Nyipiewekë Troa Hnëkë, Me Kapa Madrine La Itre Icasikeu Ne La Ekalesia
1 Tune la ketre asosiasio ne trejin, haawe easë a traqa ngöne la nöjei wiike troa icasikeu. (1 Tim. 4:15, 16) Nemene la aqane tro së a hetre madrin, me öhnyi manathithi jën’itr’ej?
2 Loi e troa thele palahi me amë la ketre ijine göi troa hnëkëne la itre icasikeu. Nyimu hawa hna xome hnei itre xane troa hnëkëne la itre icasikeu. Ngacama, tru la itre jole së, nyipiewekë catre tro së a ami ijine troa hnëkëne la itre icasikeu. Tru la thangane ka loi hne së hna troa kapa e hna ce hnëkëne memine la fami.—Efe. 5:15, 16.
3 Göi Ini Ne Canöje Trootro Qa Thei Akötresie: Catre jë troa xötrethenge palahi la porogarame ne ini Tusi Hmitrötre hna amekötine kowe la wiik. (Ios. 1:8) Wange ju la taane mekune hna troa qejepengön, nge xometrongëne jë la itre itusi nyine troa ce wang, matre tha jole koi epuni troa trotrohnine hnyawa la itre mekune hna cainöjën. Nge, mekune ju fe la itre aqane troa huliwane la itre mekune ngöne la hna cainöje trootro.
4 Göi Icasikeu Ne La Huliwa Ne Cainöj: Wange hnyawa ju la porogarame hna amamane ngöne la Huliwa ne Baselaia. E jë la itre mekune hna cinyihane hna troa ithahnataan. E maine hna xome la itre mekune qa hnine la ketre hna cinyihane ne La Tour de Garde, maine qa hnine la itre itusi hna troa ce wang, ke, thele jë, nge e jë fe. E maine kola troa amacane la itre aqane trofë göi troa cainöje trootro, ke, canga wange hmaca ju, matre maca koi epuni troa huliwaan’itr’eje ngöne la epuni a cainöje trootro.
5 Göi Ini Ne La Tour de Garde: Canga e jë la nyine inin, nge sija ju la itre mekune ka sa la itre hnying. Ketre, maine hnei epuni fe hna xome la itre mekene tus, ke, tro hë epuni a trotrohnine hnyawa la itre ini hna kapa qa ngön. Maine hne së hna mekune hnyawa la ini, memine la hne së hna atre hë, ke, tro ha kökötre la atrehmekune së. Loi e tro epuni a hnëkëne la itre hnepe mekune nyine troa qaja ngöne la caasi maine lue paragaraf, maine epuni ajane troa hane hamë mekune ngöne la ijine icasikeu. Celëhi ketre ewekë ka sisitria, nge jëne tro fe “sha xome catëne la hmi ne la mejiune shë.”—Heb. 10:23.
6 Göi Ini Tusi Ne La Ekalesia: Ame la ewekë hnapan, ke, troa e hnyawa la hna cinyihan; wange hnyawa ju la taane mekune ka eje ngöne la itre meken, memine la itre taane la itre hna cinyihan. Thupene lai, ame ngöne la epuni a e, ke, fejane ju la itre mekune ka tru. Wange ju la itre mekene tusi ka anyipicin. Ketre, tupathe jë troa sa la itre hnying, nge tha tro pe a e la hna cinyihan. Nge, e ase hë epuni hnëkë, ke, pane mekune hmaca jë la itre ini. Tupathe ju fe troa amihnehëne la itre mekune ka tru, memine la aqane thele mekun.—2 Tim. 2:15.
7 Kapa Madrine Ju La Itre Icasikeu: E ka tru koi së la itre icasikeu, ke, nyipiewekë troa traqa ngöne la traeme hna sa, matre troa hane sine la thithi ne nyiqaan, memine la kola sipone la uati hmitrötre i Iehova. Nge, troa hamë ithuecatre fe koi epuni hnene la itre nyima ne Baselaia. E maine pëkö nekö i epuni ka co, maine pëkö itre xaa kepine troa lapa ngöne la pune la uma, ke, tro epuni a öhne laka e maine tro epuni a lapa qëmeken, tha tro kö a ajolë epuni hnene la itre xaa ewekë, nge tro epuni a kepe thangane ka loi ne la porogaram. Loi e tro la itre keme me thin’a lapa easenyine la itre nekö i angatre ngöne la hnahage hnaluen, maine ngöne la pune la uma matre neëne la itre ewekë ka troa ajolëne la itre atrene la icasikeu troa drenge hnyawa.
8 Catre jë troa thele la itre mekene tusi hna troa e. Celëhi ka troa xatua epuni troa mekune hmaca lo itre mekune hnei epuni hna drenge hë. Tro epuni a atreine xolouthe la itre mekun, e tro epuni a ithahnatane memine la fami i epun, memine la itre sinee i epuni la itre hnei epuni hna inin. Maine hne së hna trongëne la itre ini celë, ke, tro ha hetre aliene me hetre thangane la itre icasikeu koi së, nge atraqatre fe la madrine hne së hna troa kapa, nge tro itr’ej’a nyipi “aciane la ihnimi me ite huliwa ka loi.”—Heb. 10:24, 25.