“Ange Atrune Pi Fe”

1. Nemene la hnëqa së isa ala caas?

¹ Hnëqa së isa ala caas e hnine la caa lapa ne la itre Keresiano asë, la troa thele matre hetrenyi la keukawa hnine la ekalesia. (1 Pet. 1:22; 2:17) Troa eje la keukawa cili, e hne së hna thel troa “atrune” me akökötrene la ihnimi së kowe la itre xaa atr. (2 Kor. 6:12, 13) Pine nemen matre nyipi ewekë troa atrepengöne hnyawa la itre trejine me easë trahmanyi me föe?

2. Pine nemen matre nyipi ewekë tro sa acatren la ihnimi trejine së memine la itre atr ka ce hmi me easë?

² Loi e AKökötrene Së La Aqane Ihnimi Trejine Së: Atre hnyawa ha së la itre trejine me easë ngöne la ua, hnene la hne së hna hane wangatrune la lapaune ka eje thei angatr, memine la aqane xomi hni ahoenyi angatr, memine la itre thiina ka lolo hnei angatre hna catre eën. Thaa easë hmaca kö a goeëne catrëne la itre hnepe ngazo ka eje thei angatr, nge eje hi lai laka, tro la itre aqane ujë celë a akökötren la ihnimi trejine the së. Maine tro sa atre hnyawa la ketre me ketre, atreine hi tro sa ithuecatrekeu me mele keukawa memine la itre trejine me easë. (1 Thess. 5:11) Ijije fe hi tro sa ketre atr ka xatuane me “amadi” itre xan, matre atreine angatr troa cile kowe la itre thiina ka ngazo me iajojezi ne la fene i Satana. (Kol. 4:11) Pine laka easë a qëmeke kowe la itre jole ka tru ngöne la itre drai tixenuë ne la fene celë, haawe, nyipi ewekë tro easë a olene laka hetrenyi la itre enehmu ka lolo e hnine la nöjei i Iehova!—Ite edomë 18:24.

3. Tune kaa la aqane tro sa ithuecatr me ixatua kowe la itre xaa atr?

³ Troa hetre trenge catre së me keukawa la mele së ngöne la easë a cile kowe la itre jole ka tru, e hne së hna epe catr kowe la itre enehmu. (Ite edomë 17:17) Hna pane mekun hnene la ketre Keresiano föe ka hape ka gufa la itre huliwa i eahlo, ngo e thupene lai, öni eahlo hmaca jë hi: “Hetrenyi la itre enehmu ka qaja la itre ewekë ka troa ithuecatre koi ni matre xatua ni troa cile kowe la itre mekune ka ngazo ka eje theng.” Celë hi itre enehmu lai qaathei Iehova, hna aceitunë angatr me itre ahnahna qaathei Nyidrë.—Ite edomë 27:9.

4. Tune kaa la aqane tro sa atre hnyawa la itre xaa atr e hnine la ekalesia?

⁴ Thele Jëne Jë Së Troa Nyipi Ewekëne La Itre Xan: Tune kaa la aqane tro sa hane ethe atrune la ihnimi së kowe la itre ka ce hmi me easë? Ene la tro sa ibozu memine la nöjei atr ngöne la itre ijine icasikeu i Keresiano, ngo loi e tro mina fe së a thele troa hane porotrike me angatr. Ngo wange kö lo itre ifego ke sasaithe pi nge löhnine menune jë së la mele i angatr; aqane tro së lai a amamane ka hape easë a hane nyipi ewekë angatr. (Fil. 2:4; 1 Pet. 4:15) Ame la ketre jëne troa wangatrunyi angatr, tre ene la troa hane könë angatr troa ce thawa me angatr la itre hnepe göxen. (Luka 14:12-14) Maine tro pena a thele troa ce cainöje me angatr ngöne itre hnalapa trootro. (Luka 10:1) Maine tro sa ketre isa thele troa atre hnyawa la itre trejine me easë, easë hi lai a acatren la caasi e hnine la ekalesia.—Kol. 3:14.

5. Nemene la ketre jëne troa akökötrene la aqane ihnimi trejine së?

⁵ Drei la itre atr hne së hna majemine iëne nyine sinee së, itre ka ce macatre me easë, maine itre atr pena ka tu së kö laka ceitune hi la itre aja me easë? Wange kö tro jë la aqane waiewekë celë a othi së troa melën la nyipi ihnimi trejin e hnine la ekalesia. Hnei Davita me Ionathana, Rutha me Naomi hna acatren la itre otrene ihnimi angatr, ngacama isa macatre i angatre kö, nge isa pengöne kö la itre aqane mele i angatr. (1 Sam. 18:1; Rutha 4:15) Hapeu, ijije kö tro epuni a akökötrene hmaca kö la aqane ihnimi trejine i epun? Maine tro sa kuca tune lai, atreine hi tro sa kapa la itre manathithi ka tru.

6. Nemene la itre xaa manathith hne së hna troa kapa e hne së hna atrun me akökötrene la ihnimi së kowe la itre trejine me easë?

⁶ Maine tro sa atrune me akökötrene la aqane tro sa hnime la itre xan, tro hë së a acatrene catrën la lapaune së me aciane la tingeting e hnine la ekalesia. Ketre, tro kö Iehova a amanathithi së qa ngöne la aqane hnime së la itre trejine me easë. (Sal. 41:1, 2; Heb. 6:10) Hnauëne kö matre thaa isa thele kö hne së isa ala caas troa atrepengöne hnyawa la itre xan?