Pine Nemene Matre Hetre Organizasio i Akötresieti Jë?

1. Pine nemene matre eköthe jë Akötresieti ekö la nöje Isaraela?

Hnei Akötresie hna eköthe matre nyi nöje ne la itre matra i Aberahama qatr, me hamëne koi angatre la itre trenge wathebo. Hnei Nyidrëti hna ati ëjene la nöje cili, “Isaraela” nge hna eköthe ej matre troa thupëne la nyipi hmi memine la wesi ula i Nyidrë. (Salamo 147:19, 20) Haawe, kösë hna hnëkë Isaraela matre nyine manathithi kowe la nöjei nöje asë.​—E jë la Genese 22:18.

Hnei Akötresieti hna ië angetre Isaraela matre tro angatr a itretre anyipici Nyidrë. Kola mama jëne la mele i angatr, ka hape, maine tro sa drengethenge la itre wathebo i Akötresie, tro hë së kapa la itre manathith. (Deuteronomi 4:6) Ketre, maine tro la itre xa atr a goeëne me xomi ini qaathene la nöje Isaraela, tro fe hë angatr a hane atre la nyipi Akötresie.​—E jë la Isaia 43:10, 12.

2. Pine nemene matre eköthe jë la lapa ne la itre nyipi Keresiano?

Kola tro la itre ijin, nge tha hna kepe Isaraela hmaca kö hnei Iehova, Nyidrëti pë hë a acile jë la ekalesia i Keresiano nyine hnane la nöj. (Mataio 21:43; 23:37, 38) Ame enehila, kola xome la göhnë i angetre Isaraela hnene la lapa ne la itre nyipi Keresiano, angetre troa anyipici Nyidrë.​—E jë la Itre Huliwa 15:14, 17.

Hnei Iesu hna eköthe la lapa ne la itre nyipi Keresiano me hnëkë angatre troa cainöj me inine la itre atr ne la nöjei nöj asë. (Mataio 10:7, 11; 24:14; 28:19, 20) Celë hi huliwa ka tru hna catre kuca enehila ngöne la hneijin ne la pun, ijine kola troa nyipune la fene ka ngazo celë. Qaane ekö, Iehova petre hi a icasinekeune ngöne la nyipi hmi la itre atr ne la nöjei nöj asë, itre milio la etrun. (Hna Amaman 7:9, 10) Hna eköthe me hnëkëne la lapa ne la itre nyipi Keresiano matre tro angatr a ithuecatrekeu, me ixatuanekeune la itre jol. Casi hi la porogarame ne ini Tusi Hmitrötr hna kapa e cailo fen, nge hna hamëne ngöne la itre ijine icasikeu.​—E jë la Heberu 10:24, 25.

3. Hna nyiqaane tune kaa la Itretre Anyipici Iehova ngöne la hneijine së?

Ame ngöne lo macatre 1870, hnene la Itretre Ini Tusi Hmitrötr, lo ka ala xalaithe hi, hna pane wange hmaca la itre nyipici ne la Wesi Ula hna pane thëthëhmine hë. Trotrohnine hë angatre laka, hnei Iesu hna eköth me hnëkëne la ekalesia i Keresiano troa cainöj, haawe, angatr a hane xome jë fe la ketre huliwa ne cainöjëne la Baselaia e cailo fen. Ame hë lo macatre 1931, hnei angatre hna xome la ëj, Itretre Anyipci Iehova.​—E jë la Itre Huliwa 1:8; 2:1, 4; 5:42.

4. Tune kaa la aqane eköthe me hnëkën la Itretre Anyipici Iehova?

Ame ngöne lo hneijine i Iesu, ke, cile hë la itre ekalesia i Keresiano ngöne la itre nöje ka nyimutre, nge hna elemekene itre ej hnene la lapa ne xomi meköt, lapa ka atrehmekunyi Iesu, He ne la ekalesia. (Itre Huliwa 16:4, 5) Ketre tune mina fe enehila, laka, kola elemekene la Itretre Anyipici Iehova hnene la lapa ne xomi meköt. Celë hi ketre gurup ne la itre qatre thup (itretre thupë mamoe ngöne la ua) ka maca ha troa huliwa; angatr a elemekene la itre Bethela ka ujë itus, me feja itus, me kuca la itre itusi nyine troa inine la Tusi Hmitrötr ngöne la 600 lao qene hlapa. Ej a hamë ithuecatr qaa hnine la Tusi Hmitrötr me itre hna amekötine kowe la 100 000 lao ekalesia ngöne la fen. Ame hnine la itre ekalesia cili, tre, kola xome hnene la itre atr ka macaje hë la hnëqa ne qatre thup. Angatr a thupëne cememine la ihnim la “hna axö mamoe” i Akötresie.​—E jë la 1 Peteru 5:2, 3.

Hna eköthe me hnëkëne la Itretre Anyipici Iehova matre troa cainöjëne la maca ka loi ne la Tusi Hmitrötr me inine la itre atr. Ceitui angatr memine lo itre aposetolo, laka, angatr a cainöje ngöne itre hnalapa trootro. (Ite Huliwa 20:20) Kola thele troa inine la Tusi Hmitrötr memine la itre atr ka ajane la nyipici. Eje hi, thatreine kö tro sa aceitunëne la organizasio ne la Itretre Anyipici Iehova memine cahu lo itre xan. Easë la ketre lapa ka cahae, nge ame la Tretretro së, ke, ka ihnimi Nyidrë. Itre trejine asë hi së itre trahmanyi me föe, easa imekunekeune la itre jol. (2 Thesalonika 1:3) Pine laka hna eköthe me hnëkëne la itre hlue i Iehova matre tro angatr a amadrinë Nyidrë me xatuane la itre xan, haawe, angatr la lapa ne la itre trejin ka madrine atraqatre e celë fen.​—E jë la Salamo 33:12; Itre Huliwa 20:35.