Mekene Naidriin
Loi e Tro Pala Hi Së a Catre Qaja La Wesi Ula i Akötresie
1. (a) Nemene la maca ka loi hna qaja hnene la itretre drei Iesu, ngo tune kaa la aqane ujë ne la itre xaa atr ne Iudra? (b) Nemene la nyine tro së isa ala caas a isa hnyingëne thel?
KOLA troa traqa kowe la 2 000 lao macatre enehila, thupene lo hna iën la Hupuna i Akötresie ene Iesu Keriso troa Joxu elany hune la fene hnengödrai asë. Hna humuthi Iesu hnene la itre ithupëjia ka thaa ce hmi kö me nyidrë, ngo hnei Iehova hna amele nyidrëti hmaca qa hna mec. Matre jëne Iesu, ijiji së hë enehila troa hetrenyi la mele ka thaa ase palua kö. Ngo ame hë lo kola nyiqaane hnene la itretre drei Iesu troa cainöjën la maca ka loi, ene xulu pi hi la icilekeu. Hna akalabusin la itre xan e angatr, hna none kaun la itre xan, nge hna wathebo angatr troa qeje Iesu. (Ite Huliwa 4:1-3, 17; 5:17, 18, 40) Nemene la hnei angatr hna troa kuca? Maine epuni ju fe, nemene la hnei epuni hna troa kuca? Tro kö epuni a catre cainöjëne pala hi la maca ka loi?
2. (a) Nemene la maca ka lolo hna troa tro fë enehila? (b) Drei la atrekë hnëqan la troa cainöjën la maca ka loi?
2 Ame ngöne lo macatre 1914 hna acilë Iesu Keriso troa Joxu ne la Baselaia e koho hnengödrai matre troa musinëne ‘la nöjei ithupëjia me nyidrë.’ (Salamo 110:2) Thupene lai, hna ukapië Satana me itre dremoni i angeic kowe la fene hnengödrai. (Hna Amamane 12:1-5, 7-12) Hna nyiqaane hi e cili lo itre drai hnapine ne la fene ka ngazo i Satana. Ame hë elanyi la kola traqa kowe la pune la itre ijine cili, Akötresieti fe hi lai a apaatren asë la fene ka ngazo i Satana. (Daniela 2:44; Mataio 24:21) Tro hë la itre atr ka mele pe a öhne trongën la mele ka epine palua e celë, hune ihnadro a paradraiso hë. Maine itre ka kapa ha epuni la maca ka loi, haawe qa i epuni troa hane ce thawa ej memine la itre xaa atr. (Mataio 24:14) Ngo nemene la aqane tro la itre atr a waipengöne lai maca ka loi?
3. (a) Nemene la aqane kapa hnene la itre atr la maca ne Baselaia? (b) Nemene la hnying hne së hna troa sa thenge?
3 Hetre itre atr ka troa kapa hnyawa la maca ka loi ne la Baselaia hne së hna tro fë, ngo ala nyimu pe kö la itre ka thaa tro kö a nyipiewekëne ej. (Mataio 24:37-39) Ame itre xan tre, tro angatr a hnyimasai së me icilekeu me easë. Hnei Iesu mina fe hna ahnithe ka hape, troa hetre gomegom e hnine la itre hnepe lapa. (Luka 21:16-19) Maine tro pena la itre sine huliwa së me itre sine ini së a icilekeu me easë. Ame ngöne la itre xaa nöj, hna thinge kowe la Itretre Anyipici Iehova troa kuca la hmi angatr hnene la itre mus. Maine troa traqa tune koi së la itre ewekë celë, tune kaa, tro kö së a catr troa qaja la Wesi Ula i Akötresie me “cile huti ngöne la lapaun”?—1 Korinito 16:13.
The Mejiune Kö Së Kowe La Sipu Trenge Catre Së
4. (a) Nemene la ka aijiji së troa nyihlue nyipici koi Iehova? (b) Pine nemen matre ka nyipi ewekë catr la itre icasikeu kowe la itre Keresiano?
4 Maine easë a ajan troa hane nyi hlue koi Iehova ce memine la nyipici, nyipi ewekë tro sa mejiune kowe la itre ewekë asë hnei Iehova hna hnëkën nyine loi koi së ngöne la götrane la ua. Ame hi la ketre, tre, ene la itre icasikeu ne la ekalesia. Önine la Tusi Hmitrötr koi së, the majemine kö paatr ngöne la itre icasikeu, thaa tro pi kö a wangacone itre ej. (Heberu 10:23-25) Ame la Itretre Anyipici Iehova ka mele nyipici, tre, angatr a catre sin pala hi la itre icasikeu memine la itre Keresiano ka ce hmi me angatr. Kola akökötren hnene la itre icasikeu cili la aqane tro së a atrehmekune la Tusi Hmitrötr. Nge kola aciane fe e kuhu hni së la madrin kowe la itre ini ka nyipici hne së hna atre hë, me hamën la ajan tro së a thele la itre aqane troa tro fë itre ej. Kola acatrene fe hnene la itre icasikeu la itre aqane imelekeu së memine la itre trejine me easë Keresiano, ene pe easë a caas troa thili koi Iehova, nge kolo mina fe a ithuecatre koi së matre tro sa kuca la aja i Nyidrë. Uati hmitrötre i Iehova a huliwa hnine la ekalesia matre eatrongë së; ketre mina, Iesu e nyipi së jëne la Uati Hmitröt.—Mataio 18:20; Hna Amamane 3:6.
5. Ame ngöne la itre nöj ka thinge la hmi kowe la Itretre Anyipici Iehova, nemene la hna kuca hnene la itre trejin, matre troa hetrenyi pala hi la itre icasikeu?
5 Hapeu, sine pala hi nyipunie la itre icasikeu asë? Nge nyipunieti fe kö a isa trongëne hnyawa la itre ini hna hamën hnene itre ej? Ame ngöne la itre nöj ka thingijën la Itretre Anyipici Iehova troa kuca la hmi i angatr, tre, hnei angatr hna thawa la itre neköi gurup ka co matre ijije tro pe hi a icasikeu ngöne la itre hnalapa ne la itre xaa trejin. Ame e itre xaa ijin, hna saze göhnen la itre icasikeu memine la hawa, nge thaa ka hmaloi kö troa sin ke ame itre xaa icasikeu, hna sa traemen koi hnenyipajidr. Ngacama thaa ka hmaloi kö koi angatr la itre traem hna sa, nge troa hetrenyi la itre iangazo, ngo kola isine hnene la itre trejine trahmanyi me föe ka nyihlue nyipici, matre pëkö caa icasikeu hna troa trian.
6. Tune kaa la aqane tro sa amamane la mejiune së koi Iehova, nge nemene la aqane tro la ewekë cili a xatua së troa catre qaja pala hi la maca ka loi?
6 Troa kökötre pala hi la mejiune së koi Iehova e hne së hna catre thithi koi Nyidrë, me mejiune hnyawa laka nyipi ewekë catre koi së la ixatua i Nyidrë. Epuni kö a hane thithi tune lai? Hnei Iesu pala hi hna thithi ngöne lo nyidrëti a cainöj e celë fen. (Luka 3:21; 6:12, 13; 22:39-44) Qëmekene troa athipi nyidrë hune la sinöe, hnei nyidrëti hna ithuecatr kowe la itretre drei nyidrë ka hape: “Hmekënejë nyipunie me thith, mate tha lö kowe la itupath.” (Mareko 14:38) Hnene la hna xele ma drenge la maca ne Baselaia hnene la itre atr, maine jë tro sa nango nanazij troa cainöj. E hnyimasai së jë pena me icilekeu me easë hnene la itre atr, maine jë tro sa nango hnö e troa cainöj matre troa neëne wanga traqa pi la itre jol. Ngo maine tro sa catre sipon jëne la thith matre tro la uati hmitrötre i Akötresieti a xatua së troa catre cainöj, eje hi lai laka, troa hetre trenge catre së troa elë hune la itre itupath.—Luka 11:13; Efeso 6:18-20.
Itre Thangane La Hna Catre Cainöj
7. (a) Pine nemen matre nyipi ewekë catr la tusi Ite Huliwa koi së isa ala caas? (b) Sa jë la itre hnying ngöne la pune la paragarafe celë me amamane la eloine la troa xome thatraqa së la itre ithuemacanyi cili.
7 Ame koi së isa ala caas, ka nyipi ewekë catr la itre hna qaja hnine la tusi Ite Huliwa. Kola qeje pengöne e cili la aqane elë hune la itre itupath, me catre mele nyipici hnene la itre aposetolo memine lo itretre dreng ekö, itre atr ka tu së hi. Tro sa ce wang la ketre götran ne la itusi cili, jëne la itre hnying memine la itre xötr ne la Tusi Hmitrötr hna hamën. Ame ngöne la easa e, tre, isa wange ju fe la aqane tro së a kepe thangane ka loi jëne la itre mekune cili ngöne la mele së.
Hapeu, itre ka qa kö hna ini la itre aposetolo ngöne la itre uma ne ini ka tru? Hapeu, ka pë fe kö thei angatr la xoue atr, ngacama akötre ju hë la itre ewekë ka traqa koi angatr? (Ioane 18:17, 25-27; 20:19; Ite Huliwa 4:13)
Nemene la ka aijijë Peteru me Ioane lue aposetolo, troa catre ithanata qëmekene la hna kootre i angetre Iudra, lo itre ka humuthe la Hupuna i Akötresie? (Mataio 10:19, 20; Ite Huliwa 4:8)
Nemene la hna kuca hnene lo itre aposetolo, ngöne lo itre wiik qëmekene troa kootrë angatr hnene la itre atren la Hna Kootre ka tru i angetre Iudra? (Ite Huliwa 1:14; 2:1, 42)
Nemene la hna sa hnei Peteru me Ioane lue aposetolo, ngöne lo kola sewe angatr hnene la itre tan troa cainöj ngöne la ëje i Iesu? (Ite Huliwa 4:19, 20)
Drei la hnene la angaposetolo hna sipo ixatua kow, thupene la hna nue angatr? Hapeu hnei angatr hna sipon jëne la thith troa paatr la icilekeu, nge maine thaa eje kö lai la hnei angatr hna thithi fë, nemene kö la alien la thithi angatr? (Ite Huliwa 4:24-31)
Tune kaa la aqane xatuane Iehova la itre hlue i Nyidrë ngöne lo kola thel hnene la ithupëjia me angatr troa sawa la huliwa ne cainöj? (Ite Huliwa 5:17-20)
Nemene la aqane amamane hnene la itre aposetolo ka hape trotrohnine hnyawa hi angatr la kepine matre kola nuamacanyi angatr? (Ite Huliwa 5:21, 41, 42)
Nemene la hna catre kuca hnene la itretre dreng ka nyimutre, ngacama hna aije angatr hnene la icilekeu? (Ite Huliwa 8:3, 4; 11:19-21)
8. Nemene la itre thangane ka loi hna kapa hnene la itretre dreng ekö qa ngöne la hnei angatr hna cainöj, nge nemene la aliene lai koi së?
8 Thaa ka gufa kö la hna cainöjën la maca ka loi. Ame ngöne lo Penetekos ne la macatre 33 M.K., hna xome la bapataiso hnene la itretre dreng ala 3 000 la etrun. “Hna nyi xane la angete lapaune koi Joxu, ala nyimu la ite trahmanyi me fö.” (Ite Huliwa 2:41; 4:4; 5:14) Ame hë thupene lai, kola hane xome la hmi i Keresiano me catre cainöjën la nyipici hnene la ketre atr ka catre icilekeu memine la itre hlue i Akötresie, ene Saulo atre Taraso. Nyidrë lo hna hëne ka hape Paulo aposetolo. (Galatia 1:22-24) Qaane ju hi lo hneijine cili, pëkö atreine troa acilëne la huliwa ne cainöj. Eje a kökötre catr enehila ngöne la hneijin hna hape itre drai hnapin, nge ase hë eje haöth la fene hnengödrai asë. Atraqatr mina fe la madrine së troa xome la hnëqa cili, celë hi matre ijije mina fe tro sa hane xomi ini qa ngöne la tulu ne la itretre anyipicin ka mele nyipici, ka pane cainöje hë ekö.
9. (a) Nemene la itre ijine ka isa pengön hna xome hnei Paulo troa cainöj? (b) Nemene la itre aqane cainöjëne epuni la maca ne Baselaia kowe la itre xaa atr?
9 Nemene la hna kuca hnei Paulo ngöne la angeic a atre la nyipici göi Iesu Keriso? “Angeic’ a canga cainöjë Keriso . . . laka nyidëti la Hupuna i Akötesie.” (Ite Huliwa 9:20) Hnei angeic hna olene koi Akötresieti la ihnimi gufa i Nyidrë koi angeic, nge angeice mina fe a trotrohnine ka hape, tune la aqane madrine angeic troa kapa la maca ka loi, haawe, nyipi ewekë mina fe tro la itre atr asë a drenge la maca cili. Atre Iudra angeic, celë hi matre hnei angeic hna tro kowe la itre sunago matre troa cainöj; kola xötrethenge lo hna majemine kuca ekö hnene la itretre Iudra, ene la troa hmi ngöne la itre sunago. Hnei angeice mina fe hna cainöj ngöne itre hnalapa trootro, me ithanata kowe la itre atr ngöne la hna maketr. Ketre, hnei angeice hna tro fë la maca ka loi kowe la itre götrane thaa hna ketr petre kö.—Ite Huliwa 17:17; 20:20; Roma 15:23, 24.
10. (a) Hnei Paulo hna amamane tune kaa ka hape, hetrenyi thei angeice la trenge catr me wangatrehmekun troa tro fë la maca ka loi? (b) Nemene la aqane tro së a hane xötrethenge la aqane huliwa i Paulo ngöne la easë a cainöj kowe la itre sinee së, me kowe la itre sine huliwa së me itre sine ini së?
10 Hetrenyi thei Paulo la trenge catr me wangatrehmekun troa tro fë la maca ka loi; ka loi fe koi së troa hane xome la tulu cili. Haawe, hnei angeic hna ketr la hni angetre Iudra, ngöne la angeic a amexej la itre hna thingehnaean hnei Akötresie kowe la itre xötrapane i angatr. Ame la angeic a ithanata me angetre Heleni, hnei angeic hna nyiqaane ithanatane me angatr la itre ewekë hnei angatre hna atre hë me majemine kuca. Ame pena e itre xaa ijin, angeic a qejepengöne la aqane traqane la nyipici koi angeic, kolo hi matre nyine nyi jë i angeice troa cainöje kowe la itre atr. Hnei angeic hna qaja ka hape: “Ini a kuca la ewekë celë pine la maca ka loi, mate tro sha ce hetenyin.”—1 Korinito 9:20-23; Ite Huliwa 22:3-21.
11. (a) Nemene la hna kuca hnei Paulo matre thaa tro kö a thele gomegom memine la itre ka catre icilekeu me angeic? (b) Eu la ijine troa xome hnyawa la tulu i angeic, nge troa tune kaa? (c) Ka qaa kaa la trenge catr hne së hna troa xom matre troa catre cainöjën la maca ka loi?
11 Ame la kola öhne hnei Paulo laka nango catrehnine la icilekeu ngöne la ketre götran, haawe angeice a tro pi qaa lai me tro pena troa cainöj ngöne la ketre götran; göne hi matre troa ananyine la itre ka thele gomegom. (Ite Huliwa 14:5-7; 18:5-7; Roma 12:18) Ngo thaa hnei angeice pi kö hna hmahma pine la maca ka loi. (Roma 1:16) Eje hi lai laka ame la thiina ka ngazo me aqane iakötrë ne la itretre icilekeu, tre pëkö madrine nyine tro Paulo a kapa qa ngön, ngo ame pe tre hnei angeice pala hi hna ‘catre jëne Akötresie’ troa cainöje trootro. Hnei angeice hna qaja ka hape: “Hnei Joxu hna ce cile me ini, me acatenyi ni ; mate nyipi mamapi hnenge la tenge ewekë hna cainöjën.” (1 Thesalonika 2:2; 2 Timoteo 4:17) Iesu la He ne la ekalesia i Keresiano, nyidrëti pala hi a hamën la trenge catr ka ijij matre troa kuca la huliwa hna ahnithe hë thatraqane la hnedrai së enehila.—Mareko 13:10.
12. Nemene la ka anyipicine laka itre ka catre cainöje la itre Keresiano, nge ekaa la ixomaxoma ne la trenge catr cili?
12 Nyimu kepine matre tro pala hi sa catre qaja la nyipici göi Akötresie, tune lo itre tulu hna amë pë hë hnei Iesu memine lo itre xaa hlue i Akötresie ne lo hneijine i nyidrë. Kola upi së troa catre cainöjën la maca ka loi, ngo thaa tro pe a inagala maine tro pena a una ielen la itre atr troa kapa la maca ka loi nge xele pe angatr. Ngo kolo pe lai a hape wange kö nue trije pi la hnëqa hnene laka, xele kö la itre atr ma drei së, maine tro pena a lepe ahumunyi së hnene la icilekeu. Xötrethenge jë pe lo tulu i Iesu, ene la troa qejepengöne ka hape, ame la Baselaia i Akötresie, tre celë hi musi lai ka troa cile hune la fene hnengödrai asë. Thaa luelue pi kö së e troa ithanata pine laka easë a nyitrenge ewekë i Iehova, lo Ka Pucatin asë e cailo fen, nge ketre, thaa qaathe së kö la maca ngo ewekë i Nyidrë. Nge qa ngöne laka tru catr la ihnimi së koi Iehova, ene pe easë a catre thel troa atrunyi Nyidrë.—Filipi 1:27, 28; 1 Thesalonika 2:13.
Revizio
• Pine nemen matre nyipi ewekë troa tro fë la maca ne Baselaia kowe la itre atr ka ala nyim, ngo nemene la isa aqane kepe së hnene la itre atr?
• Tune kaa la aqane tro sa amamane ka hape thaa easë kö a mejiune kowe la sipu trenge catre së ngöne la kola troa nyihlue i Iehova?
• Nemene la itre ini ka sisitria hna hamëne koi së hnene la tusi Ite Huliwa?
[Iatr ne la götran 173]
Tune ekö, kola catre qaja enehila hnene la itre hlue i Iehova la itre trenge ewekë i Akötresie