Aqane Eköthe La Huliwa e Cailo Fen Asë

NYIMU ewekë hna eköth nyine iothekeun me tro xometrongëne la huliwa ne cainöj ngöne la itre nöj me itre hnapet ka nyimutre, 230 nge hetre munën. Ame la itre hna amekötine göi troa xomiujine la huliwa, tre, ka xulu itre eje qaathene lo Lapa Ne Xomi Meköt, laka, ame la iwahutin, tre, hna hnen e Brooklyn, New York. Kola upe la nöjei macatre la itre qeneqaja hnene la Lapa ne Xomi Meköti kowe la itre iwapicine ne la sasaiatri hna acile ngöne la itre nöje ka nyimutre matre, jëne angatr, ijije troa iöhnyine la itre huliwa nyine kuca. Ngöne la isa iwapicin, hna acile la itre komite troa elemekene la huliwa, ala köni la etrune ngöne itre xan nge nango tru ngöne itre xan, uti hë koi ala seven. Qa i angatre troa ce waipengöne la huliwa ne troa cainöjëne la maca ka loi ngöne la itre nöje hna acili angatre ngön. Ame ngöne lai itre xaa iwapicin, tre, hetrenyi la itre masine ka catrehnine catr nyine feja tus, matre itre wenge itusi ka nyimutre catre a hna fejane ngöne la itre hnepe hawa ka co hi. Ame la nöje hna thupëne hnene la caa iwapicin, tre, hna thawathawa koi distrik, nge hna thawathawa la caa distrik koi nyimu sirkoskripsio. Truedre nge hetre munëne lao ekalesia e caa sirkoskripsio. Qa ne lai atre thupëne la distrik troa wange trongëne la itre sirkoskripsio ne la distrike i angeic. Hetre lue kovasio ne la isa sirkoskripsio e nöjei macatre. Qa ne la atre thupëne la sirkoskripsio troa alua iwai ngöne la caa ekalesia ne sirkoskripsio i angeic e nöjei macatre. Angeice a troa xatuane la angetre Anyipicin matre ce hnëkëne me ce huliwane me angatre la maca ka loi, nyine tro angatre a cainöjëne ngöne la götrane nöje hna athipe troa huliwane hnene la ekalesia i angatr.

Ame la ekalesia memine la Uma Ne Baselaia, tre, celë hi hnë troa eköthe la maca ka loi nyine troa tro fë trongëne kowe la itre atrene la götrane nöje hnei epuni hna mele ngön. Isa caa götran hnë troa cainöje ngön nyine tro la ekalesia a isa huliwan. Hna thawa nyimu hnepëne pe, nge troa huliwane hnei isa caa ka cainöje matre troa iwai me cainöje kowe la nöjei pengöne atr e cili. Ame itre xaa ekalesia, tre, ala xalaithe la itre atren, nge traqa itre xane koi ala 200, nge kola cilëne hnene la itre qatre thupe la isa pengöne hnëqa. Nge ame la atre cainöjëne la maca ka loi, tre, angeice hi la ka nyipi ewekë catr e hnine la organizasio ne la Itretre Anyipici Iehova. Ame asë hi la Itretre Anyipicin, tre, ngacama angatre ju hë a huliwa ngöne la iwahutine la sasaiatri, maine ngöne la ketre iwapicine eje pena, maine hnine pena la itre ekalesia, ngo qa i angatr asë hi isa ala caas troa cainöjëne la maca ka loi kowe la itre xaa atr.

Kola isa iupi fë la etrune la hna cainöj hnene la itre trejine kowe la iwahutine la sasaiatri matre troa fejane itre eje hnine la Annuaire, ene lo itusi hna hnëkëne me iupi fë e nöjei macatre kowe la nöjei götran e cailo fen. Ketre, caa rapor ne hna cainöj hna fejan e nöjei Januare ne la macatre hnine La Tour de Garde. Ame la lue itusi cili, tre, lue ej a amamane la aqane tro fë la huliwa ne cainöj ngöne la macatre, ene la itre hna kuca hnene la Itretre Anyipici Iehova matre troa qeje Nyidrë memine lo Baselaia i Nyidrë hna cilëne hnei Iesu Keriso. Ame lo itre macatre ka ase hë, hna ce sin e nöjei macatre la Drai Ne Amekunën la meci Iesu hnene la ala 16 milio, Itretre Anyipici Iehova me itre hnei angatr hna könën. E nöjei macatre caa miliar lao hawa ne cainöjëne angatre la maca ka loi, nge hna sasaithe la 300 000 lao atr hna bapataison. Ketre itre hadredre milio fe lao itus me zonal hna thawa trongëne koi nöjei atr.