Nemene La Nyine Tro Së a Qaja Kowe La Itre Hindous?
1 Nyipici laka, nyimutre la itre Hindou ka mele ngöne la itre nöje ka isa pengön, a tune fe e celë e Kaledonia. Haawe, atreine hi tro së a iöhnyi memine la ketre Hindou ngöne la hne së hna cainöje trootro. Matre tune kaa la aqane tro së a ithahnata me angatr?
2 Wange Hmaca Ju La Itre Mekune Celë: Hna qaja hnene la itre mesinare ka öhne la eloine la aqane ithahnata angatre memine la itre Hindou, ka hape, thaa nyipi ewekë kö troa atrepengöne menu ju pë hë la hmi Hindouisme, matre troa atreine cainöje koi angatr. Atreine hi tro angatre a drei së ngöne la itre xaa ijin, e hmaloi la aqane tro fë së la nyipici, nge easë fe a thele troa trotrohni angatr. Sipone jë troa pane ithahnata memine la hene lapa. Maine pëkö jole thei nyidrë, haawe, tro ha hmaloi koi së troa cainöje kowe la itre xaa atrene la hnepe lapa. Ame ngöne la kola nyiqaane ithahnata, loi e thaa tro kö a pane qaja ka hape, easë a tro fë la maca ka draië kö hune la hna mejiune kow hnene lai atr, maine pena, easë a ajane pena troa ithahnatane la nyipi Akötresie ka caas, maine itre hna cinyihane ka hmitrötr, nge ka hekö catr. Pine laka, nyimutre la itre Hindou ka mekune ka hape, ame la Tusi Hmitrötre ke, tusi ka xulu qa ngöne la itre götrane ahuë, atreine hi tro së a köle trije thei angatre la mekune cili me qeje pengöne ka hape, thaa wene ne kö la Colonialisme, maine edraiëne pena la ketre pengöne atr hune la ketre.
3 Xome Jë La Itre Jiane Huliwa Ka Lolo: Lue boroshüre hna hnëkëne hnyawa thatraqane la itre Hindou; Pourquoi adorer Dieu en amour et en vérité ? hna fejane qene Gujarati me Punjabi. Nos problèmes—Qui nous aidera à les résoudre ? hna fejane ngöne la itre xaa qene hlapa ju kö e Ëëd, 11 la etrun. Hetrenyi fe la itre xane hna ujëne qene Papale. Hna öhne fe laka, hetre thangane ka loi thene la itre Hindou, la itre boroshüre “ Voici! Je fais toute choses nouvelles ” me Dieu se soucie-t-il vraiment de nous ? Ka lolo mina fe troa etid me angatre ngöne la boroshüre Thele, me ngöne la itus Atrehmekune.
4 Loi e Troa Thele Troa Itrotrohni: Thaa jole kö e troa thele troa itrotrohni memine la itre Hindou. Angatre a lapaune laka, easë a melëne la ijine elitrauje hë la ngazo, nge tro Akötresieti a apaatrene qa ngöne la fene la itre ejolen, jëne la ketre hulö ka tru ka troa traqa, nge thupene lai, troa hetrenyi la ketre hneijine kola troa hlöeë la nyipici. Haawe, easë a öhne e celë laka thaa jole kö troa xome la itre mekune celë me goeëne la itre ini hna hamëne hnei Tusi Hmitrötr, göi itre drai hnapin, me akötr atraqatr, me fene ka hnyipixe laka, calemi hë. Maine nyipici laka, ala nyimu la itre Hindou ka mekune ka hape, ame la aliene la mele ke ene la itre jole ka nyimutre, nge pëkö nyin itre ej, ngo angatre fe a hane pi atre la itre mekune göi mele ne la hnepe lapa, me ihumuth, me mele xetietë, memine fe la pengö së thupene la mec. Hanawange la lue aqane nyiqaane ithahnata ka hmaloi troa tro fë.
5 Maine jë lolo kowe la trahmany:
◼ “Eni a wange hmaca la itre atr ka hnehengazone la aqane trongene la mele ne la itre hnepe lapa, ngöne la itre nöje ka nyimutre enehila. Nemene la ewekë hnei epuni hna mekun, ka troa xatuane la itre hnepe lapa matre tro pala hi la itre atrene a caas? [Nue pi troa sa.] Hetrenyi la itre atr ka atre la hna qaja hnene la itre tusi ne la itre Hindou ngöne la hnepe lapa, ngo thaa hane kö angatre aceitunëne lai memine la hna qaja hnei Tusi Hmitrötr. Haawe, eni a ajane troa ce thawa me nyipë la mekune ka eje ngöne la Kolose 3:12-14.” Thupene lai, e jë la xötr, nge amamane jë kowe la atr la mekene 15 ne la itus Atrehmekune, nge qaja jë ka hape: “Maine ajane nyipë, eni a sipone matre tro nyiso a pane xome la hnepe hawa ka co hi matre troa e la mekene celë.”
6 Atreine troa ketr la ketre thöth:
◼ “Nyipici, epuni a lapaune koi Akötresie. Hapeue fe la mekuna i epun, ngöne la aja i Akötresieti koi së?” Nue pi troa sa. Thupene lai, e jë la Genese 1:28, nge qaja jë ka hape: “Nyimutre la itre götrane ne la fene hna jilapane menune pala ha, nge tru catre mina fe hnei jol. Hapeue la mekune i epun, hetre ajane kö la Atre xupi së troa xatua së troa cile kowe la itre jole së?” Ase hë angeice sa la hnyinge së, hamëne ju la ketre itusi ka ijij.
7 Madrine Së La Itre Thangane Ka Loi: Hna tro hnene la ketre Hindou, trahmanyi ka 22 lao macatre kowe la ketre trejine föe ka cainöje ngöne la maketr, nge kola sipo nyidroti hnene la trahmanyi troa etid. Hnei nyidrë hna qaja koi nyidroti ka hape, hnei nyidrëti hna dreng, faifi hë lao macatre enehila, la kola porotrike hnei nyidroti memine la thine i nyidrë. Ngacama hnei nyidrëti hna haine la aqane hamëne Tusi Hmitrötre la itre mekune nyine ixatua thatraqane la itre jole ka traqa kowe la itre atr, ngo thaa hna kapa kö itre eje hnene la thine i nyidrë, nge kösë co petre kö nyidrëti troa ketre kapa la nyipici. Enehila ka tru hë nyidrë, nge nyidrëti a ajane troa kökötre hnyawa ngöne la atrehmekune i Akötresie. Thaa hnei nyidrëti kö hna pane hmitr, ngo nyidrëti canga xejë jë la etid; 23 lao drai ne ini tusi nyidrë, fenesi hë la itus, Atrehmekune, nge thupene la foa lao treu, qaane lo kola ithahnata memine la trejine föe, nyidrëti hë a amamane fe la aja i nyidrëti troa hane xome la bapataiso!
8 Hna nyiqaane hnene la ketre trejine troa etid memine la ketre Hindou trahmany, hnei nyidrë hna iöhnyi memin hune la train. Tru catre la itre jole ne la trahmanyi hnine la faipoipo i angeic. Ketre, ka iji menu angeice la ka haitr. Haawe, hnei angeice hna kapa la mekune ne la trejin, ene la troa wai angeice hmaca, me ce ithahnatane la itre eamo qa hnine la Tusi Hmitrötr thatraqane la mele ne la hnepe lapa. Haawe, kola ketr la hni angeic hnene la itre ini qa hnine la Tusi Hmitrötr, göi thiina, ene traqa ju la ajane koi angeice troa etid. Ame hna nyiqaane ce tro me angeice hnene la hnepe lapa i angeic, troa hane sine la itre icasikeu. Thupene lai, angatre fe hë a hane ce thawa la nyipici memine la itre enehmu, me itre sinee. Matre kösë sikisi thene la itre atr cili ka kapa hë la nyipici!
9 Ame la aja i Akötresie ke, ene la tro la “nöjei ate asëjëihë a mele me wangate hmekune la nyipici.” (1 Tim. 2:4) Thaa ene hmekuje kö la itre ka uune ka hape keresiano angatr, ngo kolo mina fe lo itre atrene la itre xaa hmi kö, tune la hmi i Hindouisme. Maine hetre Hindou ngöne la teritoare i nyipunie, tune kaa matre canga wai angatre fe hne së, me hane trongëne la itre mekune hna hamëne nyine ixatua hna hamëne ngöne la hna cinyihane celë?