Catre Jë Qaja Lapaane La Wesi Ula i Akötresie
1 Atre hi së, itre keresiano, laka thaa tro kö la itre atr asë a kepe së la easa cainöje trootro. (Mat. 10:14) Ngo ame pe, thaa tro kö sa nue la ewekë cili troa sewe së troa ahlemune la maca ka loi. (Ite edomë 29:25) Nemene la ka troa xatua së troa catr qaja la Wesi Ula i Akötresie?
2 Hnei Paulo aposetolo hna wanga atrune “la esisitia ne la wangate hmekunyi Keriso Iesu Joxu.” Qa ngöne lai, hnei angeic hna ithanata cememine la ‘mejiune atraqatr.’ (Fil. 3:8; 1 Thes. 1:5) Ngacama hnei itre xaa atr hna goeëne la maca ka loi hna cainöjëne ceitun me ketre maca ne hmo, ngo atre hnyawa hi angeice laka “celë hi mene i Akötesie nyine amelene la nöjei ate asëjëihë kola lapaun.” (Rom. 1:16) Haawe, qëmeke ju hë angeice kowe la icilekeu, ngo ame pe angeice pala hi a ‘catr ithanata jëne la mene i Iehova.’—Ite hu. 14:1-7; 20:18-21, 24.
3 Qeqene La Trenge Catre Së: Thaa qa ngöne kö la sipu trenge catre i Paulo la atreine i angeice troa catr cainöj. Öni Paulo e qeje angeic me Sila ka hape: “Ngo hna pane akötë hun, me angazon’ e Filipi, ate hi nyipunieti lo, nge catepi hë huni thupene lai [jëne] Akötesi shë troa qaja koi nyipunie la maca ka loi Akötesie memine la aköte atraqat.” (1 Thes. 2:2; Ite hu. 16:12, 37) Ketre, ame ngöne la kola akalabusi Paulo e Roma, hnei angeice hna sipone la itre trejine troa thithi sai angeic matre ‘catejë [angeic] qaja ej’, ene la ka ijiji [angeic] troa qaja.’ (Efe. 6:18-20) Hnene la hnei angeice hna mejiune koi Iehova hune la sipu trenge catre i angeice kö, ene pe atreine i angeice catr qaja lapaane la Wesi Ula i Akötresie.—2 Kor. 4:7; Fil. 4:13.
4 Ceitune hi lai memine la hneijine së enehila. Ketre jole ka tru kowe la ketre trejine trahmanyi troa qaja kowe la itre sine huliwa i angeice ka hape Temoë i Iehova angeic, me hane qeje tus koi angatr. Angeice a thithi fë jë lai hnepe jole cili, ene pe nyiqaane jë hi angeice cainöj koi angatr. Thipëne kö la ketre sine huliwa i angeic ngöne la xötrei, ngo ame hë la kola drenge la mejiune ne la melehmaca, celë hi ka aijijëne lai atr troa inine la Tusi Hmitrötr. Qaane ju hi lai, angeice a thele la itre ijine ka ijije troa cainöj. Ame pena ngöne la ketre hna huliwa i angeic, 34 lao atr hnei angeic hna xatuan uti hë bapataiso angatr, hna e la 14 lao macatre ne xatua angatr. Loi e tro sa mejiune laka tro Iehova a thuecatre së fe matre ‘troa catr qaja lapaane la Wesi Ula i Nyidrë.’—Ite hu. 4:29