Xötrethenge Jë La Tulu Hna Amë Hnei Iesu
1. Nemene la tulu hnei Iesu hna amë?
1 Ame ngöne la easa inine la itre atr, nyipi ewekë tro sa mekune hnyawa laka, ame la tulu hne së hna hamën, tre, atreine troa ketr la itre atr ka goeë së. Hnei Iesu hna hamë ini jëne la hna ithanata, me jëne fe la hna kuca. Ame la itre ka goeë nyidrë, tre atreine hi tro angatr a öhne la aqane catre huliwa i nyidrë, me ihnimi nyidrë kowe la itre atr, me aja i nyidrë ka catre troa ahmitrötrëne la ëje ne la Tretretro i nyidrë, me xecie e kuhu hni nyidrë troa eatrëne la aja ne la Tretretro i nyidrë.—1 Pet. 2:21.
2. Tune kaa la aqane tro la tulu hne së hna hamën a ketr la itre ka ce cainöje me easë?
2 Ngöne La Kola Cainöje Ngöne Itre Hnalapa Trootro: Tui Iesu, tro fe la tulu hne së hna hamën a ketr la itre ka ce cainöje me easë. Ame itre ka xötrei cainöj, me itre ka thaa maca hnyawa kö troa cainöj, nge ka goeëne la aqane catre së troa cainöje trootro, tre, tro hë angatre a ketre mekune me wange la aqane cainöje i angatr. Ame ngöne la angatr a goeëne la madrine the së, me aqane wangatrune së la itre atr, tro ha amekunë angatre la enyipiewekën la troa eënyine la itre thiina celë ngöne la huliwa ne cainöj. Maine troa mama koi angatr la aqane canga xome easë la itre xötre ne Tusi Hmitrötr, me kuci vizit, me xomiujine la itre etid, tre, tro lai a upi angatre troa hane kuca tuun.
3. Tro la tulu hne së hna amë a hamë ini tune kaa kowe la itre hnainin, nge nemene la ini hnei angatre hna kapa qa ngön?
3 Ngöne La Kola Ini Tusi Hmitrötr Me Itre Atr: Tro la itre hnainine a goeëne la aqane ujë së. Hanawange la ceitun, ngacama easa qejepengöne koi angatre la enyipiewekëne troa hnëkëne la etidi angatr, me thele la itre xötr, me sija la itre mekune ka tru, ngo tro kö angatre a öhne maine hne së hna hnëkën. (Rom. 2:21) Maine hne së hna eatrëne pala hi la traeme ne etid me angatr, thaa tro hë angatre a nue la itre xaa jole troa sewe angatre troa kuca la etidi angatr. Ketre, troa canga mama koi angatre la aqane huujëne së la mele së kowe la huliwa ne cainöj, memine la aqane catrene la lapaune së. Thaa sesëkötre kö së laka, ame la itre ka etid memine lo itre ka catre xötrethenge la tulu i Iesu, tre, angatre a ketre catre huliwai Akötresie, nge hetre wene ne la huliwa ne cainöje i angatr.
4. Ame ngöne la easa sine la itre icasikeu ne la ekalesia, nemene la ini hne së hna hamën jëne la tulu së?
4 Ngöne La Kola Sine La Itre Icasikeu Ne La Ekalesia: Hetrenyi thene la itre trejine asë ne la ekalesia la hnëqa troa hamë ini jëne la tulu hna hamën ngöne la itre icasikeu ne la ekalesia. Kola kepe eloine hnene la itre ka xötrei sine la itre icasikeu, la tulu ka lolo hna goeëne hnei angatre e hnine la ekalesia. Tro angatre a öhne la keukawane me caasi ne la itre trejin, nge qahmihmi la aqane heetre me iseji angatr. (Sal. 133:1) Tro fe a ketre mama koi angatr la tulu hne së hna hamën, ene la aqane catre së troa sine la itre icasikeu ne la ekalesia, me aqane amamane së la lapaune së ngöne la easa catre qeje mekune ngöne la itre ijine cili. Hna goeëne hnene la ketre atr ka xötrei traqa kowe la ketre icasikeu, la aqane canga öhne la ketre mekene tus hnene la ketre nekönatre jajiny ngöne la sipu Tusi Hmitrötre i nyën, memine fe la aqane ketre sipu goeëne hnyawa la kola e ej. Hnene la tulu hna hamën hnei nyën hna upi angeice troa sipone troa inine la Tusi Hmitrötr.
5. Pine nemene matre thaa tro pi kö sa wangacone la enyipiewekëne la tulu hne së hna hamën?
5 Tusi Hmitrötr a xatua së troa nyitipune la tulu ka lolo hna hamën hnei ketre me ketre. (Fil. 3:17; Heb. 13:7) Qa ngöne lai, loi e tro sa mekune hnyawa laka, maine tro sa catre xötrethenge la tulu hnei Iesu hna amë pe koi së, tre, tro lai a goeëne hnene la itre atr, nge tro lai a hetre thangane ka loi koi angatr. Maine atrehmekune hi së lai, haawe, epi tro sa wangatrune la itre trenge ewekë celë ngöne 1 Timoteo 4:16 kola hape: “Wai ’ö kö memine la aqane ini.”