Eloine La Troa Cainöje Jëne Telefon

¹ Ame la aja së, itre Temoë i Iehova, ke, thaa ene hmekuje kö la troa saene kowe la huliwa ne cainöj, ngo nyipi ewekë fe tro sa ketr la nöjei atr hnene la maca ne la Baselaia. (Ite Huliwa 10:42; 20:24) Maine nyipici laka, nyipi ewekë troa cainöje ngöne itre hnalapa trootro, ke, celë jëne easë a troa ketr la itre atr, ngo easë a öhne laka thatreine pala hi tro sa ketr la itre atr asë ngöne la teritoare së. Haawe, maine easë a ajane troa ‘kuca asë la qâ së,’ loi e tro mina fe së a hane xome la itre xaa aqane huliwa—ene la huliwa ne cainöje jëne telefon—matre troa öhne la itre atr ka hetre hni ne mamoe.—2 Tim. 4:5.

² Nyimutre la itre götrane enehila laka, hetrenyi la itre uma, me itre batima hna lapane hnene la itre fami ka nyimutre, a thaa hna nue kö troa kuca, nge hna thupëne hnyawa, maine pena itre uma hna eköhagen, nge jole catre troa cainöje itre hnalapa trootro ngön. Nge ame fe lo itre teritoare hna kuca lapaan, ke, nyimutre pi hë la itre uma ka pë atren. Ngo, nyimutre la itretre cainöje ka öhnyi thangane ka loi, hnene laka, hnei angatre hna cainöje kowe la itre atr cili jëne telefon. Ame ngöne la ketre hmakanyi ke hna cainöje ngöne itre hnalapa trootro hnene la lue trefën, matre naene lao hnalapa ka pëkö atren. Ngöne la kola bëeke kowe la Uma Ne Baselaia, nyidroti a canga thele jë hnine la annuaire la numero ne telefone ne lo itre atr ka paatr. Nyidroti a hë angatre jë, nge eitre lao atr hnei nyidroti hna ithahnata memin!

³ Hapeu, nango cile hnö nyipunie troa cainöje jëne telefon? Kola wangatrehmekune hnene la ketre trejine ka hape: “Xele ni ma wange la atr ka hë ni ngöne la hnalapange troa salemë ewekë, haawe ketre mekune lai ka catre ngöne la heng, matre thaa hmala kö la hninge kowe la aqane cainöje cili.” Ngo, thupene la hna alua cainöje jëne telefon, ke, öni angeice ka hape: “Lolo pi hë la aqane kuca celë! Thaa mekune pi kö ni laka tro ni a eatrëne lai, ngo atraqatre la madrineng! Kola mano la itre atr la angatre a sa la telefon, nge hetrenyi the së la nöjei ewekë ka aijijë së troa eatrëne la hne së hna mekune kow. Lolo catre la thangane qa ngön!” Eje fe la mekune ne la ketre söre, kola hape: “Thaa nyipi madrine kö ni la kola qeje cainöje jëne telefon. Ngo eni la a qaja koi nyipunie laka, xele ni ekö ma hane cainöje tune lai. Ngo hnenge hna tupathe la aqane cainöje cili, nge eni a öhne laka, tru catre la eloine ej. Thötre sevene lao viziteng jëne telefon, nge tru catre kö hnei etiding!” Ijiji nyipunieti fe troa hane kepe thangane ka loi, qa ngöne la hna cainöje jëne telefon.

⁴ Loi e Troa Hnëkëne La Huliwa Ne Cainöje Jëne Telefon: Kola xomiujine la huliwa ne cainöje ne la ekalesia hnene la atre thupëne la huliwa. Qanyine kö la aja ne la götrane hnei nyipunie hna mele ngön, ngo tro la Collège ne la itre qatre thupe a iëne la ketre qatre thupe maine ketre drikona ka maca, matre caasi me angeice göi troa hnëkëne la huliwa ne cainöje jëne telefon. Loi e tro la atrekë huliwane la itre teritoare a hnëkë fe, ke, tro angeice a hamëne la itre teritoare nyine kuca, me ahnyipixene pala hi itre ej. Eje hi laka, tro la atre thupëne la sirkoskripsio a wange hnyawane la aqane kökötre la huliwa cili.

⁵ E maine hetrenyi ngöne la teritoare i nyipunie la itre uma hna thatreine troa ketr, ke, loi e troa hnëkëne la itre teritoare cili matre troa cainöje jëne telefon. Tro la trejine atrekë hnëqane lai a xome la itre aderesi me ëje ne la itre atr, matre nyi teritoarën. Thaa tro kö a nyimutre menu pala ha, matre ijije troa huliwane lapaan. Nyipi ewekë troa makëne ngöne la nöjei teritoare la itre götrane hna troa cainöje ngön jëne telefon.

⁶ Tro nyipunieti a öhne tune kaa la itre numero ne telefon? Maine hna fejane la itre numero ne telefone ne la itre atr ka lapa ngöne lai batima hna thupëne hnyawan, ke, loi e troa xome itre ej. Maine pena, ijije hi troa xome la ëje ne la itre atrene lai batima, me thele la numero ne telefone i angatre e hnine la annuaire.

⁷ Loi e tro la itre qatre thupe a ketre catre troa ce huliwa memine la itre ka majemine hë cainöje jëne telefon, matre troa inine la itre xan, maine jë jëne la porogarame hna hnëkëne kowe lo itre Pionie Göi Troa Hamë Ixatua Koi Itre Xan. Ame itre xaa ijin, ke, tro pë hë a nyihnane la itre ihaji koi së ngöne la ijine Icasikeu Ne La Huliwa, hnene la itre mekune hna troa hamëne hnene la itre trejin, kola troa qaja la itre eloine la aqane cainöje celë.

⁸ Maine itre qatre thupe a vizitëne la itre trejine ka lapaa umë, maine itre sine wezipo pena, ke, ijije hi tro angatre a ithuecatre kowe la itre trejine cili matre troa hane xome la huliwa ne cainöje jëne telefon. Maine jë tro la ketre qatre thupe a pane tupathe lai, nge tro la atre cainöje a goeëne hnyawa la aqane kuca. Nge thupene lai, tro la atre cainöje a ketre tupathe troa hë. Ala nyimu la itre ka nyiqaane tune la, hnei angatre hna ithahnata a itre hnepe menetr, nge atraqatre la madrine hnei angatre hna kapa qa ngön.

⁹ Itre Mekune Nyine Ixatua Ka Hetre Thangane Ka Loi: Ame la Iesu a upe la itretre drei nyidrë troa cainöj, ke, hnei nyidrëti hna “upi angate isa ala lue.” Pine nemen? Atre hi nyidrëti laka e tro angatre a ce huliwa, ke, tro angatre a isa xomi ini qaathei ketre, me ithuecatrekeu. Caasi hi la pengöne lai memine la huliwa ne cainöje jëne telefon. Maine hetre sine cainöje i nyipunie, ke, ijije tro nyipunie a xomi ini qaathei ketre, me porotrikëne la itre eloine hnei nyipunie hna kapa, me hamë mekune nyine ixatua thatraqane la nyipunieti a troa hë hmaca. Ketre, ngöne la ijine nyipunieti a hë, ke, ijije fe tro nyipunie a ihamënekeune la ketre ixatua ka ijije göi aqane troa sa la telefon.

¹⁰ Maine nyipunieti a ajane troa hmala la hni nyipunie, me xomehnöthe la itre mekune i nyipunie, ke loi e troa lapa hune icea me amë qëmekei nyipunie la itre jia ne cainöj—Tusi Hmitrötr, itus Comment raisonner, me boroshüre Thele, me itre zonal, me itre xaa itusi ju kö. Cinyanyine jë la itre xaa aqane nyiqaane ithahnata, nge amë ju itre eje qëmekei nyipunie. Loi e troa hnëkë hnyawa troa xomi not, me itre mekune asë ka meköt, me xome fe la drai me hawa hna ithahnata memine lai atr, matre aijijë nyipunie troa hë hmaca göi troa xomexatuane pala hi la aja thei angeic.

¹¹ Hna majemine hmeke hnene la itre atr, ngöne la angatre a drenge la ketre nine ithahnata thaa hnei angatre kö hna majemine drenge ngöne telefon. Haawe, loi e troa keukawa, me menyik, me metrötre la aqane ithahnata i nyipunie. Tro hi lai atr a drenge la nine ithahnata i nyipunie, me aijijë angeice troa waipengöi nyipunie, me öhne laka nyipunieti a hnehengazone la itre atr. The xou kö, nge ithahnata jë qa kuhu hni nyipunie. Ithahnata hmidra ju, me qaja hnyawane la itre trenge ewekë, nge wange ju fe la nine ithahnata i nyipunie maine drenge hnyawane hi hnene lai atr. Hane jë fe nue ijine kowe lai atr troa hane ithahnata. Qaja apexejene jë la ëje i nyipunie, nge qaja jë fe ka hape, thaa nanyi kö la hnei nyipunieti hna lapa. Thaa aja së kö tro la itre atr a xome ceitu së, me itre atr ka salemë ewekë. Ngo loi e tro pe nyipunieti a qaja ka hape, nyipunieti a hëne la nöjei atrene lai batima, nge ngöne la xötrei ke, qaja jë la ëje i nyipunie, nge ngöne la porotrik, ke hane jë fe hëne la ëje i angeic.

¹² Itre Aqane Nyiqaane Ithahnata Jëne Telefon: Ijije hi troa xome la itre xaa aqane nyiqaane ithahnata ngöne la götrane 9-15 ne la itus Comment raisonner, me nango amekötine itre eje matre ihmeku kowe la huliwa ne cainöje jëne telefon. Maine jë qaja jë ka hape: “Eni a hë nyipë jëne telefon, ke, pëkö jënge troa tro koi nyipë me ithahnata meköti koi nyipë. Ame la aliene la hë i eni, ke, ene la troa hnyingëne la mekune i nyipë ngöne la ketre mekune ka nyipi ewekë catr.” Thupene lai, qaja jë lai hnying.

¹³ Ijije hi troa huliwane la pane aqane nyiqaane ithahnata fene la hna cinyihane hna hape “Crime/Sécurité” troa hape: “Hapeue lai? Ame la ëjeng, ke _____. Thaa nanyi kö la hnenge hna lapa. Eni a pane canga qaja koi nyipëti ka hape, thaa eni kö a troa salemë ewekë, maine tro pena a thele ewekë göi nyipunie. Eni a hë, ke, eni a hnehengazone la aqane troa isa wai melene enehila. Kola xötreithi së hnene la huliwa menu, nge kola hane angazone mina fe la mele së. Hapeue la mekune i nyipë, tro kö a traqa la ijine tro la nöjei atr a ethenyi jidr, nge pëkö xou thei angatr? [Nue pi troa sa.] Eni a ajane troa e koi nyipë la hnei Akötresieti hna thingehnaeane koi së.”

¹⁴ Hetre thangane ka loi hna kapa qa ngöne la hna hnyingëne mekötine kowe lai atr jëne telefon, maine ajane kö angeice troa ini Tusi Hmitrötr. Tro hi a itre hnepe menetre ka xalaith, la eqeane la etid. Hnyingëne jë lai atr maine ajane kö angeice troa sisedrëne la etid ngöne la hnalapa i angeic; maine thaa hmala kö angeic, ke ce wange ju la ketre drai me hawa ne etid hmaca jëne telefon.

¹⁵ Ngöne la kola nyipune la porotrik, loi e troa hnehene la ketre mekune matre nyijëi nyipunie troa wange lai atr ngöne la hnalapa i angeic, maine pena troa iupi fë la ketre itus. Maine kola luelue la atr troa hamëne la aderesi angeic, ke, hë angeice hmaca jë. Ma troa anyimua hë, me porotrike jëne telefon, matre hmala jë angeice elanyi troa könë nyipunie kowe la hnalapa i angeic.

¹⁶ Ketre Sipu Mekune Jë Me Kuca: Hnene la ketre söre ka 15 lao macatre hna nyiqaane e hmakany, la huliwa ne cainöje i angeice jëne telefon. Hnei angeice hna ithahnata kowe la ketre föe ka kapa la itus Atrehmekune. Ame la kola traqa fë la itus thene lai föe, hnei eahlo hna hnyingëne kowe lai söre la aqane xome angeice la numero ne telefone i eahlo, ke, thaa hna amë kö hnine la annuaire. Hna tria la aqane kuca la numero hnene lai sör! Hna nyiqaane etid hnene la föe, nge ame enehila, ke, ketre atre cainöje eahlo thaa hna bapataisone petre kö.

¹⁷ Hnene la ketre söre hna xome la ketre teritoare hna troa cainöje ngön jëne telefon, ngo hnei angeice hna lapa fë a köni wiik, nge thaa kuca kö ke, tru la xou i angeic. Nemene la ka hamë trenge catre koi angeice troa nyiqaan? Hnei angeice hna mekune hmaca la ketre taane la Réveillez-vous ! ne 22 Januare 1997, hna hape “E Kucakuca Ni, Celë Hi Ijine Catre Ni.” Kola qaja la pengöne la ketre Temoë sine wezipo, ngo ka catre cainöje jëne telefon. Kola qaja hnene lai söre ka hape: “Hnenge hna thithi koi Iehova me sipo Nyidrëti la trenge catr. Hnenge hna sipo Nyidrëti troa hamë ni la itre trenge ewekë ka ijije thatraqane la aqane nyiqaane ithahnatang.” Nemene la thangane hna kapa ngöne la pane drai ne cainöje jëne telefon? Öni angeice ka hape: “Hnei Iehova hna kapa la sipong. Hna drei ni hnene la itre atr, nge hne huni hna ce wange matre tro hmaca ni a wai angatr.” Hetre thangane ka loi, ke, hnei angeice hna nyiqaane la caa etid qa ngöne la hnei angeice hna cainöje jëne telefon. Angeice a nyipune ka hape: “Hnei Iehova mina fe hna ini ni hmaca troa mejiune koi Nyidrë, ngo thaa tro kö a mejiune kowe la sipu trenge catreng.”—Ite edomë 3:5.

¹⁸ Ketre aqane cainöjëne la maca ka loi, la troa tro fë la nyipici jëne telefon, nge hetre thangane ka loi hna kapa qa ngön. Loi e troa hnëkë hnyawa, me troa hmala la hni nyipunie troa kuca la huliwa cili. The kucakuca pi kö e maine xele kö la itre atr ngöne la xötrei. Sipo Iehova jë troa amamai nyipunie la nyine kuca, nge ce ithahnatane jë la itre mekune i nyipunie me itre xane ka xome hë la huliwa cili. Epi tro sa nyipi ewekëne la huliwa ne cainöje së, me catre the së fe la ajane troa ketr la nöjei atrene la teritoare së.—Rom. 10:13, 14.