Qaja Trongëne Jë La Atrehmekune Ka Thuejë Së Kowe La Mele Ka Thaa Ase Palua Kö
1 Iehova la “ate inine la ate.” (Sal. 94:10) Nyidrëti a nyijë së troa qaja la atrehmekune ka iamele, nge ka qeje Nyidrë kowe la itre atr ka thatre kö la aqane troa nyihlue i Nyidrëti hnyawa. Ketre jia ne ini ka loi la itus La connaissance qui mène à la vie éternelle, pine laka atreine tro la itre atr ka hni ka meköti a atre Akötresieti hnyawa jëne la Wesiula hna cinyihan, ene la Tusi Hmitrötr. (1 Tim. 2:3, 4) Ka thaa jole kö e troa trotrohnine la itus Connaissance nge thaa isazikeu kö la aqane qeje pengöne la nyipici; celë hi itre ewekë lai ka troa xatua la itre atr troa trotrohnine la hnei Iehova hna ajane troa ini angatr. Ame ngöne la treu celë, ke, loi e tro së a thele jëne troa ithahnata memine la itre atr, matre tro angatre a hetrenyi la ajane troa e la itus. Ame la itre xaa mekune nyine ixatua, thaa tro kö a e gufan, ngo loi pe troa xolouthe hnyawa itre eje me tupathe troa nyi trenge ewekëne hnene la sipu aqane ithahnata i epun.
2 Pine laka nyimutre la itre atr ka lapa fë hace qa ngöne la hna meci hnene la ketre atr hnei angatre hna hnim, ijije tro epuni a qaja la mejiune la melehmaca ngöne la kola porotrik, haawe qaja ju ka hape:
◼ “Alanyimu the së la itre ka hace pine laka hna meci la ketre atr hne së hna hnim. Hapeu, hnei epuni kö hna isa thele ka hape, tro hmaca kö epuni a iöhnyi me angatr? [Nuepi troa sa.] Thaa aja i Akötresieti fe kö tro la meci a thupa tëne la mele ne la atr. Hetre nyine anyipicin, ene lo hnei Iesu hna qaja ka hape ijije tro la itre hne së hna hnime ka meci hë, a mele hmaca qa hna mec. [E jë la Ioane 11:11, 25, 44.] Ngacama itre ewekë la hna öhne së ngöne lo itre macatre ekö a traqa ha enehila kowe la itre hadredre macatre, ngo nyine tro hi lai a amamane la manathithi hnei Akötresieti hna hnëkëne thatraqai së. [Fe jë la itus Connaissance ngöne la iatr 85 nge e jë la hna cinyihane fene la iatr. Thupene lai, amamane jë la iatr 86 nge qejepengöne jë ej.] Maine epuni a ajane troa atrepengöne hnyawa la itre ithuemacanyi nyine acatrene la mejiune i epuni fe kowe la melehmaca, haawe tro la itusi celë hnenge hna ajane troa amë pe a ketre ixatua ka tru koi epun.”
3 Thupene la hna ce ithahantane lo mejiune la melehmaca, ke qaja ju ka hape:
◼ “Ma mekune hi nyipëti lo hnenge hna qaja ka hape, thaa aja i Akötresieti kö ngöne lo qaan, tro la atr a mec. Maine nyipici lai, hnauëne kö laka easë a qatre trootro me mec? Maine tro së a wange la melene la sewen, hnei itre xane hna sasaithe la 100 lao macatre, nge hetrenyi fe la itre sinöe ka mele a itre thauzane hë lao macatre. Ngo, pine nemene matre itre atr pe kö a mele ngöne hi la 70 maine 80 lao macatre? [Nue pi troa sa.] Easë a meci pine laka, hnene la lue pane atr hna thaa drei Akötresie.” E jë la Roma 5:12. Fe jë kowe la götrane 53 hnine la itus Connaissance, nge e jë lai hna nyi taane lai mekene e cili. Ce wange ju la köni pane paragarafe, me qaja atrune la itre aqane sa la itre hnyinge hna hnëkëne kow. Ce wange ju la ketre ijin, tro hmaca epuni a bëeke troa sisedrëne matre apexejene lo mekene hnei epuni hna nyiqaane hë. Loi e troa xatuane lai atr troa e asë pe, qëmekene la tro hmaca së a traqa.
4 Maine epuni a ithahnata kowe la ketre atr ka hmi, ke, qaja ju ka hape:
◼ “Traqa ha kowe la itre hadredre lao hmi enehila. Itre eje a hamëne la nöjei pengöne ini ka isazikeu. Itre xaa atr a qaja ka hape, ka loi asë hi la nöjei hmi, nge thaa nyipi ewekë kö koi angatre e isazikeu la itre ini. Tune ka fe la mekune i epun? [Nue pi troa sa.] Hnei Iesu hna inine la nyipi hmi, me amamane laka, thaa kapa kö Akötresie la itre xaa hmi. [E jë la Mataio 7:21-23.] Maine easë a ajane troa amadrinë Akötresie, ke, nyipi ewekë tro së a hmi ngöne la hmi ka kuca la aja i Nyidrë.” Fe jë la itus Connaissance mekene 5, e jë la taan, nge qejepengöne hnyawa jë la itre hna cinyihan. Qaja ju ka hape ame la mekune celë, ke, celë hi ka troa xatuane la ketre atr lai, troa atre la aqane troa amadrinë Akötresie. E ajane hi lai atr troa e ej, hamëne ju lai itus koi 150 F.
5 Ame la itre atr ka luelue pine laka nyimutre catre la itre hmi, ke, tro angatre a madrine e troa sa la hnyinge celë ngöne la epuni a bëeke hmaca:
◼ “Nyimutre catre la nöjei pengöne hmi enehila, ngo tuneka la aqane tro së a atrehmekune la nyipi hmi? Nemene la aqane tro epuni a waihatrene la nyipi hmi? [Nue pi troa sa.] Hnei Iesu hna qaja koi së la aqane troa waihatrene la angetre nyipi drei i nyidrë.” Ejë la Ioane 13:35. Ce wange ju la itre paragarafe 18 me 19 ngöne la mekene 5 ne la itus Connaissance. Atreine hi tro la atr a wangatrehmekune la nyipi hmi, e hna amamane koi angeice la itre xötre qa hnine la Tusi Hmitrötre ka troa tuluthe la enyipicine maine ethoine la nöjei hmi asë. Qejepengöne jë la aqane hlemu ne la itre Temoë i Iehova e cailo fene, pine laka, hetrenyi la nyipi ihnimi thei angatr, nge lolo fe la aqane melëne angatre la itre trepene meköti ka tru i Iehova. Qaja ju la aqane troa inine la Tusi Hmitrötr, jëne la itus Connaissance, nge tro hë angeice a waihatrene la hmi hnei Akötresie hna kapa.
6 Maine epuni a ithahnata memine la ketre thupëtresiji maine föe pena trene kuku, ke, tupathe ju la aqane tro fë maca ka loi celë:
◼ “Ngöne la nöjei drai, easë a atre jëne la itre nuvel, la aqane thaa idrei me ngazo la thiina ne la itre thöth, ngöne laka, nyudrene a elë sasaithe la itre trepene meköti nyine loi thatraqane la mel. Ame itre xaa thupëtresij, ke, angatre a upezöne la itre uma ne ini, ngöne laka, thaa hnei angatre kö hna hamëne la ini ka ijij, matre tro la itre nekönatre a atreine waipengöne la loi qa ngöne la ngazo. Hapeue la mekune i epun, drei la atrekë hnëqane la troa hamëne la ini cili? [Nue pi troa sa.] Pane drenge ju la hna qaja hnene la Tusi Hmitrötr, ngöne la götrane cili. [E jë la Efeso 6:4.] Kolo lai a qaja koi së ka hape, itre keme me thine la atrekë hnëqane la troa inine trongën, la itre trepene meköti ka draië kowe la itre nekönatr.” Fe jë la itus Connaissance kowe la götrane 145, e jë la paragarafe 16, nge qejepengöne jë la itre iatr ngöne la götrane 147. Qaja ju ka hape, hna kuca la itusi matre tro la nöjei atrene la fami a inine ej. Xome jë la paragarafe 17 me 18 ne la götrane 146, nge amamane jë la aqane troa kuca la la etid kowe la itre fami.
7 Maine hnei epuni hna nyiqaane la etid memine la ketre thupëtresiji maine föe trene kuku ngöne lo epuni a xötrei iöhny, ke, ngöne la epuni a bëeke hmaca, sisedrëne ju tune la:
◼ “Ngöne la hnedrai së enehila, kola amë hnene la fen, qëmekene la itre thöthi la nöjei itupath. Celë hi ka ajolë angatre lai troa hetrenyi la xoue Akötresie ngöne la angatre a tru trootro. Ma mekune hi epuni lo porotrike i nyiso la traqa ni hnapan, hne so hna pane ithahnatane atrune la lue trepene meköt. Tune la itre keme me thine ka thiina ka ijiji Akötresie, ke, nyipi ewekë koi së troa amamane la tulu ka loi kowe la itre nekö së, nge loi e tro pala hi së a thele la nöjei aqane tro së a amamane la ihnimi së koi angatr. Hetre ketre ewekë hna qaja hnene la Tusi Hmitrötre nyine tro la itre keme me thine a hamëne kowe la itre nekönatr.” E jë la Ite Edomë 1:8. Fe jë kowe la götrane 148 ngöne la itus Connaissance, nge sisedrëne jë la etid, jëne la itre paragarafe 19-23. Qaja ju ka hape, tro hmaca epuni a bëeke troa etid memine la fami asë, me nyiqaane ngöne la mekene 1.