Kola Wangatrunyi Së Hnene La Kapucatinasë
“Ate kö [Iehova] la aqane tratrau shë; nyidëti a mekune laka so ne hnadro shë.”—SALAMO 103:14.
1, 2. (a) Pine nemene matre ka isapengöne Iehova memine la itre atr ka mus? (b) Nemene la hne së hna troa ce wange ngöne la tane mekune celë?
AME la itre ka mus, tre, angatr a musinëne me ka qanangazone la itre xan. (Mataio 20:25; Ate Cainöj 8:9) Ngo tha celë kö la aqane ujë i Iehova! Ngacama Iehova la Kapucatinasë me trene men, ngo Nyidrëti a hnime la nöjei atr. Ka tru së koi Iehova, matre Nyidrëti a wangatrune la itre mekuna së me itre aja së. Atre hi Nyidrë laka, itre atr ka ngazo së, nge ka hetre ifego së. Celë hi matre, Iehova hmekuje hi a upi së troa kuca la itre hne së hna atreine troa kuca.—Salamo 103:13, 14.
2 Ame e hnine la Tusi Hmitrötr, kola mama la aqane wangatrune Iehova la nöje i Nyidrë. Tro sa pane ce wange la köni ceitun. Ame la hnapan, tre, hnei Iehova hna xatua Samuela lo angeic a thöth, matre troa tro fë la maca ne iameköti koi Eli, atre huuj ka sisitria. Ame la hnaaluen, tre, hnei Iehova hna trotrohni Mose ngöne lo angeic a mekune ka hape, thatreine kö angeic troxome la nöje Isaraela qa Aigupito. Nge ame la hnaakönin, tre, hnei Iehova hna wangatrune la angetre Isaraela ngöne la angatr a tro qa Aigupito. Nemene la ini hne së hna xome qa ngöne la itre aqane ujë i Iehova, nge nemene la aqane tro sa nyitipu Nyidrë?
AQANE WANGATRUNE LA KETRE NEKÖNATR
3. Nemene la ewekë ka traqa koi Samuela, nge nemene jë la hnying nyine tro sa xom? (Wange ju la pane iatr.)
3 Nekönatr petre kö Samuela ngöne lo angeic a traqa troa huliwa e hnine la ēnē. (1 Samuela 3:1) Ame ngöne la ketre heji ne angeic a meköl, hetre ewekë ka traqa.a (Wange ju la ithuemacany.) (E jë la 1 Samuela 3:2-10.) Hnei Samuela hna dreng la kola hë angeic. Öni angeic pena kö ka hape, Eli, atre huuj ka sisitria. Angeic a mejë me tro koi Eli, me hape: “Ini ha la, ke hnei nyipëti hna hë ni.” Ngo öni Eli: ‘Tha eni kö la ka hë eö.’ Nge hna alua hë angeic. Kola atrehmekun e cili hnei Eli laka, Akötresieti la ka hë Samuela. Celë hi matre, Eli a qaja jë koi Samuela la nyine tro angeic a kuca, nge hnei angeic hna drengethenge. Pine nemene matre tha canga qaja kö Iehova koi Samuela lo xötrei ka hape, Nyidrëti la ka hë angeic? Tha hna qaja pë hë hnei Tusi Hmitrötr. Ngo maine jë, Iehova a thele troa amamane koi Samuela ka hape, Nyidrëti a hnehengazo angeic.
4, 5. (a) Nemene la hna kuca hnei Samuela, ngöne lo Iehova a upi angeic troa qaja koi Eli la maca i Nyidrë? (b) Nemene la pengöi Iehova ka mama ngöne la ceitune celë?
4 E jë la 1 Samuela 3:11-18. Itre wathebo i Iehova a qaja kowe la itre nekönatr troa metrötrëne la itre qatr ka trene hnëqa. (Esodo 22:28; Levitiko 19:32) Eje hi, maine jë, ketre hace ka tru koi Samuela troa hlë e hmakany, troa qaja koi Eli la maca ne iameköti qaathei Akötresie. Tusi Hmitrötr a qaja ka hape, Samuela “a qou troa thue macanyi Eli la hna amaman.” Ngo hnei Akötresieti hna amamane hnyawa koi Eli laka, Nyidrëti hi la ka hë Samuela. Hnei Eli e cili hna upi Samuela troa amamane koi nyidrëti la nöjei hna qaja hnei Akötresie. Ame hnei Samuela “hna thue macanyi nyidëti la nöjei ewekë asë.”
Hnei Iehova hna xatua Samuela, matre tro palahi angeic a hetrenyi la idrengethenge me metrötr
5 Tha ewekë ka hnyipixe kö lai pine laka, hetre “kete ate i Akötesie” ka qaja ha koi Eli la maca cili. (1 Samuela 2:27-36) Kola amamane hnene la ceitune celë, la aqane ujë i Iehova memine la inamacane i Nyidrë.
6. Nemene la ini hne së hna xome qa ngöne la aqane xatua Samuela hnei Akötresie?
6 Hapeu, ketre nekönatr epun maine thöthi pena? Maine eje hi, troa xatua epuni hnene la ceitune i Samuela. Kola amamane laka, trotrohnine hi Iehova la itre jol memine la itre mekuna i epun. Maine jë epuni a xou troa cainöje kowe la itre ka tru. Maine pena, epuni a xou wanga hnyimasai epuni jë hnene la itre xaa thöth. Tha tro kö epuni a thëthëhmine laka, ce Iehova palahi me epun. Celë hi matre, loi e tro epuni a thith, me fe la hni epun. (Salamo 62:8) Nyipiewekë fe tro epuni a lapa mekune la itre tulu ne la itre xaa nekönatr, tui Samuela. Ithanata jë memine la itre trejin ka ce xötre me epun, maine itre qatre ka melëne hë la jole ka eje thei epun. Tro hë angatr a qaja la aqane wangatrunyi angatr hnei Iehova, nge ka ketrepengöne kö.
AQANE WANGATRUNYI MOSE
7, 8. Nemene la aqane amamane Iehova laka, Nyidrëti a wangatrunyi Mose?
7 Ame ngöne lo kola 80 lao macatre i Mose, hnei Iehova hna upi angeic troa thapa la nöje i Nyidrëti hna thahluën e Aigupito. (Esodo 3:10) Eje hi, tha ka hmaloi kö la hnëqa cili koi Mose ke, 40 lao macatre ne thupëne angeice la itre mamoe e Midiana. Öni Mose: ‘Drei ni matre tro ni a tro koi Farao, me thenge la itre nekö i Isaraela qa Aigupito?’ Iehova a ithuecatre koi Mose me hape: “Tro ni a ce me eö.” (Esodo 3:11, 12) Hnei Iehova hna thingehnaeane koi angeic ka hape, tro la itre qatre i angetre Isaraela ‘a drei’ angeic. Öni angeic e sa: ‘Ngo maine tha kepe ni kö hnei angatr, me drenge la aqane ewekëng?’ (Esodo 3:18; 4:1) Tha lapaune kö Mose koi Iehova! Ngo hnei Iehova hna xomihni ahoean. Ketre, hnei Nyidrëti hna aijijë Mose troa kuca la itre iamamanyikeu. Eje hi, Mose la pane atr hna qaja e hnine la Tusi Hmitrötr, ka kapa la mene cili.—Esodo 4:2-9, 21.
8 Ngazo pe, hnei Mose hna thele ewekë me qaja ka hape, thatreine hnyawa kö angeic ithanata. Öni Akötresieti jë hi: “Tro ni a ce memine la qe i ’ö, me ini eö la hna troa qaja.” Hapeu, tro hë Mose a kuca la hna amekötine koi angeic? Ohea, hnei angeic hna sipo Iehova troa upe la ketre atr! E cili, hnei Iehova hna elëhni. Ngo hnei Nyidrëti hna wangatrune la itre aliene hni Mose, me upi Arona matre nyitrengewekë i angeic.—Esodo 4:10-16.
9. Nemene la aqane xatua Mose troa elemekene la nöj, hnene la xomihni me thiina ka menyike i Iehova?
9 Nemene la hna ini së göi Iehova, ngöne la ceitune celë? Nyipici laka, Iehova la Kapucatinasë. Maine ju, ijiji Nyidrëti hi troa kuca la ketre ewekë matre troa xou hnei Mose, me drei Nyidrë. Ngo hnei Iehova hna xomihni me qaja koi angeic ka hape, tro Nyidrëti a ce me angeic. Hapeu, hetre thangane kö? Eje hi! Mose la hna iëne matre troa elemekene la nöje i Akötresie. Hnei angeice fe hna thele troa thiina ka menyik me wangatrune la itre xan, tune la aqane kuca Iehova koi angeic.—Numera 12:3.
Hapeu, easë kö a nyitipu Iehova ngöne la easa ithanata koi itre xan? (Wange ju la paragarafe 10)
10. Nemene la itre eloin e tro sa nyitipu Iehova?
10 Hetrenyi la itre ini thatraqai së enehila. Maine ka faipoipo hë së maine ketre keme me thin, maine qatre pena, ijije hi tro sa musinëne la itre xan. Ngo ame pe, nyipiewekë tro sa nyitipu Iehova. Loi e tro sa thiina ka menyik me atreine xomihni kowe la itre föe së me itre nekö së me kowe fe la itre trejin. (Kolose 3:19-21; 1 Peteru 5:1-3) Maine tro sa nyitipu Iehova Akötresie me Iesu Keriso, ene lo Mose Ka Tru, tro hë itre xan a canga ithanata me easë. Tro fe angatr a kapa la itre ithuecatre qaathe së. (Mataio 11:28, 29) Ketre, tro hë sa ketre tulu ka lolo koi angatr.—Heberu 13:7.
KA TRU TRENGECATR NGE KA IAMELE
11, 12. Nemene la aqane wangatrune Iehova la nöje i Nyidrë ka fek qa Aigupito?
11 Ame ngöne lo 1 513 M.P.K., tre, hna sasaithe la 3 milio lao angetre Isaraela ka feke qa Aigupito. Hetrenyi la itre nekönatr me itre qatr, me itre ka wezipo me sinatr. Eje hi, alanyimu catr angatr, matre nyipiewekë troa elemekene la nöj hnene la ketre atr ka loi thiina me ka atreine itrotrohni. Celë hi kepin matre kola ië Mose hnei Iehova. E cili, tha hnene kö la angetre Isaraela hna xou troa fek qa Aigupito, kowe la ketre nöj hna thatre.—Salamo 78:52, 53.
12 Nemene la aqane wangatrune Iehova la nöje i Nyidrë? Ame ngöne lo ijine kola fek hnene la angetre Isaraela qa Aigupito ke, hetre hnei Nyidrëti “hna hnëkën.” (Esodo 13:18) Eje hi, lolo la aqane eköthe Iehova la nöje i Nyidrë, matre mama hnyawa laka, ce Nyidrëti me angatr. Ketre, hnei Iehova hna “e angate hnene la iaw e lai” memine la “hudumene eë ngöne la jidi ka pexej.” Iehova a ajane troa amamane kowe la nöj laka, Nyidrëti palahi la ka eatrongë angatr me thupë angatr. (Salamo 78:14) Nyipiewekë tro angatr a canga trotrohnine lai, pine laka hetre itre xaa ewekë ka troa traqa koi angatr.
Nemene la aqane thupëne Iehova la nöje Isaraela, ngöne la Hnagejë Ka Palulu? (Wange ju la paragarafe 13)
13, 14. (a) Nemene la aqane thupëne Iehova la nöje Isaraela, ngöne la Hnagejë Ka Palulu? (b) Nemene la aqane amamane Iehova laka, catre kö Nyidrëti hune la angetre Aigupito?
13 E jë la Esodo 14:19-22. Pane mekune jë së laka, easë fe thene la angetre Isaraela, nge pëkö jëne kötre së. Kola weji së hnene la trongene isi Farao, nge Hnagejë Ka Palulu qëmeke së. Kuca jë hi Iehova la ketre ewekë. Ame la iaw ka cile meköti qëmeke së ke, eje pena ha e hutrö, nyipi së me angetre Aigupito. Kola miti thei angatr, ngo kola hudrume la lai the së! Thupene lai, easa öhnyi Mose a line la ime i angeic hune la hnagejë, nge traqa pi hi la ketre enyi ka catr, me thawaluëne la hnagejë. E cili, easa ce tro memine la hnepe lapa së, me itre öni me itre xan. Easa sesëkötr ke, pëkö ejolene la tronge së. Easa tro hune la gaa weliwel, matre tha jole kö kowe la itre ka hmitre troa hane kötr uti hë traqa kowe la ketre götran.
14 E jë la Esodo 14:23, 26-30. Ame fe ngöne la ijine cili, Farao a pi mama me pi hune fë mekun, matre angeic a weji së me angetre Isaraela. Thupene lai, Mose a line hmaca jë la ime i angeic hune la hnagejë. Kaca pi hi eje me heti Farao memine la trongene isi angeic. Pëkö ka mel, meci asë hi angatr!—Esodo 15:8-10.
15. Nemene la hna ini së göi Iehova, ngöne la ceitune celë?
15 Hetre ini ngöne la ceitune celë, göi Iehova. Eje hi, tha ka menumenu kö Akötresie. Celë hi matre, tha hnehengazo menu kö së, ngo tingetinge pe la mele së. (1 Korinito 14:33) Ceitui Iehova memine la ketre atre thupë mamoe. Nyidrëti a thapa la nöje i Nyidrë, qaathene la nöjei ithupëjia me nyihnyawa angatr. Celë hi ka aegöcatrenyi së me akeukawanyi së, pine laka, easa mel ngöne la pune la fene celë.—Ite Edomë 1:33.
16. Nemene la nyine troa kuca, matre tro sa kepe thangane qa ngöne la aqane amelene Iehova la nöje i Nyidrëti ekö?
16 Ame enehila, tre, Iehova palahi a thupën me nyihnyawane la nöje i Nyidrë. Nyidrëti a xatua angatr troa acatrene la aqane imelekeu i angatr me Nyidrë, me thepe angatr qaathene la itre ithupëjia. Ketre, tro palakö Iehova a xatua angatr, ngöne la akötr atraqatr laka, calemi catre hë. (Hna Amamane 7:9, 10) Ngacama hetre itre ka co maine ka tru, me itre ka egöcatr maine ka wezipo, ngo tha tro kö la nöje i Iehova a hmengöhmengöne hnei xou, ngöne la kola traqa la akötr atraqatr.b (Wange ju la ithuemacany.) Ame pe ngöne la ijine cili, tro la nöje i Iehova a mekune lo itre trengewekë i Iesu, lo kola hape: “Galajë nyipunie, me goeën; ke eashenyi hë la troa amele nyipunie.” (Luka 21:28) Eje hi, tro Gog, ene lo itre nöj hna acasin nge ka catre kö hui Farao, a thele troa lepe la nöje i Iehova, ngo tha tro jë kö angatr a xou. Xecie hnyawa koi angatr laka, tro kö Iehova a thupë angatr. (Ezekiela 38:2, 14-16) Pine nemen? Pine laka tha ka saze kö Iehova. Tro hmaca kö Nyidrëti a amamane la ihnimi Nyidrë koi angatr me thupë angatr.—Isaia 26:3, 20.
17. (a) Nemene la aqane troa xatua së hnene la aqane wangatrune Iehova la nöje i Nyidrë? (b) Nemene la hne së hna troa ce wang ngöne la tane mekun e thupen?
17 Hne së hna ce wang ngöne la tane mekun celë, la itre aqane wangatrun me eatrongëne me amelene Iehova la nöje i Nyidrë. Ame la easa lapa mekune la itre ceitune celë, nyipiewekë tro sa thele la itre ithuemacany ka hnyipixe göi Iehova. E cili, tro hë sa atre la itre xaa thiina i Iehova, nge tro ha kökötre la ihnimi së me lapaune së koi Nyidrë. Ame ngöne la tane mekun e thupen, tro sa ce wang la aqane tro sa nyitipu Iehova, ngöne la aqane troa wangatrune la itre atrene la hnepe lapa së, me e hnine la ekalesia, me ngöne la hna cainöj.
a Öni Josèphe, ketre historien atre Iuda ka hape, 12 lao macatre i Samuela ngöne la ijine cili.
b Maine jë, troa mele pe thupene Amagedo la itre ka sinatr. Ame lo Iesu ekö e celë fen, hnei nyidrëti hna aloine la “ite meci asë me ite ka kucakuca asë,” me itre ka sinatr. Kolo hi lai a nyihatrene la itre hnei nyidrëti hna troa kuca elany thupene Amagedo. (Mataio 9:35) Troa pexeje la ngönetrei ne la itre hna troa amelene hmaca.