Loi e Troa Wanga Atrune La Itre Xaa Atr—Hnene La Thiina Ka Lolo
1 Ngacama Joxu Nyidrë ngöne la fen asë, Nyidrë la Atre ka menyike me ka iwangatruny, me thiina ka lolo ngöne la ijine ce mele Nyidrëti memine la itre atr ka ngazo. (Gen. 13:14; 19:18-21, 29) Ijije tro sa ahmadradrane la aqane tro sa tro fë la maca ka loi hnene la aqane xötrethenge së la thiina ka lolo i Akötresie së. (Kolose. 4:6) Kola hape troa sisitria pala kö hune la tro hi a hneimeke ipië me metrötr ngöne la hna cainöje trootro së.
2 Cainöje Ngöne La Itre Hnalapa Trootro: Tune kaa ju hë e maine easa vizitëne la keme ne la hnalapa nge thaa hawa ka ijije hmaca kö maine hetre jole i nyidrëti pena? Easa huliwa ngöne la inamacan e tro sa atrehmekune la itre ijine ka tuun matre ahopatrene hi la traeme ne ithanata së maine sa ijine tro hmaca së a bëek. Easa amamane la ihnimi së e thaa tro kö së a catre fë matre tro itre atr a xome la itre sine itus nge ase jë pena angatre thipëne itre ej. Tro la aqane iwangatrunyi së a upi së troa hetre metrötre fe kowe la itre ewekë i angatr, tune la qanahag maine qëhnelö hna thing me aqane inine së la itre nekö së troa hane tuun. Axeciëne jë së laka ame lo itre tus hna amë pe ngöne itre uma ka pë atren tre sihngödr itre ej qa kuhu qëhnelö. Eje hi laka, tro la thiina ka lolo a upi së troa kuca koi angatre la hne së hna ajan tro angatr a kuca koi së.—Luka 6:31.
3 Cainöj e Cahu Gojenyi: Maine easa cainöje e cahu gojenyi, loi e tro sa amamane la metrötre së jëne la troa nue gojenyine pala hi la itre ka tro me neëne matre tha tro kö a icacaxenyi qëmekene la itre setroa. Wanga atrehmekune ju la itre pengöne thei itre atr, maine troa ithanata kowe la itre ka hetre ijin (hnepe menetr) ngo thaa kowe pe lo itre ka hetre jolen. Ame itre xaa ijin, ma nyipi ewekë troa ithanata catr pine laka tru pala ha la meje e kuhu gojeny. Ngo loi e tro sa kuca cememine la hni ne metrötr, thaa ngöne pi mama kö.—Mat. 12:19.
4 E Maine Easa Cainöj Jëne Telefon: Ame la easa iën la ketre göhnë gaa pë mejen, matre drei së hnyawa la easa cainöj jëne telefon tre ketre aqane metrötrë angatre hi lai. Easa amamane la itre thiina ka lolo the së e tro sa canga pane qejepengö së kö me qaja la kepine matre easa hë angatr. Ithanata meköti pi ngöne telefon me xome la hne nyinawa ka ijij; celë hi aqane tro sa eköthe thei angatre la aja ne porotrikëne la itre mekune qa hnine la Tusi Hmitrötr. (1 Kor. 14:8, 9) E tro sa menyik me iwangatruny, me metrötr ngöne la itre jëne cainöje celë, haawe, easë hi lai a nyitipu Iehova Akötresie ka thiina ka lolo.