TANE MEKUN 21
Tusi Hna Amaman—Aliene Koi Së Elany
“Amen! Traqa pi, Iesu Joxu.”—HNA AMA. 22:20.
NYIMA 142 Xölehuje Ju Së La Mejiune Hna Amë Qëmeke Së
MEKUN KA TRUa
1. Nemene la mekun ka nyipiewekë catr nyine tro la itre atr a iën enehila?
NYIPIEWEKË tro la itre atr enehila a ië ewekë hnyawa. Tro jë kö angatr a ië Iehova maine Satana, ithupëjia me Nyidrë? Loi e tro angatr a iën. Troa hetre thangane kowe la mele së la mekun hne së hna troa axeciën. (Mat. 25:31-33, 46) Ame ngöne la ijine “akötr atraqatr,” tro hmekuje hi a mel la itre ka hetre hatren.—Hna ama. 7:14; 14:9-11; Ezek. 9:4, 6.
2. (a) Nemene la ithuecatre hna hamëne hnei Heberu 10:35-39? (b) Nemene la ixatua qaathene la tusi Hna Amaman?
2 E jë la Heberu 10:35-39. Maine hnei epuni hna ië Iehova, ke, ketre mekune lai ka lolo catr. Ame enehila, aja i epuni fe troa xatuane la itre xan troa hane ië Iehova. Ijiji epun troa xatua angatr jëne la tusi Hna Amaman. Ej a qaja la pun kowe la itre ithupëjia me Iehova, memine la itre manathith hna troa kapa hnene la itre ka isigöline la musi Nyidrë. Loi e tro fe sa atre hnyawa la itre ini cili. Celë hi ka troa acatrene la aja së troa nyihlue i Iehova. Ketre, jëne la hne së hna inin, ijiji easë troa xatuane la itre xan troa ië Iehova, me mele nyipici koi Nyidrë.
3. Nemene la hne së hna troa ce wang ngöne la tane mekune celë?
3 Ame ngöne la tane mekune celë, tro sa sa la lue hnying: Nemene la itre manathith hna troa kapa hnene la itre ka ië Iehova? Nge, nemene la pun kowe la itre ka ce xöl memine la öni ka ses ka madra palulu hna qaja ngöne Hna Amaman?
MANATHITH KOWE LA ITRE KA MELE NYIPICI
4. Drei la gurup hnei Ioane hna öhne a ce cil me Iesu?
4 Hnei Ioane aposetolo hna meköle goeëne la lue gurup ka isigöline la musi Iehova, me kapa la itre manathith ka epine palua. Ame la pane gurup, ke, ala 144 000 angatr. (Hna ama. 7:4) Hna ië angatr qa celë fen matre troa ce musi me Iesu ngöne la Baselaia e hnengödrai. Tro angatr me Iesu a ce musinëne la fen. (Hna ama. 5:9, 10; 14:3, 4) Ioane a meköle goeë angatr a ce cil me Iesu ngöne la Wetre Ziona.—Hna ama. 14:1.
5. Nemene la ka troa traqa kowe la itre hna iën ka mele palakö e celë fen?
5 Qane hë ekö, itre thauzan la itre atr hna iën troa sine la ala 144 000. (Luka 12:32; Rom. 8:17) Öni Ioane, ame ngöne la itre drai ne la pun, tha tru pe kö la itre hna iën e celë fen. Tro la “munëne” cili a kapa la “pelehatren” tixenuë qëmekene troa nyiqane la akötr atraqatr. (Hna ama. 7:2, 3; 12:17) Ame ngöne la ijine akötr atraqatr, troa xomi angatr a tro hnengödrai matre acasi angatr memine la itre xaa hna iën. E cili, tro angatr a ce musi me Iesu ngöne la Baselaia i Akötresie.—Mat. 24:31; Hna ama. 5:9, 10.
6-7. (a) Drei la ketre gurup hnei Ioane hna goeën, nge nemene la hne së hna atre göne ej? (b) Pine nemene matre ka nyipiewekë la tusi Hna Amaman mekene 7 kowe la lue gurup?
6 Thupene la hnei Ioane hna goeëne la pane gurup, goeëne ju fe hi angeic “la ka ala nyimu atraqatr.” Ame la gurup cili, ke, thatreine kö së e la etru i angatr. (Hna ama. 7:9, 10) Nemene la hne së hna atre göi angatr? Öni Ioane: “Angatr a xulu qa ngöne la akötr atraqatr, nge hnei angatr hna wasine la itre iheetre i angatr, me awiën ngöne la madra ne la Neköi Mamoe.” (Hna ama. 7:14) Thupene la akötr atraqatr, tro “la ka ala nyimu atraqatr” a mele pe e celë fen, me kapa la itre manathith ka tru.—Sal. 37:9-11, 27-29; Ite edomë 2:21, 22; Hna ama. 7:16, 17.
7 Maine hna ië së ju hë troa mel e hnengödrai maine e celë fen, aja së asë hi troa melën la hna qaja ngöne la tusi Hna Amaman mekene 7! Ketre ijine lai ka lolo catr kowe la lue gurup ka mele nyipici koi Akötresie! Tro easë lai a madrin ke, hnei easë hna iëne la musi Iehova. Nemene la itre xaa hna qaja hnene la tusi Hna Amaman göne la akötr atraqatr?—Mat. 24:21.
PUN KOWE LA ITRE ITHUPËJIA ME AKÖTRESIE
8. Eue la ijine troa nyiqane la akötr atraqatr, nge tune kaa la aqane ujë ne la itre atr?
8 Tune la hne së hna ce wang ngöne la tane mekun ka ase hë, tro la itre mus a apatrenyi Babulona Atraqatr, ene la itre hmi ka thoi. (Hna ama. 17:16, 17) E cili la kola nyiqane la akötr atraqatr. Tro kö la itre atr a nyinyape thele Iehova? Waea. Kola qaja ngöne la mekene 6 ne la tusi Hna Amaman ka hape, tro la itre ka tha nyihlue i Iehova kö a kötre zae thene la itre mus me itre ka salem, hna aceitunën me itre wetr. Pine laka, tha angatre kö a cilëgöline la Baselaia i Akötresie, ceitui angatr me itre ithupëjia me Iehova.—Luka 11:23; Hna ama. 6:15-17.
9. Pine nemene matre troa mama la itre hlue i Iehova ngöne la ijine akötr atraqatr, nge nemene la ka troa traqa koi angatr?
9 Ame ngöne la ijine cili, tro kö a mama la itre hlue i Iehova. Angatre pe hi la ka nyihlue i Nyidrë e celë fen, me xele ma isigöline la “öni ka ses.” (Hna ama. 13:14-17) Tro la aqane ujë i angatr a jele la trenge elëhni ne la itre ka icilekeu me Iehova. E cili, tro la itre nöj a cas matre troa lepe la nöje i Akötresie e celë fen. Ame la isi cili, ke hna hëne ka hape, isi Gog atre Magog.—Ezek. 38:14-16.
10. Thenge la tusi Hna Amaman 19:19-21, nemene la aqane ujë i Iehova ngöne la kola troa lepe la nöje i Nyidrë?
10 Nemene la aqane ujë i Iehova ngöne la kola troa lepe la nöje i Nyidrë? Öni Nyidrë: “Troa mama la elëhninge ngöne la qëmekeng.” (Ezek. 38:18, 21-23) Ame ngöne Hna Amaman mekene 19, kola qaja la itre ewekë ka troa traqa e thupen. Tro Iehova a upe la Nekö i Nyidrë troa isigöline la nöje i Nyidrë, me lepe la itre ithupëjia. Tro la “itre trongene isi ne hnengödrai,” ene la itre angela memine la ala 144 000 a ce me Iesu ngöne la isi cili. (Hna ama. 17:14; 19:11-15) Nemene la pune la isi? Troa lepe apatren asë la itre atr memine la nöjei organizasio ka icilekeu me Iehova!—E jë la Hna Amaman 19:19-21.
THUPENE LA ISI, KOLA FAIPOIPO
11. Nemene la ijine ka sisitria hna qaja ngöne la tusi Hna Amaman?
11 Pane mekune jë la madrine ne la itre hlue i Iehova ka troa mele pe thupene la isi i Nyidrë! Nyipici, tru la madrin e hnengödrai ngöne la kola troa lepe apatrenyi Babulona Atraqatr, ngo hetre ketre ewekë kö ka troa hamë madrin koi angatr. (Hna ama. 19:1-3) Ketre ijine lai ka sisitria hna qaja ngöne la tusi Hna Amaman, ene la “faipoipo ne la Neköi Mamoe.”—Hna ama. 19:6-9.
12. Thenge la tusi Hna Amaman 21:1, 2, eue la troa faipoipo la Neköi Mamoe?
12 Eue la troa faipoipo la Neköi Mamoe? Troa acasine la ala 144 000 lao hna iën qëmekene troa nyiqane la isi Amagedro. Ngo, tha ijine faipoipo pala kö. (E jë la Hna Amaman 21:1, 2.) Troa faipoipo la Neköi Mamoe thupene la isi Amagedro, e patre hë la itre ithupëjia me Akötresie.—Sal. 45:3, 4, 13-17.
13. Nemene la aliene la faipoipo ne la Neköi Mamoe kowe la itre hna iën?
13 Nemene la aliene la faipoipo ne la Neköi Mamoe kowe la itre hna iën? Tune la aqane acasine la trahmanyi me föe ngöne la faipoipo, kolo fe a troa acasi Iesu Keriso, memine la “föi” nyidrë, ene la ala 144 000. Celë hi ka troa atrune la Baselaia i Akötresie ka troa mus kowe la fen ngöne la 1 000 lao macatre.—Hna ama. 20:6.
TRAON KA MINGÖMING ME MELE SË ELANY
Hna Amaman mekene 21 a qejepengöne la traone ka hmitrötr, ene la Ierusalema Ka Hnyipixe, ej a “uti qaa hnengödrai thei Akötresie.” Ame ngöne la Ca Thauzane Lao Macatre, tro ej a axulune la itre manathithi ka nyimutre kowe la itre ka mele nyipici koi Iehova (Wange ju la paragarafe 14-16)
14-15. Ame ngöne Hna Amaman mekene 21, kola aceitunëne la ala 144 000 me nemen? (Wange ju la pane iatr.)
14 Hna Amaman mekene 21 a aceitunëne la ala 144 000 memine la ketre traon ka mingöming hna hën ka hape, “Ierusalema Ka Hnyipixe.” (Hna ama. 21:2, 9) Hna nyitrepene la traone cili hnene la 12 lao etë “hna sija la 12 lao ëje ne la 12 lao aposetolo ne la Neköi Mamoe.” Pine nemene matre hna ketri Ioane? Ke hnei angeic hna öhne la ëje i angeic hna sija ngöne la ketre etë. Ketre manathith ka tru lai koi angeic!—Hna ama. 21:10-14; Efe. 2:20.
15 Tha ceitune kö la traone cili memine la itre xaa traon. Ame la gojenyi ka tru ne la traon, ke hna kuca hnei nyipi gool, nge hna kuca hnei penina la 12 lao qëhnelö. Hna amingömingöne la itre trepene me itre ngöne uma ne la traon hnene la nöjei pengöne etë mo. Ceitune la traon me ketre kare. (Hna ama. 21:15-21) Ngo kösë hetre ewekë pala kö ka patr! Öni Ioane: “Tha öhne kö ni la ketre uma ne hmi hnine la traon, ke Iehova Akötresie, Atre ka Tru Trenge Men, la sipu uma ne hmi i nyidrë, nge tune fe kowe la Neköi Mamoe. Nge tha nyipiewekë kö troa hetre jö me treu troa hudrum hnine la traon, ke ijije hë la lolo i Akötresie troa thinan, nge laame ne la traon la Neköi Mamoe.” (Hna ama. 21:22, 23) Itre ka sine la Ierusalema Ka Hnyipixe a ithanata meköt koi Iehova. (Heb. 7:27; Hna ama. 22:3, 4) Matre Iehova me Iesu la uma ne hmi ne la traon.
Drei la ka troa kapa la itre manathith hna nyihatrene hnene la “hneopegejë” me “itre sinöe”? (Wange ju la paragarafe 16-17)
16. Nemene la ka troa traqa kowe la itre atr ngöne la Ca Thauzane Lao Macatre?
16 Itre hna iën a haine la emingömingöne la traone cili. Ngo nyipiewekë fe tro la itre ka troa mel e celë fen a atrepengöne hnyawa la traone cili. Ame ngöne la Ca Thauzane Lao Macatre, tro la Ierusalema Ka Hnyipixe a axulune la itre manathith ka tru. Ioane a öhne la itre manathith cili kösë “hneopegejë ne timi ne mel.” Nge ame ngöne la lue öline la hneopegejë, kola cia la “itre sinöe ne mel . . . nyine aloine la itre nöj.” (Hna ama. 22:1, 2) Tro la nöjei atr a kapa la itre manathithi cili. Tro hë angatr a pexeje trootro. Pë hmaca kö wezipo, me akötr, me treij.—Hna ama. 21:3-5.
17. Thenge la tusi Hna Amaman 20:11-13, drei la itre ka troa kapa la itre manathithi ngöne la Ca Thauzane Lao Macatre?
17 Drei la itre ka troa kapa la itre manathithi cili? Troa nyiqane hnene la ka alanyim atraqatr, lo itre ka mele pe qa ngöne la isi Amagedro, memine la itre nekönatr hna troa hnahon ngöne la fen ka hnyipixe. Ngo tusi Hna Amaman mekene 20 a thingehnaean ka hape, troa amelene hmaca la itre ka mec. (Hna Amaman 20:11-13.) Kolo itre ka “meköt,” itre ka mele nyipici ekö, memine fe la itre ka “tha meköti kö,” itre ka thatre Iehova kö utihë la angatr a mec. (Itre hu. 24:15; Ioane 5:28, 29) Kolo kö lai a hape, troa amelene asë la itre atr ka mec ngöne la Ca Thauzane Lao Macatre? Waea. Tha tro kö a amelene la itre ka methinë Iehova me xele ma nyihlue i Nyidrë qëmekene tro angatr a mec. Hna nue ijine koi angatr troa atrepengöi Iehova, ngo tha kapa kö angatr la ihnimi Nyidrë matre troa mel ngöne la paradraiso e celë fen.—Mat. 25:46; 2 Thes. 1:9; Hna ama. 17:8; 20:15.
THUPENE LA CA THAUZANE LAO MACATRE
18. Tune kaa la itre atr thupene la 1 000 lao macatre?
18 Thupene la 1 000 lao macatre, troa pexeje hmaca la itre atr. Troa patre palua la ngazo memine la hnëjine hne së hna kapa qaathei Adramu. (Rom. 5:12) E cili, pexej asë hë la itre atr e celë fen.—Hna ama. 20:5.
19. Pine nemene matre hetre itupath tixenuë?
19 Atre hi easë ka hape, hnei Iesu hna cile catr qëmekene la itre itupathi Satana. Hnei nyidrëti hna mele nyipici koi Iehova. Hapeu, tro kö la itre atr ka pexej a hane cile catr ngöne la Satana a tupathi angatr elany? Tro pë së a isa wang e thupen, e ase hë nue Satana hmaca qa ngöne la hnaop ka jui nge ka thatrehmekun. (Hna ama. 20:7) Ame la itre ka mele nyipici koi Iehova ngöne la itupath tixenuë cili, tro angatr a kapa la mele ka pë pun, nge troa nuamacanyi angatr qa ngöne la ngazo. (Rom. 8:21) Nge ame pë hë la itre ka icilekeu, tro angatr a ce mec me Satana me itre dremoni.—Hna ama. 20:8-10.
20. Nemene la mekuna i epun thupene la hne së hna ce wang la tusi Hna Amaman?
20 Nemene la mekuna i epun thupene la hne së hna ce wang la tusi Hna Amaman? Easa madrine la easa öhne laka, thatraqai së hi la itre hna perofetane celë. Nge kola uku së troa hëne la itre xaa atr troa hane ce nyihlue i Iehova me easë ngöne la hmi ka wië. (Hna ama. 22:17) Ame la easa mekune la itre ewekë ka troa traqa, ke kola ketri së, nge casi hi la mekuna së me Ioane aposetolo, lo angeic a hape: “Amen! Traqa pi, Iesu Joxu.”—Hna ama. 22:20.
NYIMA 27 Kola Mama La Itre Nekö i Akötresie
[Ithuemacany]
a Celë hi la tane mekun tixenuë ka qejepengöne la tusi Hna Amaman. Tro sa ce wang ngöne la tane mekun celë la itre manathith hna troa kapa hnene la itre ka mele nyipici koi Iehova, memine la pun kowe la itre ka icilekeu memine la musi Nyidrë.