Paatr 4: Aqane Troa Eatrongëne La Itre Etid Ka Kökötr
Troa Inin La Itre Hnainin Troa Hnëkë
1 Tro ha canga kökötr ngöne la götrane la ua la hnainin ka pane e la ini hna troa ce ithanatan, me sija la itre mekun ka sa la itre hnying, me mekune la aqane troa ketre qaja itre ej. Qa ngöne lai, e mama ha ka hape, kola ajan troa sisedrën la etid hnene la atr, ce hnëkëne ju me angeic la ini matre troa amamane la aqane troa hnëkë. Ka lolo catr e troa ce hnëkëne la ketre mekene itus maine ketre ini pena memine la itre atr hne së hna etidi kow.
2 Troa Sija Me Amë La Itre Mekun Ezin: Qaja jë la aqane troa xome la itre mekun ka sa hmekune la itre hnying hna fejane hë. Amamane jë kowe la hnainin la itus hnei epuni hna sija hmekuje hi e hnin, la itre hnëewekë maine itre xötrehnëewekë. Ame ngöne la epone a ce ithanatan la itre mekun, maine jë tro angeic a thele troa xötrethenge la tulu i epun, ene la troa hane sija hnine la itusi angeic la itre mekun ka nyipi ewekë; celë hi ka troa xatua angeic troa sa hmekune pala hi la itre hnying. (Luka 6:40) Thupene lai, sipo angeice jë troa ketre sipu qaja la itre mekun ka sa la itre hnying. Kolo lai a troa aijijë epuni troa atrehmekune hnyawa maine jë trotrohnine hnyawa hi angeic la itre mekun.
3 Ame mina fe la ketre aqane troa hnëkëne hnyawa la etid hnene la hnainin, tre, ene la troa xome hnyawa la itre xötr thaa hna fejan hnine la itus. (Ite hu. 17:11) Xatua angeice jë troa atrehmekune laka, ame asë hi la itre xötr hna hamën hnine la itus, tre itre eje a isa sajuën la ketre mekun hnine la paragaraf. Amamane jë koi angeic la aqane troa cinyihan ezin la itre hnepe mekun hnine la itusi hna etidi ngön. Amamane hnyawa jë koi angeic la mekun, ene laka, Tusi Hmitrötr la trepen la itre ini hna hamën. Xatua angeice jë troa xome hnyawa la itre xötr ngöne la angeic a hamë mekun ngöne la ijine etid.
4 Troa Acaa Tro Goeën Me Wange Hmaca: Qëmekene tro la hnainin a nyiqane troa hnëkëne hnyawa la etidi angeic, ka loi e tro angeic a pane acaa tro goeën asë la ini hna troa ce ithanatan. Troa pane nango goeën la taan ka tru, me itre taan ka co, me itre ceitun. Qaja jë ka hape qëmekene troa nyipune la hnëkë i angeic, ma loi e tro hmaca a xome la itre hnepe menetr matre troa wange hmaca la itre mekune ka tru hna hamën ngöne la ini, maine jë troa xome la itre mekune hna eköhagen thatraqane lai. Tro hë angeic a lapa xom la ithuemacany, e hna anyimua wange tune lai la ini.
5 Maine tro sa inine la hnainin troa hnëkëne hnyawa la etidi angeic, tro ha xatua angeic troa hamën la itre mekune ka lolo hnine la itre icasikeu ne la ekalesia. Tro fe hë a xatua angeic troa majemine inine la Tusi Hmitrötr, ene pe tro hë angeic a kepe thangane ka loi elanyi pë hë thupene la hna afenesin la etidi angeic.