Thangane Ka Loi La Hna Sin La Lapa Ne La Itre Sine Hmi Huni Keresiano

Ngacama tro ju hë huni a thupa la hnaxulu maine ngazo drai, hne huni pala hi hna sin la itre icasikeu i Keresiano. Maine traqa ju hë la itre ejolene la mel, me kucakuca pena thupene la hna ­huliwa ngöne la drai ka pexej, ngo pine nemene kö matre tha cile kö huni troa ce sin pala hi la itre icasikeu memine la itre sine hmi hun?

Kola hamë ixatua göi troa cile kowe la itre ejolene la mel. “Tro sha imekunekeune” tune la hna cinyihane hnei Paulo, lo kola qaja la itre ka icasikeu hnine la ekalesia. (Heberu 10:24) Ame la aliene la hnaithanata celë, tre ene la troa “wangatrunyi itre xan,” kolo fe lai a hape tro huni a thele troa iatrepengö hnyawa. Celë hi matre tune la trenge ewekë ne la aposetolo, kola thuecatre huni troa mele goeë itre xan. Ame la eahuni a thele troa atre hnyawa la itre xa atrene la ekalesia, tre eahuni hi lai a öhne laka, hnei itre xan hna atreine elë hun la itre ejolene la mele ka traqa koi angatr, nge itre ka traqa fe hi koi hun. Celë hi ka xatua hun troa cile catr hnine la itre itupath.

Kola sil acatrene la otretre ne imelekeu. Eahuni a ce sin la itre icasikeu memine la lapa ne la itre nyipi sinee hun. Hetre itre xa ijine kö, eahuni a ce traqa itronyi ne ce elo me ce madrin. Nemene la thangane ka loi qa ngöne la hne huni hna ce mele tune lai? Eahuni a inine troa iatrepengö hnyawa; eahuni hi lai a acatrene la imelekeu hun. Celë hi matre, e traqa ju la ketre jole kowe la ketre sine hmi hun, canga atreine hi hun xatua angeic, pine laka catre hnyawa ha la otretre ne imelekeu hun. (Ite Edomë 17:17) E ca lapa ha huni memine la itre atrene la ekalesia, eahuni lai a amamane ka hape, eahuni a “ithupënekeune.”​—1 Korinito 12:​25, 26.

Eahuni a thuecatre koi nyipunie troa iëne la angetre trongëne la aja i Akötresie, matre nyine sinee i nyipunie. Tro hi nyipunieti lai a öhne laka, Itretre Anyipici Iehova la nyine nyi sineen. Epi tha tro kö la ketre ewekë a sewe nyipunie troa ce icasikeu pala hi me eahun.