Itre Xa Jëne Troa Atrunyi Iehova
1. Nemene la hna amekötine ka hnyipixe koi së matre tro sa “ole atrunyi Iehova”?
1 Ame hë lo treu Maac ne la macatre ce, ase hë amekötine laka, tro pala pë hë la itre trejine ka ajane troa pionie, a cainöje koi 30 lao hawa e nöjei Maac me Eiperem, me ngöne la treu hmekune kola traqa troa iwai hnene la atre thupëne la sirkoskripsio. Maine kola traqa hnei nyidrë nyipine lue treu, ijije tro la itre trejin a sipone troa cainöje koi 30 lao hawa ngöne la pane treu, maine hnaaluene treu pena. Ijije tro la itre pionie asë ka ixatua, a hane sine asë la icasikeu hnei nyidrëti hna hnëkëne thatraqane la itre ka pionie lapa, memine la itre ka pionie hut. Kolo lai a hape, maine jole koi së troa cainöje koi 50 lao hawa, ijije pala kö tro sa “ole atrunyi Iehova,” hnene la hna afoa lao pionie së koi 30 lao hawa ngöne la macatre!—Sal. 109:30; 119:171.
2. Nemene la hna aijijëne kowe la itre pionie ka ixatua troa kuca, ngöne la ijine traqa ne la atre thupëne la sirkoskripsio?
2 E Traqa Ha La Atre Thupëne La Sirkoskripsio: Ijije tro la itre trene mekun a pionie ka ixatua, hmekune la ijine kola traqa koi angatr hnene la atre thupëne la sirkoskripsio, nge matre troa itö ithuecatr ngöne la hna cainöje trootro. (Rom. 1:11, 12) Epi tro la itre pionie ka ixatua a sipo drai koi maseta, matre ijije tro angatr a hane ce huliwa memine la atre thupëne la sirkoskripsio ngöne la wiik. Ame la itre xa ka huliwa i maseta ngöne la wiike ka pexej, tre ijije hi tro angatr a sipone kowe la atre thupëne la sirkoskripsio, troa ce cainöje me nyidrë e Mecixen maine Sabath. Nge maine tro fe la itre pionie ka ixatua a hane sine la icasikeu hna hnëkëne thatraqane la itre ka pionie lapa me itre ka pionie hut, tro fe angatr a kepe trenge catre qa ngön!
3. Pine nemene matre ijine ka loi ne tro sa pionie ka ixatua, la ijine troa ihë göi Drai Ne Amekunën?
3 Maac me Eiperem: Ame göi itre ka majemine troa pionie ka ixatua koi 30 lao hawa, hmekune lo ijine atrune la Drai Ne Amekunën, tre ijije tro angatr a nyixane la “huje ne atrunyi Akötesie”! (Heb. 13:15) Kola aijijë së troa pionie ka ixatua e Maac me Eiperem, matre tro sa catre cainöje ngöne la lue treu cili. Ame ngöne la nöjei macatre, hne së hna xome la lue treu, matre troa hëne la itre atr troa hane sine la Drai Ne Amekunën. Ngo pine laka troa tru elanyi la etrune la itre ka catre cainöje ngöne la ijine cili, ijije tro sa ce cainöje me itre xan. Nge thupene hë la Drai Ne Amekunën, tro hë sa tro troa wange hmaca la itre atr ka traqa troa sine lai Drai Ne Amekunën, nge ka madrine troa drenge la cainöje ka ketrepengön. Tune kaa la hni së isa ala cas, tro kö ej a uku së troa pionie ka ixatua, matre melëne hne së la itre ewekë celë ka loi?—Luka 6:45.