Eiperem—Ijine Troa ‘Huliwa, Me Catr’
1 Ame la itre wiike qëmekene me thupene la Drai Ne Amekunën, ke, itre ijine easë lai a pane waipengöne la mele së ngöne la ua. Ketre ijine lai nyine troa lapa mekune la itre hna eatrëne jëne la meci Keriso, me wangatrune la mejiune së hna hamëne hnei Akötresie, a hna aijijëne hnene la madra hna nenge hnei Iesu. Ngöne la nyipunieti a mekune hmaca lo drai 19 Eiperem lo macatre hnapan, nemene la ewekë hnei nyipunieti hna mekun? Hapeu, ijije kö tro nyipunieti a mekune hmaca la itre qëmeke ne lo itre atr ka traqa lo jidri cili? memine la thangane ka loi ngöne la ua ka eje ngöne la Drai Ne Amekunën? me itre mekune ka tru qa hnine la Tusi Hmitrötre hna ithahnatan, me itre thithi hna qaja qa kuhu hni? Maine jë, ka xecie koi nyipunieti e cili troa fe la ejuine la madrine i nyipunie, kowe la ihnimi hna amamane hnei Iehova me Iesu. Tune kaa enehila, hetre thangane kö la itre mekune celë thei nyipunie?
2 Eje hi laka, kola fe amamane hnene la nöje i Iehova la ole i angatr, a thatreine kö angatre troa qejepengön. (Kol. 3:15, 17) Ame lo Eipereme ne lo macatre ka ase hë, ke, hne së hna axeciëne matre tro sa ketre sipu catre ngöne la huliwa ne Keresiano, ke, easa ajane troa amamane la ole së kowe la itre hna amekötine hnei Iehova thatraqane la mele së. Kola elë la etrune la itre ka xome la huliwa ne pionie ka ixatua e celë e Kaledonia, a 30 koi 100 hune lo ketre macatre; kola e la ala 323 lao ka xome la huliwa cili. Ame fe la ijine cili, kolo fe a elë la etrune la itre zonale hna hamëne trongën, me itre vizit, thangane la aqane catre huliwa hnei angatre memine la ekalesia. Drei la etrune la madrine së, ngöne la easë a goeëne la itre atr a nyiqaane etid, nge kola elë la etrune la itre ka sine la Drai Ne Amekunën!
3 Eje hi laka, kola upi së troa cainöje hnene la aqane catre e kuhu hni së la mejiune the së. Celë hi mekune hna cinyihane hnei Paulo aposetolo, kola hape: “Qa ngöne lai eësha huliwa, me cat, ke hne shë hna mejiune koi Akötesie ka shewengönie, lo Ate amelene la nöjei ate asëjëihë, nge sisitia kö angete lapaun.”—1 Tim. 4:10.
4 Ngöne la treu hmekune la Drai Ne Amekunën, tro nyipunieti a amamane tune kaa la mejiune i nyipunie kowe la itre hna amekötine hnei Iehova thatraqane la mele së? Ame lo Eipereme ne lo macatre hnapan, hne së hna traqa kowe la ala 1534 lao itretre cainöje e Kaledonia. Hapeu, ijije kö tro sa sasaithe la etrune celë, ngöne la treu Eipereme ne la macatre celë? Ijije hi tro sa eatrëne la aja cili. Ngo, loi e troa caasi asë la nöjei ka cainöje ngöne la huliwa cili, ene la itre hna bapataisone hë, memine lo itre hna thaa bapataisone petre kö. Ijije fe kowe la itre hnainine ka ala nyim, nge ka ajan, troa hane xome la huliwa ne cainöj. Haawe, maine nyipunieti a mekune troa huliwa me catr ngöne la treu Eipereme celë, ke, hane ju fe mekune la aqane tro nyipunieti a xatuane la itre xan, ene la itre ka xötrei cainöj, memine lo itre trejine ka thaa maca hnyawa kö ngöne la hna cainöje trootro, matre troa hane ce tro me nyipunie ngöne la huliwa cili.
5 Xatuane Jë La Itre Xane Troa Xome Hmaca La Huliwa Ne Cainöj: Maine hetre trejine hnei nyipunie hna atre, a caasi maine lue treu ne thaa cainöje hë angatr, ke, xatua angatre jë me könë angatre troa ce cainöje me nyipunie. Maine hetrenyi ngöne la ekalesia la itre trejine ka nanazije ngöne la ua, ke, loi e tro la itre qatre thupe a catre wange me xatua angatr, matre tro hmaca angatre a xome la huliwa ne cainöje e treu Eiperem.
6 Nyipi ewekë tro asë hi së a sipone lapaane koi Iehova la ua i Nyidrë, matre troa thue catre së ngöne la huliwa i Nyidrë. (Luka 11:13) Nemene la nyine tro sa kuca, matre tro sa kapa la ua cili? Troa e la Wesi Ula i Akötresie hna cinyihane jëne la ua i Nyidrë. (2 Tim. 3:16, 17) Nyipi ewekë fe tro sa “deng la hna ulatine hnei Ua kowe la ite ekalesia,” ngöne la easa sine la faifi lao icasikeu ne la wiik. (Hna ama. 3:6) Ketre ijine la ka ijije troa xatuane la itre ka thaa cainöje lapaa kö, memine lo itre ka nanazije ngöne la ua, matre tro angatre a hetrenyi la itre hna majemine ka loi göi ini, me hane sine pala fe la itre icasikeu. (Sal. 50:23) Loi e tro sa eatrëne la itre mekune celë, easë pala fe a thupëne la mele së ngöne la ua. Ngo, hetre ketre ewekë kö hna thele the së.
7 Hnei Peteru aposetolo hna qejepengöne ka hape, tresieti a hamëne la uati hmitrötre i Nyidrë kowe la “angete denge thenge nyidë.” (Ite Huliwa 5:32) Maine easë fe la itretre drenge thenge, kolo fe lai a hape easa wangatrune la hna amekötin, ene la hna hape, “troa cainöje kowe la nöj, me anyipicine.” (Ite Huliwa 1:8; 10:42) Qa ngöne lai, maine nyipici laka, nyipi ewekë la ua i Akötresie matre tro sa hetre trenge catre troa cainöj, ngo eje hi laka, tro mina fe Iehova a xatua së e hetre aja the së troa amadrinë Nyidrë. Epi tro sa wangatrune la itre pane ewekë hna kuca hnene la atr, ngacama ka co hi, ke, celë hi itre hatrene la aja ka eje thei angeice troa drengethenge Akötresie!
8 Loi e Troa Xatuane La Itre Thöth: Itre keme me thine fe, öhne kö nyipunie laka, hetre aja thene la itre nekö i nyipunie troa qaja la nyipici kowe la itre xaa atr? Angatre kö a hane ce tro me nyipunie troa cainöj? Ka lolo kö la thiina i angatr? Maine eje hi, ke, ue la nyipunieti a luelu? Qaja jë kowe la ketre atrene la Komite Ne Huliwa Ne Cainöje Ne La Ekalesia, nge ce wange ju maine ijije kowe la nekönatre troa hane e angeice fe, ceitune me ketre atre cainöje e treu Eiperem. (Wange ju itus Notre ministère, 99-100.) Loi e tro sa atrehmekune la enyipi ewekëne la aqane tro la haa nekö i nyipunieti a hane catre atrunyi Iehova, ngöne lai treu hmekune la Drai Ne Amekunën.—Mat. 21:15, 16.
9 Hna majemine hnene la ketre thine Keresiano e Amerik, troa xatuane la nekö i eahlo jajinyi matre troa qeje Iehova kowe la itre xaa atr. Ame lo macatre hnapan, ngöne la kola xötrei cainöje hnene la nekönatre jajinyi memine la thine i nyën, ke, hnei nyëne hna amë pe la boroshüre Thele thene la ketre trahmany, nge nyëne a nango qejepengöne ju la itre aliene ej. Nyidrëti a hnyinge ju koi nyëne ka hape: “Ije macatre i hmunë?” Öni nyëne jë hi ka hape: “Seven.” Kola haine hnene la trahmanyi la aqane atreine nyëne ahlëne la aja i nyidrë. Qa ngöne lai, nyidrëti a thele jë troa atre la nyipici, ngo thaa hnei nyidrëti kö hna mekune laka, atreine tro sa melëne ej. Thaa qea ju kö, nge kolo fe hë a hane etidi kowe la trahmany, me föe i nyidrë, me nekö i nyidro jajiny.
10 Nyimutre catre la itre thöth, a itretre cainöje hë angatr, nge easa madrine troa ce cainöje me angatr. Atreine hi tro la itre thöthi celë a xatuane la itre xaa thöthi ka ce xötre me angatr. Ngo, Eipereme fe la ketre ijine ka loi kowe la itre fami, ke troa caasi ngöne la huliwa ka hmitrötr, matre troa acatrene la aqane imelekeu i angatr, me kökötre hnei angatre ngöne la götrane ua. Loi e tro la hene la fami a elemekene la huliwa cili.—Ite edomë 24:27.
11 Loi e Tro Sa Xatuane La Itre Ka Xötrei Atre La Nyipici: Hapeue la itre ka xötrei atre la nyipici hne së hna etidi memin? Hetre ewekë kö hnei angatre hna troa hane kuca, göne la treu Eipereme celë? Maine jë angatre a qaja amamane la aja i angatr, troa qaja la hnei angatre hna inine kowe la itre xaa atr, ngöne la nyipunieti a ce wange la mekene 2, paragrafe 22, maine mekene 11, paragrafe 14, e hnine la itus Atrehmekune. Maine easenyi hë matre fenesi pi nyipunie la itus, ke, loi e troa hnëkë matre troa ithahnatane hnyawane la mekune celë, ngöne la nyipunie a ce wange la mekene 18, paragrafe 8, ene la kola hape: “Ma aja i epuni troa canga qaja la hnei epuni hna inine kowe la itre sinee maine keme me thine i epun, itre sine ce elo i epuni me itre xaa atr ju kö. Maine, ase pena ha epuni nyiqaane cainöje tui Iesu ngöne laka, hnei nyidrëti hna cainöjëne la maca ka loi, ngöne la nöjei ijine ka ijij. (Luka 10:38, 39; Ioane 4:6-15) Tune kaa enehila, ma epuni jë a ajane troa catre ngöne la huliwa cili.” Hapeu, ka eje fe kö la mekune celë kowe la itre atr hne së hna etidin?
12 Hapeue la atr hnei nyipunieti hna etidin, mejiune kö angeice kowe la Wesi Ula i Akötresie? Angeice kö a trongëne la itre trepene meköti qa hnine la Tusi Hmitrötr? Ka ihmeku kö la mele i angeice memine la itre hnei Akötresie hna amekötin? Hane kö angeice sine lapaane la itre icasikeu ne la ekalesia? Hetre ajane kö thei angeice troa nyihluei Iehova Akötresie? Thupene lai, pine u matre thaa xatua angeice pe troa ithahnata kowe la itre qatre thup, matre tro angatre ce wange maine ijiji angeice fe hë troa ketre atre cainöje thaa hna bapataisone petre kö, me ce huliwa me nyipunie e treu Eiperem? (Wange ju la itus Notre ministère, 97-9.) Qa ngöne lai, ijije tro angeice a ketre sipu öhne la aqane xatua angeice hnene la organizasio i Iehova, ngöne la aqane catre i angeice troa nyihluei Iehova.
13 Nyipici laka, nyimenyime la itre xaa hnainine kökötre ngöne la ua hune la itre xan. Haawe, thenge lo hna amekötine ngöne lo Huliwa Ne Baselaia ne treu Juune 2000, götrane 4, paragarafe 5-6, nyimutre la itre hnainine ka etidine hmaca la hnaaluene itus, ke, itre atr ka hetre aja ngöne la qaan, ngo angatre a aja ixatua matre tro angatre a caasi me ce huliwa memine la ekalesia. Loi e tro pala hi sa lapa mekune laka, tro la itre atr ka hetre hni ne ajane a itretre drei Keriso ka nyipici koi nyidrë elany, “ngacama ngöne la itre hnepe drai ka co, maine itre hnepe drai ka tru.” (Ite Huliwa 26:29, MN) Ngo, maine hna wange la itre treu ka nyimutre ne etidi nyipunie memine la ketre atr, ceitune me “itre hnepe drai ka tru,” haawe, ijije kö tro la treu hmekune la Drai Ne Amekunën a aijijëne la hnainin, matre tro angeice a nyiqaane amamane la ejuine la ole i angeice kowe la thupene mele i Keriso?
14 Troa Xatua Angatre Tune Kaa Göi Troa Cainöj: Maine tro sa waipengöne la aqane inine Iesu la itretre drei nyidrë ngöne la hna cainöje trootro, ke, tro sa atrepengöne hnyawa la aqane troa xatuane la itre hnainine matre tro angatre a nyiqaane la huliwa cili. Thaa hnei nyidrëti hmekuje kö hna ithahnata kowe la ka ala nyim, me qaja kowe la itretre aposetolo i nyidrë troa nyiqaane cainöj. Hnei nyidrëti hna pane amamane la enyipi ewekëne la huliwa ne cainöj, me xatua angatre troa catre thith, nge thupene lai, kola hamë angatre la köni ewekë hna amekötine nyine troa trongën: caa sine ce tro, caa teritoare hna athipe kow, me caa maca hna troa qaja. (Mat. 9:35-38; 10:5-7; Mareko 6:7; Luka 9:2, 6) Tro fe nyipunie a kuca tune lai. Ngacama nyipunieti a troa xatuane la sipu nekö i nyipunie, maine ketre hnainin, maine ketre atr pena ka thaa hamë rapore petre kö, ngo loi e troa isa catre troa eatrëne la itre mekune celë hna ajane troa traqa kow.
15 Wangatrune Jë La Aja: Loi e troa amë e kuhu hni ne la atr, la enyipi ewekëne la huliwa ne cainöj. Loi e tro pala hi a hetrenyi la aqane waiewekë ka loi ngöne la huliwa cili. Qaja jë fe la itre hna melëne hnene la ekalesia, ka amamane la hna kuca hnene eje ngöne la huliwa ne cainöj. Melëne jë la aqane waiewekë i Iesu, hna fe amamane ngöne la itusi Mataio 9:36-38. Xatuane jë la atr ka troa cainöje elany, maine pena la atr ka nanazije ngöne la ua matre troa thithi fë la sipu huliwa hnei angeice hna troa kuca ngöne la hna cainöje trootro, ngo memine fe la huliwa ne cainöje e cailo fene hnengödrai.
16 Xatuane Jë La Itre Atr Troa Mekune La Itre Ijine Ka Ijije Ka Nyimutre Matre Troa Cainöj: Qaja jë fe la enyipi ewekëne koi së troa caasi memine la itre atrene la ini tusi së, matre troa ce cainöje trootro. Qaja jë fe la itre ijine easa ithahnata memine la itre sinee së, me itre hne së hna atre, maine pena memine la itre sine huliwa së me itre sine ini së ngöne la ijine mano. Maine easa xomi kar, ke, atreine tro sa thelejëne troa ithahnata memine la itre atrene la kar. Kola mama laka, kola aijijë së troa cainöje e hne së hna ketre sipu nyiqaane la porotrik. Nyipici laka, nyimutre la itre ijine ka nyimutre, tro sa ce thawa la mejiune së koi itre xane “qan’ e kete drai uti hë la kete drai.”—Sal. 96:2, 3.
17 Eje hi laka, maine ijije ke, ka loi kö e tro nyipunie a pane ce cainöje ngöne itre hnalapa trotro memine la ka xötrei cainöj. Maine hetre aja hnei nyipunieti hna mekune troa eatrëne ngöne la huliwa ne cainöje e treu Eiperem, ke, sipo teritoare jë thene la atrekë huliwane lai. Maine hetreny, ke, tro lai a aijijë nyipunie troa xome la nöjei ijine ka ijije troa huliwane hnyawane la teritoar. Hanawange la ketre ceitun, maine nyipunieti a fenesi hna cainöj, maine nyipunieti a xomi loto kowe la itre icasikeu maine ketre götrane pena, ke, pane wange hmaca ju maine hetre atrene jë hë la uma, maine pena traqa ha lo atr hnei nyipunie hna ajane troa vizitën. Maine ijij, ke, loi e troa wange hmaca lai atr, ngo thaa tro pe a aqean, atraqatre kö la eloine la troa kuca tune lai. Tro fe la aqane kuca celë a thue madrine së ngöne la huliwa ne cainöj, me aijijë së troa eatrëne la itre aja së.
18 Hnëkëne Jë La Ketre Maca Ka Lolo: Ketre ewekë tro la ketre atr a ajane troa cainöjëne la maca ne Baselaia, nge ketre mina fe la aqane tro angeice a ketre sipu qaja la aliene ej, ketre jole ka tru kowe la ka xötrei cainöj, maine pena kowe la ketre trejine ka hekö hë thaa cainöj. Nyipi ewekë catre troa xatuane la itre ka xötrei cainöj, me itre ka nanazije ngöne la ua. Tro la itre Icasikeu Ne La Huliwa me itre icasikeu göi troa cainöje trootro a hamë mekune ka ixatua, ngo eje hi laka, nyipi ewekë troa isa hnëkëne la aqane tro fë cainöje i nyipunie.
19 Tro nyipunieti a xatuane tune kaa la itre ka xötrei cainöj, matre troa hnëkë hnyawa? Troa pane nyiqaane tro fë zonal, nge loi e troa hmaloi e troa trotrohnin, nge thaa tro kö a aqean! Qaja jë koi angatre troa pane mekune lo itre ewekë ka traqa hna amë ngöne itre nuvel, a ka troa ahlëne la aja ne la itre atrene la teritoar, nge thupene lai, xome jë la ketre mekune e hnine la itre zonale ka ihmeku memine la itre ewekë cili. Ce amacane jë la aqane tro fë la itre zonal, nge canga huliwane jë ngöne la hna cainöje trootro.
20 Kuca Jë La Hne Së Hna Atreine Matre Troa Elë La Etrune La Itre Atr Ka Troa Caasi Me Easë: Ame lo macatre hnapan, ke, hna sasaithe la 14,8 milio lao atr ka sine la Drai Ne Amekunën e cailo fen. Nge kola e la sikisi lao milio lao ka cainöj. Kolo lai a hape, 8,8 milio lao atr ka hetre hni ne ajan, nge ka traqa kowe la porogarame celë ka ketre pengön, nge angatre a drenge e cili la kola qejepengöne la ketre ini ka tru qa hnine la Tusi Hmitrötr. Hnei angatre hna troa atrepengö së hnyawa, matre kösë hetre thangane ka loi koi angatr. Ala nyimu la angetre qaja aloinyi së, qa ngöne lai, kola kapa hnyawa la huliwa ne canöje e cailo fen, nge angatre fe a nyixölë së qëmekei itre xan. Haawe, itre atr lai nyine troa xatuan, ke angatre fe elanyi lai itre ka troa hane caasi me easë. Nemene la nyine tro sa kuca, matre tro fe angatre a hane kökötre ngöne la ua?
21 Nyimutre la itre hnainine hne së hna isa hëne troa hane sine la Drai Ne Amekunën. Haawe, kolo lai a hape, caa atr e hnine la icasikeu hnei angatre hna atre. Maine ketre atr a kapa la ihë së, ke, qa së la troa kepe angeice hnyawa, me xatua angeice troa kepe thangane hnyawa la porogaram. Pine laka, nyimutre la itre atr ka troa traqa, haawe, loi e troa xatua angeice troa thele göhnë. Hamë Tusi Hmitrötre i angeice jë, me ce goeëne la la nyima së. Sa jë la itre hnyinge hnei angeice hna troa qaja. Troa kökötre la aja thei angeice e hnei nyipunie hna ketre sipu hnehengazo angeic, nge keukawa la aqane kepe angeice hnei nyipunie. Eje hi laka, hnëqa së asë hi la aqane kuca celë—e maine easa öhne la ketre atr ka xötrei traqa, loi e keukawa la aqane tro sa kepe angatr, me hane nango ce porotrike me angatr.
22 Atreine fe troa hetre thangane ka loi ngöne la aqane waiewekë i angeic, e tro angeice a sine la Drai Ne Amekunën. Nge ame la angeice a traqa, ke, kolo jë a amamane koi së laka, ketre atr ka thele la nyipici, nge ijine tro hi së lai a ahlëne la aja thei angeic, troa atrepengöne hnyawa la nyipici. Maine jë tro la aqane qejepengöne së la thupene mel, ene la ketre hna amekötine ka mingöming, a fe la lue meke ne lai atr ka pëkö caa wangatrehmekun, ngöne la ejuine la ihnimi Iehova. Thaa tro kö a jole koi angeice troa öhne laka, ka ketre pengöne kö së—ene laka, itre atr ka hni ka nyipici së, me ka menyike la aqane ithahnata së, me ka hetre ihnim, me metrötr. Thaa ceitu kö la hnë icasikeu së memine la itre uma ne hmi, laka, hna majemine öhne la itre iatr, nge caasi pala hi la itre aqane hmi, ene lo itre hna majemine kuca ngöne la itre ijine cili. Eje hi laka, tro fe la itre ka xötrei sine la ijine cili a öhne laka, kola caasi la itre atr ka isa pengöne aqane mel, nge pëkö hle manie trootro. Atreine hi tro la itre ewekë celë a ketr me ujëne la itre hni angatr.
23 Thupene la Drai Ne Amekunën, ke, loi e tro pala hi a wange me xatuane la itre ka sine la drai cili. Maine hnei nyipunieti hna könëne la ketre atr, ke, hnëqa i nyipunieti troa xatua angeic. Qëmekene troa isa ije, hane ju fe qaja koi angatre la itre xaa icasikeu hna hnen ngöne la Uma Ne Baselaia. Qaja jë fe la taane la cainöje koi nöjei atr, hna troa cile fë. Qejepengöne jë fe la hnë icasikeu göi Ini Tusi Ne La Ekalesia, ka thaa nanyi qa ngöne la hnalapa i angatr. Ngöne la itre drai thupene lai, ke, hamë angatre jë la itus Créateur, nge thuemacanyi angatre jë laka, kola troa ithahnatane la itusi celë göi drai 30 me wiike cili, kola hape, “Nemene La Nyine Tro Sa Atre Göne La Atre Ixupe Qa Ngöne La Itus?” Qaja jë fe la kepine matre kola hnëkëne hnene la ekalesia asë, troa sine la kovasio ne distrik ka calemi hë.
24 Loi e troa ce ithahnatane matre tro nyipunieti a vizitë angatre hmaca, ngöne la hnalapa i angatr. Loi e troa xecie koi nyipunie laka, hetrenyi thei angatre la boroshüre Thele me itus Atrehmekune, matre nyine troa xatua angatre troa atrehmekune la itre ini ka tru, hna hneatrepene qa hnine la Tusi Hmitrötr. Maine thaa angatre pala kö a etid, ke, hnyingë angatre jë maine aja i angatre troa inine la Tusi Hmitrötr. Loi e tro fe a hnyingë angatre maine aja i angatre troa e la boroshüre Les Témoins de Jéhovah, eje a amamane hnyawa la aqane trongene la organizasio. Könë angatre jë fe troa goeëne la video hna hape, Les Témoins de Jéhovah : un nom, une organisation. Wange ju fe matre hane fe atre hnei angeice la itre xaa atrene la ekalesia. Ngöne la itre treu ka troa traqa, the nue angatre pi kö; nge hë angatre jë troa sine la itre icasikeu, ngöne la kola vizitëne la ekalesia hnene la atre thupëne la sirkoskripsio, maine pena ngöne la troa asabele ne sirkoskripsio, maine asabele ka ketre pengöne ka caa drai. Nue angatre jë troa ketre sipu amamane laka “angat’ asë lo hna hnëkëne kowe la mele ka tha ase palua kö”!—Ite Huliwa 13:48.
25 Nemene La Nyine Tro La Qatre Thupe a Kuca: Troa hetre thangane ka loi hna kapa qa ngöne la trenge catre hna hamëne ngöne la huliwa ne cainöje e treu Eiperem, e hna ketre catre hnene la itre qatre thup. Maine ketre atr ka xomiujine nyipunie la ini tus, ke, kuca jë la ketre lisi ne la itre ewekë nyine tro nyipunie a kuca, matre troa xatuane la nöjei atrene la ini tusi nyipunie, matre troa hane caasi ngöne la itre huliwa ka ketre pengön. Hapeu, hetrenyi kö ngöne la gurupe i nyipunie, la itre thöth, maine itre ka xötrei bapataiso, maine ka thaa cainöje lapaa, maine ka nanazije ngöne la ua? Wange hnyawa ju maine hetre ixatua kö hna hamëne hnenela itre keme me thin, maine itre pionie maine qaathei itre xaa trejine pena. Ketre sipu hamë ixatua jë fe koi angatr. Hna sasaithe la 50 lao hawa ngöne la huliwa ne cainöje lo treu Eipereme ka ase hë, hnene la ketre söre ka thaa cainöje lapaa, a lue macatre hë. Nemene la ka xatua eahlo? Öni eahlo ka hape, hna xatua eahlo hnene la itre vizite ka ithuecatre hna kuca hnene la itre qatre thup.
26 Loi e tro la itre qatre thupe me itre drikona a ce huliwa me xecie koi angatre laka, hetrenyi pala hi hnei teritoar, me itre zonal, me itre itus kowe la treu ka troa xulu. Hapeu, ijije kö troa nyi xane la icasikeu göi cainöje trootro ngöne la wiik? Maine eje hi, ke, qaja amamane jë la itre hna amekötine kowe la itretre cainöj. Ketre, ngöne la thithi nyipunie qëmekei nöjei atr, maine ngöne la isa thithi caasi pena, ke, sipo Iehova jë troa amanathithine la treu ne akökötrene së la huliwa ne la Baselaia.—Rom. 15:30, 31; 2 Thes. 3:1.
27 Ame lo treu Eiperem ka ase hë ngöne la ketre ekalesia e Karolina ngöne la götrane ailopi ne la nöj, ke, hna xatuane la itre trejine hnene la itre qatre thup, troa akökötrene la huliwa ne cainöje i angatr. E nöjei wiike ngöne la itre icasikeu, ke, angatre a könëne la itretre cainöje troa lapa mekune me thithi fë, maine ijije tro angatre a xome la huliwa ne pionie ka ixatua. Ngöne la nöjei ijine ka ijij, ke, kola ithahnatane cememine la madrine hnene la nöjei qatre thupe me drikona la treu Eiperem, matre troa ketre treu ka sisitria kö hune la itre xaa treu. Ame la pune lai, ke, 58 koi 100 lao itretre cainöj, memine fe la itre qatre thupe me drikona a ka pionie la treu cili!
28 Madrine Hna Kapa Hnene La Hna Catre Cainöj: Nemene la itre manathithi hna kapa, qa ngöne la hna “huliwa me cat” ngöne la huliwa ne cainöj? (1 Tim. 4:10) Kola cinyihane hnene lo lai itre qatre thup, la aqane catre hnene la ekalesia ngöne la hna cainöje trootro lo treu Eiperem, öni angatre ka hape: “Hna majemine ithahnatane hnene la itre trejine trahmanyi me itre söre la aqane kökötre la ihnimikeu me imelekeu i angatr, ke, angatre petre hi a nyiqaane akökötrene la huliwa ne cainöje i angatr.”
29 Hnene la ketre thöthi trahmanyi ka sine wezipo, hna ketre catre troa akökötrene la huliwa ne cainöje i angeice ngöne la treu Eiperem. Jëne la porogarame hna hnëkëne hnyawan, me ixatua hna hamëne hnei thine i angeic, me itre trejine ngöne la ua, ke, atraqatre la madrine me thangane ka loi hnei angeice hna kapa ngöne la treu ne angeice a pionie ka ixatua. Nemene la thangane lai ngöne la mele i angeic? Öni angeice ka hape: “Eni petre hi a drenge laka ketre trahmanyi ni ka hetre trenge catr.”
30 Thaa luelue kö së laka, Iehova a amanathithine hnyawa la itre ka wangatrune la hnëqa i angatr, ene la troa qaja trongëne la musi Nyidrë. (Sal. 145:11, 12) Ame la easa atrune la ijine Meci Joxu, ke, easa lai a trotrohnine laka, troa mana la itre manathithi ngöne la itre drai elany, qa ngöne la hna catre nyihluei Akötresie. Atraqatre la aja thei Paulo troa hetrenyi la mele ka thaa ase palua kö. Ngo, atre hi angeice laka, thaa ketre ewekë kö lai ka troa traqa xan, hne së hna lapa treqene nge pëkö hne së hna kuca. Hnei angeice hna cinyihane ka hape: “Nge celë hi hnenge hna huliwa kow, kola iele cate thenge la huliwa i nyidë, ate huliwa memine la men’ e kuhu hning.” (Kol. 1:29) Jëne Iesu, hnei Iehova hna aegöcatrë Paulo matre tro angeice a aeatrëne hnyawa la huliwa ne iamele, nge ijije fe tro Nyidrëti a hane xatua së enehila. Hapeu, tro kö nyipunieti a ketre sipu eatrëne lai ngöne la treu Eiperem celë?
[Hna eköhagen götran 3]
Drei La Hnei Nyipunie Hna Troa Xatuan Matre Troa Cainöje e Treu Eiperem?
Nekö i nyipunie ka co?
Ketre hnainin?
Ketre atr ka nanazije ngöne la ua?