Loi e Troa Hetre Thina Ka Ijije Kowe La Maca Ka Loi
1 Ejehi laka, aja së asë hi, itretre Temoë i Iehova, troa atrune la atresiwa i Iehova. Atre hnyawa hi së laka, pine la aqane ujë së, me aqane cainöje së, me aqane ele ihe, me aqane heetre së, ke, tro la itre xan’a qaja aloine la nyipi hmi, maine qaja angazone pena ej. Nge troa mama hnyawa lai ngöne la itre ijine icasikeu së. Loi e troa xecie the së laka, ame la itre hne së hna qaja memine la itre hne së hna kuca ngöne la itre icasikeu, ke, ka ihmeku itr’eje memine la maca ka loi, nge ka atrunyi Iehova fe.—Fil. 2:4.
2 Nyimutre la itre tulu ne fene göi aqane heetre me aqane ele ihe, hna ananyine hnene la itre keresiano. Celëhi ketre taane mekune lai nyine troa wangatrune hnene la itre ka troa cainöjëne la maca ka loi. Hna qaja ngöne La Tour de Garde ne 1 Juun, 1989, götrane 20, ka hape: “Tha nyipiewekë kö troa thele la itre iheetre ka tru thupen, ka loihi la hna nyidrawaane hnyawaan, me ka pë ethan, nge tha loi kö troa sasaithe la tulune la aqane heetr. Loi e tro fe a nyidrawaane la itre ibutr, me thupëne matre tha tro kö a xötrë ibuutre ka zezenyi maine ka dro pena. Itre aqane heetre së lai ngöne la nöjei icasikeu asë, maine ngöne la hna Ini Tusi ne Ekalesia. Qangöne lai, loi e tro së a nyidrawaane la ngönetrei së, matre pë gelen, nge loi e tro fe së a heetre hnyawa.”
3 Ketre aqane amamai ihnim, me imekunekeune la troa traqa ngöne la traeme hna sa. Ame itre xaa ijin, ke, easë a traqa hmitre kowe la icasikeu, pine laka hna traqa koi së me ajolë së hnene la ketre ewekë ka iasesëkötrë. Ngo, ame la troa majemine traqa hmitr, ke, kolo lai a amamane ka hape tha metrötrëne kö së la itre icasikeu, nge kola iwangacony. Itre ka traqa hmiitre a ajolëne la itre xane troa kepe thangane hnyawa la porogarame ne icasikeu. Hawe, maine tro së a traqa ngöne la hawa hna sa, ke, kola amamane ka hape hetre metrötre së kowe la itre atr me itre aja ne la nöjei ka sine la icasikeu.
4 Tro la ihnimi së kowe la atr ka lapa easenyi së a upi së troa idrei, matre tha tro kö a ajolëne la itre xane ngöne la itre icasikeu. Ame la troa ithahnata, me xen, me hucë itrasa, me malili la itre pepa, me tro lapa koi kabine, ke, itre ewekë lai ka troa ajolëne la itre xane troa drenge hnyawa, nge ka troa apatrene la ehmitrötrene la göhnene la hmi i Iehova. Tha loi kö troa itö, maine salemë ewekë ngöne la hna icasikeu, maine ithahnata pena me itre xan, nge loi e tro hmekujehi a mejë qa ngöne itre icea maine hetre nyipiewekë nyine troa kuca. Ngo ejehi laka, loi e tro la nöjei atrene la icasikeu a lapa, me drenge hnyawa la porogaram, matre hetre thangane koi angatre me fami i angatr. Tha tro kö a hetrenyi la itre aqane ujë ka ngazo ngöne la uma ne Baselaia, pine laka ame la “Ihnim . . . tha thina ka qali kö.—1 Kor. 13:4, 5; Gal. 6:10.
5 Kola atrun, me metrötrëne la atresiwa i Iehova hnene la aqane ujë ka loi ne la itre nekö së ngöne la itre icasikeu. Ketre iamele ka tru la troa thupë angatre hnyawa. Troa xatuane la itre nekönatre troa dreng, me hane sa ngöne la itre icasikeu. Alanyimu la itre keme me thine ka iëne troa lapa memine la itre nekö i angatr, ngöne la ketre göhnë ka tha jole koi angatre troa canga mejë, matre troa aupune la itre nekö i angatre ka co, nge tha tro ju kö a ajolëne la itre xane troa drenge la itre cainöj.
6 Hnei Paulo hna ahnithe ka hape: “Loi e troa ijije la thina i nyipunie memine la maca ka loi Keriso.” (Fil. 1:27) Loi e tro së a catre troa hetre thina ka loi, me troa wangatrune fe la itre xaa atr ka sine la icasikeu. Ame la troa ce huliwa, ke, kolo lai a amamane laka hetrenyi la “ce akeukawanyi . . . hnene la ce lapaune shë.”—Rom. 1:12.