Kola Kökötr La Porogaram Ne Xupi Uma Ne Baselaia
1 Ame la taan la Kovasio ne Distrik 1983, tre, “Caas Jën La Baselaia,” hna ithuemacanyi ngöne la ijine cili laka, troa kuca la caa kees matre troa sajuën la xupi uma me nyihnyawan la itre xaa Uma Ne Baselaia e Etazini me Kanada. Thaa nyipi trotrohnine kö së la etrun la itre manathith hna troa kapa, qa ngöne lai itre hnepe hna kuca ngöne la xötrei. Ase hë së nyiqaane melëne hnyawa la hna qaja ngöne Salamo 92:4, kola hape: “Ke hnei cilieti Iehova hna amadi ni hnene la huliwa i cilie ; tro ni a madine la ite huliwa ne la lue ime i cilie.”
2 Easë a madrine atraqatr enehila la huliwa hna kuca ha. Ame enehila, kola kökötre nyimenyim la porogaram ne xupi Uma Ne Baselaia. Atreine hi tro së asë a hane cilaxome la huliwa cili. Celë hi hne së hna kuca, ene laka, easë a hamë manie, maine tru maine co pena, ngo aqane tro hi së lai a ixatua ngöne la kola troa xupe la itre göhnë ka nyimutre ne la hmi, e cailo fene hnengödrai asë. Nyimutre fe la itre trejin ka pane hamën qa kuhu itre hni angatr la itre jiane huliwa i angatr, me traem, me atrein, me inamacane i angatr, thatraqane lai huliwa ne xupi uma. Ame la kepin matre angatr a traqa kowe la itre hnei angatr hna ajan, tre, hnene laka, Iehova la ka eatrongë angatr ngöne la itre mekun hnei angatr hna axeciën, Nyidrëti la ka sajuën la mekune i angatr, me amanathithin hnyawa la huliwa hne së hna ce catre kuca.—Salamo 127:1.
3 Nyimutre la itre Bethela ka xötrethenge la itre hna pane amekötin, thatraqane la itre ekalesia ne Etazini. Ame ngöne la itre nöje ka nyimutre, hetrenyi la trengene manie e hnine la itre Uma Ne Baselaia, hna hnëkën göi itre ahnahna hna hamën thatraqane la Keesi Ne La Uma Ne Baselaia. Ame ngöne la itre xaa nöj, ame la itre ahnahna hna hamën, tre, nyine troa nyihnan lo manie hna sipon koi sasaiatri matre troa xupe la Uma Ne Baselaia, haawe, kolo hi lai a aijijë Sasaiatri troa nyi manien la itre xaa xupi uma ka hnyipixe. Ame Etazini, hna ithuemacanyi hnine la Huliwa Ne Baselaia ne Maac 1997 qene papale, la ketre ewekë hna saze ngöne lo lai porogarame cili. Hna qaja ka hape: “Qaane lo kola kuca la Kees Göi Huliwa Ne Baselaia lo 1983, atraqatr la aqane hamë ahnahna hnene la itre trejin, celë hi matre thaa jole kö e troa sipo manie matre troa nyiqaane xupe la itre Uma Ne Baselaia. Nyimutre la itre ekalesia ngöne la nöje cili, ka kepe thangane hë lo lai hna amekötine cili, 2 700 la etrun. Nyimutre la itre ekalesia ka thatreine kö troa xupi Uma Ne Baselaia ka hnyipixe, maine troa nyihnyawan itre eje pena, pine laka pëkö mani. Nyipi ewekë catr enehila troa xome lo lai itre ahnahna hnine lo kees thatraqai Uma Ne Baselaia, troa hane hamën kowe lai itre ekalesia ka öhnyi jol göi manie. Atraqatr la ole i Sasaiatri memine lo itre ekalesia ka kapa, la itre ahnahna hnei nyipunieti hna hamën.”
4 Hetre kepine lai ithuemacanyi cili, ngöne laka, hna sipo së troa hane ixatua ngöne lai porogaram ne xupi Uma Ne Baselaia. Hna hnëkën mina fe lo lai Kees Ne Uma Ne Baselaia thatraqane la itre xaa hna ajan hnene la itre trejin me easë ngöne la itre xaa nöj, nge kolo pala hi a sipo manie thatraqane la xupi Uma Ne Baselaia ngöne la nöj. Hna qaja ngöne la Huliwa Ne Baselaia ne Semitrepa 1997, ka hape: “Hetrenyi la ajane troa xupe la itre Uma Ne Baselaia ngöne la fene hnengödrai. Nyimutre la itre ekalesia ka hnyipixe hna xötrei eköthe ngöne la macatre ne huliwa ka ase hë, kola e la 3 288. Nyimutre la itre ekalesia celë e Afirik, me Azia, ngöne la nyipine me götrane ailojë e Amerika, me götrane ahië ne Erop.”
5 Nemene hë la hna kuca qaane lo lai kola xatuan la itre nöje cili? Hna qaja hnene la Annuaire 2001, ka hape: “Ame ngöne la 30 lao nöj, cile hë la 453 lao Uma Ne Baselaia, nge 727 lao hna thaa afenesine petre kö. Hna nyipi ewekën la tulu ne Uma Ne Baselaia ka loi, nge ka ihmeku memine la itre jiane huliwa, me aqane huliwa ngöne la isa nöj hna xupi uma ngön. Ame e Kenia, tre hna sa etë; ame e Togo, tre, hna majemin troa xupi sine etë; ame e Kamerun, tre, hna majemin troa xupe sine simane la itre sine etë. Celë hi matre, atreine hi la itre trejin ka mele ngöne la nöj, troa canga hetrenyi la atrein matre cilën la itre hnëqa ngöne la kola troa xome la porogaram ne xupi uma ngöne la nöje i angatr.”
6 Kola mama hnyawa la aqane amanathithine Iehova la porogarame cili, ngöne la nöje ka tru, ene e Afirik. Ame la nyipunie a goeën la itre iatr ne la itre Uma Ne Baselaia hna xupe hë, pane mekune ju la thangane lai ngöne la huliwa hna kuca hnene la Itretre Anyipici Iehova! Kola mama hnyawa lai ngöne la köni götran—ene la caasi me ihnimi ne la itre trejin e cailo fen, memine la thangane lai kowe la itre atren lai nöj, nge ngöne fe laka, kola elë la etrun la itre atr ka traqa troa hane sin la itre icasikeu ne la ekalesia. Maine kolo hi a amaman ngöne la sine trongen la Huliwa Ne Baselaia celë la itre Uma Ne Baselaia hna xupe hë e Afirik, ngo tro pë hë a hane amamane ngöne la itre Huliwa Ne Baselaia ka troa xulu, la aqane kökötre nyimenyime fe la porogaram ne xupi Uma Ne Baselaia ngöne mina fe la itre götran ne la fen.
[Iatr ne la götran 3]
REPUBLIQUE CENTRAFRICAINE
Bimbo, Bangui
Begoua, Bangui
[Iatr ne la götran 4]
Ukonga, Tanzanie
[Iatr ne la götran 4]
Accra, Ghana
[Iatr ne la götran 4]
Salala, Liberia
[Iatr ne la götran 4]
Allada, Bénin—pane Uma Ne Baselaia,
[Iatr ne la götran 4]
Allada, Bénin—Uma Ne Baselaia Ka Hnyipixe
[Iatr ne la götran 4]
Karoi, Zimbabwe
[Iatr ne la götran 5]
Kpémé, Togo
[Iatr ne la götran 5]
Sokodé, Togo
[Iatr ne la götran 5]
Fidjrosse, Bénin
[Iatr ne la götran 6]
Lyenga, Zambie—pane Uma Ne Baselaia
[Iatr ne la götran 6]
Lyenga, Zambie—Uma Ne Baselaia Ka Hnyipixe
[Iatr ne la götran 6]
Kinshasa, Congo
[Iatr ne la götran 6]
Musambira, Rwanda