Itre Aqan Ujë Ka Loi—Thiina Ne La Nöje i Akötresie

¹ Ka sihngödr la itre thiina ka loi ngöne la hnedrai së enehila. Pine nemen? Pine laka, pëkö hneimek ne la itre atr hnene la itre jol, matre pëhë ijine i angatr troa pane amaman la itre thiina la lolo, tune la troa qaja ka hape, “Sipon,” “Oleti,” maine “Menu hë ni.” Hna qaja ha ekö hnei Tusi Hmitrötr la aqane troa ngazo la thiina ne la itre atr, ngöne la itre drai hnapin hne së hna melën enehila, ene laka, tro la itre atr a ‘hnimi angate kö, me selën, me nyi tru, nge tha ole kö, nge angete tha hnimi sinen, nge ka tha ‘teine xomi hnöth, me itete tha ajane kö la loi, nge itre ka huliwa wathöthöl.’ (2 Tim. 3:1-4) Kola ngazo la aqane ujë ne la itre atr, qa ngöne laka, eje then la itre atr la itre thiina asë cili. Pine laka, itre atre i Akötresie la itre Keresiano, haawe, loi e tro angatr a thupën wanga hane jë fe angatr xom la thiina ne la itre atr ne fen, ka pëkö metrötr.

² Nemen La Pengön La Itre Aqan Ujë? Hna qeje pengön la itre aqane ujë ceitun memin la troa wangatrun hnyawa la itre aliene hni ne la itre xaa atr, memin la troa atreine ce mel tingeting memin la itre xan. Nyimu götran ne la itre aqane ujë ka lolo, ene la troa iwangatruny, me thiina ka menyik, me imeku, me imetrötrë. Itre thiina lai ka xulu qa ngöne la ihnim koi Akötresie me kowe la itre ka lapa easenyi së. (Luka 10:27) Ka pëkö thupen itre ej, ngo ka nyipi ewekë catr pe, maine easë a ajan troa acatren hnyawa la aqane ce mele së memin la itre xaa atr.

³ Hnei Iesu hna hamën la ketre tulu ka pë ethan. Hnei nyidrëti pala hi hna trongën lo trenge wathebo gool, hna hape: “Ame la hnei nyipunieti hna ajane ite ate troa kuca koi nyipunie, kuca tune jë lai koi angat.” (Luka 6:31) Hapeu, hetre madrine së kö, me hain la aqane imetrötrë i Iesu, me ihnimi nyidrë kowe la itretre drei nyidrë? (Mat. 11:28-30) Ame la itre thiina ka loi i nyidrë, tre thaa ka xulu kö qa ngöne la itre wathebo hna hamën jëne la itre itus hna nyihatren. Ka xulu itre ej qa ngöne la hni ka nyipici, nge hetre hni ne ole ngöne itre ej. Nyipi ewekë tro mina fe së a xom la tulu ka lolo i nyidrë.

⁴ Eu la kola nyipi ewekë kowe la itre Keresiano troa lolo la itre aqane ujë i angatr? Hapeu, ngöne hmekuje hi lo itre ijin ka sisitria, la tro sa thupën la aqane ujë së? Maine pena, easë a ujë tune lai, ke hetre hne së hna thel thene la itre xan? Ohea! Loi e troa lolo pala hi la aqan ujë së, ngöne la nöjei ijin. Nemen la itre aqane tro së a amaman la aqane ujë së ka loi, kowe la itre trejin hne së hna ce mel memin hnin la ekalesia?

⁵ Ngöne La Uma Ne Baselaia: Hnë tro sa hmi la Uma Ne Baselaia. Hna hë së kowe la hnë cili hnei Iehova Akötresie. Haawe, kösë easë la itre hna könën hnei Nyidrë. (Sal. 15:1) Hapeu, easë kö a amamai tulu ka loi, easë itre hna könën, ngöne la easa traqa kowe la Uma Ne Baselaia? Hapeu, easë kö a thel troa heetr me iseji hnyawa? Eje hi laka, loi e tro sa thupën matre thaa tro kö sa sasaithi tulu, ngöne la aqane heetr me iseji së. Ngacama kola sin la itre kovasio, maine itre icasikeu ne la ekalesia ngöne la wiik, hna wangatrehmekun hnyawa la nöje i Iehova, qa ngöne la elolon la aqan ujë i angatr, aqane trongen la itre atr ka ahmitrötrë Akötresie. (1 Tim. 2:9, 10) Qa ngöne lai, easë a wangatrun me metrötrën la aqane kepe së hnyawa hnene la Tretretro së, memine fe la itre xaa atr hna hane könëne fe me easë.

⁶ Ame la ketre aqane tro së a amaman la itre thiina ka lolo ngöne la itre hna icasikeu, ke ene la troa traqa ngöne la traem hna sa. Eje hi laka, thaa ewekë ka hmaloi kö lai. Ame itre xan, ke, nany la hnalapa, maine ala nyimu pena matre ketre huliwa la troa hnëkë. Ngo hna wangatrehmekun laka, 25 koi 100 la etrun la itre ka majemin traqa thupen, la nyima me thith ka nyiqaan la itre icasikeu. Ketre jole lai ka tru. Loi e tro së a mekun hnyawa laka, itre aqane ujë lai ka amaman laka, easë a nyipi ewekën la itre xaa ka sin la icasikeu. Hnei Iehova ka Pucatin asë hna hnëkën la itre pui ne xen cili ngöne la ua, matre troa hetre thangan ka loi thatraqan la mele së. Easë a amaman la madrine së me metrötr koi Nyidrë, ngöne la easë a thel troa canga traqa kowe la hna icasikeu. Ketre, maine tro së a traqa hmitr kowe la itre hna icasikeu, troa ajolën la itre ka canga traqa ha, nge ketre, nyine amaman lai, ka hape, pëkö metrötre së koi angatr.

⁷ Ame ngöne la itre ijine icasikeu, hane kö së wangatrehmekun la itre atr ka xötrei traqa? Aqane ujë ka loi la troa hane kepe angatr. (Mat. 5:47; Rom. 15:7) Troa kepe angatr, me ibozu, me hnyimahnyima—maine nyipici laka, itre hnepe ewekë lai ka co catr, ngo itre ej a troa amaman hnyawa ka hape, itre nyipi Keresiano së. (Ioane 13:35) Thupene la hna hane xötrei sin la ketre icasikeu hnene la ketre trahmany, hnei nyidrëti hna qaja ka hape: “Hnenge hna iöhny memine la itre atr ka nyimutre ka ihnim, itre trehnyiwa ka ala nyimu ngöne hi la caa drai; thaa hna tune kö lai ngöne la hmi hna hetru ni ngön. Eje hi laka, öhnë hë ni la nyipici.” Haawe, ame hnei angeic hna saze la aqane mele i angeic, nge thupene la seven lao treu, hnei angeic hna hane xom la bapataiso. Nyipici, atreine hi troa kapa la itre manathith ka tru, jëne la itre aqane ujë cili!

⁸ Maine ka lolo pala hi la aqane ujë së kowe la ite trehnyiwa hne së hna iöhnyi memin, ngo hapeu, thaa tro kö lai a “sisitia kowe la nöjei ate ne la lapa i angete lapaun”? (Gal. 6:10) Loi e troa trongën la trepene meköt hna hape: “Tro eö a mejë qëmekene la qia he me metötëne la qat [maine qatre föe].” (Lev. 19:32) Loi e thaa tro pi kö së a wangacon la itre atr cili ngöne la ijine easë a icasikeu.

⁹ Loi e Troa Dreng Hnyawa: Ame ngöne la itre ijin icasikeu ne la ekalesia, kola cainöj hnene la itre hlue i Akötresie me hamën la itre ahnahna ngöne la ua matre troa acatren la lapaune së. (Rom. 1:11) Easë a amaman laka jole catr la aqane ujë së, e hne së hna pinyimeköl, maine hucën me keciqai itrasa, me iulili lapaa memine la itre ka lapa ezi së, me tro menu lapaa koi kabine, me e pena la ketre itusi kö, maine kuca pena la ketre ewekë kö ngöne la ijine icasikeu. Loi e troa amamai tulu ngöne la götrane cili, hnene la itre qatre thup. Troa upi së hnene la aqane ujë së itre Keresiano, troa amaman la metrötre së kowe la atre cile fë la cainöj, memin la maca hna nyitrepen hnene la Tusi Hmitrötr, hnene la troa pexej la aqane tro sa wangatrun la cainöje i angeic.

¹⁰ Ketre, thaa easë kö a wangatrun la ka cainöj, memin la itre ka dreng, e hne së hna traqa fë kowe la hna icasikeu la itre mobilis me itre xaa ewekë ju kö ka tun.

¹¹ Itre Aqan Ujë Me Itre Nekönatr: Loi e tro pala hi la itre kem me thin a thupën la aqane ujë ne la itre nekö i angatr. Maine kola nyiqaan troa treij la ketre nekönatr maine enienij agö ngöne la ijine icasikeu, nge kola ajolën la itre xan troa drenge hnyawa, haawe, ma loi e troa pane lö sai nyën e trön la hna icasikeu matre troa pane athaupu nyën. Maine jë troa nango jol koi epun, ngo mekune hnyawa kö së laka, aqane tro hi së lai a amaman laka, easë a hane metrötrën la itre xaa atr. Ame koi itre kem me thin ka trene nekönatr ka co ka enienij, loi e tro angatr a thele troa lapa e hutrö, matre thaa tro kö a ajolën la icasikeu ngöne la angatr a lö troa cile fë la nekö i angatr. Eje hi lai laka, nyipi ewekë troa nue la itre icea ka ej e hutrö, thatraqan la itre fami, celë hi aqane tro së lai a amaman la sipu metrötre së koi angatr.

¹² Nyipi ewekë tro mina fe la itre kem me thin a thupën me goeën hnyawa la aqane ujë ne la itre nekö i angatr, qëmeken me thupen la itre icasikeu. Thaa loi kö e troa nue la itre nekönatr troa nyinyap e hnin la hna icasikeu, wanga troa eatr menu hnei nyudren, maine itre xan pena. Ketre, troa thupën thaa tro kö angatr a nyinyap e trön la Uma Ne Baselaia e jidrijidri hë. Thaa tro kö së a ithanata catr menu pala ha, wanga troa ajolën la itre atr ka lapa ezin la hna icasikeu, ene pe wangangazone jë hnei angatr la hmi së. Kola madrin kowe la itre kem me thin ka thupën hnyawa la itre nekö i angatr, matre thaa tro kö nyudren a nyinyap e hnin me e trön la Uma ne Baselaia, aqane ujë lai ka sajuën la aja ka ej the së troa caas, ngöne la easë a traqa itrony troa hmi koi Iehova.—Sal. 133:1.

¹³ Ngöne La Hna Ini Tus: Atraqatre catr la madrine së kowe la itre trejin me easë, ka nue la hnalapa i angatr troa nyi hnen la itre icasikeu ne la ekalesia. Haawe, ame ngöne la easë a sin la itre icasikeu e cili, nyipi ewekë tro së a metrötr me wangatrune hnyawa la hnalapa i angatr. Qëmeken tro sa lö hnin la uma, loi e tro së a köle hnyawa la itre buutre së, matre thaa tro kö së a adron ej. Loi e tro la itre kem me thin a thupën la itre nekö i angatr, nge troa xecie hnyawa koi angatr, laka, nyudren a lapa hnyawa ngöne la hnen hna hnëkën thatraqan la icasikeu. Maine thaa ala nyimu kö la itre atren la Ini Tus, thaa tro pi kö së a inagala menu ngöne la easë e cili hnalapa ne la trejin me easë. Loi e tro la kem maine thin a ce tro pala hi memin la nekö i nyidro ka co, kowe la kabine. Ketre, pine laka, ame la Ini Tus, ke, ketre icasikeu ne la ekalesia, haawe, loi e tro sa heetr ceitun me easë a tro kowe la Uma Ne Baselaia.

¹⁴ Nyipi Ewekë Catr La Itre Aqan Ujë Ka Loi: Thaa tro hmekuje kö a hetre thangan ka loi la itre aqane ujë i Keresiano ngöne la hna cainöj, ngo kowe mina fe la aqane imelekeu së memin la itre xaa atr. (2 Kor. 6:3, 4, 6) Pine laka, easë la itretre thil kowe la Akötresie ka madrin, loi e thaa tro kö a jol koi së troa hnyimahnyima me loi thiina, me kuca la itre hnepe ewekë ka co nyine amadrinën la itre xaa atr. Celë hi itre thiina lai ka troa athaipin la mele së, easë itre hlue i Akötresie.