Catre Jë Së Kuca La Loi!

¹ Ngöne la easë a easenyi kowe la hneijine Drai Ne Amekunën, tre, nyimutre catre la itre kepin matre tro sa “cate kowe la loi.” (1 Pet. 3:13) Ame la pane kepine lai, tre, ene la thupene mel hna hujën hnei Iesu Keriso. (Mat. 20:28; Ioane 3:16) Hnei Peteru aposetolo hna cinyihane ngöne la mekune cili ka hape: “Tha hna itö nyipunieti kö thupene la ite ewekë ka tro ha hnyeqet, ene la sileva me gol, qa ngöne la thina ka ngazo i nyipunie. . . . ngo loi pe hnene la madra i Keriso ka tru alameken, tune la nekö i mamoe ka pë engazone me ethan.” (1 Pet. 1:18, 19) Tro la aqane ole së kowe la hatrene ihnimi ka tru celë a upi së troa catr kuca la loi, me wangatrehmekune laka hnei Iesu hna “hamë nyidëti kö thatraqai shë, mate tro nyidëti a itö shë qa ngöne la hna shashaithi wathebo asë, me nyihnyawane thatraqai nyidë la nöje hna iëne ka cate kowe la nöjei huliwa ka loi.”​—Tito 2:14; 2 Kor. 5:14, 15.

² Ame ngöne la easë a kuca la nyine amadrinë Iehova, tre, kola lolo la aqane imelekeu së me Nyidrë, nge Nyidrëti a ketre hnimi së me thupë së. Hnei Peteru hna qaja ka hape: “Ame la ate ajane la mele me pi goeëne la ite drai ka loi, . . . loi e tro angeic’ a tiane la ngazo, me kuca la loi; me thele la tingeting, nge xöte thenge ej. Ke eje hune la ite ka meköti la lue xajawa i Joxu, nge ame la lue hnashama I nyidë, te, kola shamatine la ite thithi angat.” (1 Pet. 3:10-12) Ame ngöne la itre drai ka ngazo celë, drei la ketre manathith troa atre laka Iehova a hlemekë së, nge ka thele Nyidrë troa xatua së, me “thupë [së] tune la wene demune meke i nyidrë.”​—Deu. 32:10; 2 A. l. ite jo. 16:9.

³ Ngacama kola ixelë me itre itupath hnene la itre pane keresiano hnei Peteru hna cinyihane kow, ngo kösë eë ka mele la aja ka eje thei angatr, kola upi angatr troa qaja trongën la maca ka loi kowe la nöjei atr asë. (1 Pet. 1:6; 4:12) Ewekë ka eje mina fe thene la nöje i Akötresie enehila. Ngacama easa melën la “ijine ka aköte,” tro la hni ne ole së kowe la loi hna kuca hnei Iehova a upi së troa catr kuca la aja i Akötresie. (2 Tim. 3:1; Sal. 145:7) Loi e tro sa ce wang la itre xaa huliwa ka loi nyine tro sa catr kuca, ngöne la hneijine Drai Ne Amekunën.

⁴ Troa Könën La Itre Xaa Atr Kowe La Drai Ne Amekunën: Ame la ketre aqane tro sa amaman la hni ne ole së kowe la ahnahna ka tru alameken, ene la thupene mel, tre, ene la troa sin la drai ne amekunën la meci Keriso ngöne la nöjei macatre, kola troa atrune ej e drai 16 Eiperem ne la macatre celë, thupene la kola lö la jö. (Luka 22:19, 20) Ame lo macatre 2002, 94 600 lao ekalesia e cailo fen ka hamë rapor ne la etrun la itre ka sin la drai cili, ene laka, ala 15 597 746 la etrun! Hna sasaithe la etrune la itre atr ka sin la Drai Ne Amekunën lo macatre 2001, kösë 220 000 la itre xaa atr ka traqa matre kola elë ngöne la macatre 2002.

⁵ Ijetre la itre ka troa sin la macatre celë? Troa ala nyimu e hne së hna catre troa xatua angatr troa hane icasikeu me easë. Loi e tro sa fejan ngöne la ketre pepa la nöjei atr hne së hna ajan troa könën. Troa canga fejan panën la itre sipu fami epun. Maine thaa ka hmi kö la föi epun, qaja jë la aja ka eje ekuhu hni epun, ene la tro angeic a hane ce sin me epun la drai cili. Hnene la ketre trahmanyi ka thaa hmi kö hna qaja ka hape, hnei angeic hna sin la Drai Ne Amekunën lo macatre hnapan, pine laka angeic a öhne la etrun la drai cili kowe la föe i angeic memine la enyipiewekëne koi eahlo tro angeic a hane sin. Nge hane ju fe amë ngöne lai ipepa, la itre sinee i epun, me itre ka lapa easenyi epun, me itre sine huliwa i epun, maine itre sine ini epun. Nge loi xecie koi epuni laka hnei epuni hna hane könëne fe la itre ka etid me epun

⁶ Thupene la hna nyialien lai ipepa, xomi ijine jë troa könë angatr isa ala caas. Xome jë la itre pepa ne ihë göi Drai Ne Amekunën. Loi e troa cinyihan la itre mataitus ceitun memine lo aqane cinyany hnine la itre itusi së, ketre matre thaa tro kö a jole troa e la drai me hnë troa atrun la Drai Ne Amekunën e kuhu fene la pepa ne ihë matre troa amekunë angatr. Ame la kola easenyi trootro la drai 16 Eiperem, loi e troa amekunën hmaca la itre atr, troa wai angatr ngöne la hnalapa i angatr, maine jëne telefon pena. Xatuane jë së la itre atr ka nyimutre troa traqa ngöne la drai cili ka hmitrötr.

⁷ Xatuane Jë La Itre Ka Sine La Drai Ne Amekunën: Ketre ijine ka ketre pengön la heji ne la Drai Ne Amekunën. Ketre ijine ka ijij koi së troa kapa la itre atr, ene la itre atr ka thaa hane kö traqa kowe la itre icasikeu së. Maine ijij, thele jë troa canga traqa, me lapa aqeany. Thele jë troa hane atrepengöne la itre atr ka xötrei hane sin la icasikeu. Loi e keukawahnin me madrin la aqane ikepe së.​—Rom. 12:13.

⁸ Hapeu, ijije kö troa xatuan la itre ka sine la Drai Ne Amekunën matre tro angatr a kökötre ngöne la ua, jëne la ini Tusi Hmitrötr ngöne la isa hnalapa i angatr? Catre jë troa xom la ëj me itre hnalapa ne la itre ka traqa, nge itre atr hna thaa vizitëne kö, haawe, loi e tro fe a wai angatr. Ijije tro angatr a kökötre ngöne la ua, me hane itretre cainöje hna thaa bapataisone petre kö qëmeken la Drai Ne Amekunën ne la macatre ka troa xulu, e hna xatua angatr cememine la ihnim. Ame la easa vizitën la itre ka sin la Drai Ne Amekunën, loi e könë angatre fe hne së kowe la cainöj ka ketre pengön hna troa hamën e drai 27 Eiperem.

⁹ Ijije Kö Tro Epuni a Hane Pionie Ka Ixatua Ngöne La Hneijine Drai Ne Amekunën? Ame e nöjei macatre, kola upi së hnene la ihnimi së koi Iehova troa catre cainöj ngöne la itre treu ka ketre pengön. Ame la hna kuca e celë, tre kola amamane la trenge catr hna kuca hnene la ekalesia asë troa catre cainöjën la maca ka loi ngöne la hneijin ne meci Keriso, nge hetre thangan hna kapa qa ngön. Ame lo macatre hnapan, ngöne lo treu Maac me Eiperem, kola e la 258 me 119 lao pionie ka ixatua e Kaledonia. Ame la treu Maac, hna elë koi 34 075 lao hawa, me 20 022 lao zonal, me 12 532 lao iwaihmaca hna kuca. Ame la itre ewekë celë, tre, itre ej a nyihatren la trenge catre hna kuca hnene la itre ekalesia asë, ene la troa cainöjën la maca ka loi ngöne la hneijine amekunën la meci Keriso.

¹⁰ Hnene la ketre ekalesia ka 107 lao itretre cainöje me 9 lao pionie lapaa hna qaja ka hape, ketre “treu ka lolo catr” la hnei angatr hna huliwa lo treu Eiperem ka ase hë, ala 53 lao ka pionie ka ixatua, memine fe la nöjei qatre thup me itre drikona asë. Hna eköthe tune kaa la madrin hnene la itre qatre thup, thene la itre ka pionie ka ixatua la treu cili? Hnei angatre hna canga nyiqaane eköth la aja kowe la huliwa cili lo itre treu ka ase hë. Kola kuca la itre icasikeu göi cainöje trootro ngöne la itre hawa ka isa pengöne ngöne la drai, matre troa aijijën la nöjei trejine ne la ekalesia troa hane sin ej. Ame ko itre sine atr, kola ithuecatr koi angatr troa cainöj jëne telefon.

¹¹ Hnene la ketre trejin qatre föe ka 86 lao macatren, nge ka hetre mecin matre thatreine kö tro, hna hane saen kowe la huliwa ne pionie ka ixatua. Ame hmakany, eahlo a nyiqaan la drai me xome la lue hawa ne cainöj ngöne la eahlo e hnine la kecen, thupene lai eahlo a pane mano itre xaa hnepe hawa, nge eahlo a bëeke thupen troa cainöje hmaca jëne telefon. Ame la ketre atr hnei eahlo hna hën, tre, ketre föe ka hnyipi meci föen, nge lue nekö i eahlo trahmany thöth ka hane meci a lue macatre hë la, nge thaa trotrohnine kö eahlo la kepin matre Akötresie a nue la itre akötre cili. Hna cainöje hnyawa koi eahlo me sa la itre hnyinge i eahlo, haawe, hna nyiqaane inine la Tusi Hmitrötr me eahlo. Hetre thangane ka lolo catr hna kapa qa ngöne la cainöj jëne telefon e hej, me itre xaa ijin, matre troa ketr la itre atr ka lapa ngöne la itre batima, maine itre götran, laka jole catr troa cainöje ngön. Tro fe lai a aijijën la itretre cainöj, troa ketr lo itre atr hna thaa öhne kö ngöne la itre hnalapa i angatr ngöne la drai.

¹² Kola nyipun la rapor hnene la itre qatre thup ka hape: “Ketre ijine ka lolo catr koi hun, nge eahuni a kapa madrine la hnëqa me itre manathithi hnei Iehova hna aijijë huni isa ala caas troa kapa.” Maine tro epuni a hnëkë hnyawa, ijije tro la ekalesia i epuni a hane kapa madrin la itre manathithi celë.

¹³ Thele Jë Troa Pexej La Etrun La Itre Trejine Ka Troa Catr Cainöje Trootro Ngöne La Ekalesia i Epun: Tro la ihnimi së koi Akötresie me kowe la atre lapa easenyi së a upi së troa nyipiewekën la nöjei ijin ngöne la nöjei treu, matre troa cainöjën la maca ka loi kowe la itre xaa atr. (Mat. 22:37-39) Loi e tro la itretre thupëne la Ini Tusi Ne La Ekalesia memine la itre ka xatua angatr, a catr sajuën la itre gurupe i angatr ngöne la huliwa ne cainöje e nöjei treu. Ame la ketre jëne ka loi troa eatrëne lai, tre, ene la troa canga wange memine la itre trejin ne la gurup matre troa ce cainöj me angatr. Canga nyiqaane kuca jë lai, ngo the treqene kö la pune la treu troa eatrëne lai mekune cili. Tro lai a aijijë epuni troa hamë ixatua cememin la ihnim kowe la itre trejin.

¹⁴ Hapeu, hetre sine atr kö ngöne la gurup ne ini tusi epuni, laka ka jole catr koi angeic troa cainöj? Maine itre xan a lapa ngöne la itre uma hna kuca thatraqai angatr, maine angatr a umë ngöne la hnalapa i angatr, trotrohnine hi së laka hna tuluthe hi la aqane tro angatr a hane cainöj. Maine tro angatr a nyijëne la itre ijine cili matre troa ahudrumen la lai i angatr, ngacama thaa qea kö, atreine hi troa xatuan la itre ka goeën la itre huliwa ka loi hnei angatr hna kuca, troa hetre hni ne ajan kowe la nyipici. (Mat. 5:16) Loi e troa xecie kowe la itretre thupën la ini tusi laka, atre hi la itre trejine cili ka hape ijije tro angatr a amë la 15 lao menetr ne cainöj ngöne la rapore i angatr. Troa hane ithuecatre kowe la itretre cainöje cili ka mele nyipici, ngöne laka ijij tro angatr a hane hamën la itre hawa ne cainöje i angatr, nge kolo fe a thue madrine i angatr. Kolo fe a meköti la rapor ne cainöj ne la nöje i Akötresie e cailo fen.

¹⁵ Itre Thöth Ka Catre Kuca La Loi! Drei la ketre ithuecatr troa goeën la itre thöth keresiano ka huliwan la trenge catre i angatr ngöne la huliwa i Iehova! (Ite edomë 20:29) Maine ketre thöthi epun, tro epuni a amaman tune kaa la ihnimi epuni koi Iehova, ngöne la itre treu celë ka ketre pengön göne la huliwa ne cainöj?

¹⁶ Maine thaa ketre atre cainöje hna thaa bapataisone petre kö epun, hapeu, ijije kö tro epuni a eatrëne lai aja i epuni ngöne la itre treu cili? Isa hnyinge jë ka hape: ‘Hetrenyi kö theng la atrehmekun ne la nyipici hna nyitrepen hnei Tusi Hmitrötr? Ajane kö ni troa hane saen kowe la huliwa ne Baselaia? Tune kaa la thinang, ketre tulu kö koi itre xan? Atreine kö ni troa sipu amaman la lapauneng, ene la troa qaja kowe la itre xaa atr la maca ka loi? Qaa kö kuhu hning la kola upi ni troa kuca la huliwa cili?’ Maine epuni a kapa la itre hnyinge celë, qaja jë hë la aja i epuni kowe la keme me thine i epuni, troa ketre atre cainöj. Tro la kem me thine i epuni a wang la ketre qatre thup ne la Kometr ne huliwa ne cainöj.

¹⁷ Maine ketre atre cainöje hë epun, ijije kö tro epuni a hane akökötrene la huliwa ne cainöje i epun ngöne lo itre ijine mano ka tru? Nyimutre la itre thöth ka bapataiso ka hane pionie ka ixatua, hnene laka hnei angatr hna hnëkën la ketre porogaram ka lolo nge hna xatua angatre fe hnene la itre kem me thine i angatr me itre xaa trejin. Maine thaa ijiji epuni kö, catre jë troa akökötren la huliwa ne cainöje i epun. Amë jë la itre mekun nyine tro epuni a thel troa aeatrën. Loi e troa aelën la itre hawa, ngo loi mina fe troa thele troa maca la aqane cainöje i epun. Maine jë, loi e troa thele troa amaman la caa xötr ne Tusi Hmitrötr ngöne la kola cainöje trootro ngöne la itre hnalapa, maine maca la aqane kuca la itre vizit, maine nyiqaan la ketre etid, maine cainöj jëne telefon, maine itre xaa jëne cainöje ju kö. Nge hapeue matre hane mekune fe la atre lapa easenyi epun, maine ketre sine ini epun, maine ketre sinee i epuni ka hane traqa me epuni kowe la Drai Ne Amekunën ngöne la macatre celë? Maine tro epuni a catr kuca la itre huliwa i Akötresie, tre, troa hetre thangane ka loi koi epun, ngo tro fe epuni a ithuecatr kowe la itre xaa trejine ngöne la ekalesia.​—1 Thes. 5:11.

¹⁸ Xatuane Jë La Itre Ka Xötrei Atre La Nyipici Troa Kökötr Ngöne La Ua: Ngöne la macatre ne huliwa ka ase hë, hna e la 1 432 lao etid hna kuca e nöjei treu e Kaledonia. Ame hë la pun, tre, nyimutre la itre hnainin ka kökötr ngöne la ua matre hane fe angatr xomi bapataiso. Ngo, qëmeken troa eatrën la aja i angatre cili, nyipi ewekë troa xatua angatr me ini angatr matre tro angatr a hane itretre cainöjën la maca ka loi. Ketre götrane lai ka nyipi ewekë catr ngöne la ini hna hamën kowe la itre ka xötrei atre la nyipici, matre tro angatr a hane itretre xötrethenge Iesu keriso. (Mat. 9:9; Luka 6:40) Hapeu, hetre atr kö hnei epuni hna etid kow ka ajan troa eatrën la aja cili?

¹⁹ Maine tha ijiji epuni kö troa xatuan la hnei epuni hna etidi kow troa kökötr ngöne la ua, thele ixatua jë thene la atre thupën la ini tus maine thene la atre thupën la huliwa. Maine jë, troa könë nyidrë troa hane sine la etid. Jëne la hna melën hnene la itre trejine celë, atreine hi tro angatr a wange la pengön la hnainin ngöne la aqane kökötre i angeic ngöne la ua. Maine jë, tro angatr a hamën la itre mekune nyine ixatua ka troa aijijën la hnainin troa kökötre pala hi ngöne la ua.

²⁰ Maine kola fe amaman hnene la hnei epuni hna etidi kow, la aja i angeic troa hane ketre atre cainöj hna thaa bapataison petre kö, nge epuni a mekun laka ijiji angeice fe hë, haawe, ce ithanatane jë memine la atre thup perezida. Tro nyidrëti a thele matre tro la lue qatre thup a icasikeu me epuni memine la hnainin, matre troa ce wang maine ijiji angeice hë troa hane ketre atre cainöj hna thaa bapataisone petre kö, nge xome jë fe la itre mekune ngöne la götrane 98-9 ne la itus Notre ministère. (Wange ju La Tour de Garde ne 15 Nofeba, 1988, götrane 17.) Maine hna kapa la ajan la hnainin matre troa hane ketre atre cainöj, haawe, loi e troa canga nyiqaan troa ini angeic ngöne la huliwa ne cainöj. Troa thuemacan la ekalesia laka ketre atre cainöje hë angeic, ngöne la angeice a hamën la pane rapor ne cainöje i angeic. Easa mejiun laka tro la itre thauzan lao ka xötrei xom la huliwa ne cainöj, thöth me qatr, a eatrën la aja cili ka tru alien, ngöne la itre treu ka ketre pengöne celë.

²¹ Troa Eatrën La Itre Mekune Ka Lolo Catr e Hna Hnëkën Hnyawa La Porogarame Së: Troa tro loi la itre huliwa së thatraqai Akötresie ngöne la hneijin ne meci Keriso, e hne së hna canga hnëkën la porogarame së. (Ite edomë 21:5) Tru la itre götran nyine tro la itre qatre thup a wange hnyawa.

²² Loi e tro la itre qatre thup a thele troa kuca la itre icasikeu göi cainöje trootro ngöne la wiik me e mecixeni me sabath, matre troa xatuan la ekalesia troa akökötren la huliwa ne cainöje i angatr. Loi e tro la atre thupën la huliwa ne cainöj a elemeken la huliwa, me thele troa thaa jole kowe la itre trejine troa cainöj. Hapeu, ijije kö troa kuca la itre xaa icasikeu göi cainöje trootro e hmahmakany, e hnaipajö hej, maine e heji pena? Loi e troa thuemacan la ekalesia göne la itre hna hnëkën thatraqane la huliwa ne cainöj. Loi e tro fe a afedren la porogaram ngöne la hna athipi pepa ne la ekalesia.

²³ Loi e troa xecie kowe la itre qatre thup laka ase hë hnëkën la itre nyine kuca thatraqane la Drai Ne Amekunën e drai 16 Eiperem. Kolo fe lai a qaja la aqane amekötin memine la itre xaa ekalesia göne la aqane troa xome la Uma Ne Baselaia, me nyidrawane ej, me iën la itre ka troa xeene la itre loto, me itre ka troa tro fë la areto me waina, me aqane troa hetrenyi itre ej. Loi e troa thuemacan la ekalesia göne la traem, me hnë troa atrun la Drai Ne Amekunën, me itre xaa hna saze ngöne la porogaram ne icasikeu thatraqane la wiik. Maine hna canga kukehnin me hnëkën la itre ewekë celë, tre troa “kuca alolone me amekötine la nöjei ewekë asë” ngöne la ijine cili.”​—1 Kor. 14:40.

²⁴ Maine jë tro la itre hene fami a ajan troa xome la hnepe traeme ne la ini tusi angatr me fami i angatr, matre troa ce ithanatan la aqane troa akökötren la huliwa ne cainöje i angatr ngöne la hneijin ne meci Keriso. Hapeu, ijije kö tro la nöjei atren la fami a hane pionie ka ixatua? Maine pena ijije kö tro la fami a xatuan la caasi maine nyimutre e angatr troa xome la huliwa cili? Maine thaa ijiji angatre kö troa eatrën la mekune cili, ahnithe amë jë la itre aja ngöne la ua nyine tro la fami a eatrën matre troa akökötren la huliwa ne cainöje i angatr. Hapeu, hetre thöthi kö ngöne la fami ka aja ixatua troa hane ketre atre cainöj hna thaa bapataisone petre kö? Ije atr hnene la fami i epuni hna troa hën kowe la Drai Ne Amekunën ngöne la macatre celë? Maine troa kuca me trongën la ketre porogaram ka lolo, tre, troa atraqatr la madrin ne la fami epun, nge nyimutre la itre manathith hna troa kapa qa ngön.

²⁵ Xome Hnyawane Jë La Traeme Munëne Pe: Hnei Peteru aposetolo hna cinyihan kowe la itre pane keresiano, me amekunë angatr la enyimenyimen la itre drai, pine laka easenyi hë la pun la fene i angetre Iudra. (1 Pet. 4:7) Ame enehila, kola mama hnene la itre ewekë ka traqa laka easenyi catre hë la pun la fene celë. Kola tro la itre drai, nge loi e troa mama laka ka xecie e kuhu hni së la mekune cili ngöne la aqane mele së. Tune la itretre catre nyihluei Iehova, loi e tro sa hneheen la huliwa ka nyipiewekë catr, ene la troa qaja la maca ka loi.​—Tito 2:13, 14.

²⁶ Enehila hi la ijine troa catr me eatrën la huliwa cili! Pane mekune jë la hnei Iehova hna kuca koi epun, me kowe la fami epun, me kowe la ekalesia. Ngacama thatreine kö tro sa të la itre manathithi ka nyimutre hne së hna kapa qaathei Nyidrë, ngo ijije tro sa atrunyi Nyidrë cememin la hni së ka pexej. (Sal. 116:12-14) Troa amanathithin hnei Iehova la trenge catr hne së hna kuca. (Ite edomë 10:22) Epi tro sa “catr kowe la loi” ngöne la hneijine ka ketre pengöne celë “mate troa atrunyi Akötesie ngöne la nöjei ewekë asëjëihë göi Iesu Keriso.”​—1 Pet. 3:13; 4:11.

[Hna eköhagen götrane page 3]

Etrun La Itre Ka Sin La Drai Ne Amekunën e Cailo Fen

1999 14 088 751

2000 14 872 086

2001 15 374 986

2002 15 597 746

[Hna eköhagen götrane page 4]

Drei La Hnei Epuni Hna Troa Könën Kowe La Drai Ne Amekunën?

□ Itre sipu fami epun me sinee i epun

□ Itre atr lapa easenyi epun, me itre atr hnei epuni hna atre

□ Itre sine huliwa me itre sine ini epun

□ Itre atr hna wange lapaan, me itre hnainin

[Hna eköhagen götrane page 5]

Xatuane Jë La Itre Ka Sine La Drai Ne Amekunën

□ Loi e keukawahnin la aqane ikepe së

□ Troa vizitë angatr

□ Hnyingë angatre jë troa etid me angatr

□ Könë angatre jë kowe la cainöje ka ketre pengön

[Hna eköhagen götrane page 6]

Nemene La Itre Aja i Epuni Hna Ahnith Amë Kowe La Hneijin Ne Meci Keriso?

□ Troa sin la Drai Ne Amekunën hnene la ketre atr hnei epuni hna könën

□ Troa ketre atre cainöje hna thaa bapataisone petre kö

□ Troa eatrëne la itre hawa ngöne la huliwa ne cainöj hna ajane troa traqa kow

□ Troa maca ngöne la ketre jëne cainöj

□ Troa xome la huliwa ne pionie ka ixatua