Paatr 2: Aqane Troa Eatrongëne La Itre Etid Ka Kökötr
Troa Hnëkën Troa Xomiujin La Etid
1 Ame la troa inine hnyawa la itre atr, tre thaa ene hmekuje kö la troa ithanatane itre mekun hnine la itus me goeën la itre xötr hna hamën. Nyipi ewekë catr tro sa thele troa eë hnyawa la ithuemacany matre troa ketr la hni ne la hnainin. Celë hi matre loi e tro sa mekune la hnainin ngöne la easë a hnëkë hnyawa qëmekene troa etid.—Ite edomë 15:28.
2 Tune Kaa La Aqane Tro Sa Hnëkë: Nyiqaane jë troa thithi fë koi Iehova la hnainin memine la itre hnei angeic hna ajan. Sipo Iehova jë troa xatua së troa ketr la hni ne la hnainin. (Kol. 1:9, 10) Maine easë a ajan troa trotrohnine hnyawa la taan, xome jë la ketre traeme ne troa wang la taan la meken maine ini, memine la itre taan mekun hna cinyihane acon, memine la itre xaa ixatua ju kö. Isa thele ju ka hape, ‘Nemene la sipu aliene la topike celë?’ Tro ha xatua së troa wangatrune hnyawa la itre mekune ka tru ngöne la easë a xomiujine la ini.
3 Wange hnyawa hmaca ju la itre mekune ngöne ketre paragarafe matre ketre paragarafe pena. Wangatrehmekune hnyawa ju la itre mekune ka sa la itre hnying hna fejane hë, me sija la itre hnëewekë ka tru me itre xötrehnëewekë. Thele jë la kepin matre kola hamën la itre xötre ne la Tusi Hmitrötr hmekune la itre mekune ka tru ngöne la ketre paragaraf, nge loi e troa xome amë la itre xötr nyine troa e ngöne la ijine etid. Ka lolo catre mina fe troa cinyihan ngöne la itus la itre hnepe mekun ezine lai itre xötr. Loi e troa trotrohnine hnyawa hnene la hnainin laka, ame la hnei angeic hna inin tre qa hnine la Wesi Ula i Akötresie.—1 Thes. 2:13.
4 Loi e Troa Hamëne La Ini Hmekune La Itre Nyine Troa Kuca Hnene La Hnainin: Ame la nyine troa kuca thupen, tre, ene la troa wange hnyawa la ini matre troa kuca hmekune la aja ne la hnainin. Thele jë troa canga nyiqaane hnëkëne la aqane troa sa la itre hnyinge i angeic me itre mekune ka nango jole koi angeic troa trotrohnine maine troa kapa. Isa thele jë ka hape: ‘Nemene la hnei angeic hna ajan troa trotrohnin maine troa saze matre troa kökötre hnei angeic ngöne la götrane la ua? Tune kaa la aqane tro ni a ketr la hni angeic?’ Thupene lai, thele jë troa hamëne la ini hmekune lai itre hnyinge cili. Ame ngöne la itre xaa ijin, maine jë tro sa öhne la eloine la troa hnëkëne la ketre ceitun, maine troa qejepengöne la ketre mekun, maine troa xome la itre hnyinge matre troa xatuane la hnainin troa trotrohnine hnyawa la aliene la ketre mekun maine ketre xötr. (Neh. 8:8) Ngo thaa tro pi kö a xome la itre xaa ithuemacany ka thaa ihmeku kö memine la taan la ini. Troa xatua angeic troa mekune hmaca la itre mekune ka tru, jëne la revizio hna troa ce ithanatane ngöne la pune la ini.
5 Drei la madrine ka tru ngöne la kola tiqa la ketre atr ka etid la itre wene la thiina ka meköt nyine atrunyi Iehova! (Fil. 1:11) Maine easë a thel troa xatua angatr troa eatrën lai aja cili, nyipi ewekë tro sa hnëkë hnyawa ngöne la nöjei ijine easë a troa inine la Tusi Hmitrötr kowe la itre atr.