Nyimu Hnyinge Hna Sa Hnene La Atrehmekune Qa Thei Akötresie
1 Qëmekene la tro epuni a hetrenyi la nyipi atrehmekune qangöne la nyipici, ketre nyimutre fe ekö lo itre hnyinge ngöne la götrane la mel, hnei epuni hna thatreine troa sa. Drei kö la madrine i epuni ngöne lo kola hamëne koi epuni la itre mekune qa hnine la Tusi Hmitrötre nyine sa la itre hnyinge cili. (Wange ju 2 Timoteo 2:2.) Enehila, atreine hë epuni troa hane xatuane la itre xaa atr, troa hane kapa la itre mekune nyine sa la itre hnyinge cili. Ijije fe tro epuni a hane hamëne koi angatre la atrehmekune ka troa ee angatre kowe la mele ka epine palua. (Ioane 17:3) Ngo nemene la aqane tro epuni a xatuane la ketre atr troa trotrohnine la etrune la atrehmekune cili? Pane mekune ju la itre hnyinge i epuni hna sa hnene la nyipici. Nemene la hna ajane troa atre hnene la itre atr ka thele la nyipici? Mekune hnyawa ju la aqane tro epuni a xatua angatr, jëne la itus, La connaissance qui mène à la vie éternelle. Hane cahu itre xaa hnepe ixatua nyine troa xatua epun, ngöne la epuni a hnëkë troa cainöje e treu juun.
2 Pine laka, nyimutre la itre atr ka hnyingëne la kepine matre kola tru catre la akötre ngöne la fen, haawe, atreine hi troa sa hnyawa koi angatre tune la:
◼ “Ame ngöne la kola traqa la itre drai ngazo, maine kola elë nyimenyime pena la itre ihumuthe me itre iakötrë, haawe, kola isa thele hnene la itre atr la kepine la kola traqa la itre ewekë ka ngazo cili. Tuneka fe la mekune i epun?” Nue pi kowe la atr troa hane qaja la mekune i angeic. Thupene lai, fe jë la itus Connaissance kowe la mekene 8, nge amamane ju la hna qaja ngöne paragarafe 2. Qaja ju ka hape, kola hamëne hnene la itusi celë la mekune i Tusi Hmitrötr, amamane jë la kepine matre kola traqa la itre ewekë ka ngazo koi së, nge hamë angeice ju fe lai itus.
3 Ame la epuni a bëeke hmaca troa wange lo atr hnei epuni hna hamë itus “Connaissance” kow, haawe, qaja jë ka hape:
◼ “Hnenge hna pane mekune hmaca lo putine ithahnata so, ngöne lo kepine matre kola tru catre la iakötrë ngöne la fen. Hapeu, epuni fe kö a hane kapa la aqane sa i Tusi Hmitrötr, jëne la itusi celë?” Nue pi troa sa. E jë la paragarafe 17 ngöne götrane 77 ne la itus Connaissance, nge e jë fe ngöne la Tusi Hmitrötre ne lai atr la Roma 9:14. Thupene lai, qaja ju ka hape: “Ame la maca ka loi, ke, ene laka, thaa hmo kö Akötresieti matre tro Nyidrë a nyi ehace së me akötrë së. Hnei Nyidrëti hna thingehnaeane koi së, laka, tro Nyidrë a hamëne koi së la mele ka thaa ase palua kö hnine la tingetinge me madrin. Ame la taan la pane mekene la itusi celë, ke, hna hape, ‘Atreine hi tro epuni a hetrenyi la manathithi elany!’ Eni a ajane troa qejepengöne koi epuni me itre atr hnei epuni hna hnim, la enyipicine la hna thingehnaeane cili.” Fe jë kowe la mekene 1, nge amamane jë la aqane troa etid. Thenge la traeme ka ijije ne la atr, ce wange ju la itre xaa hnepe paragarafe ne lai mekene cili.
4 Atreine hi tro epuni a iëne la ketre aqane nyiqane ithahnata ngöne la itus “Comment raisonner” götrane 14, fene la hna cinyihane hna hape, “Vieillesse/Mort”:
◼ “Hane fe kö epuni thele ka hape: Tuneka e meci hë, hna umuthe hi la mele lai? Maine pena hetre ketre mele ka ketre pengöne kö e thupene la mec? [Nue pi troa sa.] Kola qejepengöne hnyawa hnei Tusi Hmitrötre me sa la itre hnyinge göi pengöne la mec. [E jë la Ate cainöj 9:5, 10.] Kola amamane laka, hetre nyipi mejiune kowe la nöjei ka lapaune asë. [Fe jë kowe la itus “Connaissance” götrane 84 paragarafe 13; nge e jë me qejepengöne la itre trenge ewekë i Iesu ngöne la Ioane 11:25.] Hna hnëkëne la mekene ka pexeje celë, matre troa sa la hnyinge hna hape, Nemene la ewekë ka traqa kowe la itre atr hne së hna hnim ka meci hë? Eni a pi ajane troa amë pe la itusi celë koi 150 F.”
5 Ame ngöne la epuni a troa iwai hmaca, ibozu hmaca ju me qaja ka hape:
◼ “Hnei nyiso hna ithahnatane lo nyiso a xötrei iöhny, la ewekë ka traqa ngöne la kola meci hnene la atr. Nyimutre la itre atr, angatre a lapaune laka, hetre mele ka ketre pengöne e thupene la mec, a mele e koho hnengödrai maine ngöne pena la ketre fen. Ngo hane fe kö epuni mekune laka, ijije hmaca troa mele hmaca la ka meci hë, e celë fen? [Nue pi troa sa.] Tune la hna qaja hnei Tusi Hmitrötr, ame la nöjei hna amelene hmaca, ke angatre hi lo itre atr ka menyik, ka troa lapaane la ihnadro. [E jë la Salamo 37:11, 29, nge thupene lai, ithahnatane ju la itre mekune ngöne la itus “Connaissance” götrane 88, paragarafe 20.] Celë hi mejiune lai ka akeukawane la itre milio lao atr, ka xoue mec. Itusi la ka troa xatua epuni troa trotrohnine hnyawa la mekune cili. Hapeu, ijiji eni kö troa pane amamane koi epuni la aqane troa kapa la ixatua cili?”
6 Maine epuni a ajane la ketre aqane nyiqaane ithahnata ka thaa jole kö, pane tupathe ju la aqane nyiqane celë:
◼ “Eni ajane troa amamane koi epuni la ketre iatr hnine la itusi celë, La connaissance qui mène à la vie éternelle. Hapeue la epuni a hane goeën, la emingömingöne la iatr celë?” Fe jë la itusi matre tro la atr a hane goeëne la götrane 4-5. Nue pi troa sa. Thupene lai, e jë la itre hnaewekë ngöne la götrane 5. Nyipune ju me hape: “Ijije hi tro epuni a xome la itusi celë matre tro fe epuni a ketre hane e. Ka 150 F la thupene la itus, ke, thatraqane hmekuje hi cahu pepa.” Thele jë la ketre hawa ka ijij, matre troa iwai hmaca.
7 Hetrenyi së la atrehmekune qa thei Akötresie, eje a sa la itre hnyinge ka nyipi ewekë catre thatraqane la mel. Loi e tro pala hi epuni a hnëkë hnyawa, nge tro hë Iehova a amanathithi epun, pine laka, epuni a catre troa trofë trongëne la maca ne iamele kowe lo itre atr ka thele la nyipici.