Ini 14
Hna Eköthe Tune Ka La Itre Temoë i Iehova
Hna nyiqaane mama eue la itre Temoë i Iehova ngöne la hnedrai së enehila? (1)
Tune ka la aqane trongene la itre icasikeu ngöne la uma ne Baselaia? (2)
Nemene la aqane huliwane la mani? (3)
Drei la ka cilëmekene la itre ekalesia? (4)
Nemene la itre icasikeu ka tru hna kuca e nöjei macatre? (5)
Nemene la huliwa hna kuca ngöne la iwahutine la itre Temoë i Iehova, me ngöne la itre wapicine ej? (6)
1. Hna nyiqaane mama me fetra hnene la itre Temoë i Iehova ngöne la itre macatre 1870. Hna pane hë angatre ka hape, Itretre Ini Tusi Hmitrötr. Ngo, ame hë ngöne lo macatre 1931, ke, hnei angatre hna xome la ëje qa hnine la Tusi Hmitrötr, ene la hna hape, Itretre Anyipici i Iehova. (Isaia 43:10) Ngöne lo itre hnepe ijine kola nyiqane huliwa la organizasio, ke, ala xalaithe hi la itre atren, ngo hna kökötre trootro uti hë la weje la itre milio enehila; angatre a catre cainöje ngöne la 230 nge sine lao nöj.
2. Nyimutre la itre ekalesia ne la itre Temoë i Iehova, ka akönia icasikeu ngöne la wiik. Kola hë epuni fe troa hane sine itre ej. (Heberu 10:24, 25) Tusi Hmitrötre la sipu trepene la itre ini hnei angatre hna hamën. Hna nyiqaane me nyipune la itre icasikeu, hnei thith. Hna nyimane fe la “nöjei nyima ne ua” ngöne la itre ijine icasikeu. (Efeso 5:18, 19) Thaa hna nyi thupene kö la troa sine la itre icasikeu, nge pë fe kö hle manie trootro.—Mataio 10:8.
3. Nyimutre la itre ekalesia ka icasikeu, ngöne la uma ne Baselaia. Itre uma lai hna xupe hnene la itre Temoë i Iehova ka saene kowe la huliwa cili, nge ketre, thaa itre uma kö ka tru ejolene troa xup. Thaa tro jë kö epuni a öhne hnine la itre uma ne Baselaia la itre iatr, maine itre kuluse, maine itre xaa ewekë ju kö ka tune lai. Ame la mani hna kapa nyine jiane huliwa, ke, ka xulu qa ngöne la itre ahnahna hna hamëne hnene la itre trejin, thenge la mekuthethewe i angatr. Ame la itre ka ajane troa hamë ahnahna, ke, angatre a kuiëne ngöne la itre boate hna hnëkëne nyine trengene ahnahna.—2 Korinito 9:7.
4. Ngöne la nöjei ekalesia, hetre itre qatre thup, maine itretre thup. Angatre a elemekene la ini hna troa hamëne e hnine la Ekalesia. (1 Timoteo 3:1-7; 5:17) Kola xatua angatr, hnene la itre drikona. (1 Timoteo 3:8-10, 12, 13) Thaa ka draië kö angatr, hune la itre xaa atrene la ekalesia. (2 Korinito 1:24) Pë pena kö ëje hna hamëne koi angatr, nyine tro angatre a draië hune la itre xan. (Mataio 23:8-10) Ketre, thaa isapengöne kö la aqane heetre i angatre memine la itre xan. Nge thaa hna nyi thupe i angatre kö. Atraqatre la aja ne la itre qatre thup, troa thupëne la itre ekalesia ngöne la götrane la ua. Angatre a akeukawane me hamë ixatua, ngöne la itre ijine ngazo.—Iakobo 5:14-16; 1 Peteru 5:2, 3.
5. Hna kuca fe ngöne la nöjei macatre hnene la Itre Temoë i Iehova la itre asabele, maine itre kovasio e nöjei macatre. Ngöne la itre ijine cili, kola traqa itronyi hnene la nöjei Ekalesia, troa kapa la porogarame ka sisitria ne la ini qa hnine la Tusi Hmitrötr. Ketre ewekë hna majemine kuca ngöne la nöjei ijine asabele maine kovasio pena, ene la troa bapataisone la itre atr ka nue angatre troa itretre drei i Iesu.—Mataio 3:13-17; 28:19, 20.
6. Hna eje e Neweiok la iwahutine la itre Temoë i Iehova. E cili la ijilapane la Koleji Sataral, ene lo caa lapa ne lo itre qatre thup, ka maca hnyawa ha ngöne la hnëqa i angatr, nge ka amekötine me thupëne la itre ekalesia asë e cailo fene hnengödrai. Hetrenyi fe la 100 lao wapicine la sasaiatri e celë fene hnengödrai asë. Ame ngöne la itre wapicine cili, ke, kola ixatua hnene la itre trejine ka saene troa kuca la itre itus, me troa iupi fë itre ej. Kola hamëne fe jëne la itre wapicine cili, la itre hna amekötine nyine troa eköthe hnyawa la huliwa ne cainöj. Hapeue matre thaa hane fe epuni wai ijin, troa hane ihamë ngöne la Bethela ka easenyi qa ngöne la hnei epuni hna lapa?