Mekene Eitr
‘Cile Catre Jë Kowe La Itre Ua Ka Ngazo’
1. Pine nemen matre nyipi ewekë tro sa hmekëne hnyawa la huliwa ne la itre ua ka ngazo?
AME la kola qaja kowe la itre atr ka hape, hetre ua ka ngazo, haawe angatre hi lai a nango pi ihnyimasai ju. Ngo ame pe thaa ijije kö troa ihnyimane lai. Maine tro së a jele nyipicine maine thaa jele nyipicine pena, ngo ame pe hetrenyi la itre ua ka ngazo, nge ame la aja i angatr, tre, ene la troa akötrën la mele ne la nöjei atr. Thaa hna nue pe kö la hlue Iehova ju pë hë. Ohea, angatre hi lo lai pane pi tha ne la itre ua ka ngazo. Kola amamane hnyawa koi së lai hnei Paulo aposetolo, ngöne la kola hape: “Tha eëshë kö a ikuë me ate, ngo ite joxu pe [ka thaa mama koi atr], me itete mus, me ite tane la jidi e celë fen, me ite [“ua,” MN ] ka ngazo ngöne la ite hnë e hnengödrai.” (Efeso 6:12) Ame ngöne la hneijine së, kolo ha catrehnine catr la ikucahmë ne la itre ua ka ngazo, qa ngöne laka ase hë upetriji Satana qaa hnengödrai nge tru la elëhni i angeic ke xalaithe pe hi la itre drai i angeic.—Hna Amamane 12:12.
2. Tune kaa la aqane tro sa hun ngöne la easë a cile kowe la itre ua ka tru trenge catre kö hu së itre atr?
2 Hapeu ijije kö tro sa hun e kola cile koi së hnene la itre ua ka tru trenge catre kö hu së itre atr? Eje hi, ngo tro sa hun e hne së hna amë la lapaune së ka pexej koi Iehova. Nyipi ewekë tro sa drengethenge me trongëne la Wesi Ula i Nyidrë. E tro sa kuca tune lai, aqane tro hi së lai a ananyine la itre thangane ka ngazo hna troa xeni pun hnene la itre atr ka lapa fene la musi Satana, ene la itre akötr ka troa angazon la ngönetrei angatr me itre mekune i angatr, me hni angatr.—Iakobo 4:7.
Itre Tane La Fen e Caha Hnengödrai
3. Drei la hnei Satana hna catre icilekeu memin, nge nemene la aqane kuca i angeic?
3 Iehova a qejepengöne hnyawa la pengöne la fen, tune la aqane goeëne Nyidrëti qaa koho hnengödrai. Hnei Nyidrëti hna aijijë Ioane aposetolo troa meköle goeë Satana kösë ketre “drakona atraqate ka palulu.” Eje a thele jën troa heje ulum matre apaatren la Baselaia Ne La Mesia i Akötresie ngöne la kola troa hnahone eje e hnengödrai lo 1914. Ngo thaa ie ju kö la mekune i Satana, matre angeic a ujë hmaca pena jë kowe la itre ka tro fë trenge ewekën la Baselaia cili e celë fen. (Hna Amamane 12:3, 4, 13, 17) Matre tune kaa ju hë la aqane tro fë i Satana la isi i angeic? Hnei angeic hna nyi huliwan la itre ka ce me angeic e celë fen.
4. Drei la ka hamëne la men kowe la itre musi ne la itre atr, nge easë a atre tune kaa lai?
4 Thupene lai hnei Ioane pena hna öhne la ketre öni ka ses ka sevene lao he nge treen lao jian, nge eje a musi “hune la nöjei tribu asë, me nöjei ate, me nöjei qene hlapa, me nöjei nöj.” Ame lai öni, tre, iahnuen la kuci politik e celë fene hnengödrai asë. Hna qaja mina fe koi Ioane ka hape: “Nge drakona [Satana lo Diabolo] a hamën’ eje [kowe la öni] la mene i nyën, me therone i nyën, me musi atraqat.” (Hna Amamane 13:1, 2, 7) Eje hi laka, Satana la atre hamën la men memine la musi kowe la itre atr e celë fen. Qa ngöne lai, tune la hna cinyihane hnei Paulo aposetolo ka hape, ame la itre nyipi “tane la fen” tre ene hi lo “ite [“ua,” MN ] ngöne la ite hnë e hnengödrai,” angatre hi la ka xomi iujine la musi lo hna cilën hnene la itre atr. Nyipi ewekë troa trotrohnine hnyawa la ewekë cili hnene la itre atr asë ka ajan troa thili koi Iehova.—Luka 4:5, 6.
5. Kola icasikeu koi nemen hnene la itre tane politik ngöne la hneijine së?
5 Ngacama nyimutre la itre tane la itre mus ka sipu selën ka hape, itre ka hmi fe angatr, ngo ame pe pëkö caa nöje ka tru ka trongëne hnyawa la musi Iehova, maine pena troa lapa fene la musi ne la Joxu hnei Nyidrëti hna acil, ene Iesu Keriso. Angatre asë hi a isa sipu kuci musin. Ame enehila, tune la hna qejepengöne hnene la Tusi Hna Amamane kola hape, hetrenyi la “ite [“trenge ewekë,” MN ] ne la nöjei demoni” ka icaasinekeun la itre ka musinën la fen kowe la “ishi ngöne la drai atraqate i Akötesie Kapucatinasë” e Amagedo.—Hna Amamane 16:13, 14, 16; 19:17-19.
6. Pine nemen matre loi e tro sa thupëne hnyawa la aqane tro sa mel, wanga hane jë fe së elanyi hamë ixatua kowe la fene i Satana?
6 Kola trotro tranyi së ngöne la nöjei drai hnene la itre isi, hna axulun la zön hnei kuci politik, maine mani me mo maine hnei hmi pena, kolo itre ewekë lai ka thë la itre lapa e celë fen. Easë a drenge e itre xaa ijine la itre atr a ithanata, angatr a nyixölën la ketre nöj, maine tribu, maine ketre qene hlapa pine laka, itre atrene la zi angatr maine pena itre ka ceitu la aqane mele me angatr. Ame ngöne la itre xaa ijin, tre hane jë fe hi löhnin menun hnene la itre xan, troa hane inyixölë menu. Ngacama hetre kepin maine hetre atr hna nyixölën, ngo ame pe drei la hnei angatr hna kapa draiën? Kola qaja hnei Tusi Hmitrötr ka hape: “Fene asëjëihë a meköle thene la ate ka ngazo.” (1 Ioane 5:19) Haawe, tune kaa la aqane troa kuca matre thaa tro kö a hane ce amenu së fe memine la itre atr cili? Tro hmekuje hi së a kapa ngöne la mele së ka pexej la Baselaia i Akötresie, nge thaa tro pi kö së a hane löhnine menune la itre icilekeu ngöne la fene celë.—Ioane 17:15, 16.
Itre Aqane Nyinyithina Ne La Atre Iangazo
7. Tune kaa la aqane mama la nyinyithina i Satana ngöne la aqane amenune angeic la itre atr hnene la hmi ka thoi?
7 Ame ngöne la mele ne la atr, hnei Satana pala hi hna thele troa ajean la itre atr qa ngöne la nyipi hmi, ene la troa axouenyi angatr jëne la itre trenge ithanata ka akötr maine tro pena a lepi angatr. Hetre itre xaa aqane xami i angeice ka thatha catr, ene la troa iaö me nyinyithina. Haawe, kösë thatre pi kö la itre atr ka hape, angatr a etheny hnine la hmi ka thoi, hna iaö angatr hnei Satana matre tro angatr a mekune ka hape, angatr a nyihlue i Akötresie. Qa ngöne laka paatre kö la nyipi atrehmekune i Akötresie thei angatr, memine la ihnimi kowe la nyipici, haawe kolo jë pe hi a hule la itre atr cili kowe la itre huliwa ne la hmi ka pë alien ngo hna haine pe, maine pena hna ketre jë la hni angatr hnene la itre iamamanyikeu. (2 Thesalonika 2:9, 10) Ame thene la itre ka lö hë kowe la nyipi hmi, loi e tro pala hi së a hmek, pine laka hna qaja lo ka hape, tro “ite xan’ a nue tije . . . , kola jëthenge la ite [“ua,” MN ] ne amenun, me ite ihaji ne la ite demoni.” (1 Timoteo 4:1) Troa traqa tune kaa la ewekë cili?
8. Tune kaa la aqane tro Satana a huli së kowe la hmi ka thoi ngacama easë ju hë a thili koi Iehova?
8 Atre nyinyithina Satana, nge atre hnyawa hi angeice la pengö së. Celë hi matre ame ju hi la itre engazo së, angeice hi lai a xome ju nyine troa amenu së hnen. Matre hapeu, tune kaa la xoue atr the së? Maine eje the së la xoue atr, tro hë së lai a kapa la kola huli së hnene la itre sinee së, maine itre ka lapa ezi së, matre tro sa hane sin la itre hna majemine kuca hnine la hmi ka thoi. Nge tune kaa lo pi draië? Maine ka pi draië së, canga mama hi lai e tro së a drenge akötrën la kola haji së me e kolo pena a thaa hane kapa hnene la itre xan la itre mekune hne së hna catre fë. (Ite Edomë 15:10; 29:25; 1 Timoteo 6:3, 4) Maine jë troa huli së hnene la itre atr ka ‘jiejie la itre hnangenyë së,’ itre ka qaja ka hape, ka loi hi lai e troa isa e la Tusi Hmitrötr me meköti la aqane mel, ngo thaa nyipiewekëne pe lo aqane waiewekë thenge lo tulu hna hamëne hnei Iesu. (2 Timoteo 4:3) Ame koi Satana, ceitune hi la tro së a tro kowe la ketre hmi maine tro pena kö së a lapa hut ngöne la hmi së, ame hi la ka nyipi ewekë koi angeic, tre, thaa tro kö së a hmi koi Iehova tune lo aqane nyitrepene Nyidrë jëne la Wesi Ula i Nyidrë memine la organizasio i Nyidrë.
9. Tune kaa la aqane xome Satana la ce meköle trefën matre traqa pi kowe la hnei angeic hna thel?
9 Ketre, aqane nyinyithina i Satana mina fe la troa ukun la itre atr troa huliwane menun la itre aja ka nyipi ewekë ka eje ngöne la ngönetrei i angatr. Celë hi matre kola kuci ngazo la itre atr e thaa hna faipoipo kö. Haawe nyimutre la itre atr ka trije la thiina ka hetre trepen hnine la Tusi Hmitrötr, ke angatr a mekune ka hape, maine ajane la lue atr ka thaa faipoipo kö troa ce meköle trefën, tre isa qanyi nyidroti kö troa mekun; ame itre xan, tre, maine jë kolo hi a pi amamane ka hape, ka tru fe hë. Nge tune kaa fe itre ka faipoipo hë? Ala nyimu qaathei angatr la angetre nyi xetë. Ame itre xan, tre, ngacama thaa traqa petre kö kowe la nyi xetë ngo angatr a thele troa sei hna cil maine pena troa isa lapa, matre nue jë i angatre jë troa ce mele trefën hmaca pena ha me ketre. Ame la hnei Satana hna thel tre, loi e canga eatre jë itre aja ne ngönetrei ngo thaa nyipi ewekë ju pë hë la itre ethanyin elany, a thaa koi angatre hmekuje kö memine la itre xaa atr, ngo ngöne fe la aqane imelekeu i angatr me Iehova memine la Hupuna i Nyidrë.—1 Korinito 6:9, 10; Galatia 6:7, 8.
10. Nemene la itre aqane nyi jëne Satana la kuci ngazo memine la iakötrë matre troa amenu së?
10 Ame la ketre aja ka eje thene la atr, tre ene la troa kuca la itre nyine amadrinë angeic. Haawe hetre nyine amadrinën la atr nyine loi kowe la ngönetrei i angeic, me mekune i angeic, me hni angeic. Ngo wange pe la isa aqane ujë së ngöne la itre xaa hnepe ijine kuci madrin. Thaa kolo jë kö lo itre ijine Satana lai a thele troa iamenu, matre isazikeu pi la mekuna së me Akötresie? Hanawang la ketre ceitun, atre hnyawa hi së lo, laka Iehova a methinën la kuci ngazo memine la iakötrë. Haawe, maine ngöne la televizio, maine hna wai sinema, maine théâtre pena, tre mama pi hi la itre ewekë ka ngazo cili, hapeu, tro hi së a nue matre goeëne asë jë së la itre ewekë cili? Thaa tro kö sa thëthëhmine laka, ame lo aja i Satana tre ene la troa amenun la itre atr. Celë hi matre angeic a angazon catrën la itre ewekë cili ke easenyi hë matre apaatrenyi angeice pi, nge ketre mina, ame la nöjei “ate thina ka ngazo me itete iaö, tro pala kö angat’ a ngazo, kola amenun, me hna amenu.” (2 Timoteo 3:13; Hna Amamane 20:1-3) Qa ngöne lai, catre pi së troa hmekëne pala hi la itre nyinyithina i Satana.—Genese 6:13; Salamo 11:5; Roma 1:24-32.
11. Tune kaa la aqane tro la atr ka atre la nyipici göne la kuci haze, a kei kowe la ewekë cili e thaa hnei angeice kö hna hmek?
11 Easë mina fe a atre laka ame la atr ka xome la ketre aqane kuci haze, tune la nyi haze, me kuci iöni me ithanata me itre ka mec, tre xele Iehova ma wang, methi Nyidrë la itre ewekë cili. (Deuteronomi 18:10-12) Troa atre hnyawa mina fe laka, thaa loi kö e tro sa wange la itre trene u ne ta me kuci haze, nge thaa tro kö a kepe angatr ngöne la hnalapa së matre troa nyi drösinöeë së memine la uma së. Nge e amamane pi la itre atr cili ngöne televizio maine ngöne ëternet pena, tro kö sa göen maine drei angatr? Maine thaa ka hane fe kö së tro koi gerisör, ngo hapeue lo itre xaa hna majemin, tune lo troa hnö thenyine la wanakoime ne la nekö së medrenge wanga thanatresi pi? Hna qaja fe lo hnei Tusi Hmitrötr ka hape, thaa tro kö a kuci iönin la ketre atr, ngo hapeu ka loi fe kö e troa wange la ketre trene drösinöe matre tro pë hë së a ceitu me hlue i angeic?—Galatia 5:19-21.
12. (a) Tune kaa la aqane xome hnei Satana la miuzik matre troa jonge la he së hnene la itre mekune ka ngazo? (b) Tune kaa la aqane troa amamane hnene la aqane heetre së me aqane isej me aqane ithanata së, laka, easë a piine la aqane mele ne la itre atr ka sis xajawa i Akötresie? (c) Nemene la nyine tro sa kuca matre thaa tro kö sa itre tha ne la atre tra theth, ene Satana?
12 Kola qaja hnei Tusi Hmitrötr ka hape, thaa tro kö a nyine tane porotrike së la kuci ngazo memine la itre huliwa ka sis (cememine la itre mekune ka ngazo e kuhu hni së). (Efeso 5:3-5) Ngo tune kaa kö e sili nyimane jë la itre mekun cili, lolo ju hë la nin nge pi tro së a dreng ngo hapeu tro kö së a nyiman me fian? Hapeu easë kö a hane nyimane la itre nyima cili, laka ame la itre trenge ewekën tre kola ukune la itre atr troa ce meköle trefën nge thaa hna faipoipo pe, maine ka akökötren la ajan la itre atr troa kuci dorog, me itre xaa huliwa ka ngazo ju kö? Maine pena atre hi së laka thaa tro kö sa xome la thiina ne la itre atr ka kuca la itre ewekë ka ngazo cili, ngo hapeue la aqane heetr, me aqane isej, me aqane ithanata i angatr, easë kö thipetrij maine easë hë lapaa hane nango nyitipu angatr? Drei la itre aqane nyinyithina i Satana matre tro së itre atr a kapa la itre aqane mekune i angeic ka ngazo! (2 Korinito 4:3, 4) Maine thaa ajane kö së troa kei ngöne la itre theth hnei angeic hna amë trongën, nyipi ewekë tro sa cile catr wanga ce luuzi pi së memine la fen. Thaa tro kö sa thëthëhmine lo pengöne lo “ite tane la jidi e celë fen,” nge catre pi së troa cile koi angatr wanga troa hane ajojezine la mele së hnei angatr.—1 Peteru 5:8.
Loi e Troa Hmek Matre Troa Hun
13. Ngacama itre atr ka ngazo, nemene la ka aijijë së troa hun qa ngöne la fen hna musinën hnei Satana?
13 Qëmekene tro Iesu a mec, hnei nyidrëti hna qaja kowe la itre aposetolo i nyidrë ka hape: “Cate jë nyipunie, ke ase hë ni apone la fen.” (Ioane 16:33) Atreine fe hi tro angatr a hun. Thupene hë la 60 lao macatre, hna cinyihane hnei Ioane aposetolo ka hape: “Dei la ate cate hune la fen, nga angeic’ ate kapa laka Iesu la Hupuna i Akötesie ?” (1 Ioane 5:5) Troa mama la lapaune cili the së, e hne së hna drengethenge la itre hna amekötine hnei Iesu, me mejiune kowe la Wesi Ula i Akötresie, tune lo hna kuca hnei Iesu. Nemene mina fe la hna thele the së? Tro fe sa qale catr kowe la ekalesia, lo hna musinën hnei Iesu. Ame ngöne la easë a kuca la ngazo, loi e tro sa ietra cememine la hni ka nyipici, me thele tro Iehova a senge la ngazo së jëne la mele hna huujën hnei Iesu. Haawe, ngacama itre atr ka ngazo së nge hne së hna tria, ngo atreine fe hi tro sa hane hun.—Salamo 130:3, 4.
14. E jë la Efeso 6:13-17, nge xome jë la itre hnying memine la itre xötre ne la Tusi Hmitrötr hna hamën ngöne la paragarafe celë, matre troa ce ithanatane la itre thangane ka loi qa ngöne la isa jiane isi.
14 Maine easë a ajan troa hane hun, nyipi ewekë tro sa xetrën la “ite nyine ishi asë qa thei Akötesie,” thaa tro pi kö a wangacone la ketre. Kola sipone matre troa fe la Tusi Hmitrötre i nyipunie ngöne la Efeso 6:13-17, nge e jë la aqane qejepengöne la nyine isi cili. Thupene lai, ame ngöne la kola sa cahu itre hnying, wange jë la aqane troa thupë nyipunie hnene la itre jiane isi cili.
“Hna oteëne la nyipici”
Ngacama atre hi së la nyipici, ngo tune kaa la aqane troa thupë së hnene la hna inine lapaane la Tusi Hmitrötr me thele ewekë hnine ej, memine la hna traqa lapaa pala hi kowe la itre hna icasikeu? (1 Korinito 10:12, 13; 2 Korinito 13:5; Filipi 4:8, 9)
“Ixete ne ishi, ene la thina ka meköt”
Drei la ka acil la itre wathebo ka meköt? (Hna Amamane 15:3)
Amamane jë hnene la ketre ceitun laka, ame la atr ka ena la itre trenge wathebo i Iehova, tre troa hetre ethane lai ngöne la mele i angeic ngöne la götrane la ua. (Deuteronomi 7:3, 4; 1 Samuela 15:22, 23)
“Hna sile la ite tengene hnatrapaca i nyipunie ene la hna hnëkëne la maca ka loi ne tingeting”
Pine nemen matre kola thupë së e ame la itre lue ca së tre, itre eje a tro kowe la itre atr troa qaja la hnei Akötresie hna troa kuca matre troa hetrenyi la tingeting? (Salamo 73:2, 3; Roma 10:15; 1 Timoteo 5:13)
“Pete ene la lapaune”
Maine eje the së la lapaune ka catr, tune kaa la aqane tro sa ujë qëmekene la itre atr ka iathixötrë me thele troa axounyi së? (2 Ite Joxu 6:15-17; 2 Timoteo 1:12)
“Itapete ne la mel”
Tune kaa la aqane troa xatua së hnene la mejiun ne iamele troa neën la theth, ene la tro hi a mele ne thele la itre mo ne ngönetrei? (1 Timoteo 6:7-10, 19)
“Taua ne la Ua”
Nemene la nyine tro së a mejiune kow ngöne la nöjei ijine easë a cil kowe la itre itupath ngöne la götrane la ua ka traqa koi së, maine kowe pena la itre xan? (Salamo 119:98; Ite Edomë 3:5, 6; Mataio 4:3, 4)
Nemene fe la ka nyipi ewekë catr maine easë a ajan troa hun ngöne la easë a isi ngöne la götrane la ua? Tune kaa la aqane troa xome la ewekë cili? Nge thatraqai drei? (Efeso 6:18, 19)
15. Tune kaa la aqane tro sa isi ngöne la götrane la ua?
15 Qa ngöne laka itre sooce i Keriso së, easë la itre atren la ketre trongene isi ka tru a kola isi ngöne la götrane la ua. Maine tro pala hi së a hmek, me huliwane hnyawa la nyine isi ka pexej hna hamëne hnei Akötresie, haawe, thaa tro kö sa hane meci ngöne la isi cili. Ngo tro pena ha së a ixatua kowe la itre xaa ka nyihlue i Akötresie. Tro hë së a hmek me canga tro troa isi, me catre tro fë la maca ka loi ne la Baselaia ne la Mesia i Akötresie, ene lo musi e koho hnengödrai hnei Satana hna catre icilekeu memin.
Revizio
• Pine nemen matre thaa kolo kö a hane sin hnene la itre ka thili koi Iehova, la itre isi ne la fen?
• Nemene la itre xaa aqane nyinyithina hnei Satana hna xom matre troa akeine la itre Keresiano ngöne la götrane la ua?
• Tune kaa la aqane thupë së hnene la nyine isi hna hamën hnei Akötresie, ngöne la isi së ngöne la götrane la ua?
[Iatr ne la götran 76]
Itre nöj a icasikeu göne lo isi e Amagedo