Kola Haöthe La Götrane Ahië Ne Europe Hnene La Nyipi Hmi
1 Hnene la itre Keresiano ne la hneijine i Iesu hna catre cainöjëne ekö la Baselaia. Atraqatre la madrine i angatr, ngöne laka, kola ‘nyi xane pala hi o drai’ la itre ekalesia. (Ite Huliwa 16:5) Hnei angatre hna catre tro fë la nyipi hmi kowe la itre götrane nöj, ene e Azia, me Afrik, me Europe, matre hetre thangane ka loi, ke nyimutre la itre atr ka lapaun.
2 Ame ngöne la hneijine ne la pun, kola haöthe pala fe hnene la nyipi hmi la itre nöje ka tru ne la götrane ahië ne Europe. Ame ngöne lo itre nöje hna nue hë troa cainöje ngön, qaane lo macatre 1990, kola kökötre nyimenyime enehila la etrune la itre atr ka kapa la nyipi hmi. Kola amamane hnene la Annuaire 1999 laka, kola e ngöne la lue nöje ka tru, Russie me Ukraine, la isa 100 000 lao etrune la itre trejine ka cainöj. Ame ngöne lo 15 lao teritoare ne la nöje Union soviétique ekö, qaane lo 1991 ke 220 000 nge hetre munëne la etrune la itre atr ka nue la mele i angatre koi Iehova, me xome la Bapataiso! Haawe, pine laka, kola kökötre nyimenyime la etrune la itretre nyihluei Iehova e cili, ketre kolo mina fe a ajane troa xupe la itre Uma ne Baselaia ka hnyipixe, me itre Uma ne Asabele, a tune mina fe la itre Bethela.
3 Tune la ithuemacanyi hna hamëne hnene la Huliwa Ne Baselaia ne Maac 1997, hna xome hë la ketre sine la itre ahnahna qa ngöne la Kees hna hnëkëne göi xupi Uma, matre troa hane nyiqaane xatuane la itre ekalesia ngöne la itre götrane ka ajane catrëne la itre Uma ne Baselaia ka nyimutre ngo thaa tru kö la mani, nge ketre ngazo catre pala ha la itre ejolene la mel. Ame ngöne lo nyipine Maac 1996 me Okotropa 1998, hnei Sasaiatri hna kapa la sipo ne la itre xaa filiales troa pane hamë manie göi troa xupe la 359 lao Uma ne Baselaia; kösë lo nyimutre la itre sipo qa ngöne la itre filiales ka elemekene la huliwa ne cainöje ngöne la 11 lao nöje ka tru ne la götrane ahië ne Europe. Hna xome la itre aliene keesi cili matre troa itö hnepe götrane hnë troa acili Uma ne Baselaia, me itre jiane huliwa thatraqane itre ej; ketre, kolo mina fe a troa xatuane la itre ekalesia troa nyihnyawane me ahnyipixene la itre xaa uma thatraqane la itre huliwa ne la Baselaia. Kola amamane hnene la itre iatr celë la itre aqane kepe thangane hnene la itre trejine ne la götrane ahië ne Europe, la itre ahnahna hna hamëne kowe la keesi thatraqane la Xupi Uma ne Baselaia i Sasaiatri ka eje e Etats-Unis me ngöne la itre xaa nöje ju kö.
4 Ame ngöne la macatre 1998, hna elë la itretre cainöje ngöne la nöj e Bulgarie, 12 koi 100 la etrun, nge atraqatre la madrine ne la itre trejine ngöne la kola xötrei löthe la pane Uma ne Baselaia ngöne la treu eipereme ne la macatre celë. Hna madrine fe hnene la itre trejine ne Croatie, pine laka, 4 koi 100 la etrune la itretre cainöje ka elë, nge enehila kola xupe hnei angatre la itre Uma ne Baselaia ka nyimutre matre troa kökötre pala hi la nyipi hmi. Ame e Hongrie, kola e la 80 lao Uma ne Baselaia hna icasikeu ngön hnene la 144 lao ekalesia. Kola hape, ngöne la 235 lao ekalesia ngöne la nöje cili, ke, kola e la 61 koi 100 ka hetre umane hmin. Ame e Makedonia, luetre lao Uma ne Baselaia ka hnyipixe hna afenesin, nge itre xane thaa hna umuthe pala kö. Ame lo itre drai hedredei 1999, Lue Uma ne Baselaia hna afenesine ngöne la traone ka tru, e Skopje. Ijije hi troa hnen la itre icasikeu ne la sikisi lao ekalesia.
5 Ame ngöne lo macatre hnapan e Russie, kösë ala 260 nge hetre munëne pala hi la itre atr ka xome la Bapataiso ngöne la nöjei wiik! Kola xötrethenge hnene la fililale ne Russie, la aqane kuca ne la itre xaa nöje ka tru; matre kösë 12 lao komite ne Xupi Uma hna acile ngöne la götrane nöje cili ka tru catr, matre thatraqane la itre Uma ne Baselaia hna troa kuca elany. Ame ngöne la götrane ailopi ne la traone e St. Petersburg, kola kuca e cili la pane Uma ne Asabele ne la nöj, laka, 1 600 lao göhnë hna hnëkën: kösë faifi fe lao Uma ne Baselaia ka isa 200 lao göhnë. Ketre hna afenesine mina fe e Ukraine, la 84 lao Uma ne Baselaia, nge 80 thaa hna umuthe petre kö; ka nyipi ewekë catre kowe la mele ne la itre trejine me easë ngöne la götrane la ua, memine fe lo itre atr ka nyimutre ka kapa la maca ka loi.
6 Hapeu, thaa madrine kö së la aqane kökötrene la nöje i Iehova ngöne la götrane ahië ne Europe? Ngacama isa nöje kö hne së hna mele ngön, ngo kola amekunë së hnene la aqane kökötrene la nyipi hmi laka, thaa ka iwangatrehmekunyi atr kö Akötresie, nge ame la aliene la Nyidrëti a xomihni ahoeany, ke matre troa amelene la “ka alanyimu.” (Hna ama. 7:9; 2 Pet. 3:9) Drei la madrine ka tru the së, ene la troa hane ithingë me mekune la aqane troa xatuane la itre xaa atr, matre tro angatre a hane kökötre ngöne la götrane la ua, a tune mina fe lo itre atr ka mele ngöne la itre götrane ka nanyi catre qa ngöne la nöje së! Kola xatua së hnei Ite Edomë 28:27 ka hape “Ame la ate hamë ewekë kowe la ate pë ewekë, te, tha tro kö a pë ewekë.” Hnene la aja së troa hamëne la ixatua së, matre troa nyi maniene la huliwa cili, haawe, “cei tune hi” la itre ewekë hna ajane thatraqane la huliwa ne xupi uma; ketre kola aijijë së troa hane kapa la manathithi ka xulu qa ngöne laka, easë a hamëne la hne së hna hetreny, nge kola öhne hne së la aqane haöthe la fene hnengödrai hnene la nyipi hmi.—2 Kor. 8:14, 15; Ite Huliwa 20:35.
[Iatr ne la götran 3]
Săcele, Roumanie
[Iatr ne la götran 3]
Maardu, Estonie
[Iatr ne la götran 3]
Sevnica, Slovenie
[Iatr ne la götran 3]
Tiszavasvári, Hongrie
[Iatr ne la götran 4]
Jūrmala, Lettonie
[Iatr ne la götran 4]
Taurage, Lithuanie
[Iatr ne la götran 4]
Tallinn, Estonie
[Iatr ne la götran 5]
Prievidza, Slovaquie
[Iatr ne la götran 5]
Mátészalka, Hongrie
[Iatr ne la götran 5]
Belgrade, Yougoslavie
[Iatr ne la götran 6]
Ruma, Yougoslavie
[Iatr ne la götran 6]
Vranov nad Topl’ou, Slovaquie
[Iatr ne la götran 6]
Tornakalns, Lettonie