Qaja Kuca: Amamai Tulu Jë Së
1 Hnei Paulo aposetolo hna ithuecatre koi Timoteo troa amamai tulu, ngöne la troa trongëne la itre hnei angeice hna qaja. (1 Tim. 4:12) Loi e tro mina fe së a amamane ngöne la easë a cainöje trootro laka, easë a trongëne la itre hne së hna qaja; maine tro së a kuca tune lai, maine jë atreine hi troa ketr la hni ne la itre atr hne së hna iöhnyi memin.
2 Nyipi ewekë tro së a melëne la nöjei aqane troa trongëne la itre thiina ka lolo, ene la troa atreine ce mel, me iwangatruny, me thiina ka menyik, me atreine trotrohnine la itre xan. Maine tro së a melëne la itre thiina ka lolo celë, haawe, easë hi lai a amamane laka, easë a thupëne matre thaa tro kö a akötrëne la itre xan, hnene la itre aqane ujë së. Hna aceitunëne la itre aqane ujë ka loi ngöne la hna cainöje trootro memine la kola sootrëne me apuiloine la xen. Maine thaa hna sootrëne kö me apuiloine la xen, eje hi lai laka, troa hnyemuhnyemu la itre göxen, nge thaa pi tro kö së a xeni itre ej. Ceitune hi lai memine la itre aqane ujë së kowe la itre xaa atr, laka, maine ka ngazo itre ej, eje hi lai laka, thaa tro kö a pi drenge hnei angatre la maca hne së hna tro fë.—Kol. 4:6.
3 Troa Amamai Tulu Ngöne La Aqane Troa Ithahnata: Nyipi ewekë catre tro së a hnyimahnyima me ibozu ngöne la easë a tro fë la maca ka loi. Maine tro së a ahnyapane la itre aqane nyiqaane ithahnata së me akeukawane me amenyikene itre ej, troa atre hnene la atr ka hape, hetre ihnimi së koi angeic. Drei angeice hnyawa ju ngöne la angeice a ithahnata, nge metrötrëne ju la mekune i angeic. Loi e tro sa thupëne fe la aqane tro së a ithahnata, troa hetre hni ka metrötr me iwangatruny.—Wange ju la Itre Huliwa 6:8.
4 Ame ngöne la itre xaa ijine ke, easë a traqa kowe la itre atr ka icilekeu, nge ka pi iwesitrë. Nemene la nyine troa kuca? Hnei Peteru hna upi së troa ithahnata “fë la menyike me qou.” (1 Pet. 3:15; Rom. 12:17, 18) Hnei Iesu hna qaja ka hape, maine troa ngazo la aqane thipetrije hnene la ketre atr la maca ka loi ne la Baselaia, thaa tro kö a kuca la ketre ewekë, ngo tro hi së a ‘jume jume ju hi la dro ne la ite hnatrapaca së.’ (Mat. 10:14) Troa ahmalane la hni ne la itre atr ka icilekeu me easë, e hne së hna amamai tulu ka lolo ngöne la aqane cile së kowe la itre xaa hnepe jole ngöne la mele së.
5 Troa Amamai Tulu Ngöne La Aqane Ujë: Maine easë a tro fë la maca ka loi ngöne la itre gojenyi gaa tru loto, me ngöne la itre götrane gaa tru atr, nyipi ewekë tro së a hmekëne matre thaa tro kö a nyi mejene menu, maine hë ielene la itre atr, nge ketre, thaa tro kö së a thungigojenyine la itre ka tro. Maine easë e hnine la uma ne la itre atr hne së wange hmaca, loi e tro pala hi së a thiina ka loi, me metrötr, me amamane kowe la atr ka kepe së laka easë a madrine la aqane kepe së hnei angeic. Ame koi itre nekönatre ka ce tro me easë, loi e tro mina fe angatre a metrötrëne la atr hne së hna wange hmaca, memine la hnalapa i angeic, nge loi e troa lapa hnyawa me hane drenge la kola porotrik. Maine tro la itre nekönatre a nyenyape menu, haawe tro hë a wangangazonyi së hnene la itre atr ka drei së.—Ite edomë 29:15.
6 Hnene la aqane nyidrawane së la ngönetrei së, troa mama hnyawa kowe la itre xaa atr, ka hape, easë la itretre tro fë la Wesi Ula i Akötresie. Thaa tro kö së a wangahmalohmaloeëne la aqane tro sa heetr, me isej, thaa tro kö a cici la ihnaihe së, me iathixötrë la hnaheetre së, maine sasaithi tulu pena. Loi e troa cengöne pala hi la ngönetrei së memine “la maca ka loi.” (Wange ju la Filipi 1:27.) Maine tro së a thupëne hnyawa la ngönetrei së, memine la itre jiane huliwa së, haawe, thatreine jë kö tro së a athixötrëne la itre atr hnene itre ej, maine tro pena a öhnyi ethane la huliwa së hnei angatr. (2 Kor. 6:3, 4) Kola amingömingöne me asisitriane la maca ne Baselaia, hnene la elolone la aqane ithahnata së me aqane ujë së, nge e cili kola atrune la ëje i Iehova.—1 Pet. 2:12.