la huliwa ne cainöj, tre eje hi lai ka aijijë së troa huliwa koi Akötresie me xatuane la itre atr. Haawe kolo lai a qaja ka hape, maine tro sa catre cainöj, tro hë lai a atraqatr la madrine së. Ketre, maine tro sa cainöj atruny, tro hë së lai a maca ngöne la huliwa celë. Nge ame hë la easa maca trootro, tre tha xou i easë hë troa cainöj. Ketre tro ha tru fe la itre atr hne së hna cainöje kow, nge ma tro hë së lai a nyiqaane ini Tusi me angatr. Hane hi lai itre ewekë ka troa akökötrene la madrine së ngöne la hna cainöj.
3. Pine nemene matre lue treu ka loi koi së la treu ne Maac me Eiperem, göi troa pionie ka ixatua?
3 Lue treu ka loi koi së la treu Maac me Eiperem, ke kola aijijë së troa pionie ka ixatua koi 50, maine 30 pena hi lao hawa. Ketre, qaane e Mecixen 22 Maac, uti hë la Drai Ne Amekunëne e Thupenehmi 14 Eiperem, tro fe së lai a madrine qa ngöne la hna hëne la itre atr troa hane sine la Drai Ne Amekunën. Tro hë la itre ekalesia a enije me madrine e tro la itre atren a ce huliwa “hnene la hni ka cas,” göi troa tro fë pepa kowe la itre götrane hnë cainöje ngön, me umuthe la huliwa ngöne la drai hna sa.—Zef. 3:9.
4. Maine easa ajane troa pionie ka ixatua, nemene la nyine troa kuca?
4 Nyiqaane Hnëkë Jë: Maine tha nyiqaane pala kö nyipunie, pane wange ju la porogarame i nyipunie, nge goeëne ju la itre nyine troa saze, matre ijije tro nyipunieti a cainöj atruny ngöne la cas maine luetre, maine köni treu cili. Thithi fë jë koi Akötresie la ewekë cili. (Iako. 1:5) Ce ithanatane ju fe memine la itre atrene la hnepe lapa i nyipunie, me itre xane fe e hnine la ekalesia. (Ite edomë 15:22) Tro hë nyipunieti lai a öhne laka, ngacama hetre sine meci së, maine tru pena la jol, ngo sisitria kö la madrine hna troa melëne qa ngöne la hna pionie ka ixatua.
5. Nemene hë la thangan elany, e tro sa cainöj atruny ngöne la ijine easa hnëkë göi Drai Ne Amekunën?
5 Aja i Iehova tro la itre hlue i Nyidrëti a madrin. (Sal. 32:11) Maine tro sa isa akötrehnine troa huliwa atruny ngöne la ijijne easa hnëkë göi Drai Ne Amekunën, tro ha kökötre la madrine së, nge tro fe sa amadrinëne la Tretretro së.—Ite edomë 23:24; 27:11.