Mekene Thötrin
Ka Ala Nyimu Atraqatr Qëmekene La Therone i Iehova
1. (a) Nemene la ewekë ka troa pane traqa qëmekene troa nyijune kowe lo ala 144 000 memine lo itre atr ka nyihlue i Akötresie nge paatre petre kö Iesu? (b) Nemene la hna aijijëne kowe la “ka ala nyimu atraqat” ka mele enehila ngöne la hneijine së?
AME la pane ewekë hna hnehengazon hnene la itre atr ka mele nyipici koi Iehova, qaane ju hi lo thei Abela uti hë Ioane Bapataiso, tre, ene la troa kuca la aja i Akötresie ngöne la mele i angatr. Ngo eje hi lai laka, maine meci asë hë angatr, ngo angatr a treqene la troa amele angatre hmaca e celë ngöne la fene ka hnyipixe i Akötresie. Qëmekene troa nyijune kowe lo ala 144 000 ka troa ce musi me Keriso ngöne la Baselaia i Akötresie e hnengödrai, tro mina fe angatr a pane mec. Ngo kolo pë hë a amamane ngöne Hna Amamane 7:9 laka ame ngöne la itre drai hnapin, ene la itre drai tixenuë enehila, tre troa hetrenyi la “ka ala nyimu atraqat” ka xulu qa ngöne la nöjei nöj, thaa tro kö angatr a hane mec, ngo tro angatr a hetrenyi la mele ka thaa ase palua kö e celë fen. Tune kaa fe nyipunie?
Kola Atrehmekune La Ka Ala Nyimu Atraqatr
2. Nemene la aqane trongene la itre ewekë matre trotrohnine hnyawa jë së la pengöne la ka ala nyimu atraqatr hna qaja hnine la tusi Hna Amamane 7:9?
2 Ame ngöne la macatre 1923, tre hna atrehmekune hnene la itre hlue i Iehova ka hape, ame la “ite mamoe” ngöne la ceitun hna hamën hnei Iesu ngöne Mataio 25:31-46 me “ite xa mamoe” hna qaja ngöne Ioane 10:16, tre itre atr lai ka troa mele epine palua e celë fen. Ame ngöne la macatre 1931, tre hnei angatr hna trotrohnine laka ame la itre atr hna qejepengöne ngöne Ezekiela 9:1-11, a hna pele hatren la itre göpadri angatr, tre celë fe itre atr lai ka troa mele e celë fen. Ame hë ngöne la macatre 1935, tre, hnei angatr hna trotrohnine ka hape, ame la ka ala nyimu atraqatr, tre celë fe ketre götrane ne la itre xaa mamoe hna qaja hnei Iesu. Ame hë enehila, tre hna kapa la ka ala nyimu atraqatre cili, ene pe kola e la itre milio la etrune la itre atren.
3. Pine nemen matre ame la xötrehnëewekë hna hape “qëmeke ne la theron,” tre thaa kolo kö lai a qaja la itre atr ka troa elë hnengödrai eë?
3 Ame ngöne Hna Amamane 7:9, tre thaa hna öhne kö la ka ala nyimu atraqatr e koho hnengödrai. Kola cile “qëmeke ne la therone” i Akötresie, thaa kolo kö a hape angatr a tro hnengödrai eë. Ngo kösë ame lai, tre angatre e xajawai Akötresie. (Salamo 11:4) Thaa hna qaja kö la etrune la ka ala nyimu atraqatr hna “tha ’teine kö ketre at e,” thaa angatre kö a troa hane elë hnengödrai eë; ala 144 000 hmekuje hi lao atr hna iën qa la fen matre troa mele e koho hnengödrai, angatre hi lo hna qaja hnei Hna Amamane 7:4-8 me Hna Amamane 14:1-4.
4. (a) Nemene la “aköt atraqat” hna troa mele pe qa ngön hnene la ka ala nyimu atraqatr? (b) Thenge la hna qaja ngöne Hna Amamane 7:11, 12, drei la ka goeën la ka ala nyimu atraqatr me ce thili me angatr koi Akötresie?
4 Kola qaja ngöne Hna Amamane 7:14 göne la ka ala nyimu atraqatr ka hape: “Angate hi la angete tro pi qa ngöne la aköte atraqatr.” Tro angatr a mele pe qa ngöne la ketre ewekë ka ngazo catre kö hune la nöjei ewekë ka traqa ngöne la mele ne la atr. (Mataio 24:21) Ame hë la kola olen me atrunyi Iehova me Keriso qa ngöne la hnei nyidroti hna amele angatr, ene pe tro ha cengöne hë draië asë la itre hna xupe hnei Akötresie ka mele nyipici koi Nyidrë e hnengödrai, me hape: “Amen ; thatraqai Akötresi shë la qaja aloin, me lolo, me inamacan, me ole, me atrun, me men, me cat, epin’ epine palua. Amen.”—Hna Amamane 7:11, 12.
Kola Mama Laka Ijiji Angatr Troa Mele Pe
5. Tune kaa la aqane troa atrehmekune la ewekë hna thele thene la itre atr ka ajane troa hane atrene la ka ala nyimu atraqatr?
5 Ame la iamele ne la ka ala nyimu atraqatr ngöne la ijine akötr atraqatr, tre Akötresieti hi lai a ujë thenge la itre ewekë hnei Nyidrëti hna amekötin. Hna ithanatane hnyawa hnine la Tusi Hmitrötr la itre thiina ne la itre atr hna troa amelen. Qa ngöne lai, ijije mina fe troa ujë enehila hnene la itre atr ka ajan la meköt, me amamane ka hape angatr a hane thele troa mel. Nemene la nyine troa kuca hnei angatr?
6. Pine nemen matre thaa jole kö e tro sa xome ceitune la ka ala nyimu atraqatr memine la itre mamoe?
6 Ka hni ka menyike la itre mamoe, nge idrei nyudren. Haawe, ame ngöne lo Iesu a qaja ka hape hetrenyi nyidrë la itre xaa mamoe ka thaa tro kö a hane mele e hnengödrai, nyidrëti lai a amamane hnyawa ka hape, hetrenyi la itre xaa atr ka ajan troa mele epine palua e celë fen, nge angatr a troa drengethenge la itre ini hna hamëne hnei nyidrë. Hnei nyidrëti hna qaja ka hape: “Dengë hë la ite mamoenge la aqane ewekëng, nge ate hmekunyi angate kö ni, nge angat’ a xöte thenge ni.” (Ioane 10:16, 27) Ame la itre atr cili, tre angatr a drei Iesu, me drengethenge nyidrëti hnyawa, nge itretre drei nyidrëti fe hë angatr.
7. Nemene la itre thiina nyine troa eën hnene la itretre drei Iesu?
7 Nemene la itre xaa thiina nyine troa eën hnene la itretre drei Iesu? Kola sa hnene la Wesi Ula i Akötresie ka hape: “Tro nyipunie a tijepi la ate ka hekö ka ngazo, thenge la thina hnapan . . . me xetëne hnei nyipunie la ate ka hnyipixe, lo hna xupe tui Akötesie ngöne la thina ka meköt, me thina ka hmitöte me nyipici.” (Efeso 4:22-24) Angatr a eën la itre thiina ka akökötren la caas thene la itre hlue i Akötresie, ene la “ihnim, me madrin, me tingeting, me xomihni ahoeany, me metrötr, me thiina ka loi, me [“lapaun,” MN ], me thiina ka menyik, me xomehnöth.”—Galatia 5:22, 23.
8. Nemene la hna qëmeke kow hnene la ka ala nyimu atraqatr ka xatuan la thelen?
8 Kola xatuan hnene la ka ala nyimu atraqatr la itre atr ka xalaithe hi ka troa mele e koho hnengödrai, nge ka elemekene enehila la huliwa ne cainöj. (Mataio 24:14; 25:40) Kola ixatua atre hnene la itre xaa mamoe laka tro angatr a qëmeke kowe la icilekeu, pine laka ame ngöne la itre drai tixenuë, tre, hnei Keriso memine la itre angela hna upetriji Satana memine la itre dremoni i angeic qaa hnengödrai. Matre “Ekölö hi ni la hnadro . . . qa ngöne la hna utipi koi nyipunie la diabolo ka tru tenge elëhni, ke trotrohninë hë nyëne laka xoxopate pe hi la ijine i nyën.” (Hna Amamane 12:7-12) Kola catrehnine la aqane icilekeu i Satana memine la itre hlue i Akötresie, ke easenyi hë troa nyipune la fene celë.
9. Nemene la itre thangane ka loi hna kapa hnene la itre hlue i Akötresie ngöne la kola cainöjëne la maca ka loi, nge pine nemen?
9 Ngacama kola catrehnine la icilekeu, ngo kolo pala hi a kökötre la huliwa ne cainöj. Itre thauzane hi la etru i angatr ngöne lo kola nyipune lo Pane Isi Ka Tru e Cailo Fen, ngo ame hë enehila, tre, kola e la itre milio la etrune la itretre cainöjën la Baselaia, ngöne laka hnei Iehova hna thingehnaeane ka hape: “Pëkö ewekë hna kuca nyine ishi me nyipo hna troa ien.” (Isaia 54:17) Hna atrehmekune mina fe hnene la ketre atren la hna kootre i angetre Iudra ekö ngöne la hneijine Iesu laka, thatreine kö troa sawa la huliwa i Akötresie. Hnei angeic hna qaja kowe la itre Faresaio göi itretre dreng ka hape: “Iananyipi memine la nöjei ate celë, nge nue angate ; ke maine qa thei ate la thina celë memine la huliwa celë, te, troa pate xan ; ngo maine qa thei Akötesieti ej, tha ’teine kö nyipunie troa apaten ; wanga mama ka hape, nyipunie a ishi me Akötesie.”—Ite Huliwa 5:38, 39.
10. (a) Nemene la aliene la “hatren” hna peleth hune la göpadri ne la ka ala nyimu atraqatr? (b) Tune kaa la aqane drengethenge hnene la itre hlue i Akötresie la “ketre aqane ula e hnengödrai”?
10 Kösë hna pele hatrene hë la itre atren la ka ala nyimu atraqatr matre troa amele angatr. (Ezekiela 9:4-6) Kola amamane hnyawa hnene la “hatren” laka, hnei angatre hë hna sa xepu koi Iehova, me xome la bapataiso matre troa itretre drei Iesu, nge eje e kuhu hni angatr la ajan troa xötrethenge la itre thiina i Keriso. Angatr a drengethenge la “kete aqane ula e hnengödrai” kola qaja göne la hmi ka thoi, ene la ketre musi ka eje e celë fene hnengödrai i Satana, kola hape: “Nöjenge fe, tropi qa thei nyido, mate tha hane kö nyipunie sine la ite ngazo i nyido, nge mate tha traqa kö koi nyipunie la ite meci nyido.”—Hna Amamane 18:1-5.
11. Nemene la aqane amamane hnyawa hnene la itre atren la ka ala nyimu atraqatr laka itre hlue i Iehova angatr?
11 Ketre, hnei Iesu hna qaja kowe la itretre drei nyidrë ka hape: “Celë hi mate tro nöjei ate asëjëihë a wangate hmekune laka itete dei nyipunie, e tro nyipunie a ihnimikeu.” (Ioane 13:35) Drei la eisapengönene lai memine la itre atren la itre hmi ngöne la fene celë, laka angatr a isa humuthe hmaca kö la itre atr ka ce hmi me angatr pine laka isa nöje i angatre kö! Kola qaja hnene la Wesi Ula i Akötresie ka hape: “Mamapi la ite nekö i Akötesie, me ite nekö i diabolo ngöne laka tha qa thei Akötesieti kö la ate the kuca kö la thina ka meköt, memine la ate tha hnime kö la tejine me angeic. . . . Qâ shë troa ihnimikeu. Tha tro kö a tui Kaina lo qa ngöne la ka ngazo, ate humuthe la jini angeic.”—1 Ioane 3:10-12.
12. Ame ngöne lo ijine akötr atraqatr, nemene la hnei Iehova hna troa kuca kowe la itre ‘sinöe,’ ene la itre hmi ka thaa wa wene ka loi kö?
12 Hna qaja hnei Iesu ka hape: “Ame la nöjei sinöe ka loi, kola wa loi ; nge ame la sinöe ka ngazo, kola wa ngazo. Tha ’teine kö la sinöe ka loi troa wa ngazo, kete tune la sinöe ka ngazo a tha wa loi kö. Tro ha sha tij’ asë la nöjei sinöe ka tha wa loi, me kuiënepi kowe la eë. Celë hi mate tro nyipunie a wangate hmekunyi angate ngöne la ite wene i angat.” (Mataio 7:17-20) Ame ngöne la itre wene ne la itre hmi ne la fen, kola atrehmekune laka itre eje la itre ‘sinöe’ ka ngazo, laka kolo pë hë a treqen troa apaatren hnei Iehova ngöne lo ijine akötr atraqatr.—Hna Amamane 17:16.
13. Tune kaa la aqane amaman hnene la itre atren la ka ala nyimu atraqatr laka angatr a cile “qëmeke ne la therone” i Iehova?
13 Kola amamane hnyawa koi së ngöne Hna Amamane 7:9-15 la itre ewekë ka aijijën la ka ala nyimu atraqatr troa mele pe. Kola caasi me cile la itre atren “qëmeke ne la therone” i Iehova, nge angatr a cilëgölin la musi cile i Nyidrë. Hnei angatr hna “hnea la ite ixete i angat, me awiën’ it’ eje ngöne la qaziëti ne la Arenio,” kösë angatr a wangatrehmekune me kapa la mele hna huujën hnei Iesu nyine thatraqane la itre ngazo i angatr. (Ioane 1:29) Hnei angatr hna nue la mele i angatr koi Akötresie me nyihatrene lai hnene la hna bapataiso angatr hnine la tim. Haawe, ame koi Akötresie tre ka pë ethane angatr ngöne la ua, ene pe kola nyihatrene lai hnene la itre iheetr ka wië, nge angatr a “nyihlue i nyidë e lai me jid.” Hetrenyi kö la itre götran ne la mele i epun nyine troa saze matre troa ihmeku memine caha itre mekun hna ithanatan?
Itre Thangane Ka Loi Enehila
14. Qaja jë la itre xaa thangane ka lolo hna troa kapa hnene la itre hlue i Iehova enehila?
14 Maine jë ase fe hë epuni öhne la itre sipu manathith hna kapa enehila hnene la itre atr ka nyihlue i Iehova. Hanawange la ketre ceitun, ame la epuni a atre la itre aja ka meköti Iehova, epuni a trotrohnine fe laka hetrenyi la ketre mejiune ka mingöming thatraqane la itre drai elany. Haawe, hetre aliene hë enehila la mele i nyipunie, ene la troa nyihluene la Akötresie ka caas, memine la aja ka sisitria catr troa mele epine palua ngöne la paradraiso e celë fen. Eje hi lai laka, tro la Joxu Keriso Iesu a “e [angatr lo ka ala nyimu atraqatr] kowe la timi ka mele ka qeqe.”—Hna Amamane 7:17.
15. Nemene la itre thangane ka loi hna kapa hnene la Itretre Anyipici Iehova ngöne la angatr a trongën la itre trepene meköti qa hnine la Tusi Hmitrötr, ngöne la pengöne la politik me kuci ngazo?
15 Hetrenyi la itre xaa manathithi ka tru hna troa kapa hnene la ka ala nyimu atraqatr, ene la ihnim, me caas, memine la ce hni thene la itre hlue i Iehova e celë fen. Pine laka caasi hi la göxeni hne së hna xom ngöne la götrane la ua, haawe, easë asë hi a drengethenge la itre trenge wathebo memine la itre trepene meköti hna hamën hnine la Wesi Ula i Akötresie. Celë hi matre thaa aisa së kö hnene la itre mekune ne la itre ka kuci politik maine itre mekune ne isi pi nöj. Ketre, easë a metrötrën la itre wathebo ka draië hnei Akötresieti hna ahnithe kowe la nöje i Nyidrë. (1 Korinito 6:9-11) Qa ngöne lai, thaa ixelemawai kö la itre hlue i Iehova, me gomegom me kuci ngazo tune la itre atr ne fen, ngo angatre pe a madrin troa mele hnine la ketre paradraiso ngöne la götrane la ua. Hanawang la hna qejepengöne lai ngöne Isaia 65:13, 14.
16. Ngacama hna ketr la ka ala nyimu atraqatr hnene la itre jol ka eje ngöne la fene celë, ngo nemene la mejiune i angatr?
16 Ohea, thaa ka pexeje kö la itre hlue i Iehova. Nge, hna ketri angatre fe hnene la itre ejolene la mel ngöne la fene celë, ene laka kola hane traqa mina fe koi angatr la itre ijine jol, maine angatr a hane xeni pune menune la kuci isi ne la itre nöj. Kola tithi angatre mina fe hnene la itre mec, angatre fe a akötr, me mec. Ngo angatre pe a mejiune laka ame ngöne la fene ka hnyipixe tre, tro Akötresieti a “köle tije la nöjei tenge timida asëjëihë qa ngöne la ite lue meke i angat ; nge pa hmaca kö mec, me hace hni, me teij, me aköt.”—Hna Amamane 21:4.
17. Maine troa traqa la ketre ewekë koi së enehila, ngo nemene la itre ewekë ka lolo hna lapa treqen hnene la itre nyipi hlue i Akötresie?
17 Maine tro nyipunieti a meci enehila hnene laka, qatre hë, maine hna tithe hnene la ketre meci ka tru, maine hna eatr, maine hna icilekeu pena me nyipunie, ngo tro Iehova a amele nyipunieti hmaca ngöne la Paradraiso. (Ite Huliwa 24:15) Thupene lai, tro pala pë hë nyipunie a kapa madrine la pui ne xeni ne la ua ngöne la ijine Musi Keriso Ka Caa Thauzane Lao Macatre la etrun. Tro ha elitrauje la ihnimi nyipunie koi Iehova, ngöne la epuni a öhne la kola eatre la itre aja i Nyidrë. Nge tro fe a kökötre la ihnimi nyipunie ngöne la nyipunieti a kapa qaathei Nyidrë la itre manathith ngöne la ngönetrei. (Isaia 25:6-9) Drei la itre ewekë ka lolo catr hna troa melën elany hnene la itre hlue i Akötresie!
Revizio
• Nemene ewekë la hna mekune hnei Tusi Hmitrötr ngöne la kola qaja la ka ala nyimu atraqatr?
• Maine easë a ajan troa hane ketre atrene la ka ala nyimu atraqatr hna kapa hnei Akötresie, nemene la nyine tro sa kuca?
• Nemene la enyipiewekën koi nyipunie la itre manathith hna kapa enehila hnene la ka ala nyimu atraqatr, nge hna troa melën elanyi hnei angatr ngöne la fene ka hnyipixe i Akötresie?
[Iatr ne la götran 123]
Ka ala nyimu atraqatr, itre milio la etrun, nge ka caasi angatr me ce thili kowe la nyipi Akötresie ka caas