Hapeu, Catre Kö Së Troa Cainöj?
1 Ngacama hna akalabusi Peteru me Ioane, me angazone la mele i nyidro, ngo thaa mano kö nyidro, hnei nyidroti hna catre qaja la maca ne la Baselaia. (Ite Huliwa 4:17, 21, 31) Nemene lai aliene koi së enehila la hna hape, troa catre cainöj?
2 Catre Jë Së Cainöj: Ame la hna qaja ka hape, “catr” ke, ka ihmeku memine la hna hape “ka thaa cile hnö,” pine laka, ka “xecie e kuhu hni ne lai atr troa catr, nge hetrenyi la aqane waiewekë ka loi matre atreine angeice troa cile kowe la itre akötr, me atreine cile catre hnine la itre itupath.” Haawe, ka mama cile kowe la itre nyipi keresiano laka ame la troa catre cainöj, ke kola hape, thaa tro kö a cile hnö troa ithahnata, me wange pala hi la nöjei ijine ka ijije troa cainöjëne la maca ka loi. (Ite Huliwa 4:20; 1 Pet. 3:15) Nyine tro fe lai a amamane ka hape, thaa easë kö a hmahmane la maca ka loi. (Sal. 119:46; Rom. 1:16; 2 Tim. 1:8) Qa ngöne lai, ame la troa catr, ke, ketre thiina lai nyine tro sa akökötrene the së, matre aijijë së troa eatrëne la hnëqa së, ene la troa cainöjëne la maca ka loi ne la Baselaia, ngöne la pune la hneijine celë. Tro la thiina cili a upi së fe, troa cainöjëne la maca ka loi kowe la nöjei atr hne së hna iöhnyi memin.—Ite Huliwa 4:29; 1 Kor. 9:23.
3 Catre Jë Ngöne La Hna Ini: Hapeu, kola jole koi nyipunie troa cainöje kowe la itre sine ini nyipunie pine laka, nyipunieti a xou, maine ka lapa thaupu pena? Nyipici laka, thaa ewekë ka hmaloi kö troa eatrëne la ewekë cili. Ngo ame pe, ke, tro Iehova a hamëne la trenge catre koi së, e hne së hna thithi fë koi Nyidrë la jole ka eje the së, nge tro Nyidrëti a xatua së troa catre cainöje kowe la itre xan. (Sal. 138:3) Ketre, hnene la aqane catre cainöje së, troa mama ka hape, ketre atre anyipici Iehova së, nge kolo mina fe a aijijë së troa cile catre qëmekene la itre iahmahmany. Qa ngöne lai, tro la aqane cainöje i nyipunie ngöne la hna ini, a hane amelene fe la itre ka drei nyipunie.—1 Tim. 4:16.
4 Catre Jë Ngöne La Hna Huliwa: Hapeue ngöne la hnei nyipunie hna huliwa, atre nyipunieti kö hnene la itre sine ce huliwa i nyipunie, ka hape, ketre Temoë i Iehova nyipunie? E tro pe a mekune hnyawa, caasi hi la aqane troa ketr la itre sine huliwa i nyipunie hnene la maca ka loi, ene la tro nyipunie a cainöje koi angatr. Tro mina fe la aqane catre cainöije i nyipunie a aijijë nyipunie, troa sipo drai ne mano thatraqane la itre icasikeu i Keresiano me itre asabele.
5 Catre Jë Ngöne La Itre Itupath: Nyipi ewekë troa catr ngöne la easë a cile kowe la ithupëjia. (1 Thes. 2:1, 2) Tro la aqane catre së a aijijë së troa lapa huti ngöne la lapaun, e traqa pi koi së la itre icilekeu, me itre iahmahmany, me itre iaxösisi. (Fil. 1:27, 28) Tro la thiina cili a acatrenyi së, matre tro sa cile huti ngöne la itre itupathi ka uku së troa ena la itre wathebo ne la Akötresi së, Iehova. Kolo fe a thuecatre së troa lapa tingetinge memine la itre ka thele iwesitrë me easë.—Rom. 12:18.
6 Ngacama nyimutre la itre jole hne së hna isa qëmeke kow, the hmaca pi kö së troa cainöjëne pala hi la maca ka loi. —Efe. 6:18-20.