“Hnenge Hna Goeëne La Ka Ala Nyimu Atraqatr”

1. Tune kaa la mele i Ioane aposetolo ngöne lo macatre 95 M.K.?

AME ngöne lo macatre 95 M.K., hnei Ioane aposetolo hna cile kowe la itre jol ka tru. Hna akalabusi nyidrë e Patamo nge qatre hë nyidrë. Ketre, nyidrëti pe hi la aposetolo ka mel. (Hna ama. 1:9) Atre hi Ioane laka, hnene la itre ka icilekeu hna tro fë la itre ini ka thoi kowe la itre Keresiano, matre troa thë la aqane caasi angatr. Kolo ha ae trootro la etrune la itre nyipi Keresiano.—Iudra 4; Hna ama. 2:15, 20; 3:1, 17.

2. Thenge la Hna Amamane 7:9-14, nemene la hna meköle goeëne hnei Ioane? (Wange ju la pane iatr.)

² Nyimutre la itre jol hna cile kow hnei Ioane. Ngo hnei Akötresieti hna aijijë nyidrë troa meköle goeëne la drai elany. Hnei Ioane hna öhne la ketre angela kola upe la foa lao angela troa cilaxome la foa lao enyi ka catr ne la akötr atraqatr, utihë pexeje hë la gurup ne la itre hlu. (Hna ama. 7:1-3) Kola qaja lo ala 144 000 ka troa ce musi me Iesu e hnengödrai. (Luka 12:32; Hna ama. 7:4) Thupene lai, hnei Ioane hna öhne la ketre gurup. Hnei nyidrëti hna hain ke, alanyimu catr angatr. Nemene la hnei nyidrëti hna öhn? “Ala nyimu atraqatr, lo hna thatreine e, nge angatr a isa xulu qa ngöne la nöjei nöj, me nöjei tribu, me nöjei hane ngönetrei, me nöjei qene hlapa. Angatr a cile qëmekene la theron me qëmekene la Neköi Mamoe.” (E jë la Hna Amaman 7:9-14.) Drei la etrune la madrine i Ioane ngöne lo nyidrëti a öhne laka, troa elë la etrune la itre hlue i Akötresieti elany!

3. (a) Pine nemene matre kola acatrene la lapaune së hnene la hna meköle goeën hnei Ioane? (b) Nemene la hne së hna troa ce wang ngöne la tane mekun celë?

³ Eje hi laka, hna acatrene la lapaune i Ioane hnene la hnei nyidrëti hna meköle goeën. Nge kolo fe a acatrene la lapaune së ke, easa melëne la itre drai ne la pun. Ame enehila, kola traqa koi itre milio lao atr ka hane nyihlue i Iehova, me mejiune troa amele angatr ngöne la akötr atraqatr, me mel epine palua e celë fen. Qaane ekö, Iehova a amamane la pengöne la ka alanyimu atraqatr. Ame ngöne la tane mekun celë, tro sa ce wang la aqane amamane Nyidrëti la pengöi angatr. Tro fe sa ce wang la lue pengöne la gurup cili: (1) la etrune la itre atr cili, me (2) itre nöje i angatr. Celë hi itre mekun ka troa acatrene la lapaunene la itre ka troa sine la gurup cili.

TROA MEL EKAA LA KA ALANYIM?

4. Nemene la ini hna tha trotrohnine hnene la itre xaa hmi, nge pine nemene matre tha celë kö mekuna ne la Itretre Ini Tusi Hmitrötr?

⁴ Tha hnene kö la itre hmi ka thoi hna inine la itre atr laka, troa mel epine palua la itre ka drengethenge Akötresie. (2 Kor. 4:3, 4) Angatr a inine laka, maine troa meci la ketre atr ka lolo, tre, tro angeic a elë hnengödrai eë. Ngo tha celë kö mekuna ne la neköi gurupe ne la Itretre Ini Tusi Hmitrötr ka nyiqaane fejane lo zonal, hna hape, Ita Ne Thup, lo macatre 1879. Trotrohnine hi angatr laka, tro Akötresieti a acile hmaca la Paradraiso. E cili, tro la itre milio lao atr ka drei Akötresieti a mel e celë fen, ngo tha e koho kö hnengödrai. Ngo eje hi, hnei angatr hna pane thel troa atre hnyawa la pengöne la itre atr cili ka drengethenge Akötresie.—Mat. 6:10.

5. Nemene la hna trotrohnine hnene la Itretre Ini Tusi Hmitrötr göne lo 144 000?

⁵ Ketre, kolo fe a trotrohnine hnene la Itretre Ini Tusi Hmitrötr, laka, hetrenyi la itre atr “hna itön qaa la fen,” matre troa ce musi me Iesu e hnengödrai. (Hna ama. 14:3) Eje hi, 144 000 lao atr ka catre mele nyipici, me nyihlue i Akötresieti ekö lo angatr e celë fen. Nge nemene la mekuna i angatr göne la ka alanyim?

6. Nemene la hna mekun hnene la Itretre Ini Tusi Hmitrötr göne la ka alanyim?

⁶ Ame ngöne la hna meköle goeën, hnei Ioane hna öhne la itre atrene lai gurupe kola “cile qëmekene la theron me qëmekene la Neköi Mamoe.” (Hna ama. 7:9) Hnene la Itretre Ini Tusi Hmitrötr hna mekun ka hape, tune la itre hna iën, tro la ka alanyimu a mel e koho hnengödrai. Ngo maine tro la lue gurup cili a ce mel e koho hnengödrai, nemene la eisapengönene lue ej? Ame ekö, Itretre Ini Tusi Hmitrötr a mekun laka, ame la ka alanyim, tre, itre Keresiano ka tha drengethenge Akötresieti hnyawa kö ngöne lo angatr e celë fen. Angatre hi a trongëne la itre trepene meköt, ngo angatr palahi a sajuëne la hmi ka thoi. Celë hi matre, hnene la Itretre Ini Tusi Hmitrötr hna mekun laka, ngacama ka tru la ihnimi angatr koi Akötresie, ngo ame pe, tha ijiji angatre kö troa ce musi me Iesu. Pine laka ka tëtë hi la ihnimi angatr koi Akötresie, matre tro hi angatr a cile qëmekene la theron, ngo tha tro kö a lapa hune la theron.

7. Ame kowe la Itretre Ini Tusi Hmitrötr, drei la ka troa mel e celë fen ngöne la ijine musi Keriso ka caa thauzane lao macatre, nge nemene la hnei angatr hna mekun göne la itre ka mele nyipici koi Akötresie?

⁷ Drei la ka troa mel e celë fen? Hnene la Itretre Ini Tusi Hmitrötr hna mekun laka, thupene la kola acasine la ala 144 000 memine la ka alanyimu e hnengödrai, hetrenyi la itre xaa atr, itre milio la etrun, ka troa mel e celë fen. Angatr a troa kepe manathith qa ngöne la Musi Keriso Ka Caa Thauzane Lao Macatre. Ame kowe la Itretre Ini Tusi Hmitrötr, tha tro kö la itre milio lao atr a nyihlue i Iehova qëmekene troa nyiqane la musi Keriso. Ame koi angatr, tro la itre milio lao atr a atrepengöi Iehova ngöne la ijine musi Keriso. Ame la itre ka trongëne hnyawa la itre trepene meköti Iehova, tro angatr a mel epine palua e celë fen. Ngo troa apatrene la itre ka icilekeu me Nyidrë. Ketre, kola mekun hnene la Itretre Ini Tusi Hmitrötr laka, ame la itre “joxu” hna troa acil e celë fen ngöne la ijine musi Keriso, tre, angatr a troa tro e koho hnengödrai thupene la caa thauzane lao macatre ne musi Keriso. Ame koi angatr, ame la itre “joxu” cili, tre, kola qaja la itre atr ka mele nyipici nge ka mec qëmeken troa traqa hnei Keriso, nge itre hna troa amelene ngöne la caa thauzane lao macatre ne musi la Baselaia.—Sal. 45:16.

8. Ame kowe la Itretre Ini Tusi Hmitrötr, drei la köni gurup ka hetre göhnë ngöne la Baselaia i Akötresie?

⁸ Ame kowe la Itretre Ini Tusi Hmitrötr, hetrenyi la köni gurup: (1) Ala 144 000 ka troa ce musi me Iesu e hnengödrai; (2) ka alanyimu laka, tha ka catrecatre kö la lapaune i angatr koi Akötresie, matre angatre pe hi a cile qëmekene la therone i Iesu e hnengödrai; nge (3) itre milio lao atr ka troa inine la itre trepene meköti Iehova e celë fen ngöne lo ijine Musi Keriso Ka Caa Thauzane Lao Macatre.b Eloine pe, hnei Iehova hna xatua angatr troa trotrohnine la mekune celë.—Ite edomë 4:18.

KOLA HUDRUME LA LAI NE LA NYIPICI

9. (a) Nemene la aqane tro la ka alanyimu e celë fen a cile “qëmekene la theron me qëmekene la Neköi Mamoe”? (b) Pine nemene matre ka meköti la hna qaja ngöne Hna Amamane 7:9?

⁹ Ame ngöne lo macatre 1935, kolo ha trotrohnine hnyawa hnene la Itretre Anyipici Iehova, la pengöne la ka alanyimu lo hna meköle goeën hnei Ioane. Atre hë angatr laka, tha tro kö la ka alanyimu a elë hnengödrai eë, matre troa cile “qëmekene la theron me qëmekene la Neköi Mamoe.” Ngo kolo hmekuje hi lo itre hna meköle goën, nge nyine nyi ahnuene hi. Ngacama kola troa mel e celë fen hnene la ka alanyim, ngo ijije hi tro angatr a cile “qëmekene la theron.” Angatr a wangatrehmekune laka, Iehova la Kapucatinasë e koho hnengödrai me e celë fen. Angatre fe a drengethenge me sajuëne la musi cile Iehova. (Is. 66:1) Ketre, ijije hi tro angatr a cile “qëmekene la Neköi Mamoe,” pine laka, angatr a lapaune kowe la mele hna huujëne hnei Iesu. Ame ngöne Mataio 25:31, 32, tre, kola qaja la “nöjei nöj,” laka, kolo fe a qaja la itre atr ka ngazo. Kola troa acasi angatr asë “qëmeke i Iesu,” hune la therone ka lolo i nyidrë. Kola anyipicine hnyawa laka, tha kolo kö a qaja la itre ka troa mel e koho hnengödrai, ngo itre ka troa mel e celë fen. Celë hi mekune lai ka hnyipixe hna saze lo 1935. Nge meköti la mekun cili. Celë hi kepin, matre tha hna qaja kö hnei Tusi Hmitrötr ka hape, troa xome la ka alanyimu hnengödrai eë. Casi hi la gurup ka troa mel epine palua e koho hnengödrai, ene la ala 144 000 ka troa “joxu me musinëne la fen” me Iesu.—Hna ama. 5:10.

10. Pine nemene matre loi e tro la ka alanyimu a nue Iehova troa ini angatr qëmekene la ijine Musi Keriso Ka Caa Thauzane Lao Macatre?

¹⁰ Qaane lo 1935, hnene la Itretre Anyipici Iehova hna trotrohnine la pengöne la ka alanyimu atraqatr. Kola qaja la itre Keresiano ka mele nyipici koi Iehova, nge ka mejiune troa mel epine palua e celë fen. Maine angatr a ajane troa mele pe qa ngöne la akötr atraqatr, loi e tro angatr a thele troa atrepengöi Iehova hnyawa, me nyiqane atrunyi Nyidrë qëmekene la ijine Musi Keriso Ka Caa Thauzane Lao Macatre. Nyipiewekë tro angatr a catre lapaun, “matre mele pi [angatr] qa ngöne la itre ewekë cili” qëmekene la Caa Thauzane Lao Macatre.—Luka 21:34-36.

11. Pine nemene matre kola mekun hnene la Itretre Ini Tusi Hmitrötr, ka hape, hetre itre xan ka troa elë e koho hnengödrai thupene la Caa Thauzane Lao Macatre?

¹¹ Tune kaa lo hna qaja ka hape, kola troa elë hnengödrai eë hnene la itre xaa atr, thupene la Caa Thauzane Lao Macatre? Celë hi hna qaja hnine la Ita Ne Thup ne 15 Febuare 1913. Maine ju, tro sa isa hnying, ka hape, ‘Hnauëne la troa mel e celë fen hnene la itre hlue i Akötresieti ka meci hë ekö, nge ame la itre Keresiano ka tha mele nyipici hnyawa kö koi Iehova, angatr a troa mel e koho hnengödrai?’ Eje hi, ka tria la mekuna i angatr ke, ame koi angatr: (1) tro la ka alanyimu a mel e koho hnengödrai, nge (2) hetrenyi thene la ka alanyim, la itre Keresiano ka tha mele nyipici hnyawa kö koi Akötresie.

12-13. Nemene la hna trotrohnine hnene la itre hna iën memine la ka alanyimu, göne la ahnahna i angatr?

¹² Qaane lo 1935, trotrohnine hë la Itretre Anyipici Iehova, ka hape, ame la ka alanyimu hna meköle goeën hnei Ioane, tre, angatre hi lo itre ka troa mele pe e Amagedro. Angatr la itre ka “xulu qa ngöne la akötr atraqatr” e celë fen. Nge angatre “pala hi a suene ka hape: “Mele ju kö hun jëne la Akötresi hun, atre lapane la theron, me jëne la Neköi Mamoe.’ ” (Hna ama. 7:10, 14) Ketre, Tusi Hmitrötr a qaja ka hape, ame la itre ka troa mel e koho hnengödrai, tre, angatr a troa kapa la “ketre ewekë ka sisitria” hune la itre atr ka mele nyipici e celë fen. (Heb. 11:40) Celë hi matre, hnene la itre trejin hna ithuecatre kowe la itre atr troa nyihlue i Iehova, matre troa hane mel epine palua e celë fen.

¹³ Atraqatre la madrinene la ka alanyimu, kowe la mejiune i angatr. Trotrohnine hnyawa hi angatr laka, Iehova hmekuje hi la ka iëne la götrane hnë tro la itre hlue i Nyidrë ka mele nyipici a atrunyi Nyidrë, e koho hnengödrai maine pena e celë fen. Tro la itre hna iën memine la ka alanyimu a kapa la ahnahna i angatr, pine laka, hnei Iehova hna upi Iesu Keriso, troa huujëne la mele i nyidrë me meci pi së.—Rom. 3:24.

ATRAQATR LA KA ALANYIM

14. Thupene lo 1935, pine nemene matre hetrenyi palakö la itre ka hnyingëne thel la aqane troa eatr la hna perofetan göne la ka alanyim?

¹⁴ Thupene la hna trotrohnine hnyawa la itre xaa mekun ka hnyipixe hnene la Itretre Anyipici Iehova lo 1935, hetrenyi palakö ka hnyingëne thel, la aqane troa kökötre la etrune la itre ka troa mel e celë fen. Ame Ronald Parkin, tre, 12 lao macatre i nyidrë, ngöne lo kola xötrei atre la pengöne la ka alanyimu. Öni nyidrë, “Hetrenyi ekö la 56 000 lao trejin ka cainöj e cailo fen. Maine jë ame la itre xan, ke, itre hna iën. Ngo ame la ka alanyim, tha tiqa menu kö angatr.”

15. Tune kaa la aqane kökötre la ka alanyimu, ngöne la itre macatre?

¹⁵ Ngo ame itre macatre thupen, hna upe la itre mesinare kowe la itre xaa nöj. Celë hi matre, kolo ha kökötre trootro la etrune la Itretre Anyipci Iehova. Thupene lai, ame lo 1968, kola nyiqaane la porogarame ne Ini Tusi Hmitrötr jëne la itus, hna hape, “La vérité qui conduit à la vie éternelle.” Hna qejepengöne hnyawa la nyipici, matre hmaloi hi kowe la itre atr troa canga trotrohnin. Eje hi, foa lao macatre, nge kola sasaithe la itre milio lao ka xötrei xomi bapataiso. Ketre, pëhë trengecatrene la hmi Katolik e Amérique Latine me ngöne la itre xaa nöj. Tha hna wathebone hmaca kö la huliwa ne cainöj e Europe orientale me ngöne la itre xaa götran e Afrique. Celë hi matre itre milio lao atr ka xomi bapataiso. (Is. 60:22) Ame fe ngöne la itre macatre, hnene la organizasio i Iehova hna eköthe la itre jiane huliwa, matre xatuane la itre atr troa inine hnyawa la Tusi Hmitrötr. Eje hi, ase hë acasine la ka alanyimu, nge hna sasatithe la 8 milio lao atr ka nyihlue i Iehova.

KA XULU LA KA ALANYIMU QA NGÖNE LA NÖJEI NÖJ

16. Itre ka xulu qa kaa la ka alanyim?

¹⁶ Ame ngöne lo Ioane a cinyihane la hnei angeice hna meköle goeën, hnei angeice hna qaja göne la ka alanyimu, ka hape, “angatr a isa xulu qa ngöne la nöjei nöj, me nöjei tribu, me nöjei hane ngönetrei, me nöjei qene hlapa.” Celë fe hi hna pane qaja ekö hnei Zakaria perofeta. Hnei angeice hna cinyihan ka hape: “Ngöne la ite drai cili troa xölehuje hnene la ala luepi qa ngöne la ite qene hlapa asë, nge tro angat’ a xölehuje la pune la ixete ne la ate Iuda, me hape, Tro huni a ce tro me nyipunie, ke ate hë huni laka thei nyipunie la Akötesie.’ ”—Zaka. 8:23.

17. Tro sa xatuan tune kaa la nöjei atr, ngöne la nöjei qene hlapa?

¹⁷ Trotrohnine hi la Itretre Anyipici Iehova laka, nyipiewekë troa cainöjëne la maca ka loi ngöne la nöjei qene hlapa, matre troa acasine la nöjei atr. Celë hi matre, 130 hë lao macatre ne ujëne la itre itus ngöne la itre hadredre lao qene hlapa, matre troa inine la Tusi Hmitrötr memine la nöjei atr. Hetrenyi la Tusi Hmitrötr me itre itus ngöne la nöjei qene hlapa. Eje hi, Iehova hmekuje hi la ka atreine troa acasine la itre atr ka xulu qa ngöne la nöjei nöj. Kola atrunyi Iehova hnene la ka alanyim. Kola hlemu loi la nöje i Iehova, hnene la huliwa ne cainöj memine la aqane ihnimikeu ne la itre trejin e cailo fen. Celë hi ka acatrene la lapaune së!—Mat. 24:14; Ioane 13:35.

ALIENE KOI SË LA HNA MEKÖLE GOEËN HNEI IOANE

18. (a) Thenge la Isaia 46:10, 11, pine nemene matre tha sesëkötre kö së laka, hnei Iehova hna eatrëne la hna perofetan göne la ka alanyim? (b) Pine nemene matre tha mekune kö hnene la itre ka mele pe e celë fen laka, hetre ewekë hna cipane koi angatr?

¹⁸ Easa madrine göne la hna perofetan kowe la ka alanyim! Tha sesëkötre kö së, laka hnei Iehova hna eatrëne hnyawa la hna perofetane celë. (E jë la Isaia 46:10, 11.) Ame la ka alanyim, tre, tru la hni ne ole i angatr kowe la mejiun qaathei Iehova. Ngo tha angatre kö a mekun ka hape, hetre ewekë pe kö hna cipane koi angatr. Tha hna ië angatre kö hnene la uati hmitrötr, matre troa hane musi me Iesu e hnengödrai. Kola qaja hnei Tusi Hmitrötr la nöjei trahmany me föe ka mele nyipici koi Iehova, nge hna eatrongën hnei uati hmitrötr. Ngo tha angatre fe kö a hane sine lo 144 000. Ioane Bapataiso la ketre. (Mat. 11:11) Ketre tui Dravita mina fe. (Itre hu. 2:34) Kola troa amele angatr, matre troa mel ngöne la Paradrasio e celë fen. Celë hi matre, loi e tro sa isa amamane laka, easa mele nyipici koi Iehova, me sajuëne la musi cile i Nyidrë.

19. Nemene la nyine tro sa kuca ngöne la easa trotrohnine la hna meköle goeëne hnei Ioane?

¹⁹ Ame enehila, ketrepengöne kö la aqane acasine Akötresieti la itre milio lao atr ka xulu qa ngöne la nöjei nöj, matre troa atrunyi Nyidrë. Ngacama easa troa mel e koho hnengödrai maine e celë fen, ngo loi e tro sa xatuane la nöjei atr asë matre tro angatr a hane sine la ka alanyimu ne la “itre xa mamoe.” (Ioane 10:16) Calemi hë la akötre atraqatr hna perofetane hnei Iehova. Kola troa apatrene la nöjei musi me nöjei hmi ka thoi ka akötrëne la mele ne la itre atr. Drei la ketre manathithi ka tru hna hamën kowe la itre ka sine la ka alanyim, ene la troa nyihlue i Iehova epin epine palua e celë fen!—Hna ama. 7:14.