Troa Traqa Ngöne La Hawa Hna Sa
1. Iehova a amamai tulu koi së ngöne nemene götran?
1 Ka kuca pala hi Iehova la itre ewekë ngöne la hawa hna sa. Nyidrëti a ‘ixatua ngöne la nyipi ijin.’ (Heb. 4:16) Nyidrëti fe a hamëne la ‘xeni ngöne la nyipi ijin.’ (Mat. 24:45) Haawe, xeci hnyawa fe e kuhu hni së laka, “tha tro kö a hmit” la drai ne elëhni Nyidrë. (Hab. 2:3) Nge nyine loi koi së la Iehova a kuca la itre ewekë ngöne la hawa hna sa! (Sal. 70:5) Ngo pine laka, tru catre la itre jole së, nge itre atr ka tha pexeje pena, jole koi së troa hane kuca la itre ewekë ngöne la hawa hna sa. Ngo pine nemene matre nyipi ewekë troa kuca la itre ewekë ngöne la hawa hna sa?
2. Pine nemene matre ketre jëne troa atrunyi Iehova la troa traqa ngöne la hawa hna sa?
2 Ame la easa huliwa i maseta, tre ka traqa pala hi së ngöne la hawa hna sa; ngo tune kaa göne la itre huliwa qaathei Iehova? Ame la easa traqa ngöne la hna icasikeu ngöne la hawa hna sa, göi troa nyima me drenge la thithi ne nyiqaan, hatrene hi lai laka, easa ajane troa nyitipune la Tretretro së. (1 Kor. 14:33, 40) Ame ngöne la hneijine së celë, tre patre kö thei itre atr la thiina cili, ke angatr a hnimi angatre kö, nge jole koi angatr troa xomihni. (2 Tim. 3:1-3) Qa ngöne lai, maine tro la itre Keresiano a traqa ngöne la hawa hna sa, göi huliwa maine göi icasikeu pena, me aeatrëne la hna isa pui, tro hë lai a öhne hnene la itre atr, nge jëne tro fe hë angatre lai a atrunyi Iehova.—2 Pet. 2:12.
3. Pine nemene matre ketre jëne tro sa atrune la itre xan, la easa canga traqa?
3 Ame la easa traqa ngöne la hawa hna sa, aqane tro hi së lai a amamane ka hape, easa wang atrunyi itre xan. (Fil. 2:3, 4) Maine tro sa canga traqa göi icasikeu, maine göi cainöje trootro pena, tha tro kö së lai a ajolëne la itre xa trejin. Ngo maine hne së hna lapaa majemine traqa hmitr, tro la itre xan a mekune ka hape, easa pi hune fë la traeme së. Ame la easa canga traqa, tro hë la itre xan a atrehmekune ka hape, ka tru koi së la troa aeatrëne la huliwa ngöne la hawa hna sa.
4. Maine ka lapaa traqa hmitre së, nemene la nyine tro sa kuca?
4 Maine ka majemine nyipunie traqa hmitr, thele jë la kepin. Wange ju la itre nyine troa kuca, nge ka ijij, matre atreine nyipunie troa aeatrën asë la itre hnëqa i nyipunie ngöne la hawa hna sa. (Ate cai. 3:1; Fil. 1:10) Sipo ixatua ju thei Iehova. (1 Ioane 5:14) Ame la easa aeatrëne la itre huliwa ngöne la hawa hna sa, ketre jëne easë hi lai a amamane ka hape, easa trongëne lo lue wathebo ka sisitria; ene la troa hnimi Iehova Akötresie, me hnime la atre lapa ezi së.—Mat. 22:37-39.