TANE MEKUN 19
Tusi Hna Amaman—Aliene Koi Së Enehila
“Ka madrine la atre e catrëne la hna perofetan celë.”—HNA AMA. 1:3.
NYIMA 15 Qaja Madrine Jë Së La Hupuna i Iehova!
MEKUN KA TRUa
1-2. Nemene la pane kepin matre loi e tro sa atrepengöne hnyawa la tusi Hna Amaman?
PANE mekune jë ka hape, kola hane hë epun hnene la ketre sinee troa goeëne la itre foto i angeic. Ame la epuni a goeëne la itre foto, ke, pëkö ca atr hnei epuni hna wangatrehmekun. Ngo ca ifoto pe kö ka canga mama koi epun. Pine nemen? Ke epuni fe e hnine lai foto, matre epuni a thele la ijin, memine la götran hna xom lai foto. Epuni fe a thele la ëjene la itre atr ka ce foto me epun. Ketre foto lai ka tru aliene koi epun.
2 Ceitune hi la tusi Hna Amaman memine lai foto. Pine nemen? Hetre lue kepin. Ame la hnapan, ke, hna cinyanyine la itusi cili koi së. Ame ngöne la pane xötr ne la itusi cili, kola qaja ka hape: “Hna amaman jëne Iesu Keriso, lo hnei Akötresie hna ahnithe kow troa amamane la itre ewekë ka troa canga traqa koi itre hlue i nyidrë.” (Hna ama. 1:1) Celë hi matre, ame la itre hna cinyanyi ngöne la itusi celë, ke tha thatraqane kö la nöjei atr asë, ngo koi së hi, itre hlue i Akötresie. Ame easë itre hlue i Akötresie, atre hnyawa hi easë laka, easë fe a hane eatrëne la hna perofetan ngöne la itusi celë. Matre, kösë easë fe e hnine lai foto.
3-4. Eue la troa eatr la itre hna perofetan ngöne la tusi Hna Amaman, nge nemene la nyine tro sa kuca?
3 Ame la hnaaluene kepin matre nyipiewekë tro sa atrepengöne hnyawa la tusi Hna Amaman, ke, ej a qaja la ijin troa eatr la itre hna perofetan. Hnei Ioane aposetolo hna qaja la ijine cili ngöne lo nyidrëti a hape: “Hnene la ua hna xomi ni kowe la drai i Joxu.” (Hna ama. 1:10) Ame lo Ioane a cinyanyine lai, lo macatre 96 M.K., ke nanyi palakö “la drai i Joxu.” (Mat. 25:14, 19; Luka 19:12) Ngo thenge la hna perofetan hnei Tusi Hmitrötr, hna nyiqane la drai cili lo 1914 ngöne lo kola acili Iesu troa Joxu ngöne la Baselaia e koho hnengödrai. Qane ju hi la macatre cili, kola nyiqane eatr la itre hna perofetane ngöne la tusi Hna Amaman göne la nöje i Akötresie. Eje hi, easë hnyawa a melëne “la drai i Joxu”!
4 Pine laka, easë hnyawa a melëne la itre drai ne la pun, nyipiewekë tro sa wangatrune la hna qaja ngöne Hna Amaman 1:3: “Ka madrine la atre e catrëne la hna perofetan celë me itre ka dreng, me itre ka trongëne la hna cinyihan, ke calemi hë la drai hna sa.” Nyipiewekë tro sa “e catrëne” me “dreng,” me “trongëne” la hna perofetan. Nemene la itre hna perofetan nyine tro sa trongën?
LOI E TRO IEHOVA A KAPA LA HMI SË
5. Thenge la tusi Hna Amaman, pine nemene matre nyipiewekë troa kapa la hmi së hnei Iehova?
5 Kola amamane ngöne la pane meken ne la tusi Hna Amaman ka hape, atre catre Iesu la itre ewekë ka traqa ngöne la nöjei ekalesia. (Hna ama. 1:12-16, 20; 2:1) Celë hi ka mama ngöne la itre maca hnei nyidrëti hna iupifë kowe la 7 lao ekalesia ne Asia. Ame ngöne la itre maca cili, hnei nyidrëti hna hamëne la itre hna amekötin nyine xatuane la itre pane keresiano. Nyipiewekë tro angatr a wang ka hape, hna kapa kö la hmi angatr hnei Iehova. Ketre, ame la itre maca cili, ke, thatraqai easë fe, itre hlue i Iehova enehila. Nemene la ini koi së? Atre hnyawa hi Iesu Keriso, Joxu së, la aqane imelekeu së me Iehova. Nyidrëti a thupë së, nge öhne asë hi nyidrë la itre ewekë hne së hna kuca. Atre hi nyidrë la nyine tro sa kuca, matre tro palahi a kepe së hnei Iehova. Nemene la itre hna amekötin ka nyipiewekë koi së enehila?
6. (a) Thenge la Hna Amaman 2:3, 4, nemene la jol hnei Iesu hna öhne thene la ekalesia ne Efeso? (b) Nemene la ini nyine tro sa xom?
6 E jë la Hna Amaman 2:3, 4. Tha tro kö a patr la ihnimi së hnapan koi Iehova. Kola mama ngöne la maca i Iesu kowe la ekalesia ne Efeso laka, hnei angatr hna cile hut me catre huliwa i Iehova, ngacama kola traqa la itre jol. Ngo ame pe, patre hë lo ihnimi angatr hnapan. Loi e tro hmaca angatr a acatrene la ihnimi angatr, matre tro Iehova a kapa la hmi angatr. Ketre tune fe enehila, nyipiewekë tro sa cile catr qëmekene la itre jol. Ngo ka nyipiewekë catre fe la itre kepin matre easë a cile catr. Akötresie a goeëne la itre ewekë hne së hna kuca, ngo memine fe la kepin matre easa kuca. Aja i Iehova tro sa nyihlue i Nyidrë qa kuhu hni së.—Ite edomë 16:2; Mar. 12:29, 30.
7. (a) Thenge la Hna Amaman 3:1-3, nemene la jol hnei Iesu hna öhn thene la ekalesia ne Saradi? (b) Nemene la ini koi së?
7 E jë la Hna Amaman 3:1-3. Loi e tro palahi sa hmek. Hetre ketre jol ka traqa kowe la ekalesia ne Saradi. Ngacama itre ka catre huliwa i Akötresie ekö, ngo angatr ha nyiqane nanazije trootro. Matre öni Iesu koi angatr, “hmeke ju.” Nemene la ini koi së? Eje hi, thatreine kö Iehova thëthëhmine la itre huliwa së. (Heb. 6:10) Ngo, tha tro pi kö sa mekun ka hape, pine laka hne së hna huliwa catr koi Nyidrë ekö, matre tha nyipiewekë hë enehila tro sa huliwa atrunyi koi Nyidrë. Ngacama easa utipië trootro, ngo loi e tro palahi sa hmek me catre “huliwa i Joxu” utihë la pun.—1 Kor. 15:58; Mat. 24:13; Mar. 13:33.
8. Nemene la ini hne së hna xom qa ngöne la hna qaja ngöne Hna Amaman 3:15-17 kowe la ekalesia ne Laodikea?
8 E jë la Hna Amaman 3:15-17. Loi e tro sa catre huliwa koi Iehova cememine la hni ka pexej. Hnei Iesu hna qaja la ketre jol ka ej thene la ekalesia ne Laodikea. Kösë “ka keu” la hmi angatr. Hnei Iesu hna jelehmo angatr pine la itre thiina i angatr. Loi e tro angatr a akökötrene la aja i angatr troa huliwa i Iehova me atrunyi Nyidrë. (Hna ama. 3:19) Nemene la ini koi së? Maine easë ha nyiqane nanazij, ke loi e tro hmaca sa wangatrune la itre ini hne së hna kapa qaathei Iehova. (Hna ama. 3:18) Tha tro pi kö sa nue la mani me mo troa tro pa ngöne la mele së, nge pi Iehova pë hë.
9. Thenge la maca i Iesu kowe la ekalesia ne Peregamo me Thuataira, nemene la ewekë nyine tro sa thipetrij?
9 Loi e tro sa kötrene la itre ka iamenumenu. Hnei Iesu hna hajine la itre xaa trejin ne Peregamo, ke hnei angatr hna aciane la icilekeu, me thë la cas ne la ekalesia. (Hna ama. 2:14-16) Ngo nyidrëti pe a madrine kowe la itre trejin ne Thuataira, ke, hnei angatr hna ananyine la “itre ewekë ka jui i Satana.” Nge hnei nyidrëti hna ithuecatre koi angatr troa fedr kowe la nyipici. (Hna ama. 2:24-26) Loi e tro la itre trejin hna ajojezin hnene la itre ini ka thoi a ietra. Tune kaa fe easë enehila? Loi e tro fe sa nuetrij la itre ini ka icilekeu memine la mekuna i Iehova. Itre ka iamenumenu a “nyi ka hmi, ngo tha metrötrëne pe [angatr] la mene i Akötresie.” (2 Tim. 3:5) Maine tro sa catre inine la Tusi Hmitrötr, ke canga tro hi sa wangatrehmekune la itre ini ka thoi me thipetrij itre ej.—2 Tim. 3:14-17; Iudra 3, 4.
10. Nemene la ketre ini hne së hna xom qa ngöne la hnei Iesu hna qaja kowe la ekalesia ne Peregamo me Thuataira?
10 Tha tro kö sa kuci ngazo, maine kapa la itre xaa aqane ujë ka sis. Hetre ketre jole fe ka ej ngöne la ekalesia ne Peregamo me Thuataira. Hnei Iesu hna hajine la itre xaa atrene la lue ekalesia cili, ke angatr palahi a kuca la itre ewekë ka sis. (Hna ama. 2:14, 20) Nemene la ini koi së? Tha tro pi kö sa mekun ka hape, tro Iehova a nu la itre huliwa ka sis hne së hna kuca, ke ekö hë së nyihlue i Nyidrë, nge hetre hnëqa së ngöne la ekalesia. (1 Sam. 15:22; 1 Pet. 2:16) Aja i Nyidrë tro sa trongëne la itre trepene meköti Nyidrë ka draië, ngacama kola tro ngazo la fen.—Efe. 6:11-13.
11. Nemene la itre ini hne së hna ce wang? (Wange ju la hna eköhagen hna hape, “Itre Ini Koi Së Enehila.”)
11 Nemene la itre ini hne së hna ce wang? Hne së hna ce wang laka, nyipiewekë tro sa waipengöne la hmi së koi Iehova. Maine hetre ewekë ka adrone la hmi së, ke loi e tro sa canga saze. (Hna ama. 2:5, 16; 3:3, 16) Ngo, hetre ketre ewekë palakö hnei Iesu hna qaja matre hmekën la itre ekalesia. Nemene la ewekë cili?
TROA CILE CATR QËMEKENE LA IAKÖTRË
Thupene la hna upi Satana kowe la fen, hnei angeic hna akötrëne tune kaa la itre hlue i Iehova? (Wange ju la paragarafe 12-16)
12. Nemene la ithuecatr hnei Iesu hna hamën kowe la ekalesia ne Semurina me Filadelefia? (Hna Amaman 2:10)
12 Tro pena sa ce wang la hna qaja hnei Iesu kowe la ekalesia ne Semurina me Filadelefia. Hnei Iesu hna ithuecatr koi angatr laka, tha tro kö angatr a xouene la iakötrë, ke tro kö angatr elanyi a kapa la itre manathith. (E jë la Hna Amaman 2:10; 3:10) Nemene la ini koi easë enehila? Loi e tro sa lapa atre ka hape, tro fe a hane axösisi së, matre nyipiewekë tro sa hnëkë. (Mat. 24:9, 13; 2 Kor. 12:10) Pine nemene matre loi e tro sa lapa mekune lai?
13-14. Nemene la thangane la isi e hnengödrai kowe la itre hlue i Iehova?
13 Tusi Hna Amaman a qaja ka hape, troa akötrëne la nöje i Akötresie ngöne la hneijine i easë, ene “la drai i Joxu.” Kola qaja ngöne Hna Amaman mekene 12 laka, thupene la kola acile la Baselaia i Akötresie, ke hna isi e hnengödrai. Mikaela, ene Iesu Keriso me trongene isi nyidrë a isi me Satana me itre dremoni. (Hna ama. 12:7, 8) Thupene lai, hna ngaa Satana me itre dremoni me ukapië angatr kowe la fen. Celë hi matre, akötre catr la itre atr. (Hna ama. 12:9, 12) Nemene hë la thangane kowe la nöje i Akötresie?
14 Tusi Hna Amaman a qaja la aqane ujë i Satana e thupen. Pine laka, tha ijiji angeice hmaca kö troa elë e hnengödrai, matre angeic a nu asë la trenge elëhni angeic kowe la itre hna iën e celë fen, itre jini ne la Baselaia, itre ka xome “la huliwa ne anyipici Iesu.” (Hna ama. 12:17; 2 Kor. 5:20; Efe. 6:19, 20) Hna eatre tune kaa la hna perofetane celë?
15. Drei la “lue perofeta” hna qaja ngöne Hna Amaman mekene 11, nge nemene la ka traqa koi nyidro?
15 Hnei Satana hna axösisine la itre trejin hna iën ka elemekene la huliwa ne cainöj. Angatre hi lo “lue perofeta” hna humuth.b (Hna ama. 11:3, 7-11) Ame lo 1918, hna akalabusine la 8 lao trejin ka elemekene la organizasio. Matre kösë “meci” hë la huliwa ne la itre hna iën.
16. Nemene la ewekë ka traqa lo 1919, nge nemene la hnei Satana hna kuca utihë enehila?
16 Kola qaja ngöne Hna Amaman mekene 11 laka, troa canga amelene hmaca la “lue perofeta.” Hna eatr la hna perofetane celë ngöne ju kö lo macatre thupene la kola akalabusine la itre trejin hna iën. Ame lo macatre 1919, hna nue angatr hmaca qa ngöne la kalabus. Tha qea ju kö, nge angatr hmaca a xejë la huliwa ne cainöj. Ngo tha cile kö Satana akötrëne la nöje i Akötresie. Qane ju hi lai, Satana a neng kösë “hneopegejë” la itre iakötrë kowe la itre hlue i Akötresie. (Hna ama. 12:15) Enehila hi la ijin tro sa “cile hut, me lapaun.”—Hna ama. 13:10.
CATRE JË KUCA LA HULIWA I IEHOVA
17. Nemene la ixatua hna kapa hnene la nöje i Akötresie, ngacama tru la iakötrë?
17 Kola qaja ngöne Hna Amaman mekene 12 laka, tro la nöje i Akötresie a kapa la ketre ixatua. Kösë kola ulume la “hneopegejë” ne iakötrë hnene la “ihnadro.” (Hna ama. 12:16) Nge celë hi ka traqa. Ame itre xaa ijin, kola xatua së hnene la itre xaa hna acil ngöne la fene i Satana, tune la itre hnakootr. Anyimua hune hë së ngöne la itre hnakootr. Matre nemene la hna aijijë së troa kuca? Kola aijijë së hmaca troa kuca la huliwa hnei Iehova hna ahnith koi së. (1 Kor. 16:9) Nemene la huliwa cili?
Nemene la lue maca hna tro fë hnene la itre hlue i Iehova? (Wange ju la paragarafe 18-19)
18. Nemene la huliwa së ngöne la itre drai ne la pun?
18 Hnei Iesu hna perofetane laka, tro la nöje i nyidrë a “cainöjëne la maca ka loi ne la Baselaia [i Akötresie] e cailo fen” qëmekene troa traqa la pun. (Mat. 24:14) Easa kapa la ixatua ne la itre angela, nge thei angatr “la ketre maca ka loi nge ka epine palua, maca nyine tro fë kowe la itre ka lapa e celë fen, koi nöjei nöj, me nöjei tribu, me nöjei qene hlapa, me nöjei atr.”—Hna ama. 14:6.
19. Nemene la ketre maca hna cainöjëne hnene la itre hlue i Iehova enehila?
19 Tha easë hmekuje kö a cainöjëne la maca ka loi ne la Baselaia. Easë fe a xatuane la itre angela ngöne la huliwa i angatr, hna qaja ngöne Hna Amaman mekene 8 koi 10. Itre angela a qaja la itre ewekë ka troa traqa kowe la itre ka icilekeu memine la Baselaia i Akötresie. Matre easë, itre hlue i Iehova a tro fë la ketre maca hna aceitunëne me “wene mani ka catr me eë.” Kola amamane hnene la maca cili la aqane tro Akötresie a amekötine la fene i Satana. (Hna ama. 8:7, 13) Loi e tro la itre atr a atre ka hape, calemi hë la pun, matre tro angatr a saze me hane mel ngöne la drai ne elëhni Iehova. (Zef. 2:2, 3) Ngo ketre maca lai hna xele ma dreng hnene la itre atr. Matre loi e tro sa catr, la easa tro fë la maca cili. Nge ame ngöne la ijine akötr atraqatr, ke tro kö a catrehnine catr la maca ne iameköti.—Hna ama. 16:21.
WANGATRUNE JË LA HNA PEROFETAN CELË
20. Nemene la hne së hna troa ce wang ngöne la lue tane mekun e thupen?
20 Loi e tro sa wangatrune “la hna perofetan” ngöne la tusi Hna Amaman, ke thatraqai së hnyawa hi. (Hna ama. 1:3) Ngo nemene la ka troa xatua së troa cile catr ngöne la iakötrë me catre cainöjëne la itre maca cili? Lue ewekë ka troa xatua së. Ame la hnapan, tro sa atre la hna qaja hnene la tusi Hna Amaman göne la itre ithupëjia i Iehova. Nge hnaaluen, tro sa lapa mekun la itre manathith hne së hna troa kapa elany, e tro sa mele nyipici. Celë hi hne së hna troa ce wang ngöne la lue tane mekun e thupen.
NYIMA 32 Ië Iehova Jë Së!
a Easa melëne la ketre hneijin ka ketrepengön! Kola eatr enehila la itre hna perofetan ngöne la tusi Hna Amaman. Nemene la enyipiewekëne la itre hna perofetan cili koi së? Tro la tane mekun celë, memine la lue xan e thupen a qejepengöne koi së la tusi Hna Amaman. Tro itre ej a amaman laka, tro Iehova a kapa la hmi së, e tro sa trongëne la hna qaja ngöne la itusi cili.
b Wange ju fe la “Itre Hnyinge Ne La Itre Ka e” ngöne la Ita Ne Thup 15 Nofeba 2014 g. 30 (Qene Wiwi).