Itre Keme Me Thin—Loi e Troa Amamai Tulu Ka Loi Kowe La Itre Nekö i Nyipunie
1 Kola qaja koi së hnei Tusi Hmitrötre ka hape “troa aciacin’atraqate la keme [me thine] ne la ate ka meköt.” (Ite edomë 23:24, 25) Drei la manathithi ka tru kowe la itre keme me thine ka amamai tulu ka loi kowe la itre nekö i angatr! Hna qaja hnene la ketre atrene la komite ne filial, göne la keme me thine i nyidrë, ka hape: “Mele i nyidroti la nyipici, ketre, hetre ajange fe troa hane xome la nyipici cili, matre nyine trepene la meleng.” Nemene la hna troa goeëne hnene la itre nekönatr, thene la itre keme me thine i angatr?
2 Thiina Ka Loi Me Hni Ne Metrötr: Hnëqa ne la itre keme me thine troa amë thene la itre nekö i angatre la itre thiina ka loi. Loi e tro nyudrene a inine la itre aqane ujë ka loi, thaa tro hmekuje kö a qaja, ngo loi e troa öhne hnei nyudrene me xötrethenge. Qa ngöne lai, nemene la itre thiina hne së hna melën? Hapeu, hane kö së drenge la itre nekö së a qaja ka hape, “menu ju hë ni,” “eni a sipon,” me “oleti”? Hapeue e hnine la hnepe lapa, hetrenyi kö the së la imetrötrekeu? Easë kö a hane drenge hnyawa la itre xane a ithahnata? Easë kö a hane drenge la kola ithahnata koi së hnene la nekö së? Tune kaa, easë kö a melëne la itre thiina celë e hnine la Uma ne Baselaia, me ngöne la isa hnalapa së?
3 Loi e Troa Catre Lapaun Me Catre Cainöj: Kola qaja hnene la ketre trejine ka cainöje lapaa, 50 hë lao macatre nge hetre munën, ka hape: “Lolo catre la tulu hna hamëne hnei kaka me nenë, ngöne laka, hetre hni ne ajane i nyidro troa sine la itre icasikeu, nge catre catre nyidroti cainöjëne la maca ka loi.” Tune kaa la aqane tro së a amamane kowe la itre nekö së laka, easë pala hi a hnehengazone la mele i angatre ngöne la götrane la ua? Hapeu, easë kö a lapaa hane ce goeëne memine la itre atrene la hnepe lapa, la topike ne la drai? Hapeu, easë pala fe a hane sisedrëne la ini Tusi Hmitrötre ne la hnepe lapa? Hapeu, kolo kö a öhnyi së hnene la itre nekö së e hane e la Tusi Hmitrötr, memine la itre itusi Sasaiatri? Nemene la hnei angatre hna dreng, ngöne la easë a nyi trenge ewekë ne la hnepe lapa jëne la thith? Hapeu, hane kö së thele troa ce ithahnatane memine la itre nekö së la itre nyipi porotrik, ene lo itre ewekë ka lolo ngöne la nyipici me ngöne la ekalesia? Hetre hni ne aja së kö troa sine la nöjei icasikeu asë, me hane ce cainöje pala hi ngöne itre hnalapa trootro memine la hnepe lapa së?
4 Itre keme me thin, mekune hnyawa ju la tulu hne së hna troa hamëne kowe la itre nekö së. Loi e troa sisitria la tulu cili, nge tro hë la itre nekö së a nyipi ewekëne ej, ngöne la mele i angatre ka pexej. Hna qaja hnene la föe ne la ketre atre thupe ka wange trongëne la itre ekalesia, laka, 70 hë lao macatre i eahlo, öni eahlo ka hape: “Eni pala kö la a kepe thangane la tulu ka loi hna amë pe koi ni hnene la keme me thine i eni Keresiano ka hnimi ni. Nge ame la aja ka tru hnenge hna thithi fë pala hi, ke, ene la tro ni a amamane la aqane wangatrune ni la trengamo ka lolo cili, laka troa xötrethenge hnyawa eje ngöne la itre drai ne mele ni.”