Inine Jë La Itre Atr Ka Hni Ka Menyik Troa Xötrën La Kala i Akötresie
1. Kola hapeu la troa inine la itre atr matre tro angatr a itretre dreng?
1 Hna qaja la pengöne lo itre pane keresiano ekö, ka hape itretre “Hmi.” angatr (Ite hu. 9:2) Ame la nyipi aqane hmi Keresiano, tre, kola qaja la aqane mele ka pexeje ne la atr. (Ite edomë 3:5, 6) Ame ngöne la easa xomiujine la itre etid, thaa tro hmekuje kö sa thele troa qejepengöne la nyipi atrehmekune göne la itre nyipici qa hnine la Tusi Hmitrötr. Ohea, nyipi ewekë tro fe sa xatuane la tire hnainin troa xötrëne la jë i Iehova.—Sal. 25:8, 9.
2. Nemene la ka troa upe la ketre hnainin troa xötrethenge la itre wathebo i Akötresie?
2 Xatuane Jë La Itre Hnainin Troa Hnimi Iehova Me Iesu: Thaa ka hmaloi kö kowe la itre atr ka thaa pexeje kö troa mekun, me mele, me ithanata me ujë thenge la aja i Akötresie! (Rom. 7:21-23; Eph. 4:22-24) Ngo kola upe hnene la ihnimi Akötresie memine la Hupuna i Nyidrë, la itre atr ka hni ka ipië troa cile kowe la jole celë. (Ioane 14:15; 1 Ioane 5:3) Tro sa xatuane tune kaa la itre hnainin troa eëne la ihnimi cili?
3. Nemene la aqane tro sa xatuane la itre hnainin troa hane hnimi Iehova me Iesu?
3 Xatuane jë la atr hnei epuni hna etid memin troa atrepengöi Iehova hnyawa. Hna qaja hnene la ketre trejine trahmany, ka hape: “Thatreine kö troa hnime hnene la itre atr la ketre hnei angatr hna thatre kö; haawe, matre ame ngöne la kola xötrei xejë la etid, eni a pane ini angatr la ëje i Akötresie e hnine la Tusi Hmitrötr. Nge eni a thele la itre ijine troa amamane hnyawa la itre thiina i Iehova.” Ame la ketre aqane troa eatrëne lai, tre, ene la troa qaja atrune la tulu hna amë pe hnei Iesu. (Ioane 1:14; 14:9) Ketre, xome jë la itre mekune hna eköhagen ngöne la pune la nöjei mekene la itus Ini Tusi Hmitrötr matre troa xatuane la hnainin troa melëne la itre thiina ka lolo i Akötresie memine la Hupuna i Nyidrë.
4. (a) Pine nemen matre ketre jole ka tru kowe la itre itre hnainin ka nyimutre la troa hane cainöj? (b) Nemene la aqane tro sa xatuane la itre etidi së ngöne la angatr a nyiqaane feke ca ngöne la huliwa ne cainöj ne la Keresiano?
4 Loi e Troa Amamai Tulu Ka Loi Nyine Hamë Ini: Pine laka itre ka hamë ini së me eatrongëne la itre hnainin, haawe, loi e tro sa amamane hnene la itre huliwa së la aliene la hna hape troa xötrëne la jë i Akötresie. (1 Kor. 11:1) Drei la ketre ceitun, ala nyimu la itre hnainin ka thaa majemi kö troa ithanatane memine la itre trehnyiwa la itre hnei angatr hna lapaune kow. Haawe, nyipi ewekë tro sa xomihni ahoeany me atreine troa xatua angatr troa akökötrene la ihnim, memine la lapaun; nge loi e troa hetrenyi thei angatr la trenge catr troa hane xome la huliwa ne cainöj me inine la itre atr. (2 Kor. 4:13; 1 Thes. 2:2) Tro la aja së troa eatrongëne la itre ka inine la Tusi Hmitrötr me easë, a upi së troa ce tro me xatua angatr ngöne la angatr a xötrei hane xome la huliwa ne cainöj ne la Keresiano.
5. Nemene la aqane tro la tulu ka loi a xatuane la itre hnainin troa trongëne la mekun, ene la hna hape troa xötrethenge la itre wathebo i Akötresie?
5 Tro mina fe la tulu së a inine la itre hnainin ngöne la itre xaa götrane ka tru ne la mele ne la Keresiano. Ame ngöne la easë a hane wange la itre ka wezipo maine ibozu memine la itre xaa atr ngöne la itre ijine icasikeu ne la ekalesia, haawe, kolo hi a mama koi angatr e cili la ihnim hna melën. (Ioane 15:12) Ame ngöne la easa hane ixatua troa nyidrawane la Uma Ne Baselaia, maine kuca pena la itre xaa ewekë nyine xatuane la itre xan, easë hi lai a ini angatr la aqane troa nyi hlue i Akötresie. (Ioane 13:12-15) Ame ngöne la angatr a öhne laka lolo nge thaa hne së kö hna nyi ejolene la aqane mele së, angatre hi lai a trotrohnine lo aliene la hna hape ‘troa pane thele la baselaia.’—Mat. 6:33.
6. Nemene la itre thangane la hna hane xatuane la itre atr ka thiina ka menyik troa nyi hlue i Iehova?
6 Ame la troa inine la itre atr la Wesi Ula i Akötresie memine la troa xatua angatr troa itretre dreng, tre, thaa ka hmaloi kö, loi e troa catr. Ngo drei kö la madrine së e troa öhne la itre atr ka hni ka menyik e “trongëne la nyipici”!—3 Ioane 4.