Eloine La Itre Icasikeu Kowe La Itre Thöth
1 Hna qaja hnene la ketre thöth jajiny, ka hape: “Ame ngöne la itre xaa ijin, pane lapa mekune ju hi ni la nöjei jole ka traqa ngöne la mele ne la thöth. Kola mele xötreithi së hnene la itre atr ka kuci ngazo, me xomi dorog, me iji menu la ka haitr.” Hapeu, celë fe kö la mekune i nyipunieti lai? Maine eje hi, nemene la nyine troa kuca matre troa thipetrije la itre aqane mele ka ngazo cili? Nyipi ewekë troa lapaun, ke e thaa hna catre lapaune kö kowe la itre jë i Iehova ka meköt, “tha ’teine kö troa amadi nyidrë.” (Heb. 11:6) Maine tro nyipunie a sine pala hi la itre icasikeu, tro ha xatua nyipunie troa acatrene la mejiune i nyipunie kowe la itre hnei nyipunie hna lapaune kow, me hetre trenge catre troa kötrene la itre ewekë ka ngazo.
2 Thangane La Itre Icasikeu Koi Nyipunie: Nemene la eloine la kola ce xeni la ketre hnepe göxeni ka lolo me itre enehmu? Hapeu, thaa qa ngöne kö la hne së hna ce thawa la itre nyipi göxen memine la itre atr ka loi thiina ngöne la ce hni me ce madrin? Ceitune hi lai, memine la itre icasikeu së, ngo ngöne pe la götrane la ua.
3 Nyine ithuecatre la itre ewekë hna ithahnatane hnine la itre icasikeu, qaane ju hi la itre mekune thatraqane la itre ejolene la mel, uti hë la itre ini hna kapa nyine troa trotrohnine la itre hna perofetane hnine la Tusi Hmitrötr. Itre ini ka lolo hna hamën, göi aqane troa hetrenyi la mele ka loi, me aqane troa cile kowe la itre jol. Ketre, ka lolo catre kö la itre enehmu hne së hna öhne hnine la itre icasikeu, ketre hetre thangane ka loi ngöne la ua, ke, hetre ajane së nge madrine së troa sine itre ej. (Sal. 133:1) Thaa sesëkötre kö së la hna qaja hnene la ketre thöth, jajiny, kola hape: “Eni a ini ngöne la drai ka pexej, nge kösë kola uti ipië trootro la meleng. Eloine pe, hetrenyi la itre icasikeu, ceitune me ketre hnepe timi e nyipine la hnapapa, laka kola hamë egöcatre hmaca koi ni, matre atreine tro ni a qëmeke kowe la ketre drai ne ini.” Önine la ketre ka hape: “Hnenge hna öhne ka hape, kola xatua ni troa qale koi Iehova, hnene laka hnenge hna ce mele pala hi memine la itre atr ka hnimi Iehova.”
4 Maine tro epuni hane sine fe la Ini Ne Cainöje Trootro Qaathei Akötresie, haawe, tro epuni a inine troa xawane la itre ithuemacanyi qa hnine la Tusi Hmitrötr, me kuca la ketre cainöj, nge thupene lai, troa cile fë eje qëmekene la ekalesia hnine la Uma Ne Baselaia. Drei la manathithi hna kapa, qa ngöne laka, hna hnëkë së troa tro fë inamacanëne la itre ini ne iamele qa hnine la Wesi Ula i Akötresie! Ekaa fe la hnene la itre thöthi hna troa kapa la ixatua ka lolo cili?
5 Aqane Kepe Thangane Hnyawa La Itre Icasikeu: Könitre lao ewekë ka sisitria nyine troa kuca matre troa kepe thangane la itre icasikeu. Loi e troa hnëkë, me qeje mekun, me trongëne itre ej.
6 Troa Hnëkë: Amë hutine ju la ketre traem, matre tro pala hi a hnëkëne la itre icasikeu. The nue kö la itre qa ne ini, me ketre huliwa hna kuca ngöne la sine la drai, maine itre elo pena, troa thapa la traeme hnei epuni hna amë matre troa canga wange la itre mekune hna troa ithahnatane ngöne la nöjei icasikeu. Manathithi e troa majemine kuca tune lai. Ketre, loi e troa pane catre pala hi lo porogarame ne E Tusi Hmitrötr ngöne la nöjei wiik, hna hamëne ngöne lo Ini Ne Cainöje Trootro Qaathei Akötresie. Itre hnepe menetre ne tro hi a xome lo itre mekene hna amekötin, matre troa e me mekune ngöne la nöjei drai. Ami ijine ju troa hnëkëne la Ini Tusi ne la ekalesia, me ini göi La Tour de Garde. Itre xane a hnëkëne la itre icasikeu cili, caasi maine lue drai qëmeken. Kuca tune jë fe göne lo itre nyine troa ce wange ngöne la itre icasikeu göi Huliwa Ne Cainöje e nöjei wiik.
7 Qeje Mekune Jë: Kola qaja hnei Tusi Hmitrötr ka hape, ame la kola 12 lao macatre i Iesu, hna öhnyi nyidrë hnine la ēnē, a kola dreng, me hnying, me qeje mekun. (Luka 2:46, 47) Haawe, hnei nyidrëti fe hna hane sine la porotrik. Tro fe epuni a hane kepe thangane ka loi qa ngöne la itre icasikeu, e hnei epuni hna hane catre qeje mekune e hnine itre ej.—Ite edomë 15:23.
8 Nyipi ewekë tro epuni a drenge hnyawa ngöne la itre ijine icasikeu. Eje hi laka, ame itre xaa ijin, ke ka hmaloi kö la troa kuca la ketre cainöj, hune la troa dreng. Pine nemen? Canga paatre hi la itre mekune së, e ketre atr la ka ithahnata. Matre troa atreine drenge tune kaa? Loi e troa cinyihane la itre hna qaja. Xome ju hi la itre ini nyine troa wange hmaca pëhë e thupen. Aqane tro hi lai a xatua epuni troa lapa drenge hnyawa la itre cainöj. Ketre, xome jë fe la itre xötre ne la Tusi Hmitrötr, nge goeëne ju itre ej, ngöne la kola e hnene la ka cainöj.
9 Ketre mina fe, loi e troa hetre ajane troa hane qeje mekune ngöne la kola ce ithahnatane la itre hna cinyihan, ngöne la itre ijine icasikeu. Tro fe epuni a kepe thangane catr, e hnei epuni hna mekune hnyawa la itre hnei epuni hna troa qaja. Öni Ite Edomë 15:28 ka hape: “Tro la hni ne la ate ka meköt’ a mekune nyine sa.”
10 Trongëne Jë La Hna Inin: Ame la nyine troa kuca tixenuë, ke ene la troa xecie hnyawa koi epun, laka, ame la hnei epuni hna inin, ke, “kola huliwane la ite hni nyipunie.” (1 Thes. 2:13) Maine tro epuni a trongëne la itre ini ka lolo hna hamëne ngöne la nöjei icasikeu, haawe, tro hë epuni lai a qale catre koi Iehova. Thaa sihngödri hmaca kö Nyidrëti koi epun, nge tro epuni a hetrenyi la madrine ka tru, me ajane troa nyihlue i Nyidrë, ngöne la epuni a “trongëne la nyipici,” me fedre kowe ej.—3 Ioane 4.
11 Qa ngöne lai, itre trejine thöth, trahmanyi me föe, maine tro epuni a hnëkë pala hi kowe la itre icasikeu, me qeje mekune ngön, me trongëne la itre hnei epuni hna inin, tro ha atraqatre la madrine i epuni troa sine la itre icasikeu. Nge tro mina fe epuni a kapa la itre manathithi ka tru qa ngöne itre ej. Tro ha acatrene la lapaune i epun, memine fe la ajane ka eje thei epuni troa nyipici pala hi koi Iehova, Tretretro i epuni e koho hnengödrai.—Sal. 145:18.