Kola Atrunyi Iehova Jëne La Itre Uma Hna Xup

1, 2. (a) Nemene la hna kuca qaane hë ekö hnene la itre hlue i Iehova? (b) Nemene la ka sisitria koi Iehova?

QAANE hë ekö, ka madrine pala hi la itre hlue i Iehova troa xupe la itre uma nyine atrune la atresiwa i Nyidrë. Hnene la angetre Isaraela ekö hna ce kuca la uma mano me hamëne madrine la itre ewekë thatraqane la troa acile ej.—Eso. 35:30-35; 36:1, 4-7.

² Ame koi Iehova, tha itre ewekë kö la ka sisitria göi troa atrunyi Nyidrë, nge tha itre ewekë kö lai hnei Nyidrëti hna wangatrune catrën. (Mat. 23:16, 17) Ame la ka tru koi Iehova, tre, ene la tro la itre hlue i Nyidrë a atrunyi Nyidrë cememine la hni ka ajan, nge tro angatr a catre huliwa. (Eso. 35:21; Mar. 12:41-44; 1 Tim. 6:17-19) Eje hi laka tha ka cile huti kö la itre uma hna xup. Patre hë lo uma mano memine lo ēnē. Ngo ame pe la itre ewekë hna hamëne hnene la itre hlue i Nyidrë me itre huliwa i angatre ngöne lo itre ijine xupi uma, tre, thatreine kö Iehova thëthëhmin.—E jë la 1 Korinto 15:58; Heberu 6:10.

3. Nemene la hne së hna troa ce wange ngöne la mekene celë?

³ Hnene fe la itre hlue i Iehova enehila hna catre huliwa troa xupe la itre uma ne hmi. Nyine haine la hne së hna kuca fene la musi Iesu Keriso Joxu! Mama hnyawa hi laka Iehova a amanathithine la trenge catre së. (Sal. 127:1) Ame ngöne la mekene celë, tro sa ce wange la itre xa huliwa hna kuca, me aqane atrunyi Iehova hnene itre ej. Tro fe sa ce wange la itre mekuna ne la itre xa ka kuca la huliwa cili.

Itre Uma Ne Baselaia Hna Xup

4. (a) Pine nemene matre nyipi ewekë troa xupe la itre xa filial? (b) Pine nemene matre acasine jë la itre filial ka nyimutre? (Wange ju la itre mekune hna eköhagen, “Xupi Uma Ne Filial—Itre Ewekë Ka Saze.”)

⁴ Tune la hne së hna ce wange hë ngöne la Mekene 16, Iehova a ajane tro sa icasikeu. (Heb. 10:25) Itre icasikeu la ka acatrene la lapaune së, nge itre eje mina fe a akökötrene la madrine së ngöne la huliwa ne cainöj, huliwa hnei Iehova hna sasaqen ngöne la itre drai tixenuë enehila. Ame la thangane lai, itre hadredre thauzane lao atr ka lö kowe la organizasio i Nyidrë e nöjei macatre. (Is. 60:22) Qa ngöne laka kolo pala hi a elë trootro la etrune la itre jini ne la Baselaia, haawe, nyipi ewekë troa xupe la itre uma ne feja itus. Nyipi ewekë mina fe troa xupe la itre xa uma ne hmi.

5. Pine nemene matre ëje ka loi hi lai Uma Ne Baselaia? (Wange ju fe la itre mekune hna eköhagen, “Uma Ne La Nyipi Lai.”)

⁵ Öhne hë ekö ngöne la qaan hnene la Itretre Ini Tusi Hmitrötr la enyipiewekëne la troa icasikeu ngöne la sipu uma ne hmi angatr. Kola mekune ka hape, ame la pane uma ne hmi hna xup, tre, e Virginie, Etazini lo 1890. Ame lo itre macatre 1930, hetre itre uma hna xup me hna ahnyipixen ngo pë pala kö ëje hna hamën thatraqane la itre hnë icasikeu cili. Ame ju hi lo 1935, hnei J. Rutherford hna iwai ngöne la filial ne Hawaii, nge ame ngöne la ijine cili, kola xupe la ketre uma ne Baselaia hna afedrene kowe lai bethela. Ame la kola hnyingë J. Rutherford la aqane troa hëne lai uma hna xup, öni nyidrë: “Tune kaa e tro sa hëne ka hape, ‘Uma Ne Baselaia,’ ke, kolo huliwa së lai, ene la troa cainöjëne la maca ne la Baselaia?” (Mat. 24:14) Tha hmitre ju kö, nge kolo fe hë a hamëne la ëje cili kowe la nöjei hnë icasikeu ne la itre ekalesia ne la nöje i Iehova e cailo fen.

6, 7. Nemene la thangane qa ngöne la hna nyimenyime xupe la itre Uma Ne Baselaia?

⁶ Ame lo itre macatre 1970, kola ajane catrën troa xupe la itre Uma Ne Baselaia. Hnene la itre trejine ne Etazini hna kuca la ketre aqane xupi uma ka mingöming, nge ka ijij, tha tro ju kö a tru hnei drain. Ame hë lo 1983, traqa koi 200 lao Uma Ne Baselaia hna xup e Etazini me Canada. Hnene la itre trejine hna eköthe la itre komite ne xupi uma ne la nöj. Lolo catre la thangane la aqane huliwa cili, ke, ame lo 1986, hnene la Lapa Ne Xomi Meköt hna amekötine tro ha xötrethenge la aqane huliwa cili, matre ame lo 1987, 60 hë lao komite ne xupi uma ne la nöj (CCR) e Etazini.a Ame lo 1992, kola acile la itre CCR e Argentine, Australie, Faras, Alema, Zapo, Mexique, Afrique götrane kolojë, me Espagne. Eje hi laka, nyipi ewekë tro sa xatuane la itre trejine ka catre huliwa ngöne la itre hna xupi Uma Ne Baselaia, ke, ame la huliwa hnei angatr hna kuca, tre, celë hi ketre igötranene la huliwa i Akötresie.

⁷ Kola atrunyi Akötresie hnene la itre uma hna nyimenyime xup ngöne la itre götrane hna acile itre ej. Hnene la ketre zonal hna qeje pengöne la kola xupe la Uma Ne Baselaia e Martos, Espagne; ame ngöne lai tane lai zonal, hna cinyihane ka hape, “Lapaun a Kötrën La Itre Wetr.” Nge ame e hnin, ej a hnying me hape: “Qa ngöne nemen matre ame ngöne la fene ka tha imeku, tre itre ka saen, tha göi thupen kö, a traqa qa ngöne la nöjei götran [ne Espagne] troa xupe e Martos la ketre uma? Nge hnauëne laka nyimenyime me lolo la aqane xup, nge ka tro loi la huliwa?” Kola sa hnene la ketre ka saen hnine pala hi la zonale cili, ka hape: “Pine laka, Eahun la nöje hna inin hnei Iehova.”

Xupi Uma Ngöne La Itre Nöje Ka Tha Trena Mo

8. Ame lo 1999, nemene la ketre aqane huliwa hna amekötine hnene la Lapa Ne Xomi Meköt, nge pine nemen?

⁸ Ame ngöne la pune la itre macatre 1900, kola lö hnine la organizasio i Iehova hnene la itre atr ne la itre nöje ka tha trena mo kö. Hnene la itre ekalesia e cili hna ketre acile la itre hnë icasikeu. Ame ngöne la itre xa nöj, kola qaja angazo angatr me hnyimasai angatr, ke, kösë lo itre sine uma ne drai hnapan la itre hnë icasikeu i angatr. Ngo, qaane lo 1999, hnene la Lapa Ne Xomi Meköt hna amekötine la ketre aqane troa xupe nyimenyimëne la itre Uma Ne Baselaia ngöne la itre nöje cili. Ame la itre mani hna huliwan, tre itre ka xulu qa ngöne la itre nöj ka hetre mo, “mate cei tune hi” koi angatr asë. (E jë la 2 Korinito 8:13-15.) Hnene la itre trejine trahmanyi me föe qa ngöne la itre xa nöje hna saene troa ixatua ngöne la huliwa cili.

9. Nemene la huliwa kösë hna thatreine troa eatrën, ngo nemene hë la hna kuca?

⁹ Eje hi laka, kösë ketre huliwa thatreine kö troa eatrën. Hna qaja hnene la ketre ithuemacany lo 2001 ka hape, 18 300 lao Uma Ne Baselaia hna ajane troa acile ngöne la 88 lao nöje ka tha trena mo kö. Ngo jëne la ua i Akötresie me ixatua i Iesu Keriso Joxu, pëkö huliwa hna thatreine kuca. (Mat. 19:26) Ngöne la 15 lao macatre, qaane lo 1999 koi 2013, hnene la itre hlue i Akötresie hna trongëne lo aqane xupi uma ka nyimenyim, matre hnei angatre hna xupe la 26 849 lao Uma Ne Baselaia.b Iehova pala hi a amanathithine la huliwa ne cainöj, matre ame lo 2013, 6 500 hmaca kö lao Uma Ne Baselaia hna ajane troa xup ngöne la itre nöje cili. Nge kolo pala hi a elë la etrune la itre Uma Ne Baselaia hna ajane troa xupe e nöjei macatre, traqa ha koi itre hadredr.

10-12. Nemene la aqane atrune la ëje i Iehova hnene la itre Uma Ne Baselaia hna xup?

¹⁰ Nemene la aqane atrune la ëje i Iehova hnene la itre uma hna xupe celë? Hnene la ketre ithuemacanyi qa ngöne la filial ne Zimbabwe hna qaja ka hape: “Ca treu thupene la hna xupe la Uma Ne Baselaia, troa alue la etrune la itre ka sine ekö la itre icasikeu.” Ame ngöne la itre nöje ka nyimutre, tiqa ha la itre atr ka traqa kowe la itre icasikeu, ke, hetre hnë hmi hë ka lolo. Celë hi matre, ame hë la kola ase xup la ketre Uma Ne Baselaia, tha hmitre ju kö nge pë hë göhnë, loi e tro hmaca xupe la ketre. Ngo, tha celë kö la itre uma hna xup la ka ea la itre atr koi Iehova. Hnene la ihnimi ka mama thene la itre Keresiano ka xupe la itre uma cili hna ujëne la mekuna ne la itre atr göne la organizasio i Nyidrë. Tro sa ce wange la itre xa ceitun.

¹¹ Indonésie. Ame la kola atre hnene la ketre thupëtresij ka hape, ame la itre ka xupe la Uma Ne Baselaia, tre, itre ka saen ka pë thupen, öni nyidrë: “Eni a haine la pengöi epun! Öhne hi ni la madrine i epuni me hni epun ngöne la huliwa i epun, ngacama pëkö thupe i epun. Eni a mekun laka, pëkö ketre hmi ka tui epun!”

¹² Ukraine. Hnene la ketre föe hna tro e nöjei drai ezine la hna xupi Uma Ne Baselaia. Canga mama ju hi koi eahlo ka hape, ame la itre ka huliwa, tre Itretre Anyipici Iehova, nge ame la uma hna xup, tre Uma Ne Baselaia. Öni eahlo: “Atrepengöne hë ni la Itretre Anyipici Iehova, ke, hna qaja ha koi ni hnene la trejine me eni, ketre Atre Anyipici Iehova fe. Ame la eni a goeëne la aqane trongene la huliwa, eni hi lai a ajane jë troa hane lö hnine la lapa cili. Mama hnyawa ha koi ni la ihnimi e cili.” Nyiqaane jë hi ini Tusi Hmitrötr hnene la föe, nge ame hë lo 2010, hna bapataiso eahlo.

13, 14. (a) Nemene la ini koi së qa ngöne la aqane ujë ne la lue trefën lo nyidro a goeëne la kola xupe la Uma Ne Baselaia? (b) Nemene la nyine tro epuni a kuca matre troa atrune la ëje i Iehova hnene la hnë hmi epun?

¹³ Argentine. Hnene la lue trefën hna porotrik memine la ketre trejine ka cilëmekene la hna xupi Uma Ne Baselaia. Önine lai trahmany: “Nyiho pala hi a goeëne la kola xupe la uma, nge. . . ajane jë hi nyiho troa atrepengöi Akötresie e cili. Nemene la nyine tro nyiho a kuca matre troa hane sine la itre icasikeu e cili?” Ajane la lue trefën troa inine la Tusi Hmitrötr, ngo loi fe troa ce ini Tusi asë hnene la hnepe lapa i nyidro.

¹⁴ Maine jë patre petre kö epuni la kola xupe la Uma Ne Baselaia hnei epuni hna icasikeu ngön, ngo hetre ixatua nyine tro fe epuni a kuca matre tro la hnë hmi epun a atrune la ëje i Iehova. Tro epuni a könëne la itre ka ini Tusi Hmitrötr me epun, me itre hnei epuni hna wange lapan, me itre xa atr ju kö, matre tro angatr a hane sine la itre icasikeu ngöne la Uma Ne Baselaia. Ketre, tro fe epuni a kuca hnyawane me nyidrawane la hnë hmi epun. Loi e troa hnëkë mani göi troa kuca nyihnyawane la Uma Ne Baselaia, maine thatraqane la itre hnë hmi ngöne la itre xa götrane la fen. (E jë la 1 Korinito 16:2.) Itre huliwa asë hi lai ka troa atrune la ëje i Iehova.

Itre Ka Huliwa a “Hujë Angatre Xane Kö”

15-17. (a) Drei la itre ka troa ixatua hnyawa ngöne la huliwa ne xupi uma? (b) Nemene la hne së hna atre qaa ngöne la itre mekune hna hamëne hnene la itre trefën ka hane sine la huliwa ne xupi uma e cailo fen?

¹⁵ Nyimutre la itre Uma Ne Baselaia, me itre Uma Ne Asabele, me itre Bethela hna xupe hnene la itre trejine trahmanyi me föe ne la nöj. Hna traqa hnene la itre trejine trahmanyi me föe ka trene metie qaa ngöne la itre xa nöj troa ixatua. Hnene la itre xan e angatr hna nyi göhnene ngöne la mele i angatr la huliwa ne ixatua xupi uma matre ijije troa hane xupi uma ngöne la ketre nöj koi itre wiik. Ame itre xan, angatr a saen koi nyimu macatre troa xupi uma, ase jë la ketre nöj matre ketre nöj.

¹⁶ Ngacama hetre itre jole nyine cile kow hnene la itre ka huliwa ne xupi uma e cailo fen, ngo hetre itre manathithi pe qa ngön. Hnei Timo me Lina hna tro kowe la itre nöj e Asie, me Erop, me Amerika Ne Kolojë troa xupe la itre Uma Ne Baselaia, me itre Uma Ne Asabele, me itre filial. Öni Timo: “Ame ngöne la 30 lao macatre ka ase hë, hnenge pala hi hna feke trootro thupene lue macatre.” Öni Lina, ka 25 hë lao macatre ne faipoipo me Timo: “Hnenge hna ce huliwa me Timo ngöne la treen lao nöj. Tha ka hmaloi kö la troa majemi kowe la itre xa pengöne xeni kö, memine la itre ijine hedredrei maine ijine hnötr, me ithanatane la qene hlapa ka hnyipixe me trongëne la itre hnë cainöje ka hnyipixe me troa hetre sinee ka hnyipixe.”c Hapeu, ka gufa la itre ewekë cili? Öni Lina: “Ame la thangane la hna catr, tre, itre manathith ka tru. Hna hnimi nyiho me kepe nyiho hnene la itre trejin, nge mama hnyawa koi nyiho laka Iehova la atre thupë nyiho. Hnei nyiho fe hna öhne la aqane eatre lo hna thingehnaeane hnei Iesu kowe la itretre drei nyidrë, hna qaja ngöne Mareko 10:29, 30. Itre hadredre lao trejine trahmanyi me föe me thin hnei nyiho hna kapa.” Öni Timo: “Madrine ka tru koi nyiho troa huliwane la atreine i nyiho kowe la itre huliwa ka lolo, me hane ixatua akökötrene la itre ewekë ne la Joxu.”

¹⁷ Hna ixatua xupi uma hnei Darren me Sara, e Afrique, me Asie, me Amérique Central, me Erop, me Amérique du Sud, me Pacifique Sud. Ame koi nyidro, tru catre kö la hnei nyidroti hna kapa hune la hnei nyidroti hna kuca. Ngacama tru la itre jole hnei nyidroti hna cile kow, ngo hna qaja hnei Darren ka hape: “Ketre manathith ka tru la troa ce huliwa memine la itre trejin trahmany ngöne la nöjei götrane e cailo fen. Öhne hë ni la kepine matre kola cas e cailo fen la itre hlue i Iehova; ihnimi hi la ka acasi angatr.” Öni Sara: “Hetre ini hnenge hna hane xome qaathene la itre trejine trahmany me föe ka xulu qa ngöne la itre xa nöj! Ame la eni a öhne la aqane huujëne angatr la mele i angatre koi Iehova, ene pe kola upi ni troa hane catre kuca la hnenge hna atrein.”

18. Nemene la aqane eatre la hna perofetane ngöne Salamo 110:1-3?

¹⁸ Hna perofetane hë hnei Davita Joxu ka hape, maine nyipici laka, tro fe a hane qëmeke kowe la itre jol hnene la itre jini ne la Baselaia i Akötresie, ngo tro kö angatr a “hujë angate xane kö” matre troa sajuëne la Baselaia. (E jë la Salamo 110:1-3.) Ame asë hi la itre trejine ka sajuëne la Baselaia, tre kola eatre fe hui angatre la itre hna perofetane celë. (1 Kor. 3:9) Nyimutre catre la itre uma ne filial hna xup enehila, me itre Uma Ne Asabele, me itre Uma Ne Baselaia e cailo fen, itre thauzane la etrun. Celë hi hatrene lai laka, cile hë nge musi hë enehila la Baselaia i Akötresie. Drei la ketre manathith ka tru la easa hane ce huliwa me Iesu Keriso Joxu, hna jëne la huliwa ka atrunyi Iehova!