Aqane Eköthe Me Elemekene La Ekalesia

AME ngöne la pane tusi Paulo aposetolo koi angetre Korinito, hnei nyidrëti hna qaja la ketre nyipici ka nyipiewekë catr göi Akötresie, ngöne lo nyidrëti a cinyihane, ka hape: “Tha qa thei Akötesieti kö la menumenu, ngo loi la tingeting.” Nge nyidrëti a qaja fe la pengöne la itre icasikeu ne la ekalesia, me hape: “Kuca alolone jë me amekötine la nöjei ewekë asë.”—1 Kor. 14:33,40.

² Atre hë Paulo ka hape, hetre gomegome e hnine la ekalesia ne Korinito, ene pe nyidrëti a hamëne ju ngöne la qaane la tusi nyidrë, la itre eamo. Hnei nyidrëti hna ithuecatre kowe la itre trejine ne Korinito troa “ca hna ewekë” nge öni nyidrë, loi e “ce hni nyipunie ngöne la mekune ka cas.” (1 Kor. 1:10, 11) Hnene laka, hna traqa la isazikeu hnene la itre jol e hnine la ekalesia, ame hnei Paulo hna hamëne la itre eamo koi angatr. Nyidrëti a xome jë la ngönetrei ne la atr nyine ceitun, me amamane hnyawa la enyipiewekëne la troa cas me ce huliwa. Matre, hnei nyidrëti hna xatuane la itre keresiano asë ne la ekalesia troa ihnimikeu, me imekunekeun, ngacama isa hnëqa i angatre kö. (1 Kor. 12:12-26) Easa trotrohnine laka, troa atreine ce huliwa la itre atren asë la ekalesia, e meköti me lolo la aqane eköth ej.

³ Hna eköthe tune kaa la ekalesia i Keresiano? Drei la atrekë huliwane lai? Nemene la itre xa aqane huliwa hna acil, nge drei la itre ka cilën la itre hnëqa e hnin? Maine tro sa nue la Tusi Hmitrötr troa eatrongë së, tro hë së a kapa la itre mekune ka sa hnyawa la itre hnyinge celë.—1 Kor. 4:6.

HNA EKÖTHE THENGE LA AJA I AKÖTRESIE

⁴ Hna eköthe la ekalesia i Keresiano ngöne lo Penetekos macatre 33 M.K. Nemene la hne së hna atre göne la ekalesia ngöne la ijine cili? Hna eköthe ej me elemekene thenge la aqane ameköti ewekë i Akötresie, maine thenge la aqane musi (qene Heleni, kratos) Akötresie (théos). Ame la lue hnëewekë celë qene Heleni, tre kola mama ngöne 1 Peteru 5:10, 11 nge hna ujëne ka hape, “musi” me “Akötresie.” Kola amamane hnyawa hnene la ewekë ka traqa ekö e Ierusalema, a 2 000 hë lao macatre enehila, laka, hna acil hnei Akötresie la ekalesia ne la itre Keresiano hna iën. (Ite hu. 2:1-47) Nyidrëti la qaane la ekalesia nge lapa i Nyidrë. (1 Kor. 3:9; Efe. 2:19) Kola xötrethenge hnene la itre ekalesia enehila la aqane eköthe me elemekene lo ekalesia ngöne la hneijine la itre pane keresiano.

⁵ Ame ngöne la qaan, tre, ala 120 hi lao atrene la ekalesia. Angatre hi lo itre ka pane kapa la uati hmitrötr, ewekë hna perofetane hë hnei Ioela 2:28, 29. (Ite hu. 2:16-18) Ngo ame ju fe kö la drai cili, kolo fe a hane bapataisone la ala 3 000, me hane nyi atrene la ekalesia ne la itre hna iën. Hnei angatr hna kapa hnyawane la trengewekë göi Keriso, me “cate kowe la hna inine hnei ang’ aposetolo.” Thupene jë hi lai, hnei “Iehova hna nyi xane koi angat’ o drai la ite ka troa mel.”—Ite hu. 2:41, 42, 47.

⁶ Pine laka kola kökötre catr la ekalesia ne la itre hna iën e Ierusalema, ene pe kola eetr hnene la atre huuj ka sisitria; tiqa ha e Ierusalema hnene la ini hna hamëne hnene la itretre dreng. Kola e fe thene la itretre dreng ka hnyipixe lo itretre huuj ka nyimutre, ka hane nyi atrene la ekalesia ne Ierusalema.—Ite hu. 5:27, 28; 6:7.

⁷ Hnei Iesu hna qaja ka hape: “Tro nyipunie a anyipici ni e Ierusalema, me Iuda asë, me Samaria, nge uti hë la cane la fene hnengödrai.” (Ite hu. 1:8) Nge celë hi ewekë lai ka traqa, ngöne laka, thupene lo meci Setefano, hna xulu la ketre icilekeu ka tru e Ierusalema; ene pe kola aisaijene pi la itretre dreng ka mele e cili, a tro Iudra me Samaria. Ngo ame asë hi la nöjei götrane hnei angatr hna tro kow, angatr a catre cainöjëne la maca ka loi me inine la itre atr, a ene mina fe thene lo itretre Samaria. (Ite hu. 8:1-13) Ame fe hë thupene lai, hna nyiqaane cainöjëne la maca ka loi koi angetre ethen, ene lo itre tha hna peritomon. (Ite hu. 10:1-48) Atraqatre catre fe la thangane la hna cainöje me inine la itre atr, pine laka, hetrenyi la itre ekalesia ka hnyipixe hna acil e tröne e Ierusalema.—Ite hu. 11:19-21; 14:21-23.

⁸ Nemene la itre hna hnëkëne ngöne la itre ekalesia matre troa elemeken itre ej thenge la aja i Iehova? Jëne la uati hmitrötre i Akötresie, hna acile la itre qatre thup matre thupëne la hna axö mamoe. Ame ngöne lo kola pane tro hnei Paulo me Banaba troa tro fë la evangelia, hnei nyidroti hna acile la itre qatre thup ngöne la itre ekalesia hnei nyidroti hna wange trongën. (Ite hu. 14:23) Kola qejepengöne hnei Luka ngöne la tusi Ite Huliwa la hna icasikeu hnei Paulo aposetolo, me itre qatre thup ne la ekalesia ne Efeso. Hnei Paulo hna qaja koi angatr, ka hape: “Wai nyipunieti kö, memine la hnënge mamoe asë, hnei uati hmitrötr hna acilë nyipunie nyine itretre thup, troa hiane la ekalesia i Akötresie, hnei Nyidrëti hna itöne thupene la madra ne la Hupuna i Nyidrëti ka cas.” (Ite hu. 20:17, 28, MN) Hna acili angatr troa qatre thup, ke, angatr a trongëne la itre hna amekötine e hnine la Tusi Hmitrötr thatraqane la itre ka ajane la hnëqa cili. (1 Tim. 3:1-7) Hna aijijë Tito, ketre trejin ka ce huliwa me Paulo, troa hane acile la itre qatre thup ngöne la itre ekalesia ne Kerete.—Tito 1:5.

⁹ Kolo palahi a acile trongëne la itre ekalesia, nge kolo palahi a thupëne la ekalesia e cailo fen hnene la itre aposetolo me itre qatre thup ne Ierusalema. Angatre hi lo lapa ne xomi meköt ekö.

¹⁰ Hnei Paulo aposetolo hna cinyianyi kowe la ekalesia ne Efeso, ka hape, tro ha hetrenyi palahi la casi e hnine la ekalesia, e hna ce huliwa memine la uati hmitrötre i Akötresie me lapa palahi fene la musi Keriso Iesu. Celë hi matre nyidrëti a xatuane jë la itre keresiano e cili troa thiina ka ipië, me troa casi palahi la mekun, me mele tingetinge memine asë la itre atrene la ekalesia. (Efe. 4:1-6) Nge nyidrëti a xome jë la Salamo 68:18, me hape, kola eatr thene la itre atr ka macaj hna acil hnei Iehova troa huliwa thatraqane la ekalesia ceitu me itre aposetolo, me itre perofeta, me itretre tro fë evangelia, me itretre thupë mamoe, me itretre hamë ini. Hna aceitunë angatr me itre ahnahna qaathei Iehova; qa i angatr troa acatrene la itre atrene asë la ekalesia matre troa macaj tui Keriso. Celë hi ewekë lai ka amadrinë Akötresie.—Efe. 4:7-16.

KOLA XÖTRETHENGE LA TULU NE LA ITRE PANE KERESIANO EKÖ

¹¹ Ame enehila, casi hi la aqane eköthe la itre ekalesia ne la Itretre Anyipici Iehova. Ceitune itre ej memine la ketre lapa, pine laka, ka casi la itre ekalesia e cailo fen. Nge ame e hnine la lapa cili, tre, itre xa mamoe a xatuan la itre keresiano hna iën hnei uati hmitrötr. (Zaka. 8:23) Hnei Iesu hna aejëne lai, ke, tune lo hnei nyidrëti hna thingehnaeane hë, tro nyidrëti a cememine la itretre drei nyidrë hna iën “ngöne la nöjei drai asëjëihë uti hë la pune la fene hnengödrai.” Kolo palahi a kökötre catre la itre ekalesia enehila. Matre ame la itre atren, tre, hnei angatr hna kapa la maca ka loi i Akötresie, me nue la mele i angatr troa nyihlue i Nyidrë, me xomi bapataiso matre troa itretre drei Keriso Iesu. (Mat. 28:19,20; Mar. 1:14; Ite hu. 2:41) Angatr a atrehmekune laka, Iesu Keriso la “ate thupë mamoe ka sisitia,” lo Taan la hna axö mamoe asë; kola qaja la itre hna iën me “ite xa mamoe.” (Ioane 10:14, 16; Efe. 1:22,23) Kola casi hnene la hna axö mamoe asë ke, angatr a atrehmekune me nyipici kowe la musi Keriso, me drengethenge la “hlue ka nyipici me ka inamacan,” ene lo gojenyi ne thewe xen hna acil hnei Iesu matre troa eatrongë angatr. Epi tro palahi sa mejiune me lapa qale kowe la hlue cili ka nyipici.—Mat. 24:45.

HULIWA NE LA ITRE ASOSIASIO

¹² Hnene la organizasio hna acile la itre asosiasio matre, ijije jë troa thewe xen ngöne ijine ka ijij, nge matre tro fe a cainöjëne la maca ka loi e cailo fen qëmekene troa traqa la pun. Kola isa acile la itre asosiasio thenge la itre wathebo i musi ne la nöj, nge itre ej a ce huliwa. Itre eje lai la ka aijijëne matre cainöjëne jë la maca ka loi e cailo fen.

AQANE EKÖTH LA FILIAL

¹³ Ame la kola eköth la ketre filial, Lapa Ne Xomi Meköt a acile la köni qatre thup troa nyi atrene la Komite Ne Filial, ngo ame itre xa filial hna nyi xa atren. Nge qa i angatr troa thupëne la huliwa hna kuca ngöne la nöj, maine hna kuca pena ngöne la itre nöj hna ahnith kowe la filiale i angatr. Tro la ketre e angatr a xome la hnëqa ne Kordinatör ne la Komite Ne Filial.

¹⁴ Ame la itre ekalesia hna thupën hnene la ketre filial tre, hna ce xawane thenge la itre sirkoskripsio. Ame la etrune la itre sirkoskripsio, tre, hna amekötine thenge la götrane hna mele ngön, me thenge la itre qene hlapa hna ithanatan, me thenge mina fe la etrune la itre ekalesia hna thupën hnene la filial. Hna isa acile la ca atre thupëne la sirkoskripsio. Hna qaja hnyawan e itre xa ijin la huliwa ne la itre qatre thupe cili ka iwai trootro, jëne la itre tusi hna iupi fë koi angatr hnene la filial.

¹⁵ Kola atrehmekune hnyawa hnene la nöjei atren la organizasio, laka, nyine loi koi së asë la itre hna acil e hnine la organizasio. Angatre a metrötrën la itre qatre thupe hna acil, itre ka thupëne la huliwa ngöne la itre filial, me itre sirkoskripsio, me itre ekalesia. Angatr a treqene me ajane la xen hna hamën hnene la “hlue ka nyipici me ka inamacan,” ngöne ijine ka ijij. Ame pena la “hlue ka nyipici” enehila tre, angeic a metrötrëne hnyawa la musi Keriso, me trongëne hnyawa la itre trepene meköti ne la Tusi Hmitrötr, me ujë thenge la hna amekötine hnei Akötresie jëne la uati hmitrötr. Easë asë hi a ce huliwa me cas, matre hetre thangane ka loi hne së hna kapa, tune lo itre pane keresiano ekö. Kola hape: “Hna acile hutine la nöjei ekalesia ngöne la lapaun, me nyi xane ju o drai.”—Ite hu. 16:5.