Amamane Jë Laka Epuni a Hane Hnime La Itre Atr Ka Drei Epun
1 Easenyi hë matre nyipune pi hë la huliwa ne cainöjëne la Baselaia e cailo fene hnengodrai, thupene la hna apaatrene trije asë la “angete tha’ te Akötesie.” (2 Thes. 1:7-9) Qa ngöne laka, kola hane seseune fe la mele ne la itre xane hnene la nöje i Iehova, haawe, angatre a catre troa trofë la maca ne Baselaia matre troa ketr pala hi la itre atr ka nyimutre.—Zef. 2:3.
2 E nöjei treu, hna e la itre milio lao hawa hna kuca matre troa thele la itre atr ka ajane troa drenge “la loi.” (Is. 52:7) Alanyimu pi hë la itre atr ka kapa la itre zonale La Tour de Garde me Réveillez-vous! ngöne la kola trofë itre ej, maine pena lo boroshüre Nemene La Hnei Akötresieti Hna Thele The Së? Tro la aqane seseune së la itre atr cili a upi së troa akökötrene thei angatre la hnepe aja hne së hna öhne thei angatr.—Ite edomë 3:27.
3 Troa Meköti La Aqane Xomi Not: Troa hetre thangane la huliwa e hna xomi not hnyawa, ene la troa fejane la itre mekune hna ajane troa ithahnatan, me itre itusi hna amë pe. Maine tro epuni a cinyihane la itre ithuemacanyi ngöne la pengöne lai atr, ene la ëje me adresi angeic, me drai me hawa ne ce porotrik, me itusi hna amë, me mekune hna ithahnatan, ke, tro lai a ketre ixatua ka tru koi epuni ngöne la epuni a bëeke troa iwai hmaca. Ketre, maine tro epuni a cinyihane la itre xaa mekune hna qaja hnene lai atr ngöne la xötrei iöhny, ke, atreine hi tro epuni a nango amexeje itre eje ngöne la epuni a bëeke hmaca.
4 Canga Bëeke Jë Troa Wange Hmaca La Itre Vizit: Ala ije la itre atr hnei epuni hna hamë itus kow lo treu hnapan, nge hnei epuni hna tupathe troa wange hmaca? Hapeu, nyimu wiike hë ka paatr, nge thaa iöhnyi pala kö epuni me angatr? Maine nyipici ka hape, epuni a hane seseune la mele i angatre ka epine palua, ke, ewekë lai ka troa upi epuni troa canga bëeke hmaca, thupene luetre maine köni drai, matre troa sisedrëne lo itre hna porotrikën; ketre, ijine petrekö, pine laka, thaa ijije kö troa thëthëhmine la itre mekune hna ce ithahnatan. Maine tro epuni a canga bëeke hmaca troa akökötrene la aja thei angatr, ke, atreine hi tro epuni a thungijëi Satana troa “xulu me xome la wesi ula hna trane thei angat.”—Mareko 4:15.
5 Sisitria Catre La Troa Hnëkë: Maine epuni a ajane troa maca ngöne la ijine troa iwaihmaca, ke, nyipi ewekë tro epuni a hnëkë hnyawa. Hnëkëne jë la aqane tro epuni a nyiqaane la porotrik, qëmekene la troa iwaihmaca. Hna hamëne ngöne la götrane hnapine ne la Huliwa ne Baselaia ne treu eipereme 1997 la itre mekune ka nyimutre ngöne la aqane troa trofë la itre zonale maine pena lo boroshüre Thele, matre hetre thangane ka loi hna troa kapa. Ame la ewekë hnapine hna troa kuca, ke, ene la troa hnehene la itre mekune nyine troa ithahnatane ngöne la kola iwaihmaca. Nemene la nyine troa qaja ngöne la epuni a akökötrene la aja? Troa nyiqaane tuneka la etid?
6 Ngöne la kola troa sisedrëne la porotrik, ene la aqane troa nyidrawane la fene hnengödrai, me kuca matre troa ketre göhnë ka mingöminge hna troa mele ngön, ke, qaja ju ka hape:
◼ “Ngöne lo pane traqa ni, ke, caasi hi lo mekune so laka hetrenyi la itre hnepe ewekë ka tru nyine troa kuca, qëmekene troa paradraiso me tingetinge la fen. Hapeue la mekune i epun, atreine kö tro la itre atr a aeatrëne la hnëqa celë? [Nue pi troa sa.] Kola sipo epuni troa pane goeëne la kepine matre nyipi ewekë tro Akötresie a lö hnine la itre huliwa ne la atr.” E jë la Salamo 37:38. Nge thupene lai, fe jë kowe la ini 5 ne la boroshüre Thele, nge xome jë la itre hnepe hnaewekë hna iëne hnine la paragarafe 4-5 matre troa amamane la aqane tro Akötresie a aeatrëne la hna perofetane celë. Nge hnyingëne ju ka hape, ajane kö angeice troa ini Tusi Hmitrötre jëne la boroshür.
7 Maine hnei epuni hna ithahnatane la Baselaia i Akötresie, nge hnei epuni hna amë la boroshüre “Thele” ngöne la xötrei iöhny, ke, ngöne la kola iwaihmaca, qaja ju ka hape:
◼ “Ame lo porotrike so hnapan, ke, hne so hna ce wange laka, ketre nyipi musi la Baselaia i Akötresie, nge eje a troa amekötine la fene asë. Tusi Hmitrötre a amamane laka, Iesu Keriso la ka troa cilëne la musi cili. Hapeu, atreine kö epuni troa mekune la itre manathithi hna troa kapa, e troa mus hnene la baselaia cili, nge troa cilëne ej hnene lai atr cili?” Nue pi troa sa. Fe jë la boroshüre Thele kowe la ini 6. Xome jë la itre mekune hna iëne ngöne la paragarafe 6-7, memine la iatr ngöne la götrane 13, amamane jë la hna troa kuca hnene la Baselaia thatraqane la nöjei atr elany. E jë la Daniela 2:44, nge hnyingëne ju ka hape, ajane kö troa etid.
8 Maine hnei epuni hna öhne la ketre atr ka wangatrehmekune laka kola fetra la itre jole thene la itre atr qa thene la itre hmi ne fen, ke, ngöne la kola iwaihmaca, hnyinge ju ka hape:
◼ “Hapeu, hane fe kö epuni isa thele la aqane troa öhne la hmi hna kapa hnei Akötresie? [Nue pi troa sa.] Kola hamëne hnene la boroshüre Nemene La Hnei Akötresieti Hna Thele The Së? la itre hatrene nyine wangatrehmekune la nyipi hmi.” Fe jë kowe la ini 13, nge qaja atrune jë la faifi lao mekune laka ame la itre mata itus hna cinyihane aezine ngöne la paragarafe 3-7. Ijije tro epuni a sisedrëne tune la: “Maine öhne hë së la nyipi hmi, ke, nyipi ewekë fe tro së a thele la hnei Akötresie hna ajane the së isa ala caas.” E jë la Ioane 4:23, 24. Hnyingë angeice ju ka hape, ajane kö angeice troa ithahnatane la mekune celë. Fe jë kowe la ini 1 ne la boroshür, nge iamacanyine jë la aqane troa etidi ngön.
9 Ngöne la epuni a iwaihmaca troa sisedrëne la porotrike ka qaja la madrine e hnine la fami, ke, qaja ju ka hape:
◼ “Ngöne lo xötrei iohnyi so, ke, hnenge hna amamai epuni la jëne madrine kowe la fami, laka troa trongëne la eamo qa hnine la Wesi ula i Akötresie, ene la Tusi Hmitrötr. Ngöne la troa isenyine la itre jole ka eje thene la itre fami, hapeue la mekune i epun, Tusi Hmitrötre la ketre itus ka hekö hë, maine thatraqane la hneijine së?” Nue pi troa sa. Amamane jë la itus Connaissance. Fe jë kowe la mekene 2, nge e jë la hna fejane ngöne la paragarafe 13. Xome jë la itre mekune ngöne la paragarafe 3, nge hnyingëne ju ka hape ajane kö troa etid me fami.
10 Maine tro së a xome me thupëne hnyawa la itre not ka meköt, me hnëkë hnyawa, me canga bëeke fe troa akökötrene la aja ne la itre atr, haawe, atreine hi tro së a amamane laka, ketre atr ka ihnimi së, nge celë hi ka troa xatua angatre lai troa xome la gojenyi ne mel.—Mat. 22:39; Gal. 6:10.