Catre Pi Së Troa Akökötrene La Aja Ne La Itre Atr Hna Ketr Hnene La Itre Ithuemacanyi Ne La Baselaia Na. 36
1 Hapeu, fenesi hë epuni tro fë lo Itre Ithuemacanyi Ne La Baselaia Na. 36 hna isa athipi koi epun? Eje a pane aijijëne la itre atr asë, troa pane mekune hnyawa la hnyinge celë kola hape: “Thauzane Macatre Ka Hnyipixe—Tune Kaa Fe La Mele i Epuni Elany?” Ame lo kola qëmeke kowe la macatre 2000, nyimutre la itre ewekë hna treqene me ajane catrëne kowe la thauzane macatre ka hnyipixe, ngo thaa eatre pe. Celë hi itre ewekë lai hna ithahnatane hnine la Itre Ithuemacanyi Ne La Basela Na. 36, nge kola amekunë së laka, thatreine kö troa tro loi la itre ewekë ngöne la fene celë. Ame hmekuje hi la thauzane macatre ka troa hamëne la tingetinge memine la mele xetietë hna thele hnene la itre atr, ke Thauzane Macatre Ne Musi Iesu Keriso hmekuje hi. Hna upi së hnene la mejiune së kowe la Baselaia cili, troa tro fë kowe la itre xaa atr la Itre Ithuemacanyi Ne La Baselaia Na. 36.
2 Itre Aqane Kapa La Itre Ithuemacanyi Ne La Baselaia: Hetre thangane catre lo tro fë Itre Ithuemacanyi së hnapan, ngöne laka, atraqatre la madrine së troa ce xome la huliwa cili. Celë hi matre hna cinyihane hnene la bethela ne Canada, göne lo Itre Ithuemacanyi Ne La Baselaia Na. 35, ka hape: “Hna sajuëne hnyawa la huliwa celë hnene la itre trejine memine la itre pionie, nge ketre ithuecatre ka tru la madrine ka eje thei angatre me mele i angatre ngöne lo itre ijine cili.” Troa tune mina fe la madrine i nyipunieti lai, ngöne la ijine tro fë la Itre Ithuemacanyi Ne La Baselaia Na. 36.
3 Kola troa umuthe la tro fë Itre Ithuemacanyi celë ngöne la 17 Nofeba 2000. Hapeu, ase hë epuni kuca asë la itre teritoare i epun? Maine thaa ase hnyawa petre kö, maine jë tro la itre qatre thupe a sipo epuni troa sisedrëne la huliwa cili, uti hë e pune Nofeba.
4 Matre nemene hë la aqane kapa hnene la itre atr, la Itre Ithuemacanyi, ngöne la nöje i epun? Tro jë itre xane a nyialiene lo sine pepa hna thupa sinën, matre sipone la boroshür, Thele, maine tro fe a sipo etid. Ngo ala nyimu catre thene lai itre atr ka drei së lo ange ka ajane troa ithahnatane la thauzane lao macatre, ngo thaa enije pe, kolo hi a lapa uti hë la traqa hmaca la Itretre Anyipici Iehova. Haawe, loi e troa wange hmaca lo nöjei atr asë ka drei së. Eue la ijine ka ijije troa wai angatr? Ene ju fe kö lo lai thupene kola pane xötrei iöhnyi me angatr.
5 Hanawange la aqane kuca ne la itre trejine ngöne la angatre a bëeke hmaca troa wange la itre atr ka kapa la Itre Ithuemacanyi Ne La Baselaia Na. 35. Hna hamëne la caa Itre Ithuemacanyi kowe la ketre trene restaurant. Haawe, hnene lai föe hna haine la maca, me könëne hmaca lai sör. Ene pe hna bëeke hmaca hnene la sör lue drai thupen, me nyiqaane etid me nyidro. Ame e Danemark, ke hna amë pe hnene la ketre trejine la ketre Itre Ithuemacanyi ngöne la ketre hnalapa ka pë atren. Ame ju fe kö lai drai cili, hna thupa hnene la föe atrekë hnalapane lai, lo sine pepa, me iupi fë koi Bethela; nge thupene lai, Bethela pena ha a iupi fë kowe la ekalesia ezin. Qëmekene troa umuthe la wiik, hna cainöje koi eahlo hnene la lue sör, ene pe hna nyiqaane ju la etid, nge hna hane xötrei sine mina fe hnene la föe la icasikeu ngöne la Uma Ne Baselaia!
6 Nemene La Nyine Troa Qaja Ngöne La Easë a Bëeke Hmaca: Ka hmaloi nge jëne madrine la troa wange hmaca la itre atr ka kapa la Itre Ithuemacanyi hne së hna hamën. Ka loi e tro pala hi së a xome trongëne la caa Itre Ithuemacanyi, wanga apaatrene ju hnene lai atr la pepa i angeic. Tupathe ju la itre mekune celë.
7 Thupene la hne së hna ibozu memine lai atr, pane qaja jë ka hape:
◼ “Hnenge hna amë pe lo ipepa hna hape, ‘Thauzane Macatre Ka Hnyipixe—Tune Kaa Fe La Mele i Nyipunieti Elany?’ Hapeu, ajane kö epuni troa atre ka hape, easenyi hë troa nyiqaane la Thauzane Macatre Ne Musi Iesu, musi ka troa hamëne la mele ka loi hnine la Paradraiso e celë fen? Amamane jë la itre iatr ka qaja la Paradraiso ngöne la Itre Ithuemacanyi Ne La Baselaia Na. 36. Ame ngöne la pune ke, kola upi nyipunie troa sipone la caa boroshür, Nemene La Hnei Akötresieti Hna Thele The Së?” Amamane jë la boroshür, fe jë kowe la ini 5, e jë la pane hnying, me paragarafe 1 me 2, nge sipone jë kowe lai atr troa qeje mekune ngön. E jë me ithahnatane la caasi maine lue xötre ne la Tusi Hmitrötr. Maine ijij, wange hmaca ju la ketre hnying, me ketre paragaraf, nge thupene lai, troa isa pui göi troa bëeke matre troa sisedrëne la porotrik.
8 Pine laka, kola troa tro fë ngöne la treu Nofeba, lo boroshür, “Thele” maine itus, “Atrehmekune,” qaja jë ka hape:
◼ “Ame lo traqa ni hnapan, hnenge hna hamë nyipë la caa Itre Ithuemacanyi, hna hape, ‘Thauzane Macatre Ka Hnyipixe Tune Kaa la Mele i Nyipunieti elany?’ Eje a hë nyipë troa hane inine la Tusi Hmitrötr. Eni hi la a bëeke hmaca troa amamane koi nyipë la itus hne huni hna xome nyine ini ngön. Amamane jë la boroshüre Thele, nge goeëne ju ngöne la pun, maine amamane jë pena la itus, Atrehmekune, nge fe jë kowe la götrane 188-9. Hane cahu aqane amamane la aqane mele elanyi ngöne la Thauzane Macatre hna ahnithe hnei Tusi Hmitrötr. Maine easë a ajane troa hane mele hnine la Paradraiso, nyipi ewekë troa hetrenyi la atrehmekune i Akötresie. Eni a sipon, thaa tro kö a qea, eni a ajane troa pane amamane la aqane troa inine la Tusi Hmitrötr.”
9 Hna xatua së hnene la tro fë Itre Ithuemacanyi Ne La Baselaia Na. 36, troa akökötrene la aqane cainöje së, ene pe kola sisitria la aqane anyipicine së. Ketre, kolo mina fe a ahlëne la aja ne la itre atr ka ala nyimu ngöne la teritoare së, troa drei së. Haawe, qa ngöne la aqane catre së troa akökötrene la aja cili, ketre tro fe hë a hetre madrine së troa öhne pala hi la itre atr ka hni ne mamoe, jëne la ixatua i Iehova.—Mat. 10:11; Ite Huliwa 13:48, 49, 52.