Troa Thiina Ka Menyik Me Thiina Ka Loi Tui Iehova
“Manathithi la ate mekune kowe la ate pë ewekë.”—SALAMO 41:1.
1. Nemene la aqane amamane la itre hlue i Iehova laka, angatr a ihnimikeu?
AME la itre hlue i Iehova e cailo fen, tre, angatr la itre atrene la ketre lapa ka cahae. Kola hë angatr ka hape, itre trejin trahmanyi me föe ke, ka ihnimikeu angatr. (1 Ioane 4:16, 21) Ame e nöjei drai, angatr a amamane la ihnimi angatr kowe la itre trejin me angatr. Angatr a qaja la itre trengewekë ka ithuecatr maine thiina ka menyik kowe la itre trejin. Ame la easa wangatrune la itre xan, easë hi lai a nyitipune la Tretretro së e koho hnengödrai.—Efeso 5:1.
2. Nemene la aqane nyitipune Iesu la ihnimi ne la Keme i nyidrë?
2 Hnei Iesu hna xötrethenge la tulu ne la Keme i nyidrë. Hnei nyidrëti palahi hna thiina ka menyik koi nöjei atr. Öni nyidrë: “Trohemi koi ni, nyipunieti asë ange ka huliwa me hace, nge tro ni a amanonyi nyipunie.” (Mataio 11:28, 29) Maine tro sa nyitipu Iesu me “mekune kowe la ate pë ewekë,” tro hë sa amadrinë Iehova, nge tro fe sa hane madrin. (Salamo 41:1) Ame ngöne la tane mekun celë, tro sa ce wang la aqane tro sa wangatrune la itre atrene la hnepe lapa së, me itre trejin e hnine la ekalesia, memine fe la itre atr hne së hna cainöje kow.
TROA WANGATRUNE LA ITRE ATRENE LA HNEPE LAPA SË
3. Nemene la aqane tro la trahmany a wangatrune la föi angeic? (Wange ju la pane iatr.)
3 Nyipiewekë tro la itre trahmany a amamai tulu me thupëne la itre hnepe lapa i angatr. (Efeso 5:25; 6:4) Tusi Hmitrötr a qaja ka hape, nyipiewekë tro la itre trahmany a wangatrun me trotrohnine la itre föi angatr. (1 Peteru 3:7) Loi e tro la trahmany a trotrohnin laka, tha ceitu i angeice kö memine la föi angeic. Tha tro kö angeic a mekun laka, ka sisitria kö angeic hune la föi angeic. (Genese 2:18) Loi e tro pe angeic a wangatrune la itre mekuna ne la föi angeic me metrötrë nyiidro. Önine la ketre föe ne Canada: “Tha hna wangaconyi ni kö hnene la föeng maine qaja pena ka hape, ‘Ka ngazo la mekuna i nyipo.’ Nyidrëti pe a drei ni. Nge ka lolo palahi la aqane amekötine nyidrëti la mekunang.”
Ka ihnim la trahmany ka nyipici kowe la föi angeic, nge angeic a sisine la ngazo
4. Nemene la aqane ujë ne la trahmany ka wangatrune me metrötrëne la föi angeic?
4 Ame la trahmany ka wangatrune me metrötrëne la föi angeic, tre, tha angeice kö a wesiwes kowe la itre xaa föe. (Iobu 31:1) Ketre, tha angeice kö a goeë ëternet me thele troa iatre memine la itre xaa föe, maine tro pena kowe la itre xaa sit ka ngazo. Eje hi, angeic a nyipici kowe la föi angeic ke, tru la ihnimi angeic koi nyiidro me koi Iehova, nge angeic a sisine la ngazo.—E jë la Salamo 19:14; 97:10.
5. Nemene la aqane tro la föe a wangatrune la föi angeic?
5 Maine tro la trahmany a nyitipune la aqane ihnimi Iesu Keriso, tha jole hë kowe la föe “troa metrötrë” angeic. (Efeso 5:22-25, 33) E cili, tro hë la föe a thele troa trotrohnine la mekuna ne la trahmany. Ketre, tro fe la föe a thiina ka menyik kowe la trahmany, ngöne la nyidrëti a kuca la itre huliwa ne la ekalesia. Önine la ketre trahmany ne Grande-Bretagne: “Ame e itre xaa ijin, canga öhne hi la föeng laka, hetre jol ka traqa koi ni. Nyiidroti a trongëne la hna qaja ngöne Ite Edomë 20:5, me treqene la nyipi ijin qëmekene troa ‘jöe’ la itre mekunang.”
6. Nemene la aqane tro sa ithuecatre kowe la itre nekönatr troa thiina ka menyik me meku itre xan, nge nemene la thangane lai koi nyudren?
6 Ame la itre kem me thin a wangatrune la itre xan, angatre hi lai a amamai tulu kowe la itre nekönatr. Nyipiewekë tro fe nyidroti a inine la itre nekönatr troa thiina ka menyik me meku itre xan. Drei la ketre ceitun. Kem me thin a inine la itre nekönatr laka, tha tro kö a nyinyap e hnine la Uma Ne Baselaia. Ketre, ame la angatr a ce xen, nyidroti a ini nyudren laka, troa pane nue la itre qatr troa eli xen. Ngo ijije fe troa xatuane hnene la itre trejin la itre kem me thin. Eje hi, loi e tro sa olene kowe la nekönatr la nyën a kuca la ketre ewekë ka lolo, tune la troa fe la qëhnelö koi së. Tro hë lai a amadrinë nyën me xatua nyën troa trotrohnin laka, “sisitia la manathithi e troa hame hune la troa kapa.”—Ite Huliwa 20:35.
TROA WANGATRUNE LA ITRE TREJIN E HNINE LA EKALESIA
7. Nemene la aqane wangatrune Iesu la atr ka simi hnangenyë, nge nemene la ini koi së?
7 Ame la ketre ijine Iesu e Dekapoli, “hna tro fë pi koi nyidë la ka simihnangenyë me teteqë.” (Mareko 7:31-35) Hnei Iesu hna xomi angeic kowe la gaa co me aloine la meci angeic. Pine nemen? Pine laka, ka simi hnangenyë angeic, nge maine jë, tro angeic a hmahma ke, tru la atr. Trotrohnine hi Iesu la mekuna i angeic, celë hi matre “nyidëti a e angeic” matre aloinyi angeic ngöne la gaa pë atr. Eje hi laka, thatreine kö së troa kuci iamamanyikeu, ngo loi e tro pe sa wangatrune la itre mekun me itre aliene hni ne la itre trejin, me thiina ka menyik koi angatr. Öni Paulo aposetolo: “Tro sha imekunekeune mate troa aciane la ihnimi me ite huliwa ka loi.” (Heberu 10:24) Trotrohnine hi Iesu la aliene hni ne la atr ka simi hnangenyë, nge hnei nyidrëti hna thiina ka menyik koi angeic. Drei la ketre tulu ka lolo koi së!
Kola upi së hnene la ihnim troa xatuane la itre trejin ka qatre hë me itre ka sinatr
8, 9. Nemene la aqane tro sa amamane laka, easa wangatrune la itre trejin ka qatre hë me itre ka sinatr? (Qaja jë la itre xaa ceitun.)
8 Troa wangatrune la itre trejin ka qatre hë me itre ka sinatr. Ame la ka sisitria ngöne la ekalesia, tre, ihnim, ngo tha ene kö la etrune la hna kuca. (Ioane 13:34, 35) Kola upi së hnene la ihnim troa kuca asë la hne së hna atrein, matre xatuane la itre trejin ka qatre hë me itre ka sinatr. Tha ka hmaloi kö koi nyudren troa sine la itre icasikeu memine la huliwa ne cainöj. Ngacama hetre jole së ju hë nge tha tru kö la hnei nyudren hna troa kuca, ngo easa xatua nyudren. (Mataio 13:23) Drei la ceitune i Michael, ketre trejin ka sinatr nge ka ti ikatr pë hë. Tru la hni ne ole i angeic kowe la ixatua hna hamën hnene la hnepe lapa i angeic me itre trejin e hnine la ekalesia. Öni angeic: “Hnene la ixatua i angatr, matre eni a atreine tro kowe la itre icasikeu me hane cainöj. Atraqatr la ajange troa cainöj ngöne la gaa tru atr.”
9 Nyimutre la itre trejin ka qatre hë me itre ka sinatr ka huliwa e hnine la itre Bethela. Itre atr ka elemekene la Bethela a hnimi nyudren. Angatr a ce cainöj me nyudren jëne mobilis maine cinyianyi pena. Hnei Bill, ketre trejin ka 86 lao macatre, hna cinyiany kowe la itre atr ka lapa gaa nany. Öni nyidrë: “Madrine catre huni troa cinyianyi tus.” Öni Nancy, ketre trejin ka 90 lao macatre: “Ame koi ni, ka nyipiewekë la itre tus. Ketre aqane tro hi lai a cainöj. Nyipiewekë tro la itre atr a atre la nyipici!” Öni Ethel, ketre trejin hna hnahone lo 1921: “Hace catre la meleng. Ame e itre xaa ijin, thatreine kö ni heetre caas.” Ame pe, ka madrine palahi eahlo troa cainöj jëne mobilis me wange hmaca la itre atr. Öni Barbara, ketre trejin ka 85 lao macatre: “Jole koi ni troa cainöje trootro ke, wezipo catre ni. Ngo eni a cainöj jëne mobilis. Oleti Iehova!” Ame ngöne la caa macatre, hnene la itre trejin ka qatre hë hna cainöj koi 1 228 lao hawa, me cinyianyine la 6 265 lao tus, me hëne la 2 000 lao atr jëne mobilis, me hamëne la 6 315 lao itus! Iehova a madrine la trengecatre hnei nyudreni hna kuca!—Ite Edomë 27:11.
10. Nemene la aqane tro sa xatuane la itre trejin troa kepe thangane qa ngöne la itre icasikeu?
10 Troa wangatrune la itre trejine ngöne la itre ijine icasikeu. Easa wangatrunyi angatr, ngöne la easa xatua angatr troa kepe thangane qa ngöne la itre icasikeu. Ame la ketre aqan, tre, tha tro kö sa traqa hmitr, wanga ajolë angatre jë. Ame e itre xaa ijin, easa traqa hmitr ke, hetre itre jol. Ngo maine ka majemine së traqa hmitr, loi e tro sa pane mekun la thangan kowe la itre trejin, me thele la aqane tro sa wangatrunyi angatr. Ketre, tro palahi sa mekune laka, Iehova me Iesu la ka könë së kowe la itre icasikeu. (Mataio 18:20) Loi e tro sa hetre hni ne metrötr koi nyidro, me canga traqa kowe la itre icasikeu!
11. Pine nemene matre nyipiewekë tro la itre trejin ka hetre götrane qa a trongëne la hna qaja ngöne 1 Korinito 14:40?
11 Ame la easa wangatrune la itre trejin me easë ke, easë hi lai a trongëne la hna qaja hnei Tusi Hmitrötr, ka hape: “Kuca alolone jë me amekötine la nöjei ewekë asë.” (1 Korinito 14:40) Kola xötrethenge la xötre celë hnene la itre trejin ka hetre götrane qa. Angatr a metrötrëne la traeme hna sa. Angatre hi lai a wangatrune la itre trejin ka troa cile fë cainöj thupei angatr, memine fe la ekalesia. Pane mekune jë la ethan e troa sasaithe la hawa. Ame la itre xaa trejin, angatr a traqa qa gaa nany. Ame itre xan, angatr a xomi kar. Nge ame la itre xan, tre, kola itrothei hnene la itre föi angatr ka tha hmi kö.
12. Pine nemene matre loi e tro sa hnim me metrötrëne la itre qatre thup? (Wange ju la hna eköhagen hna hape, “Wangatrune Jë La Itre Ka Elemeken.”)
12 Tru la huliwa hna kuca hnene la itre qatre thup e hnine la ekalesia me ngöne la huliwa ne cainöj. Celë hi matre, loi e tro sa hnim me metrötrë angatr. (E jë la 1 Thesalonika 5:12, 13.) Easa amamane la hni ne ole së koi angatr, ngöne la easa drengethenge angatr me sajuë angatr ke, ‘angatr a hmekëne thatraqane la itre u së, ke itretre troa qeje gelen.’—Heberu 13:7, 17.
TROA WANGATRUNE LA ITRE ATR NGÖNE LA HNA CAINÖJ
13. Nemene la ini hne së hna xom qa ngöne la aqane ujë i Iesu kowe la itre atr?
13 Hnei Isaia hna perofetane göi Iesu, me hape: “Tha tro kö angeic’ a hutra la hainyi ka pej, nge tha tro kö angeic’ a apineju la eunyine kola enuk.” (Isaia 42:3) Hnene la ihnimi Iesu kowe la itre atr, matre nyidrëti a utipi angatr. Trotrohnine hi nyidrë la mekuna ne la itre ka kucakuca, hna aceitunëne memine “la hainyi ka pej” maine “eunyine kola enuk.” Hnei nyidrëti hna thiina ka menyik koi angatr. Itre nekönatre fe a ajane troa ce tro me Iesu. (Mareko 10:14) Eje hi laka, thatreine kö tro sa trotrohnin me inine la itre atr tui Iesu! Ngo ijije hi tro sa wangatrune la itre atr ne la teritoare së, hnene la aqane ithanata së memine la ijine me traeme ne porotrik.
Loi e troa mama ngöne la aqane ithanata së laka, easa thiina ka menyik me wangatrune la itre atr
14. Pine nemene matre loi e tro sa thupëne la aqane ithanata së kowe la itre atr?
14 Nemene la aqane tro sa ithanata kowe la itre atr? Itre milio lao atr enehila ka “kucakuca me isa ije” hnene la aqane huliwa thoi ne la itre entreprise, me atre kuci politik, me itre hene ne hmi. (Mataio 9:36) Ame la pun, tre, kola imekuhni la itre atr, nge pëhë inyipicikeu. Celë hi matre, loi e troa mama ngöne la itre hne së hna qaja me aqane qaja së laka, easa thiina ka menyik me wangatrunyi angatr! Nyimutre la itre atr ka drei së, ngo tha hnene kö laka, ka maca së troa huliwane la Tusi Hmitrötr. Angatr a drei së ke, easa metrötrën me wangatrunyi angatr.
15. Nemene la itre xaa aqane tro sa wangatrune la itre atr ne la teritoar?
15 Nyimutre la itre aqane tro sa wangatrune la itre atr ne la teritoar. Loi e tro palahi a menyik me metrötr la aqane hnyinge së. Hanawang la tulu ne la ketre pionie. Ka xoue atr la itre atr ne la nöj, matre angeic a thupëne la aqane tro angeic a hnying. Angeic a thupën matre tha tro kö la itre atr a hmahma, e tria ju la aqane sa. Tha angeice kö a hnying ka hape, “Atre fe hi epuni la ëje i Akötresie?” maine “Nemene la Baselaia i Akötresie?” Angeice pe a qaja ka hape, “Jëne la Tusi Hmitrötr, atre hi ni laka, hetre ëje i Akötresie. Tro ni a amamai epun?” Isapengöne la aqane troa cainöj ke, isapengöne la itre atr hne së hna cainöje kow memine la aqane mele i angatr. Ngo nyipiewekë tro palahi sa menyik me metrötrëne la itre atr ne la teritoare së. Celë hi matre, loi e tro sa atre angatre hnyawa.
16, 17. Nemene la aqane tro sa thiina ka menyik (a) ngöne la traeme ne wange së la itre atr? (b) ngöne la easa canga afenesine la ithanata?
16 Eu la ijine tro sa wang la itre atr? Ame la easa cainöj ngöne la itre hnalapa trootro, troa sesëkötre la itre atr pine laka, tha hnei angatre kö hna hë së. Celë hi matre, nyipiewekë tro sa iëne hnyawa la ijine tro sa traqa koi angatr. (Mataio 7:12) Hapeu la itre atr ne la teritoar, angatre kö a meköl aqeany e pune wiik? Ame e cili, loi e tro sa pane nyiqane troa cainöj ngöne la gaa tru atr, maine wange hmaca lo itre atr ka ajane troa ithanata.
17 Tro kö sa lapa aqeany? Tha tro kö sa qea hna porotrik ke, nyimutre la itre jol ne la itre atr. Ketre tune fe la easa xötrei iöhnyi me angatr. Ka loi e troa canga afenesine la ithanata, tha tro kö a hmitr. (1 Korinito 9:20-23) Maine tro sa metrötrëne la traeme ne la itre atr pine laka, tru hnei jole i angatr, haawe, tro hë angatre lai a hmala troa ithanata me easë, ngöne la easa bëeke hmaca. Ame la easa eënyine la itre thiina ne la uati hmitrötre i Akötresie, easë hi lai “a ce huliwa tro kö me Akötesie.” Nge tro hë Iehova a upi së troa xatuane la ketre atr troa kapa la nyipici!—1 Korinito 3:6, 7, 9.
18. Nemene la itre manathith hne së hna troa kapa qa ngöne la hne së hna wangatrune la itre xan?
18 Haawe, loi e tro sa kuca asë la hne së hna atrein matre troa wangatrune la itre atrene la hnepe lapa së, memine la itre trejin e hnine la ekalesia, me itre atr hne së hna cainöje kow. Tro hë sa kapa la itre manathith enehila me elanyi fe. Tune la hna qaja ngöne Salamo 41:1, 2: “Manathithi la ate mekune kowe la ate pë ewekë; tro Iehova a amele angeice ngöne la drai ne ngazo. Tro ha thupë angeice me amele angeice hnei Iehova; tro angeic’ a loi xölene ngöne la nöj.”