Mekene Naen
Trenge Catr Qa Ngöne La Mejiun Ne La Melehmaca
1. Maine paatre ju la mejiun kowe la melehmaca, troa tune kaa ju pë hë lo itre ka meci hë?
HAPEU hetre sinee i epuni fe kö hnei epuni hna hnim ka meci hë? Maine pë ju melehmaca, eje hi lai laka thatreine hmaca kö troa iöhnyi me angatr elany. Haawe, tro pala pë hë a eje la pengö i angatr tune lo hna qejepengöne hnei Tusi Hmitrötr ka hape: “Tha’te kö la kete ewekë hnei ite ka meci hë, . . . ke pëkö huliwa, me mekun, me wangate hmekun, me inamacan, ngöne la hua eö a tro kow.”—Ate Cainöj 9:5, 10.
2. Nemene la ketre ewekë ka lolo hna aijijën hnene la melehmaca?
2 Hnene la ihnimi ipitö i Iehova matre hnei Nyidrëti hna hnëkën thatraqan la itre atr ka meci hë la melehmaca qa ngöne la mec, matre ijije fe koi angatr la mele ka epine palua. Kolo lai a hape ijije hi tro nyipunie a hetrenyi la mejiun ka troa akeukawan la itre hni nyipunie, mejiune laka, troa iöhnyi hmaca e ketre ijin memine la itre atr hnei nyipunie hna hnim a ka meci hë.—Mareko 5:35, 41, 42; Ite Huliwa 9:36-41.
3. (a) Nemene la itre eloine la melehmaca ngöne la Iehova a troa eatrën la aja i Nyidrë? (b) Eu la kola mama hnyawa ka hape, hetre trenge catre së fe qa ngöne la mejiun kowe la melehmaca?
3 Qa ngöne laka hetre melehmaca, haawe thaa xou së hmaca kö e mec. Ame mina fe la akötre ka traqa kowe la itre hlue i Nyidrë, atreine hi Iehova troa axoxopatren itre ej, ngo jëne la itre akötre cili, Nyidrëti a nue koi Satana troa anyipicine lo mekune ka ngazo hnei angeice ekö hna qaja, lo ka hape, ame la “ite ewekë asë hna hetenyi hnene la ate tro angeic’ a hamëne hnane la mele i angeic.” (Iobu 2:4) Hnei Iesu hna mele nyipici koi Iehova uti hë la mec, haawe, Akötresie a amele nyidrëti hmaca jë matre troa mele e koho hnengödrai. Celë hi matre hnei Iesu hna tro kowe la theron ne la Tretretro i nyidrë e koho hnengödrai, matre troa amamane la aliene ka tru ne la mele i nyidrë, ene la mele ka pexej hnei nyidrë hna huujën nyine iamele kowe la nöjei atr asë. Jëne la melehmaca, tro la itre atren la “hnënge mamoe ka xalaith,” itre ka troa ce musi me Keriso, a hetrenyi la mejiune troa caasi me nyidrë ngöne la Baselaia ne hnengödrai. (Luka 12:32) Ame kowe la itre xan, tre, hetrenyi la mejiune troa melehmaca me troa mele epine palua ngöne la paradraiso e celë fen. (Salamo 37:11, 29) Pine laka “qa thei Akötesie la men ngo tha qa the [së] kö,” haawe, hetre trenge catrene la itre Keresiano asë jëne la mejiun kowe la melehmaca, troa cile kowe la itre itupathi ngöne la angatr a qëmeke kowe la mec.—2 Korinito 4:7.
Nyipi Ewekë Kowe La Lapaune Së Itre Keresiano
4. (a) Nemene la aliene la kola qaja ka hape, ame la melehmaca tre celë hi “wesi ula hnapan”? (b) Nemene la aliene la melehmaca kowe la itre atr ne fen?
4 Kola qaja ngöne Heberu 6:1, 2, la göhnen la melehmaca, ketre ini hna hneatrepen hnyawa hna qaja ka hape, “wesi ula hnapan.” Maine thaa hna nyitrepene ju la lapaune së ngöne la ini cili, thatreine jë kö tro sa hane itre Keresiano ka macaj. (1 Korinito 15:16-19) Ngo eje hi lai laka, kösë isapengöne catr la aqane qejepengöne i Tusi Hmitrötr la melehmaca memine la aqane mekune ne la fen. Haawe, qa ngöne laka thaa thele kö angatr la itre ewekë ne la ua, ene pe tru catre la ka mekune ka hape, pë hmaca ju kö ketre mel, pine laka enehila hi la ijine troa mel. Celë hi matre, angatre pe hi a mele ne kuci madrin. Ame koi itre ka lapa qale catr kowe la hmi itre qaqaa, maine itre hmi ka hane sipu selën ka hape, itre Keresiano fe angatr maine thaa itre keresiano pena kö, tre, angatr a lapaun ka hape, ka mele pe kö la u ngöne la kola meci la atr. Ngo thaa ka ihmeku kö la ini cili memine la hna qaja hnei Tusi Hmitrötr göi melehmaca, pine laka, thaa nyipi ewekë kö troa amelene hmaca la itre atr e thaa hna meci kö la u. Ame la atr ka thel troa ce xome lai lue ini cili, gufa kö la ixatua koi angeic, thaa tro jë kö a akeukan la hni angeic ngo tro pena ha amenun la mekune i angeic. Tune kaa la aqane troa xatuan la ketre atr ka hni ka menyik nge ka ajan troa atre la nyipici?
5. (a) Qëmekene tro la ketre atr a wangatrune hnyawa la melehmaca, nemene la nyine tro angeic a atre? (b) Nemene la itre xötr ne la Tusi Hmitrötr nyine tro nyipunie a xom matre troa qejepengöne la u memine la pengöne la itre ka meci hë? (c) Nemene la nyine troa kuca maine tro la ketre atr a xome la ketre Tusi Hmitrötr, nge kola mama laka ej a ahnuth la nyipici?
5 Qëmekene troa trotrohnine hnyawa hnene la itre atr la pengön la melehmaca, nyipi ewekë troa pane atre hnyawa hnei angatr la aliene la u memine la pengöi itre ka meci hë. Ame ngöne la itre xaa ijin tre, maine tro hi a hamën la itre xaa hnepe xötr matre alaine hnyawa pi la ini cili ngöne la he ne la atr ka pi ajan troa atre la nyipici qa hnine la Tusi Hmitrötr. (Genese 2:7; 1 Korinito 15:45; Ate Cainöj 9:5, 10) Ngo ame ngöne la itre xaa Tusi Hmitrötr enehila maine itre xaa hnepe mekune pena qa hnine ej hna ujën hnene la itre xaa atr, tre, kolo pena ha a ahnuth maine juetrën, maine pena kola he la nyipici göi u. Qa ngöne lai, nyipi ewekë hmaca troa bëeke kowe lo aqane ujëne ekö la itre xötrehnëewekë cili ngöne lo itre qene hlapa hna nyiqaane cinyihane ekö la Tusi Hmitrötr ngön.
6. Tune kaa la aqane tro nyipunie a xatuan la ketre atr troa trotrohnine la pengöne la u?
6 Ame ngöne la Tusi Hmitrötr qene Drehu, tre hna ujën la “u” qa ngöne la hnepe hnëewekë qene Heberu hna hape neʹphesh nge qene Heleni hna hape psy·kheʹ. Ame la itre xaa Tusi Hmitrötr tre thaa hnene fe kö itre eje hna ujëne la itre hnepe hnëewekë cili hnei “u” hmekuj ngo kola ujëne hnei “xupuana,” me “atr,” me “mel.” Ka loi troa ce wange la aqane ujën la Traduction du monde nouveau memine fe la itre xaa Tusi Hmitrötr, matre troa xatuane la hnainin ka hni ka menyik troa atrehmekune hnyawa laka ame lai itre hnepe hnëewekë ngöne la qaan hna ujën hnei “u” tre, thaa kolo kö a qeje itre atr hmekuj, ngo kolo fe a hane qaja la itre öni. Celë hi matre, thaa hna amamane fe kö hnene la itre hnepe hnëewekë cili ka hape, ame la u tre, thatreine kö troa goeën me ketr, nge ka troa lö pe qa hnine la ngönetrei ne la atr ngöne la angeic a mec, matre troa tro kowe la ketre mele ka ketrepengöne pena ha.
7. Tune kaa la aqane tro epuni a qejepengön jëne la Tusi Hmitrötr la pengöne la itre atr e hnine la göhnë hna tro kow hnene la itre atr? me hnine la Gena?
7 Ame la itre hnepe hnëewekë qene Heberu hna hape sheʼohlʹ me qene Heleni hna hape haiʹdes, tre hna ujëne hnine la Tusi Hmitrötr qene Drehu ka hape, “hua” me “hedis,” nge ame göne la hnepe hnëewekë qene Heleni hna hape geʹen·na, tre hna ujën ka hape Gena. (Ate Cainöj 9:10; Ite Huliwa 2:27) Kola amamane hnyawa hnene la Tusi Hmitrötr laka caasi hi la aliene la Hua memine la Hedis, kola qaja la göhnë hna tro kow hnene la itre atr; lue eje asë hi a qaja la göhnen la itre ka mec ngo thaa mele kö. (Genese 37:35; Hna Amamane 20:13) Eje mina fe a qaja laka ijije hi troa mejë hmaca qa hnine la hua, jëne la melehmaca. (Ite Huliwa 2:31) Ngo eje hi lai laka pëkö mejiune ka ijij kowe la itre atr ka tro kowe la gena, nge ketre thaa hna qaja fe kö ka hape, ka tro pala pë hë a mele e cili la u.—Mataio 10:28.
8. Ame ngöne la kola trotrohnine hnene la ketre atr la aliene la melehmaca, kola mama tune kaa lai thangane ngöne la itre mekune me itre huliwa i angeic?
8 Ame hë la kola lualai hnyawa la itre ini cili ngöne la he ne la ketre atr, ene pe angeic fe hë a hane trotrohnine hnyawa la aliene la melehmaca kowe la mele i angeic. Nge angeice fe hë a hane atrehmekune hnyawa la etrun la ihnimi Iehova, ihnimi ka upi Nyidrë troa hnëkëne amë lai ewekë cili ka lolo catr. Xapo ju hi la akötre ne la itre atr ka meci sineen, pine laka hetre mejiune i angatre hë laka tro hmaca ha angatr a iöhnyi ngöne la fene ka hnyipixe i Akötresie. Nyipi ewekë catr troa trotrohnine hnyawa la itre mekune celë, matre troa hane wangatrehmekune la aliene la meci Keriso. Hna atrehmekune hnene la itre Keresiano ne la hneijine i Iesu laka, ka sisitria catr la melehmaca i Iesu Keriso kowe la lapaune ne la Keresiano, nge kola aijijëne fe la itre xaa atr ka meci hë troa mele hmaca. Haawe, hnei angatr hna catre cainöjëne la melehmaca i Iesu, memine la mejiune hna troa kapa elanyi qa ngön. Ketre tune mina fe enehila, laka, ame koi itre ka madrine me hetre hni ne ole kowe la mejiun ne la melehmaca, tre angatr a canga thele troa hane thuemacane la itre xaa atr la nyipici cili ka sisitria.—Ite Huliwa 5:30-32; 10:42, 43.
Kola Xome La ‘Kii Ne Hedis’
9. Nemene la pane aqane huliwane Iesu la “ite ki ne mec me hedis”?
9 Ame asë hi lo itre atr ka troa ce musi me Keriso e koho hnengödrai, tre ka tro asë hi angatr a mec. Ngo atre hnyawa hi angatre lo hnei Iesu hna troa hamën, ngöne laka hnei nyidrëti hna qaja ka hape: “Ase hë ni mec, nge hana wang, mele kö ni epine epine palua, Amen ; nge hetenyi ni la ite ki ne meci me hedis.” (Hna Amamane 1:18) Nemene la aliene la trenge ewekë i nyidrë? Iesu hi lai a qaja la itre ewekë hnei nyidrëti hna sipu melën. Hnei nyidrëti fe hna mec. Ngo thaa hnei Akötresieti kö hna nuetriji nyidrëti e hnine la Hedis. Ame ngöne la hnaakönine drai, hnei Iehova hna sipu amele Iesu hmaca matre troa mele ngöne la götrane la ua, nge hna aijijë nyidrë troa mele epine palua. (Ite Huliwa 2:32, 33; 10:40) Ketre hnei Akötresieti hna hamë Iesu la “ite ki ne meci me hedis” matre troa hane thewe jëne la itre xaa atr matre mele pi angatr qa hnine la itre hua, nge thaa tro hmaca kö a hetre ethane koi angatr la ngazo i Adamu. Qa ngöne laka eje thei Iesu la itre kii cili, atreine hi troa amelene hmaca hnei nyidrëti qa ngöne la mec la itretre dreng ka mele nyipici qaathene la itre ka mec. Tro nyidrëti a pane amelene hmaca la itre atren la ekalesia i nyidrë hna iën hnene la uati hmitrötr, me hamëne koi angatr la ahnahna ka sisitria, ene la mele ka epine palua e koho hnengödrai, tune lo aqane kuca hnene la Tretretro koi nyidrë.—Roma 6:5; Filipi 3:20, 21.
10. Eu la kola amelene hmaca la itre Keresiano hna iën ka mele nyipici?
10 Eu la kola troa amelene hmaca hnengödrai eë la itre Keresiano hna iën ka mele nyipici? Kola amamane hnei Tusi Hmitrötr laka ase hë nyiqaan. Hna qejepengöne hnei Paulo aposetolo ka hape, troa amelene hmaca la itre Keresiano cili ‘ngöne la ijine hlepëti nyidrë,’ hna nyiqaane la hlepëti nyidrë lo macatre 1914. (1 Korinito 15:23) Thupene jë hi la hna mama la hlepëti nyidrë, ame la kola umuth hnene la itre hna iën la mele i angatr e celë fen, pë hmaca kö meköle treqe Joxu hnine la itre hua. Ohea, ame fe hi la angatr a mec, kolo fe hi lai a kapa la ketre mel, matre itre ua pena ha, kösë sameke hi la aqane ujë angatr, “nyipi saqe hi, tune la sameke la alamek.” Drei la madrine ka tru thei angatr qa ngöne laka kola “xöte thenge angat” hnene la itre huliwa i angatr ka loi!—1 Korinito 15:51, 52; Hna Amamane 14:13.
11. Nemene la melehmaca hna hnëkëne kowe la itre atr ka ala nyim, nge tro ej a nyiqaan e eu?
11 Ngo thaa angatre hmekuje kö itre hna iën troa musi e hnengödrai, la itre hna troa amelene hmaca. Qa ngöne laka hna hëne lai ngöne Hna Amamane 20:6 ka hape, “mele hmaca hnapan,” kolo fe lai a amamane laka troa hetre ketre melehmaca. Ene la melehmaca hna troa kapa hnene la itre atr ka troa mele epine palua ngöne la paradraiso e celë fen. Troa traqa eu la melehmaca cili? Kola qaja hnene la tusi Hna Amamane laka, e thupene la troa paatre la “fen me hnengödrai,” ene la fene ka ngazo celë memine la itre ka musinëne ej. Easenyi catre hë la pune la fene celë. Thupene lai, ame hë ngöne la ijine hna sa hnei Akötresie, e cili hi la kola troa nyiqaan la melehmaca e celë fen.—Hna Amamane 20:11, 12.
12. Drei la itre atr hna troa amelene hmaca e celë fen, nge pine nemene matre ketre ewekë lai hne së hna lapa treqen?
12 Drei la hna troa amelene hmaca e celë fen? Ene hi lo itre atr ka mele nyipici koi Iehova nge ka mele ekö qa catr, ene lo itre trahmanyi me föe ka lapaune catr kowe la melehmaca matre thaa hnei angatre kö hna xoue mec matre troa “kapa la troa amelen.” Kolo lai a hape, hnei angatre hna mele nyipici pala hi koi Akötresie, ngacama ame la pune koi angatr qa ngöne la imelekeu cili tre mec. Drei la madrine ka tru elanyi troa hane atre la itre atr cili, me troa hane drenge la aqane qejepengöne angatr lo itre ewekë ka traqa ekö a thaa hna qejepengöne atrune kö hnene la Tusi Hmitrötr! Ame thene la itre ka troa melehmaca e celë fen, tre, Abela, ene lo pane atre anyipici Iehova; Enoka me Noa lue ka catre cainöjën lo maca i Akötresie qëmekene troa Iwë la fen; Aberahama me Sara lo lue ka kapa lo itre angela; Mose, lo hna hamëne kow la Trenge Wathebo hune la Wetre Sinai; itre perofeta ka catr tui Ieremia, ka öhne la kola lepe apaatren e Ierusalema ngöne la macatre 607 M.P.K.,a me Ioane Bapataiso lo atre drenge la Akötresieti a sipu qaja ka hape, Hupuna i Nyidrëti lae Iesu. Nyimutre mina fe la itre trahmanyi me föe ka mele nyipici nge ka meci ngöne la hneijine së, ene la itre drai tixenuë ne la fene celë.—Heberu 11:4-38; Mataio 11:11.
13, 14. (a) Nemene la ewekë ka troa traqa kowe la Hedis me kowe la itre ka mec ka ej thene ej? (b) Drei la itre hna troa amelene hmaca, nge nemene la kepine lai?
13 Thaa kolo hmekuje kö a troa amelene hmaca la itre ka mele nyipici koi Akötresie, hetrenyi fe la itre xaa atr hna troa amelene hmaca, uti hë elanyi la troa pë aliene la itre hua. Kola troa mama la aqane troa pë alien elanyi la itre hua, jëne la aqane tro Iesu a xome lo ‘kii ne Hedis’ thatraqane la itre atr. Hna amamane lai ngöne la ketre ewekë hna meköle goeën hnei Ioane aposetolo, ngöne la nyidrëti a öhne la Hedis “hna kuiën . . . kowe la hneopegejë eë.” (Hna Amamane 20:14) Nemene la aliene la hna ithahnata cili? Kolo lai a hape, troa apaatrene epine palua la Hedis, ene lo hua, hna imeköle treqe hnene la nöjei atr ka mec. Troa paatre palua la hua, nge pë hnyawa ha alien, pine laka thaa itre atr ka hmi hmekuje kö koi Iehova la itre hna troa amelene hmaca, ngo jëne la ihnimi Iesu, nyidrëti mina fe a troa amelene hmaca la itre ka thaa meköti kö. Kola qaja hnyawa koi së hnene la Wesi Ula i Akötresie ka hape: “Tro ha mele hmaca la nöjei ka meköt, me ka tha meköti kö.”—Ite Huliwa 24:15.
14 Pëkö e ange ka thaa meköti kö hna troa amelene göi troa canga ahnëjinëne hmaca. Ame ngöne la fene elanyi ka meköt hna musinën hnene la Baselaia i Akötresie, kola troa xatua angatr troa mele thenge la itre jë i Iehova. Kola amamane hnene la ewekë hna meköle goeën laka, kola troa fe la “tusi ne mel.” Kolo lai a amamane ka hape, ijije fe hi troa hane sija la itre ëje i angatr. Kola troa “isa hnyingë angate thenge la nöjei huliwa i angat” hna kuca thupene lo hna amele angatre hmaca. (Hna Amamane 20:12, 13) Haawe tro ha mama la pengö i angatr ngöne la pun, maine “troa mejë kowe la mel” maine pena troa “mejë kowe la hnëjin.”—Ioane 5:28, 29.
15. (a) Drei la itre hna thaa troa amelene hmaca qa hna mec? (b) Kola upi së troa ue hnene la atrehmekune la nyipici göi melehmaca?
15 Ame la nöjei atr asë ka mec, tre, thaa tro kö a amele angatr asë hmaca. Hnei itre xan e angatr hna kuca la ngazo, ene lo itre ngazo hna thatreine troa seng. Ame la itre atr cili tre, thaa angatre kö a tro kowe la Hedis ngo kowe pe la Gehena, itre ka tro angatr a paatr epine palua. Gojenyine fe lo itre atr lai hna troa lepe apaatren ngöne la “aköte ataqate,” laka easenyi hë. (Mataio 12:31, 32; 23:33; 24:21, 22; 25:41, 46; 2 Thesalonika 1:6-9) Qa ngöne lai, thaa tro pi kö së a wange ahmalohmaloeën la ihnimi Iehova ene la tro Nyidrëti a amelene hmaca la itre ka mec qa hnine la Hedis, kola hape the mele menu kö wanga gufa pi la mejiun kowe la melehmaca. Pëkö melehmaca ka ijije kowe la itre atr ka thele troa icilekeu memine la musi cile i Iehova. Loi e tro la atrehmekune celë a upi së troa amamane la hni ne ole së kowe la ihnimi gufa i Akötresie, ene la troa mele thenge la aja i Nyidrë.
Hna Acatren Hnene La Mejiun Ne La Melehmaca
16. Tune kaa la aqane troa hamë së la ketre trenge catr ka tru hnene la mejiun ne la melehmaca?
16 Ame koi së itre ka lapaun kowe la melehmaca, tre, hetre trenge catre së qa ngöne la mejiune cili. Maine enehila tre, easë hë a qatre trootro, atre hi së laka thatreine kö tro sa thingigojenyin la mec, ngacama tro ju hë së a thele la nöjei pengöne drösinöe göi troa aqean la mel. (Ate Cainöj 8:8) Maine hne së hna nyihlue i Iehova me mele nyipici koi Nyidrë, haawe, atreine hi tro sa mejiune kowe la itre drai elany nge lapa hnyawa la itre mekune së. Atre hi së laka, ame ngöne la ijine hna sa hnei Akötresie, tro Nyidrëti a amele së hmaca. Nge drei kö la elolone la mele elany! Kolo hnei Paulo aposetolo hna qaja ka hape, “la nyipi mel.”—1 Timoteo 6:19; Heberu 6:10-12.
17. Nemene la ka aijijë së troa catre mele nyipici koi Iehova?
17 Kola catr la lapaune së, ke, atre hi së laka hetre melehmaca, nge thaa sihngödre kö koi së la qaan la ewekë ka lolo cili, nge eje a aijijë së troa catr ngöne la lapaun. Ixatua ka tru lai koi së matre ngacama troa thele troa humuthi së hnene la itre ka icilekeu, troa hetre trenge catre së troa catre nyipici pala hi koi Akötresie. Hnei Satana pala hi hna thele troa thahluën la itre atr hnene la xoue mec. Ngo thaa hnei Iesu kö hna xouene la mec. Hnei nyidrë hna mele nyipici koi Iehova uti hë la mec. Jëne la mele hnei nyidrë hna huujën, hnei nyidrëti hna hamën la nyin troa thapa la itre atr qa ngöne la xoue mec.—Heberu 2:14, 15.
18. Nemene la ka xatuan la itre hlue i Iehova matre hlemu jë la aqane mele nyipici angatr koi Akötresie?
18 Qa ngöne laka angatr a lapaune kowe la mele hna huujën hnei Keriso me kowe la melehmaca, haawe, kola hlemu hnyawa laka ka mele nyipici la itre hlue i Iehova. Qëmekene la itre itupath, hnei angatr hna amamane ka hape, tru catre kö la hnei angatr hna hnimi Iehova, hune ‘la hnei angatr hna hnime la itre u i angatr.’ (Hna Amamane 12:11) Hetrenyi angatr la inamacan, ke, thaa hnei angatre kö hna nuetrije la itre trepene meköti ne la itre Keresiano, matre troa kötre mel enehila. (Luka 9:24, 25) Atre hi angatr laka maine tro angatr a meci pine la musi ka pë sane i Iehova, tro kö Nyidrëti a nyijune lai koi angatr jëne la melehmaca. Eje kö thei epuni la lapaune cili? Troa eje thei nyipunie la lapaune cili, e hnei nyipunie hna hnimi Iehova hnene la hni ka pexej me wangatrune hnyawa la sipu aliene la mejiune ka sisitria catr, ene la melehmaca.
[Ithueamacany]
a Ame la aliene la M.P.K., ke, kola hape “Ite macate ka pate pete kö Keriso.”
Revizio
• Pine nemen matre loi e troa pane trotrohnine la alien la u memine la pengöne la itre ka mec hnene la ketre atr qëmekene troa atrehmekune la alien la melehmaca?
• Drei la hna troa amelene hmaca, nge tune kaa la thangane lai atrehmekune cili kowe la mele së?
• Tune kaa la aqane troa acatren la lapaune së hnene la mejiun ne la melehmaca?
[Iatr ne la götran 85]
Iehova a thingehnaean ka hape, troa hetre melehmaca kowe la itre ka meköt me kowe fe la itre ka thaa meköti kö